NGEREN U TIMEN SHA MI 42
ICAM 103 Mbakuran mba I Ne, Ve Lu Uiyua La
Tese Wer U Wuese Nomsombaiorov mba Ve Lu “Uiyua” La
“Zum u a kôndo sha yô, . . . a na uiyua, ka nomsombaiorov je.” —EF. 4:8.
KWAGH U SE LU HENEN YÔ
Ken ngeren ne, se lu nengen gbenda u mbashiren tiônnongo man mbatamen kua mbatamen mba sôron atôônanongo ve wasen se la, man er se wuese tom u anmgbianev mbajighjigh mban ve eren la yô.
1. Ka akaa a nyi nahan Yesu a er sha ci wase?
ORUMACE môm kpa, nan ngu a er kwagh u wasen ior i kuma sha Yesu ga. Shighe u Yesu lu shin tar la, yange er akaa kpishi a wasen ior sha tahav mbu eren uivande mbu lu a mi la. (Luka 9:12-17) Yange na iyua i hemban cii sha u lumun ér una kpe sha ci wase. (Yoh. 15:13) Hii shighe u i nder Yesu shin ku la je, ngu wasen se her zan zan nyian. Yange sôn Yehova ér a na cighan jijingi na, a va tese se shi a sur se asema. (Yoh. 14:16, 17, ngeren u shin kpe; 16:13) Ken mbamkombo asev kpa, Yesu ngu nan se akaa a i gbe u se lu a mi ve se fatyô u tesen ior Bibilo sha tar cii, shi geman ve hingir mbahenen yô.—Mat. 28:18-20.
2. Ka unô ve lu “uiyua” mba i er kwagh ve ken Mbaefese 4:7, 8 laa?
2 Nenge ase iyua igen i Yesu a ne se yô. Yesu yange kôndon yemen sha kera yô, apostoli Paulu nger ér “a na uiyua, ka nomsombaiorov je.” (Ôr Mbaefese 4:7, 8.) Paulu pase ér Yesu na uiyua mban ér ve sue tiônnongo sha igbenda kposo kposo. (Ef. 1:22, 23; 4:11-13) Nyian ne, nomsombaiorov mba ve lu “uiyua” la ka mbashiren tiônnongo man mbatamen mba ken tiônnongo kua mbatamen mba sôron atôônanongo. a Nomsombaiorov mban mba a mbamyen er se nahan, nahan ka ve er akaa agen shami ga. (Yak. 3:2) Kpa Ter wase Yesu Kristu ngu eren tom a nomsombaiorov mba ve lu uiyua mban, u wasen se.
3. Ôr kwagh u a tese er se fatyô u suen tom u nomso mba ve lu “uiyua la” ve eren la yô.
3 Yesu na “nomsombaiorov” mban tom u vesen ér ve taver mba ken tiônnongo asema. (Ef. 4:12) Kpa se cii se fatyô u wasen ve u eren tom u vesen ne. De se tese ikyav: Se mbagenev se mba eren tom u maan ayou a Tartor. Mbagenev ka ve sue mbatomov mban sha u va nan ve kwaghyan, shin van ve a akaa agen a kwagh a gbe ve a mi yô, gayô wasen ve sha igbenda igen. Nahan se kpa, hanma wase nana fatyô u suen tom u mbashiren tiônnongo kua mbatamen mba ken atôônanongo man mbatamen mba sôron atôônanongo sha kwaghôron wase man sha ieren yase. De se nenge er tom u ve lu eren kpoghuloo la, u lu wasen se man er se tese ve kua Yesu u a ne se ve la ser “uiyua” mba a ne se ne ve gba se kwagh yô.
MBASHIREN TIÔNNONGO MBA VE EREN “ITYOM I WASEN IOR” LA
4. Lu “ityom i wasen ior” i nyi nahan mbashiren tiônnongo eren sha ayange a mbaapostoli laa?
4 Sha ayange a mbaapostoli la, i tsua anmgbianev mbagenev lu mbashiren tiônnongo. (1 Tim. 3:8) Ikyav tese ér lu ve ve eren “ityom i wasen ior” i Paulu nger kwagh sha mi la ye. (1 Kor. 12:28) Nahan ikyav tese ér Mbashiren tiônnongo eren ityom i hange hange kpishi, sha er mbatamen mban vea hemba veren ishima sha tom u tesen man u kuran iyôngo la yô. Ikyav i tesen yô, alaghga mbashiren tiônnongo wasen u ngeren ukôpi mba Ruamabera shin yamen akaa a ngeren uruamabera mbara a mi.
5. Ka ityom i wasen ior i nyi nahan mbashiren tiônnongo ve eren nyiana?
5 Nenge ase ityom i hange hange igen i mbashiren tiônnongo ve eren hen tiônnongo wou la. (1 Pet. 4:10) Alaghga i na ve tom ér ve nengen sha inyaregh ki tiônnongo, gayô ve ngeren branci a tindin a ityakeda sha er mbapasenkwagh vea zuan a i yô. Gayô ve nengen sha uharegh mba tiônnongo a pasen kwagh her la, shin sha mbaanar mba samber a iliam man mba tesen vidio ken mkombo. Gayô ve nengen sha mba ve ve mkombo ken Iyou i Tartor la, shin ve wasen u sôron Iyou i Tartor. Ityom ne cii ka ityom i hange hange i i gbe u a er sha er akaa a za ken tiônnongo sha inja sha inja yô. (1 Kor. 14:40) Kwagh ugen yô, mbashiren tiônnongo mbagenev mba ne akaaôron ken Mkombo u Uma Wase man Tom Wase kpaa, kua akaaôron a ken igbar. Shi a fatyô u tsuan orshiren tiônnongo ér nana wasen ortamen u nengen sha annongo u pasen kwagh. Ashighe agen je yô, orshiren tiônnongo u nan kom yô, nana fatyô u zan vea ortamen za sôron anmgbian sha u taver nan ishima.
