NGEREN U TIMEN SHA MI 47
Se Er Nan ve Anmgbianev Asev Vea Za Hemen u Doon Se Ishima Tsung?
“Se za nen hemen u doon a hanmô wase, sha ci u ka hen Aôndo dooshima a dugh ye.”—1 YOH 4:7.
ICAM 109 Ior Ve Doo U Ishima Tsung
KWAGH U I TIM SHA MI KEN NGEREN NE YÔ a
1-2. (a) Er nan ve apostoli Paulu yange kaa ér dooshima ka ieren i “hemban cii”? (b) Ka mbampin mba nyi se lu timen sha mini?
APOSTOLI Paulu yange lu ôron kwagh u jighjigh u nan, man ishimaverenkeghen, kua dooshima, maa za kure ér, “kwagh u hemban ken [aeren ne] cii yô, ka dooshima.” (1 Kor. 13:13) Paulu yange ôr nahan sha ci u nyi? Ityôkyaa yô, ken hemen a va kera gba u se na jighjigh a uityendezwa mba Aôndo a er sha kwagh u tar u he la ga. Sha ci u hen shighe la, akaa a se lu veren ishima keghen hegen la cii aa kure sha mi. Kpa Yehova kua ior vea za hemen u doon se ishima hanma shighe cii. Jighilii yô, vea za hemen u doon se ishima gbem sha won.
2 Er i gbe u se tesen dooshima hanma shighe yô, se lu timen sha mbampin utar. Hiihii yô, gba u anmgbianev asev vea doo se ishima sha ci u nyi? Sha uhar yô, se tese anmgbianev asev dooshima nena? Sha utar yô, se er nan ve anmgbianev asev vea za hemen u doon se ishima tsung?
GBA U SE DOO AYOL A ASE SHA CI U NYI?
3. Ter atôakyaa a i gbe u se doo ayol a ase yô.
3 Er nan ve i gbe hange hange u se doo ayol a ase? Ityôkyaa i môm yô, anmgbianev asev ka vea doo se ishima yô, kwagh la a tese ér se mba Mbakristu mba mimi. Yesu yange kaa a mbaapostoli nav ér: “Ka sha kwagh ne man ior cii vea fa er ne lu mbahenen av ye, aluer ne doo ayol a en yô.” (Yoh. 13:35) Heela tseegh ga, ka sea tesen anmgbianev asev dooshima yô, kwagh la a wase se u lun ken mzough. Paulu yange kaa ér dooshima ka “a zua ior ve lu kangenaa.” (Kol. 3:14) Nahan kpa, ityôkyaa i vesen igen ngi i se tesen anmgbianev asev dooshima yô. Apostoli Yohane yange nger anmgbianev nav mba nomso man mba kasev washika kaa ér: “Or u Aôndo a doo nan ishima yô, gba keng u anmgbian u nan kpa una doo nan ishima.” (1 Yoh. 4:21) Ka sea tesen anmgbianev asev dooshima yô, kwagh la a tese ér Aôndo doo se ishima.
4-5. Aluer hanmô wase nan doo se ishima yô, tese ér Aôndo doo se ishima sha ci u nyi?
4 Aluer anmgbianev asev doo se ishima yô, tese ér ka Aôndo je a doo se ishima ye, sha ci u nyi? Ikyav i tesen yô, time sha gbenda u ishima i we i zough vea alegh a iyolough agen la. Ortwer ka nana kighir se uwegh sha gbela sha u nana nenge er ishima yase i lu eren tom la yô, kwagh la a wase nan u fan aluer ishima yase ngi eren tom tsembelee shin ngi eren tsembelee ga kpaa. Ka nyi se fatyô u henen ken ikyav nee?
5 Er ortwer ka nana kighir se uwegh sha gbela ve nan fa er ishima yase i lu eren tom la nahan, se kpa aluer se tôv sha gbenda u se tesen anmgbianev asev dooshima la man se nenge ser ve doo se ishima tsung yô, se fa je ser kape Aôndo kpa a doo se ishima tsung je la. Aluer se nenge ser anmgbianev asev kera doo se ishima tsung ga shi se kera mba tesen ve dooshima kpishi er yange se tesen ve la ga yô, tese ér Aôndo kpa kera doo se ishima tsung ga. Kpa aluer hanma shighe se mba tesen ser anmgbianev asev dooshima yô, kwagh la una wase se u fan je ser Aôndo doo se ishima tsung.
