1-2. Ka “tom u dedoo” u nyi ortamen nan erene?

 WEA er tom u orshiren tiônnongo la ica a gba hegen yô, adooga tsô u ngu nôngon wer u lu a aeren a ka i gba u anmgbian nana lu a mi ve nana kuma u lun ortamen la. U soo wer u er “tom u dedoo” u mbatamen ve eren laa?—1 Tim. 3:1.

² Ka tom u nyi ortamen nan erene? Nan eren tom u pasen kwagh la sha gbashima vea tiônnongo imôngo, shi nan eren tom u sôron anmgbianev mba nomso man mba kasev kua tom u tesen la kpoghuloo. Shi nan ôron ve akaa, shi nan eren akaa a aa wase ve u seer nan Yehova jighjigh yô. Sha nahan yô, Bibilo yila mbatamen mba ve eren tom kpoghuloo ne ér “uiyua.”—Ef. 4:8.

3. Ka nyi anmgbian nana er ve nana kuma u lun ortamene? (1 Timoteu 3:1-7; Titu 1:5-9)

³ U er nan ve u kuma u lun ortamene? Ka mfe u eren akaa tseegh or a lu a mi ve nana kuma u lun ortamen ga. Ken tar yô, mbatôôn ior tom ka ve keren ior mba ve lu a mfe u eren akaa a ve soo ér i er ve la. Kpa tom u ortamen la yô ka nahan ga. Kpa u ngu wer aluer u fa u pasen kwagh shi u fa u tesen tsembelee tsô maa u kuma u lun ortamen ga. Saa u lu a aeren a Bibilo i kaa ér anmgbian nana lu a mi ve nana kuma u lun ortamen la. I ter aeren ne ken 1 Timoteu 3:1-7 man Titu 1:5-9. (Ôr.) Ken ngeren ne, se lu timen sha aeren agen atar ken aeren shon a i gbe u ortamen nana lu a mi yô. Shi se time sha akaa a anmgbian nana eren ve nana lu a iti i dedoo ken tiônnongo kua ken inya kpaa yô. Man er nana er ve nana lu orya u injaa, kua kwagh u una wase nan ve nana kegh iyol u eren tiônnongo tom yô.

LU A ITI I DEDOO

4. U ‘lun a iti i bo ga’ la inja na ér nyi?

⁴ Kwagh môm u u er ve u kuma u lun ortamen yô, gba keng u u  “lu a iti i bo ga.” Inja na yô, a gba u mba ken tiônnongo vea nenge ér u ngu a mimi iyol, sha ci u ieren you i dedoo la. Shi a gba u or môm nana lu a ityôkyaa i kaan ér u er kwaghbo ga. Heela tseegh ga, shi gba keng u u lu or u “ior mba ken inya kpa ve eren shiada u dedoo sha kwagh [wou]” yô. Alaghga ior mbagenev mba ve civir Yehova ga la vea puu atesen a Bibilo a u ne jighjigh a mi la. Kpa mayange de eren kwagh u vea kôr ave sha mi vea hingir u nengen we ér inja you wanger ga ze. (Dan. 6:4, 5) Pine iyol you wer, ‘Anmgbianev mba nomso man mba kasev kua ior mbagenev mba ve civir Yehova ga kpa mba nengen mo ér m ngu or u injaa kpa?’

5. U er nan ve u tese wer u ngu “or u soon ieren i dedoo”?

⁵ Aluer u ngu “or u soon ieren i dedoo” yô, u nenge a aeren a dedoo ken mbagenev, shi u ôr ve er aeren la a doo u kpishi yô. Shi u er akaa a dedoo sha ci u mbagenev, man alaghga a lu akaa a i ver ishima ér we u er keng keng ga yô. (1 Tes. 2:8; Titu 1:8) Er nan ve i gbe hange hange u ortamen nana lu “or u soon ieren i dedoo”? Ka sha ci u aluer nan ngu a ieren ne yô, a saan nan iyol u taver anmgbianev asema, shi eren ityom igen ken tiônnongo. (1 Pet. 5:1-3) Er kwagh ne a lu tom u kiriki ga nahan kpa, aluer nan ngu wasen mbagenev yô, a saan nan iyol a hemba tom u nan er la.—Aer. 20:35.

