1-2. (a) Ka mbampin mba nyi nahan, alaghga mbacivir Yehova vea lu pinen ayol a ve? (b) Ka nyi se lu timen sha mi ken ngeren nee?

 SE CII, sea lu mbayev shin mbaganden kpa, ashighe agen ka se ta akperan. a Ikyav i tesen yô, alaghga gumor u nan lu orpasenkwagh yô, nana lu nengen ér kwagh gba Yehova sha kwagh u nan ga. Kwagh ne una na yô, a taver nan u eren batisema. Ikyav igen yô, a lu anmgbian u yange nan tsua ér mcivir u Yehova a lu kwagh u hiihii ken uma u nan shighe u nan lu gumor la, nan yem u keren ér nana lu a inyaregh kpishi ga yô. Hegen ne, nan hingir organden shi nan kera ngu a inyaregh kuma u nengen sha tsombor u nan ga. Nahan alaghga a lu nan inja er kwagh u yange nan tsua u eren shighe u nan lu gumor la lu kwagh u vough ga nahan. Gayô alaghga anmgbian u kwase ugen nan bee iyol, nahan nan kera ngu a agee iyol kpishi ga. Kwagh la una na yô, iyol ia kpe nan, sha ci u nan kera ngu fantyô u eren akaa a yange nan eren la ga. I lu nahan u pine iyol you mbampin mban vee? ‘Kwagh gba Yehova sha kwagh wam je kpa? Yange m de mer akaa agen a karem sha ci u Yehova nahan lu shami je kpa? Hegen kpa, me fatyô u eren akaa sha ci u Yehova?’

² Aluer se ker u zuan a mbamlumun sha mbampin mban ga yô, kwagh la una na se kera na Yehova jighjigh ga, shi se de u civir un je kpaa. Nahan ken ngeren ne, se time se nenge er aluer se hemba veren ishima sha akaawan a Bibilo ve, kwagh la una wase se u lun a jighjigh u nan ser (1) kwagh wase gba Yehova ishima, shin (2) akaa a yange se tsua u eren la lu akaa a vough, shin (3) se mba Yehova a inja her yô.

 KWAGH U UNA WASE SE SE DE U TAN AKPERAN YÔ

3. Aluer se mba tan akperan yô, ka nyi ia wase se se de u tan akperana?

³ Shighe u se lu tan akperan yô, ka nyi ia wase se? Kwagh môm u una wase se yô, ka u keren iwasen ken Mkaanem ma Aôndo. Aluer se er nahan yô, se seer nan Yehova jighjigh, shi se hemba yan ijende a na kangenaa. Nahan kwagh ne una hemba wasen se u ‘tilen dông sha jighjigh u nan.’—1 Kor. 16:13.

4. Se ‘tôv akaa cii’ nena? (1 Mbatesalonika 5:21)

⁴ Ôr 1 Mbatesalonika 5:21. Umbur wer Bibilo kaa a vese ér, “tôvon nen akaa cii.” Se er kwagh ne nena? Aluer se fa mimi u ma kwagh jighilii ga yô, a gba u se ker u fan kwagh u Bibilo i ôr sha kwagh shon yô. Ikyav i tesen yô, hen sha kwagh u gumor u nan lu nengen ér kwagh gba Yehova sha kwagh u nan ga yô. Doo u nana hen ér, er nan lu a mnenge ne yô maa ka mimi, kwagh gba Yehova sha kwagh u nan gaa? Ei, ka nahan ga. Gba u nana ‘tôv akaa cii’ sha u timen ken Bibilo fan kwagh u Yehova a henen sha a nan jim jim yô.

5. Se er nan ve se kav er Yehova a nengen mbamzeyol asev laa?

⁵ Ka sea ôron Mkaanem ma Aôndo yô, i lu inja er Yehova ngu lamen a vese nahan. Kpa ka i gba u se er kwagh a hemba di u ôron Bibilo tseegh la, ve se kav kwagh u Yehova a henen sha zayol wase la jighilii ye. Gba u se ker avur a Bibilo a a ôr kwagh u una wase se sha zayol wase la jighilii yô, shi se time sha a kpaa. Se fatyô u keren akaa ne ken ityakeda yase i nongo u Yehova u gber la. (Anz. 2:3-6) Gba u se er msen hen Yehova, se sôn un a wase se se zua a iwanger sha kwagh u a taver se la, maa se ker akaawan a Bibilo kua ngeren mba vea wase se u nengen sha zayol wase la yô. Shi ka a inja u se ôron kwagh u mbacivir Yehova mbajighjigh mba sha ayange a tsuaa la ken Bibilo, mba ve kpa ashighe agen yange ve hen kwagh shi i lu ve ken ishima er se nahan yô.