6. Aluer anmgbianev asev mba nomso man mba kasev kera doo se ishima tsung ga yô, kwagh la ka zayol u vesen sha ci u nyi? (1 Yohane 4:7-9, 11)
6 Aluer anmgbianev asev kera doo se ishima tsung er yange ve doo se ishima la ga yô, kwagh la ka zayol u vesen. Sha ci u nyi? Sha ci u kwagh ne una fatyô u paven se a Yehova. Apostoli Yohane yange ôr kwagh ne wang, a kaa ér: “Or u anmgbian u nan, u nan nengen a nan la a doo nan ishima ga yô, Aôndo u nan nenge a na ga la una fatyô u doon nan ishima ga.” (1 Yoh. 4:20) Ka nyi se hen ken kwagh ne? Saa se “tesen hanmô wase dooshima” ve Yehova una lumun se ye.—Ôr 1 Yohane 4:7-9, 11.
SE TESE HANMÔ WASE DOOSHIMA NENA?
7-8. Ka sha igbenda i nyi nahan se fatyô u tesen ser se doo a ayol ase?
7 Mkaanem ma Aôndo ôr kwa kimbir kimbir ér, “doo nen ayol a en.” (Yoh. 15:12, 17; Rom. 13:8; 1 Tes. 4:9; 1 Pet. 1:22; 1 Yoh. 4:11) Nahan kpa, dooshima gema ka mlu u ken ishima. Sha nahan yô, sea lu a dooshima kpa, saa se tese ve a nenge a mi ye. Nahan se tese ser anmgbianev asev mba nomso man mba kasev doo se ishima nena? Se tese sha kwaghôron man ieren yase.
8 Igbenda ngi kpishi i se fatyô u tesen ser anmgbianev asev mba nomso man mba kasev doo se ishima yô. Ka igbenda igen je ne: “Ôron nen kwagh sha mimi, hanma or a orgen.” (Sek. 8:16) “Lu nen ken bem a hanmô wen.” (Mar. 9:50) Hemen “nan nen mbagenev icivir.” (Rom. 12:10) “Ngohol nen mbagenev.” (Rom. 15:7) “Deen nen mbagenev kwaghbo.” (Kol. 3:13) “Za nen hemen u wasen ayol a en ikyav.” (Gal. 6:2) “Surun nen hanmô wen ishima.” (1 Tes. 4:18) “Wasen nen hanmô wen.” (1 Tes. 5:11) “Eren nen msen sha ci u hanmô wen.”—Yak. 5:16.
Shighe u anmgbian nan lu yan ican a zayol yô, se wase nan nena? (Nenge ikyumhiange i sha 7-9)
9. U surun anmgbianev asev asema la ka gbenda u vesen u tesen ve ser ve doo se ishima sha ci u nyi? (Shi nenge foto kpaa.)
9 De se time sha gbenda môm ken igbenda i i ter sha ikyumhiange i sha 8 la, u se tese ser anmgbianev asev doo se ishima yô. Se time sha kwaghwan u Paulu u a kaa ér, “surun nen hanmô wen ishima” la. Er nan ve u surun anmgbianev asev ishima la i lu gbenda u vesen u tesen ve ser ve doo se ishima? Takeda ugen u pasen akaa a ken Bibilo kaa ér, ishember i ‘surun ishima’ i Paulu a ter heen ne, ngi ôron kwagh u “lun vea or ikyooso ikyooso sha u taver nan ishima shighe u nan lu yan ican a zayol u vesen yô.” Nahan aluer anmgbian nan tagher a zayol man se sur nan ishima yô, kwagh la una wase nan nana za hemen u civir Yehova sha mimi. Shi hanma kwa u se sur anmgbian ishima yô, se tese ser nan doo se ishima.—2 Kor. 7: 6, 7, 13.
