“Iyange i ishima i doon ker ga cii yô, Yehova ka a na i saan mo iyol sha atsam a sha Ityôgh ki Televishen ki Mbashiada mba Yehova^® la.”—Mkaanem ma Lorraine, ngu ken tar u Amerika.

Mbakristu mba we “atsam a civir Aôndo” shighe u ve lu civir un yô. (Kol. 3:16) Aluer u hen atsam ne u fa u wan a ken ityou yô, aa wase u shighe u u lu a takeda u atsam gayô anar, er hanseeti shin tableeti nahan ga je kpaa. Kar u henen atsam sha u eren akaa a a dondo ne.

• Ver ishima ôr asember a icam sha er u kav loho u u lu ker la yô. Ka wea kav kwagh u i ôr yô, i hemba lun we ican ga u umbur kwagh shon. Asember a atsam a ken takeda u atsam wase la, man a atsam ase agen, kua a atsam a mbayev la cii, nga sha jw.org. Za henpe i nger ér Library la, maa nenge ape i nger ér Music la.

• Nger asember a icam la sha uwe shin takeda. Kwagh la una hemba wasen we u umbur asember shon.—Dut. 17:18.

• Kar iyol u wan icam shon duen sha. Ôr asember a icam la gayô wa i kwa kimbir kimbir.

• Nenge aluer u umbur hanma ishember yô. Cir takeda wou, nahan kar u umbur asember la, nenge aluer u hungur ma ishember shin u umbur a cii yô.