6. Ka sha igbenda i nyi nahan or a tese ér nan ngu “or u ngohol ior sar sar”? (Mbaheberu 13:2, 16; shi nenge foto kpaa.)

⁶ U tese wer u ngu “or u ngohol ior sar sar” shighe u u er kwagh a mbagenev doo doo, kua mba ve lu azende a ou a kôôsôô la ga je kpaa yô. (1 Pet. 4:9) Dikishenali igen i pasen asember a ken Bibilo ôr kwagh u or u ngohol mbagenev sar sar yô, i kaa ér: “Ka nan er kwagh a ior kundu kundu, aluer nan fa ve ga je kpaa. Shi ka i saan nan iyol u lôhôn mbagenev hen ya u nan.” Pine iyol you wer, ‘Mbagenev fam ér m ngu or u eren a mbahev mba ve ve ken tiônnongo wam la kundu kundu kpa?’ (Ôr Mbaheberu 13:2, 16.) Or u ngohol ior sar sar ka nan er kwagh a hanma orvannya cii kundu kundu. Ikyav i tesen yô, ka nan er a mba ve lu mbaatsanev la doo doo, man mba ve ve u nan akaaôron hen tiônnongo u nan la, kua mba ve eren tom kpoghuloo u taver anmgbianev asema la, er mbatamen mba sôron atôônango nahan.—Gen. 18:2-8; Anz. 3:27; Luka 14:13, 14; Aer. 16:15; Rom. 12:13.

7. Ortamen nana tese ér nan ngu “or u soon inyaregh ga” nena?

⁷ “Nana̱ de lu or u soon inyaregh ga.” Kwagh ne  tese ér doo u inyaregh kua akaa a iyolough a hemba gban we kwagh ga. Wea lu ornyar shin icanor kpa, gba u u hemba veren ishima u civir Yehova a akaa agen cii. (Mat. 6:33) Gba u u na shighe wou kua agee a ou man akaa agen a u lu a mi la u civir Yehova, shi nengen sha tsombor wou kua tiônnongo kpaa. (Mat. 6:24; 1 Yoh. 2:15-17) Pine iyol you wer: ‘M nengen inyaregh nena? Akaa a hange hange a m lu a mi la kumam kpa? Shin m hemba veren ishima u keren inyaregh man u lun a akaa a iyolougho?’—1 Tim. 6:6, 17-19.

8. Ka sha igbenda i nyi nahan u tese wer u “eren kwagh akuma akuma” shi u “kôron iyol tsaha”?

⁸ Aluer u ngu or u “eren kwagh akuma akuma” man or u “kôron iyol tsaha” yô, a tese ér u ngu or u hiden a iyol ijime. Kwagh ne tese ér u lu or u yan kwagh shin man kwagh karen ikyaa inya ga. U huan ikyondo shi u hondon ityough sha icivir. Shi u tsua akaa a nan we msaanyol la sha inja; u dondon aeren a dang a ior i tar ne i eren la ga. (Luka 21:34; Yak. 4:4) Shi gba u u lu or u wan ishima shighe u mbagenev ve er akaa a doon we ga yô. Shi gba u u lu “or u hunden msôrom ga,” shin mbagenev vea fa u ér u ngu or u man msôrom kpishi ga. Pine iyol you wer, ‘Gbenda u m eren kwagh ken uma wam la tese ér m ngu or u eren kwagh akuma akuma shi m kôron iyol tsaha kpa?’