10. Aluer mhôônom ma kôron se a anmgbianev asev yô, kwagh la una wase se u surun ve ishima sha ci u nyi?
10 Ka mhôônom ka ma kôr se a or ve se sur nan ishima ye. Se ôr nahan sha ci u nyi? Sha ci u mhôônom ka ma a kôr or a orgen u nan lu yan ican yô, kwagh la a mgbegha nan u surun or la ishima, shi eren kwagh u wasen nan. Nahan mhôônom ka ma a kôr se a anmgbianev asev yô, kwagh la a wase se u surun ve ishima. Nenge ase er Paulu yange pase er mhôônom ka ma kôr Yehova a ior ve, kwagh la a mgbegha un u surun ve ishima yô. Paulu kaa ér Yehova ngu “Ter u lun a mhôônom ma zungwen tsung man Aôndo u lun a ishimasurun cii.” (2 Kor. 1:3) Ishember i “mhôônom ma zungwen” i Paulu a ter heen la, ngi ôron kwagh u mhôônom kôron se a anmgbianev asev. Sha nahan yô, i yila Aôndo ér, Ter, shin Imbor i mhôônom ma zungwen, sha ci u ka un a hembe lun a ieren i zungwen mhôônom la ye. Mhôônom mara ka ma mgbegha un u surun se ishima “ken ameen a se tagher a mi cii.” (2 Kor. 1:4) Yehova ka a na mba ve tagher a mbamzeyol la a mmem, shi a sur ve ishima er imura ka ia kôr ior vea ma mngerem ma dedoo ma ma lu duen ken vande ve i kundu ve iyol nahan. Se dondo ikyav i Yehova i zungwen mbagenev mhôônom shi surun ve ishima la nena? Gbenda môm u se er kwagh ne yô, ka u nôngon lun a aeren a aa wase se u zungwen mbagenev mhôônom shi surun ve ishima yô. Ka aeren a nyi nahana?
11. Mbakolose 3:12 man 1 Peteru 3:8 kaa ér ka aeren a nyi i gbe keng u se lu a mi ve se za hemen u tesen dooshima shi surun anmgbianev asev ishima?
11 Ka nyi ia wase se ve se za hemen u tesen dooshima shi ‘surun hanmô wase ishima’ ayange ayange? Gba u se hen u zungwen a mbagenev imôngo, man u doon ayol a ase er ka anmgbianev mba hen tsombor nahan, man u tesen erdoo. (Ôr Mbakolose 3:12; 1 Peteru 3:8.) Aeren ne aa wase se nena? Aluer mhôônom kôr se a anmgbianev asev shi se wa ve ikyo sha mimi yô, a sar se tsung u wasen ve shighe u se nenge ve lu yan ican yô. Ka vough er Yesu yange kaa nahan, ér: “Ka kwagh u or nan hembe henen ken ishima la zwa u nan ka u ôron ye. Or u dedoo ka nan ôron akaa a dedoo a nan koso ken ishima i nan la.” (Mat. 12:34, 35) U surun anmgbianev asev mba nomso man mba kasev mba kwagh a tser ve la ishima sha mimi la, ka gbenda u vesen u tesen ve ser ve doo se ishima.
SE ER NAN VE ANMGBIANEV ASEV VEA ZA HEMEN U DOON SE ISHIMA TSUNG?
12. (a) Gba u se wa ikyo sha er anmgbianev asev vea za hemen u doon se ishima yô, sha ci u nyi? (b) Ka mpin u nyi se lu timen sha mi hegene?
12 Se cii se soo ser se ‘za hemen u doon a hanmô wase.’ (1 Yoh. 4:7) Nahan kpa, kwagh u vesen u i gbe u se umbur yô, Yesu kaa ér: “Dooshima u ior kpishi una ndôhôr.” (Mat. 24:12) Yesu lu kaan ér mbahenen nav kpishi vea de u tesen mbagenev dooshima ga. Nahan kpa, gba u se wa ikyo sha er ieren i ior i tar ne i i ban a dooshima yum la ia tsar se ga yô. Sha ci u aluer ieren la tsar se yô, se kpa se de u eren kwagh a anmgbianev asev sha gbenda u tesen ser ve doo se ishima. Er se fe nahan yô, de se time nen sha mpin u vesen ne. Ka nyi ia wase se u fan ser anmgbianev asev doo se ishima tsung?