6. Mbamkombo ka ve wase se nena ve se de u tan akperana?

⁶ Shi ka sea henen Bibilo ken mbamkombo asev yô, i lu inja er Yehova ngu lamen a vese nahan. Aluer se mba zan mbamkombo hanma shighe yô, se fatyô u ungwan ma kwagh ken kwaghôron shin ken ikyaa i anmgbian nan ne ken mkombo yô, man kwagh u se ongo la una wase se se de u tan akperan. (Anz. 27:17) Nahan de ase hegen se time sha akaa a aa wase se se de u tan akperan la jighilii.

SHIGHE U U NENGE WER KWAGH GBA YEHOVA SHA KWAGH WOU GA YÔ

7. Alaghga mbagenev vea pine iyol ve ér nyi?

⁷ I lu nahan u pine iyol you mpin ne vee? ‘Yehova fam je kpa?’ Aluer u ngu nengen iyol you wer u ndahar shin u gba kwagh ga yô, alaghga u hingir u henen wer u fatyô u yan ijende a Aôndo u a gbe sha man tar la ga. Alaghga kape Tor Davidi kpa yange hen kwagh je la. Yange kpiligh un iyol kpishi er uumace di nahan kpa, Yehova a fe ve yô, nahan a pine ér: “TERE, or ngu nyi man U fe nana? man wan u or kpaa, er U we nan ikyo yô?” (Ps. 144:3) Ka han u fatyô u zuan a mlumun sha mpin laa?

8. Er i ôr ken 1 Samuel 16:6, 7, 10-12 nahan, ka nyi Yehova ka a nenge a mi ken oro?

⁸ Bibilo kaa a vese ér mba i nengen ve ér ve gba kwagh ga la kpa, Yehova yô nengen ve ér ve gba kwagh. Ikyav i tesen yô, Yehova yange tindi Samuel hen ya u Yese ér a za shighe wan na ugen ken ônov nav mba nomso mkurem, nana va lu tor u Iserael ken hemen. Tsô Yese yila ônov utaankaruhar ken ônov nav mba nomso mba anigheni mbara, ve va hen Samuel. Yange yila wan na Davidi u lu u kiriki la ga. b  Nahan kpa, ema lu Davidi je Yehova tsua ye. (Ôr 1 Samuel 16:6, 7, 10-12.) Yehova yange fa or u Davidi lu jim jim yô. Yange fa er un doo gumor la ishima kpishi yô.

9. U er nan ve u fa wer mimi je kwagh wou gba Yehova ishima? (Shi nenge foto kpaa.)

⁹ Nenge ase er Yehova a vande tesen ér kwagh wou gba un ishima yô. Ka a wa u kwagh u una wase u sha zayol wou jighilii yô. (Ps. 32:8) Kwagh ne tese je ér ka a vande fan zayol wou cii ve a er nahan ye. (Ps. 139:1) Aluer u dondo kwaghwan u Yehova, shi u nenge er kwaghwan shon a wase u yô, u hingir u nan jighjigh wer kwagh wou gba un ishima. (1 Kron. 28:9; Aer. 17:26, 27) Yehova ngu nengen hanma kwagh u u lu eren sha u civir un shi ungwan imo na yô. Shi a nenge aeren a dedoo a u lu a mi la, nahan a soo ér we u lu ijende na. (Yer. 17:10) Nahan aluer we kpa u soo wer a lu Ijende you yô, a saan un iyol kpishi.—1 Yoh. 4:19.