9. U “eren kwagh sha kwaghfan” la inja na ér nyi, man u “eren kwagh sha inja sha inja” la di inja na ér nyi?

⁹ Aluer u ngu or u “eren kwagh sha kwaghfan” yô, u henen sha akaa a Bibilo i ôr sha mbamlu kposo kposo yô. Shi u ver ishima u hen er u dondo kwaghwan u Bibilo ken mlu wou yô. U er nahan yô, u hemba zuan a mkav, shi fan kwagh u u er ve a doo yô. U gbe tsuan kwagh u u er la gagher ga. Kpa ka u nôngo wer u fa akaa a i gbe u u fa la cica cii. (Anz. 18:13) Nahan kwagh ne a wase u u tsuan kwagh u a lu sha ishima i Yehova yô. Aluer u ngu or u “eren kwagh sha inja sha inja” yô, u eren kwagh nzughul nzughul ga, shi u zan hen kwagh sha shighe. U lu or u i fe u ér u ngu a mimi iyol shi u dondon kwaghwan yô. Aluer u ngu a aeren a se lam sha mi sha itinekwagh i kiriki ne yô, kwagh la una wase u u lun a iti i dedoo. Hegen se time sha aeren a Bibilo i kaa ér gba u ortamen nana lu a mi ve nana lu orya u injaa la.

LU ORYA U INJAA

10. Or ka nan “hemen ya u nan sha gbenda u dedoo” nena?

¹⁰ Aluer u ngu a kwase man u soo wer u lu ortamen yô, saa tsombor wou kpa ua lu a iti i dedoo ve u kuma u lun ortamen ye. Sha nahan yô, a gba u u “hemen ya [wou] sha gbenda u dedoo.” Inja na yô, a gba u u lu or u nengen sha tsombor wou sha gbenda u tesen wer ior ou doo u ishima, shi tsuan akaa sha ci ve sha kwaghfan. U er kwagh ne nena? Eren mcivir u hen tsombor. Shi nôngo tsombor wou u de bundu mbamkombo ga. Heela tseegh ga, wase mba hen tsombor wou ve eren tom u pasen kwagh la sha gbashima. Kwagh ne ngu hange hange sha ci u nyi? Sha ci u apostoli Paulu yange pine ér: “Aluer or fa u hemen ya u nan ga nahan, nana nenge sha tiônnongo u Aôndo nena?”—1 Tim. 3:5.

11-12. Aluer anmgbian nan soo u lun ortamen yô, ieren i ônov mba nan ka kwagh u vesen sha ci u nyi? (Shi nenge foto kpaa.)

¹¹ Aluer u ngu a ônov mba ve yen anyom 18 mba u lu nengen sha a ve yô, “[ônov ou] ve̱ lu mba ungwan kwagh shi eren kwagh sha inja.” Gba u u tese ve shi u tsaase ve sha gbenda u tesen wer ve doo u ishima. Ka keng u soo wer i saan ve iyol, shi ve seen shi ve numben er mbayev cii ve eren nahan. Kpa ka cii la ga, shi gba u u tese ve u ungwan imo you, man u nan ior icivir, man u eren kwagh sha inja. Heela tseegh ga, gba keng u u nôngo sha afatyô wou cii u wase ônov ou u yan ijende a Yehova kangenaa, man u dondon akaawan a Bibilo, kua u nôngon eren batisema.

¹² “Ônov mba nan ve lu mbananjighjigh mba i nengen ve ér ve wa dang ga shin ve taver ityough ga yô.” Aluer wan u orshiren tiônnongo, shin wan u ortamen nan er batisema, shin nan ngu nôngon  ér nana er batisema, kpa nan va er isholibo i vesen yô, mbatamen ve nenge aluer ter u nan la kuma u lun orshiren tiônnongo shin ortamen her yô. Aluer ve nenge ér ka ter u nan la a tese nan shin a tsaha nan ga ve nan er isholibo la yô, anmgbian la nana kera kuma u lun orshiren tiônnongo shin ortamen ga.—Nenge Iyoukura i ken zwa Buter i Oktoba 15, 1996, peeji 21, ikyumhiange 6-7.