13. Ka nyi ia wase se u fan ser anmgbianev asev doo se ishima tsung?
13 Kwagh môm u una wase se u fan ser anmgbianev asev doo se ishima tsung yô, ka u tôvon gbenda u ka se er kwagh shighe se nyer ken mbamlu mbagenev yô. (2 Kor. 8:8) Apostoli Peteru ôr kwagh ter mlu môm u se fatyô u tôvon nengen er ka sea nyôr ker ve se er kwagh yô. A kaa ér: “Kwagh u hemban cii yô, doo nen ayol a en tsung je, sha ci u dooshima cirin asorabo kpishi.” (1 Pet. 4:8) Nahan kwagh u ka se er shighe u anmgbianev asev ve er kwagh bagenaa, shin ve er kwagh u vihin se la una wase se u fan aluer ve doo se ishima tsung yô.
14. Er i ôr ken 1 Peteru 4:8 nahan, ka dooshima u nyi i gbe u se lu a mini? Tese ikyav.
14 De se time sha mkaanem ma Peteru man vighe vighe. Vegher u hiihii u ivur i sha 8 la pase er i gbe u anmgbian asev vea doo se ishima yô. I kaa ér se ‘doo a ayol ase tsung je.’ Ishember i “tsung” i Peteru a ter ken ivur ne la, inja na jighilii yô ér, “naleghaa.” Vegher u sha uhar u ivur la pase kwagh u aluer anmgbianev asev doo se ishima tsung ve se er yô. Anmgbianev asev ka vea doo se ishima tsung yô, dooshima la a wase se u cirin asorabo a ve. Tôô ase wer, inki kôr sha tebur ajiir kpishi, nahan a fatyô u tôôn bamber ikyondo samber un sha tebur la sha er una cir ijiir i inki a haa la i môm shin ahar tseegh ga, kpa una cir ajiir kpishi yô. Kape aluer anmgbianev asev mba nomso man mba kasev doo se ishima tsung ve, se fatyô u cirin shin den ve isholibo i môm shin asorabo ahar tseegh tsô ga, kpa se de ve “asorabo kpishi” je la.
15. Aluer anmgbianev asev mba nomso man mba kasev doo se ishima tsung yô, ka nyi se fatyô u erene? (Mbakolose 3:13)
15 Gba u anmgbianev asev mba nomso man mba kasev vea doo se ishima tsung sha gbenda u se fatyô u den ve kwaghbo hanma shighe cii yô, kua shighe u i taver kpishi u eren nahan je kpaa. (Ôr Mbakolose 3:13.) Aluer se mba den anmgbianev asev kwaghbo yô, se mba tesen ser se doo ayol a ase tsung, shi se soo u eren ishima i Yehova. Shi ka nyi igen kpa ia wase se u den anmgbianev asev kwaghbo, ve ishima ia kera vihin se sha akaa a ve eren la ga?
Er ka se koso ufoto mba dedoo, se dugh mba ve doo ga la cii kera nahan, kape ka se koso akaa a dedoo a anmgbianev asev mba nomso man mba kasev ken ishima, se kera yem henen sha mbamyen vev ga je la (Nenge ikyumhiange i sha 16-17)
16-17. Ka nyi igen kpa ia wase se u den anmgbianev asev asorabo a kiriki? Tese ikyav. (Shi nenge foto kpaa.)