ALUER U NGU HENEN WER AKAA A YANGE U TSUA LA LU SHAMI GA YÔ

10. Aluer se hen sha akaa a yange se tsua u eren la yô, alaghga ka mbampin mba nyi nahan vea va se ken ishima?

¹⁰ Ashighe agen yô, alaghga mbagenev vea hen sha akaa a yange ve tsua u eren la, nahan a taver ve u nan jighjigh ér yange ve tsua lu akaa a vough. Alaghga yange ve de tom u i kimbin ve inyaregh kpishi yô, gayô ve kera hii kpenga u van ve a inyaregh tsembelee, u yange ve wa ishima la ga, sha er vea hemba zuan a shighe u civir Yehova yô. Alaghga anyom kar hegen kpishi. Nahan alaghga vea hide a hen sha kwagh u ior mbagenev mba ve fe ve, mba yange ve tsua u eren akaa agen kposo yô. Man hegen ne, ka inja er ior mbara mba a inyaregh kpishi shi ve tema kpe ve iyol nahan. Kwagh ne una na yô, alaghga vea pine ér: ‘Yange m de mer akaa agen a karem sha ci u Yehova nahan, lu shami je kpa? Shin yange ma  m er tom kpoghuloo sha er me lu a inyaregh kpishi hegen yôô?’

11. Ka akaa a nyi nahan or u a nger Pasalmi 73 la lu henen sha mi ve iyol kpe unu?

¹¹ Aluer u ngu pinen mbampin mbara nahan ken ishima you yô, nenge er yange lu or u a nger Pasalmi 73 la ken ishima yô. Yange nenge ior mbagenev lu inja er kpe ve iyol, mba a inyaregh kpishi shi mba a mbamzeyol ga nahan. (Ps. 73:3-5, 12) Er nenge lu inja er akaa nga zan a ve doon yô, lu un inja er iniôngon na i civir Yehova cii ka kwagh u saan ishe nahan. Er lu henen sha akaa a nan un iyol kpen ne yô, ishima i shi zan un iyol didi. (Ps. 73:13, 14) Yange er nan ve ishima de u zan un iyol sha akaa a lu henen sha mi laa?

12. Er i ôr ken Pasalmi 73:16-18 nahan, ka nyi yange i wase or u a nger pasalmi shon la ve de u henen sha akaa a nan un iyol kpene?

¹² Ôr Pasalmi 73:16-18. Orpasalmi ne yange za ken tempel u Yehova. Er za lu imôngo vea mbacivir Yehova yô, a hingir u henen kwagh sha gbenda u vough. A kav ér, er i kpe mbagenev iyol nahan cii kpa, gema mba a ishimaverenkeghen ga. Fe nahan yô, ishima gba un shimi. Sha ci u nenge ér kwagh u un tsough u veren mcivir u Yehova hiihii ken uma na la hemba doon a hanma kwagh ugen cii. Kwagh ne na yô, a hide a kange ishima ér una za hemen u civir Yehova.—Ps. 73:23-28.

13. Aluer u ngu vaan afanyô sha akaa a yange u tsua u eren la yô, ka nyi u fatyô u erene? (Shi nenge foto kpaa.)

¹³ We kpa, Mkaanem ma Aôndo ma a wase u nahan u hide u zua a ishimataver er orpasalmi la nahan. Ma a wase u nena? Umbur akaa a dedoo a u lu a mi la, man er Yehova a lumun we la kpaa. Shi umbur wer Yehova wasen mba ve civir un ga la ga. Ior kpishi ken mba ve civir Yehova ga la nenge ér u lun a akaa kpishi la hemba kan kwagh u vesen ken uma ve, sha ci u mba a ishimaverenkeghen sha kwagh u mlu  u ken hemen la ga. Kpa we yô, Yehova na u uiyua mba dedoo kpishi hegen, shi a tôndo zwa ér ken hemen kpa una va na u akaa a dedoo kpishi. (Ps. 145:16) Heela tseegh ga, hen sha kwagh ne: Luun er yange u tsua u eren akaa agen kposo aa u lu eren hegen ne yô, u fa er uma wou ma a lu hegen jighilii ga. Kpa kwagh ngu môm u fatyô u fan jighilii yô: Hanma kwagh u u tsough u eren sha ci u Aôndo doo u ishima, shi ior kpa doo u ishima yô, ka keng u zua a akaa a aa na a hemba saan we iyol yô.

SHIGHE U U LU NENGEN WER U NGU YEHOVA A INJA GA YÔ

14. Mlu u mbagenev ngu nena, man alaghga vea lu pinen ayol a ve ér nyi?

¹⁴ Ior mba Yehova mbagenev mba kera fetyô u eren akaa kpishi er ve soo la ga, sha ci u ve bee iyol, gayô ve gba angev shin ve gba iwan. Nahan alaghga vea lu nengen ér ve kera mba Yehova a inja keng ga. Alaghga vea lu pinen ken ishima ve ér, ‘M ngu Yehova a inja her je kpa?’