WASEN TIÔNNONGO

13. U tese wer u ngu “inja legh legh” shi u “sendegh sha kwagh ga” nena?

¹³ Anmgbianev mba nomso mba ve lu a aeren a dedoo a Orkristu la ka ve lu tiônnongo a iwasen kpen kpen. Or u lun “inja legh legh” ka nan nôngon kpoghuloo ér nana lu ken bem vea mbagenev, shi nan wasen mbagenev ér ve kpa ve lu ken bem vea mbagenev. Heela tseegh ga, or u lun inja legh legh ka nan keghen ato a mbagenev, shi nan nôngon ér nana kav er i lu ve ken ishima la. Aluer mbatamen mba hemban ingyegh tsua ér a er kwagh, man kwagh u ve tsough la hendan a kwaghwan u Bibilo ga, kpa gema ka kwagh u sha ishima you ga nahan, u lumun u suen kwagh u ve tsough u eren la kpa? U “Sendegh sha kwagh ga” la inja na yô, ka u norom wer saa mbagenev ve er kwagh er u soo la ga. U fa er i doo u u dondo mnenge u mbagenev kpaa yô. (Gen. 13:8, 9; Anz. 15:22) Shi u “zôhôn zwa ga” shin u “nyoon ishima fefa ga.” U eren kwagh a ior sha ilyahan ga, shi u gbe ayôôso a ve ga, kpa ka u eren kwagh a ve kundu kundu. Er u lu a bemshima yô, ka u nôngon kpoghuloo wer u lu ken bem vea mbagenev kua ashighe a i taver u eren nahan je kpaa. (Yak. 3:17, 18) Ka u lam a ior kundu kundu, kua mbahendan a vese je kpaa, nahan ishima i gba ve shimi.—Mbaj. 8:1-3; Anz. 20:3; 25:15; Mat. 5:23, 24.

14. U lun “or u nan sember hingir ornanjighjigh ga” la inja na ér nyi, man u “eren kwagh a [Yehova] sha mimi” la di inja na ér nyi?

¹⁴ Anmgbian u nan kom u lun ortamen yô, ka i gba u nana lu “or u nan sember hingir ornanjighjigh ga” yô. Er i gbe u saa u er batisema, shi anyom a kar kpishi cii ve u lu ortamen ga nahan kpa, a gba u u tôô shighe u seer lun vea Yehova kôôsôô, shi u hen u dondon akaawan a Bibilo sha er u fa u tsuan akaa a u soo u eren cii sha kwaghfan yô. A gba u u lu or u hiden a iyol ijime, shi u kegh iyol u eren Yehova tom sha hanma  gbenda cii, er Yesu nahan. Shi a gba u u wa ishima u kegh wer Yehova a seer nan we tom ken tiônnongo. (Mat. 20:23; Fil. 2:5-8) U fatyô u tesen wer u “eren kwagh a [Yehova] sha mimi” sha u varen a na, shi kuran atindi a na, man sha u dondon kwaghwan u nongo na.—1 Tim. 4:15.

15. Saa ortamen nana fa u nan kwaghôron tsema tsema keng-nee? Ta iwanger.

¹⁵ Ruamabera kaa wang ér gba u mbakuran vea “fa ityesen.” Nahan kwagh ne tese ér saa u fa u nan kwaghôron tsema tsema? Ei. Ka mbatamen cii ve fe u nan kwaghôron tsema tsema ga. Nahan kpa, gba u mbatamen vea fa u eren tom a Bibilo tsembelee shighe u ve lu pasen kwagh kua shighe u ve ze u sôron anmgbianev u taver ve asema yô. (1 Tim. 3:2; nenge 1 Mbakorinte 12:28, 29 man Mbaefese 4:11.) Shin er i gbe u saa u fa u nan kwaghôron tsema tsema ga nahan kpa, gba u u za hemen u nôngon kpoghuloo sha er u seer fan ityesen yô. Kpa u er kwagh ne nena?