16 Hemba veren ishima sha aeren a dedoo a anmgbianev ou mba nomso man mba kasev ve lu a mi la, i de lu sha mbamyen vev ga. Hen sha kwagh ne. Tôô wer u ngu hen iniongo vea anmgbianev mba nomso man mba kasev, ne mba yan kwagh lamen, saan ne iyol kpishi. Iniongo la va been yô, ne kohol ne tôô foto, shi ne kimbir tôôn foto la kwa har sha er, aluer u hiihii la doo ga kpa, mba ne mase tôôn la vea doo yô. Maa ne hingir a ufoto utar. Kpa ken foto ugen ken mba utar mbara, u nenge shigh ki anmgbian ugen saan ga. Nahan u er nena a foto laa? U dugh foto la kera, sha ci u u ngu a foto mbagen her uhar, mba ne mba ne lu ker la cii, kua anmgbian la kpaa, ne se ker yô.
17 Se fatyô u tôôn ufoto mba se koso her la karen sha akaa a ka se koso ken ishima la. Ka se koso akaa a doon a se zough a mi shighe u se lu vea anmgbianev asev mba nomso man mba kasev yô. Kpa alaghga shighe ugen anmgbian u nomso shin u kwase nana ôr kwagh gayô nana er kwagh shighe u se lu imôngo la a doo a kuma ga. Nahan se koso kwagh la ken ishimaa? Ei. A gba u se nôngo se dugh kwagh la ken ishima yase kera, vough er a lu foto kpa se dugh u a doo ga la ken mba doon mbara kera nahan. (Anz. 19:11; Ef. 4:32) Se hungur a isholibo i kiriki i anmgbian wase u nomso shin u kwase nan er la, sha ci u se umbur akaa a doon kpishi a nan er sha ashighe agen a se vande lun a nan imôngo yô. Ka ambaakaa a i doo u se koso ken ishima shi aa lu se kwagh u vesen je la.
ER I HII VE I GBE U SE HEMBA DOON AYOL A ASE NYIAN YÔ
18. Ka akaa a vesen a nyi se hen sha kwagh u dooshima ken ngeren nee?
18 Gba u se za hemen u doon ayol a ase tsung sha ci u nyi? Er se hila nenge nahan, aluer se mba tesen ser anmgbianev asev mba nomso man mba kasev doo se ishima yô, se mba tesen ser Yehova doo se ishima. Ka se tese ser anmgbianev asev doo se ishima nena? Gbenda môm u ka se er kwagh ne yô, ka sha u surun ve ishima. Aluer mhôônom ma kôron se a anmgbianev asev yô, kwagh la una wase se se za hemen u ‘surun hanmô wase ishima.’ Se er nan ve se za hemen u doon ayol a ase tsung? Se er kwagh ne sha u den anmgbian asev kwaghbo hanma shighe u ve er kwagh u kuman ga yô, kua ashighe a i taver u eren nahan je kpaa?
19. Gba u se tese anmgbianev asev dooshima nyian a hemba ave a tse sha ci u nyi?
19 Nyian ne, gba hange hange u se hemba tesen ser se doo ayol a ase sha ci u nyi? Peteru pase se ityôkyaa, a kaa ér: “Mkur u akaa cii zurum. Sha nahan yô, . . . doo nen ayol a en tsung je.” (1 Pet. 4:7, 8) Er mkur u tar u ifer ne a hembe zurum hegen cii ne, ka nyi se lu veren ashe a mini? Yesu yange tsenga ôron kwagh sha kwagh u mba dondon un ér: “Akuraior cii aa kôr ne ihyom sha ci u iti yam.” (Mat. 24:9) Kwagh u una wase se u wan ishima a ihyom i tar u ker se la shi civir Yehova sha mimi her yô, saa se za hemen u lun ken mzough. Aluer anmgbianev asev mba nomso man mba kasev doo se ishima sha mimi yô, Satan una nôngo nan nan kpa una fatyô u van a mpav hen atô wase ga. Sha ci u dooshima u ka a “zua ior ve lu kangenaa” la, zua se se hingir gungur môm.—Kol. 3:14; Fil. 2:1, 2.
ICAM 130 Deen Ior Kwaghbo
a Nyian ne, gba u se tese ser anmgbianev asev doo se ishima tsung a hemba ave a tse. Gba u se er nahan sha ci u nyi, man se tese hanmô wase dooshima nena?
