Mbampin mba Mbaôron Takeda Ne Ve Pin La
Mbaiserael yange ve yaan mana man utakanger tseegh shighe u ve lu ken taaikyôngo laa?
Anyom 40 a Mbaiserael lu ken taaikyôngo la cii, lu mana ve hemban yan ye. (Eks. 16:35) Yehova shi na ve utakanger acin a ahar. (Eks. 16:12, 13; Num. 11:31) Nahan kpa, Mbaiserael pande lu a akaa agen kpuaa, a ve yaan yô.
Ikyav i tesen yô, ashighe agen Yehova yange a hemen ior nav a za a ve hen “ijiir i memen,” ape mngerem man kwaghyan a lu yô. (Num. 10:33) Imba jiir la igen lu Elim; “ihwembemnger lu her pue kar ihiar man atine a ivilegh akunduatargber,” man a shi nan kpa lu avile a i yer ér debino la. (Eks. 15:27) Takeda ugen (Plants of the Bible) kaa ér debino “ngu ajiir kpishi sha tar, . . . shi ka debino i hemban yan ken deserti kpaa ye. Shi ior umiliôn imôngo mba eren ya a mi.”
Shi alaghga Mbaiserael za haa afo hen zege uwagh ugen u i yer ainge ér Feiran, a lu gbaa u Wadi Feiran la. Shi takeda ugen (Discovering the World of the Bible) kaa ér, wadi, shin pev u a lu uwagh ne, “lihe kuma ukilomita 130, shi ngu ken iwagh i i hembe lihen shi doonashe, man i ior kpishi ve fe i hen haregh u Senai la yô.” Takeda ne shi kaa ér, “aluer u mough hen ape uwagh ne u kuwan u za haan shin zegemnger la, u kôndo a kôndo shin u zan zan kuma ukilomita 45 nahan yô, u va nyôr hen gbaa u uwagh shon, u i yer ér Feiran la. Uwagh ne lihe nôngo u kuman ukilomita 5. Atine a debino de ishar her, shi ijiir ne dooashe kpishi je yô, ka i yila i ér sule u Eden. Ior ndera zan hen ijiir la anyom udubu imôngo, sha ci u atine a debino a a lu her udubu imôngo la.”
Atine a debino hen ihwembemnger i Feiran
Yange Mbaiserael mba moughon u duen ken Igipiti kera yô, ve tôô mwem ma hôron kua ikyav mbi hôron shimi, shi yange vea tôô samuyia kua mkurem kpaa. Akaa ne tseegh yô, yange ma ve ya di shighe kpuaa tso ma bee kera. Kpa nongoior la va a “iyôngo man ivo kua abua kpaa, ilev ngee je zua ga.” (Eks. 12:34-39) Nahan kpa, er mlu u ken taaikyôngo la lu ican kpishi yô, annyamev mbara kpishi yange vea kpe. Alaghga yange i wua ilev mbira mbigen i ya, mbigen di i na Aôndo nagh a mi, kua mbaaôndo mbaaiev je kpaa. a (Aer. 7:39-43) Nahan kpa, Mbaiserael lu a ilev mbigen her. Se fatyô u nengen a mimi u kwagh ne ken mkaanem ma Yehova ôr a ve shighe u ve hemba un ato la. A kaa ér: “Ônov enev vea hingir mba zenden ken deserti wue wue er mbakuranilev nahan, zan zan anyom akunduahar je.” (Num. 14:33) Sha nahan yô, ka keng ashighe agen ve ma atumba a ilev vev mbira, shi ve wua mbi ve ya kpaa. Kpa ilev mbira ngee kuma u iorov er miliôn 3 nahan vea ya zan zan anyom 40 ga. b
Ilev vev mbira zuan a kwaghyan man mngerem hana? c Sha shighe la, ura nôôn ken deserti hemba er u nôôn ker ainge la, nahan imendenev kpa lu kpishi. Takeda u Insight on the Scriptures, Tihi u sha 1 la kaa ér, “nyian ne, mngerem kera ma hen haregh u Arabia la kpishi, er yange ma lu shighe u Mbaiserael haa afo her, anyom 3,500 ken ijime la nahan ga. Se fa nahan sha ci u, ajiir a yange iwagh i hen haregh la kuwan karen ve apev gba za shimi la, nga her kpishi.” Nahan je kpa, taaikyôngo la lu deserti, uma tseghe tseghe, shi lu ijiir i cieryol kpaa. (Dut. 8:14-16) Yehova yange una ne Mbaiserael mngerem sha ivande ga yô, yange ma ve tim kua ilev vev cii.—Eks. 15:22-25; 17:1-6; Num. 20:2, 11.
Mose yange kaa a Mbaiserael ér, Yehova koso ve sha mana ‘sha er Una tese ve ve fa er i lu sha kwaghyan tseegh man or a lu uma ga, kpa i lu sha hanma kwaghôron u a dugh ken zwa u TER man or a lu uma sha mi yô.’—Dut. 8:3.
a Bibilo ter acin ahar a yange i na Yehova nagh sha annyamev ken taaikyôngo yô. Yange i er kwagh ne sha kwa u hiihii, shighe u i lu veren upristi sha tom ve la. Kwa u sha uhar la yô, lu sha shighe u iniongo i Paseka. Ikwa i ihiar ne cii, lu shighe u shi anyom 1512 u a mar Yesu la. Hen shighe la, Mbaiserael due ken Igipiti kera inyom kar i môm, lu ken inyom i sha uhar.—Lev. 8:14–9:24; Num. 9:1-5.
b Mbaiserael yange ve tsa ken taaikyôngo ka zurum anyom 40 yô, ve nôngo ityav, ve ya ishar sha uzendenya udubu deri imôngo. (Num. 31:32-34) Nahan kpa, ve za hemen u yan mana zan zan ve kar nyôron ken Tar u Ityendezwa la.—Yos. 5:10-12.
c Se fatyô u kaan ser uzendenya vev mbara yaan mana ga, sha ci u Yehova kaa a ve ér hanma or yô, nana kuran mana sha mye u nan tseegh, yange ter kwagh u annyamev ga.—Eks. 16:15, 16.