16. U er nan ve u seer fan ityesene? (Shi nenge foto kpaa.)

¹⁶ “Var a mkaanem ma mimi.” Kwagh u una wase u u seer fan ityesen yô, hanma shighe u u lu tesen shin u lu wan ior kwagh cii, kwaghôron wou a lu kwagh u Bibilo i tese yô. Man kwagh u una wase u u eren kwagh ne yô, a gba u u henen Bibilo kua ityakeda yase tsembelee. (Anz. 15:28; 16:23; nenge Titu 1:9.) Shighe u u lu henen kwagh yô, ver ishima zulee nenge er ityakeda yase i pase avur a Bibilo la, sha er u dondo kwagh u Ruamabera a kaa la sha gbenda u vough yô. Shi shighe u u lu tesen yô, nôngo sha afatyô wou cii, Yehova a seer doon mba u lu lamen a ve la ishima, shi kwaghôron wou a mgbegha ve u eren kwagh u ve hen la. Shi aluer u ngu pinen mba ve er tom u ortamen ica i gbe la akaa a a tsume u la yô, kwagh la kpa una wase u u seer fan ityesen. (1 Tim. 5:17) Gba u mbatamen cii vea lu ior mba vea “fatyô u taver mbagenev ishima” yô. Nahan kpa, ashighe agen yô, a gba u mbatamen vea wa mbagenev kwagh shin vea “kôôm” ve je kpaa. Shighe u mbatamen ve lu taver mbagenev asema shin ve lu wan ve kwagh shin kôôm ve je kpaa, gba u vea lam a ve kundu kundu. Aluer u ngu eren kwagh a mbagenev kundu kundu man sha dooshima, shi u ngu tesen ve kwagh u Mkaanem ma Aôndo ma kaa yô, u lu or u fan ityesen, sha ci u u ngu dondon ikyav i Yesu u a lu Ortesen u Hemban Cii la.—Mat. 11:28-30; 2 Tim. 2:24.

 ZA HEMEN U NÔNGON WER U LU ORTAMEN

17. (a) Ka nyi ia wase orshiren tiônnongo ve nana za hemen u nôngon ér nana lu ortamene? (b) Shighe u mbatamen ve lu tôvon sha kwagh u anmgbian sha u vea nenge aluer nan kuma u lun ortamen yô, ka nyi i gbe u vea umburu? (Nenge ngeren u kiriki u a lu a itinekwagh ér “ De Keren Ngegh Ngegh sha Kwagh u Anmgbian u I Soo u Nan Nan Tom la Ga” la.)

¹⁷ Alaghga mbashiren tiônnongo mbagenev vea hen sha aeren a i gbe u mbatamen vea lu a mi la yô, vea nenge ér aeren shon ngee, nahan a tsa sha won kpa vea kuma u lun ortamen ga. Kpa gema umbur wer, Yehova shin nongo na ngu veren ishima ér saa se tese hanma ieren ken aeren ne a myen shio ga. (1 Pet. 2:21) Shi umbur kpaa wer ka jijingi u Yehova u a lu a tahav kpishi la una wase u u lun a aeren ne ye. (Fil. 2:13) Ieren igen ngi i u soo wer u seer lu a mi yôô? Er msen hen Yehova sha kwagh shon. Seer timen sha kwagh u ieren la ken ityakeda yase, shi pine ortamen ugen hen tiônnongo wou er u er ve u seer lun a ieren shon yô.

18. I taver mbashiren tiônnongo cii ishima ér ve er nena?

¹⁸ Yô se cii, kua mba ve vande lun mbatamen la kpaa, se za nen hemen u nôngon lun a aeren a i tim sha mi ken ngeren ne la. (Fil. 3:16) U ngu orshiren tiônnongo? Za hemen u nôngon wer u lu ortamen! Sôn Yehova a tese u shi a maa u sha er u hemba eren un kua tiônnongo tom yô. (Yes. 64:8) Yehova a ver u doo doo er u lu nôngon wer u kuma u lun ortamen yô.