15. Or u a nger Pasalmi 71 la yange lu a vangertiôr ér nyi?

¹⁵ Or u a nger Pasalmi 71 la kpa kape yange ishima za un iyol vough je la. Yange er msen ér: “De undun mo shighe u agee am a bee la ga.” (Ps. 71:9, 18) Er iyol kpe orpasalmi ne nahan kpa, lu a vangertiôr ér aluer un ngu civir Yehova sha mimi yô, Una za hemen u suen un. Orpasalmi ne yange kav er ka i doo Yehova a mba ve lu a mbamyen kpa ve lu nôngon sha afatyô ve cii civir Un la yô.—Ps. 37:23-25.

16. Ka sha igbenda i nyi nahan mbabeenyol ve lu Yehova a inja? (Pasalmi 92:12-15)

¹⁶ Ne mbabeenyol, nengen nen mlu wen la er Yehova kpa a nengen la. Wea lu kor kor je kpa, una wase u u fatyô u civir un sha mimi. (Ôr Pasalmi 92:12-15.) De hembe veren ishima sha kwagh u u kera fetyô u eren ga la ga, kpa hemba veren ishima sha kwagh u u fatyô u eren hegen la. Ikyav i tesen yô, u fatyô u taver  mbagenev asema sha ikyav i jighjigh u nan wou kua sha akaa a u lu eren u tesen wer kwagh ve gba u ishima la. U fatyô u ôron mbagenev er Yehova a sue u anyom kpishi, shi ôron ve uityendezwa mba Bibilo mba u lu veren ashe a mi, er vea va kure sha mi ken hemen yô. Shi hanma shighe yô umbur wer, mbamsen mba u lu eren a ishima you i môm sha ci u mbagenev la, mba wasen ve kpishi. (1 Pet. 3:12) Mlu wase una lu nan nan kpa, hanma wase cii nana fatyô u eren kwagh sha ci u Yehova kua mbagenev.

17. Doo u se tôô iyol yase se kar sha mbagenev ga sha ci u nyi?

¹⁷ Aluer ishima doo u ker ga sha ci u u nenge wer u kera ngu fantyô u eren Yehova tom kpishi er yange u eren la ga yô, fa wer hanma kwagh u u lu nôngon eren cii gba Yehova kwagh kpishi. Nahan kpa, alaghga a lu u ape tôôn kwagh u u lu eren la, karen sha u mbagenev ve fetyô u eren yô. Kpa mayange de eren nahan ga! Sha ci u nyi? Sha ci u Yehova tôôn kwagh u se fetyô u eren la karen sha u mbagenev ve fetyô u eren la ga. (Gal. 6:4) Ikyav i tesen yô, Maria yange na Yesu mkurem ma taver ishe gbilin. (Yoh. 12:3-5) Kpa kwasecôghol u lu icankwase la yô, yange va er iyua sha samnyar u gban kwagh ga agbenger ahar tseegh. (Luka 21:1-4) Kpa Yesu tôô kwasecôghol la kar sha Maria ga. Yange nenge iyua i hanma ve er la ér mba a jighjigh u nan. Ter na Yehova kpa, hanma kwagh u u er sha ci u u soo u civir un shi a doo u ishima yô, ka a gba un kwagh, ka una ndahar nan nan je kpaa.

18. Ka nyi ia wase se ve se de u tan akperana? (Shi nenge ngeren u kiriki u a lu a itinekwagh ér “ Mkaanem ma Yehova Ma a Wase U U De u Tan Akperan” la.)

¹⁸ Se cii ashighe agen ka se ta akperan. Kpa er se nenge nahan, Mkaanem ma Aôndo ma a fatyô u wasen se se de u tan akperan. Sha nahan yô, nôngo sha afatyô wou cii, zua a iwanger sha akaa a a taver we la. U er nahan yô, u zua a ishimataver, nahan iyol a kera kpe u ga. Yehova fa mlu wou vindi vindi. A fa akaa a u tsough u eren sha er u ver un hiihii ken uma wou la cii. Nahan una na u injar kpee er a tende zwa nahan. Mba ve civir Yehova sha mimi la cii, ve doo un ishima, shi hanma ve yô, kwagh u nan gba un ishima.