6. Ka atôakyaa agen a nyi a ne ve tom u mbashiren tiônnongo ve eren sha gbashima la u lu se a inja yumu?
6 Tom u mbashiren tiônnongo ve eren la ka u wase tiônnongo nena? Anmgbian u kwase ugen ken tar u Bolivia, iti na ér Beberly, b a kaa ér: “Mbashiren tiônnongo mba hen tiônnongo wase ka ve na yô, mkombo a doo, sha ci u ka tom u ve eren la ka u na m fatyô u wan icam, shi nan ikyaa ken mkombo shi keghen ato a akaaôron shi henen kwagh ken uvidio man ufoto ye. Ka ve wase u kuran mba ve ve mkombo la cii sha er ma kwaghbo una er ve ga yô, shi ve tsar Zoom u tiônnongo sha er mba ve fetyô u van mkombo ken Iyou i Tartor ga la kpa, vea nyôr mkombo sha Zoom yô. Ka a duen mkombo yô, ve kpa ve wase u esen Iyou i Tartor, shi nengen sha iyua i i er la, tom ve la ka u wase kpishi!” Anmgbian u kwase ugen ken tar u Colombia u nom na a lu ortamen yô, iti na ér Leslie, a kaa ér: “Ka i gba u mbashiren tiônnongo vea wase nomom u nengen sha ityom na igen. Vea lu ga yô, nomom ma a er tom je, a zua a ian i memen ga. M wuese gbashima ve la kpishi, shi m wuese er ka ve kegh iyol u wasen yô.” Se cii tom u mbashiren tiônnongo ve eren la ngu se a inja kpishi.—1 Tim. 3:13.
7. Se tese ser se mba a ishughun sha kwagh u mbashiren tiônnongo nena? (Shi nenge foto kpaa.)
7 Shin er alaghga se lu wuese mbashiren tiônnongo ken ishima nahan kpa, Bibilo kaa a vese ér: “Tesen nen ner ne mba a ishughun.” (Kol. 3:15) Ortamen ugen ken tar u Finland iti na ér Krzysztof, a pase er ka un tese ishughun na yô. A kaa ér: “Ka m nger kwagh sha kaade shin m nger loho ken hanseeti nahan m ter ma ivur Bibilo ker shi m ter gbenda u orshiren tiônnongo nan lu eren kwagh ve m zough a ishimataver la, shin m ter er i hii ve m lu wuese tom u nan yô, m tindi nan a mi.” Anmgbian ugen ken New Caledonia, iti na ér Pascal, un vea kwase na Jael ka ve er msen sha ci u mbashiren tiônnongo, ve ter ve sha ati ati. Pascal kaa ér, “Hegen ne, ka se eren msen shi se zamber shi se sughun Yehova sha kwagh u anmgbianev mba nomso mba i ne ve ityom ken tiônnongo mban.” Yehova ka a ungwa mbamsen mbara, nahan kwagh la a wase tiônnongo cii.—2 Kor. 1:11.
MBATAMEN MBA KEN TIÔNNONGO MBA VE “EREN TOM KPOGHULOO HEN ATÔ WEN” LA
8. Er nan ve Paulu yange nger ér mbatamen mba sha ayange a na la “eren tom kpoghuloo”? (1 Mbatesalonika 5:12, 13)
8 Mbatamen mba sha ayange a mbaapostoli la yange ve er tom kpoghuloo sha ci u tiônnongo. (Ôr 1 Mbatesalonika 5:12, 13; 1 Tim 5:17) Yange ve “hemen” ken tiônnongo sha u eren mbamkombo shi tsuan akaa a tiônnongo una er yô ken mzough u mbatamen. Shi ve waan anmgbianev mba nomso man mba kasev kwagh sha gbenda u tesen dooshima, sha er vea za hemen u lun a jighjigh u nan ve her taveraa yô. (1 Tes. 2:11, 12; 2 Tim. 4:2) Nomsombaiorov mban shi ka ve er tom kpoghuloo sha er vea nenge sha icombor ve, shi ve ayol a ve kpa vea za hemen u lun a jighjigh u nan ve her taveraa, shi vea lu vea Yehova kôôsôô yô.—1 Tim. 3:2, 4; Titu 1:6-9.
9. Ka ityom i nyi nahan mbatamen ve eren nyiana?
9 Nyian kpa, mbatamen ka ve lu a ityom i eren kpishi. Mba eren tom u pasen ivangeli. (2 Tim. 4:5) Ka ve ver ikyav i dedoo sha u eren tom u pasen kwagh la sha gbashima, shi tesen er a pase kwagh hen haregh u tiônnongo ve yô, shi tsaase mbagenev u eren tom u pasen kwagh la shi tesen tsembelee. Shi ka ve ôr ajir kpaa. Shighe u ve lu ôron or ijir yô, ka ve zungwe nan mhôônom shi mba sangen a sange ga. Orkristu ka nana er isholibo i vesen yô, mbatamen ve nôngo sha afatyô ve cii ve wase nan sha er nana hide nana lu vea Yehova doo doo yô. Nahan kpa, ka ve wa ikyo sha er tiônnongo una za hemen u lun wang yô. (1 Kor. 5:12, 13; Gal. 6:1) Jighilii yô, i fa mbatamen ér mba mbakuran tiônnongo. (1 Pet. 5:1-3) Mbatamen ka ve na akaaôron ken Bibilo. Ka ve wa iyol sha akaaôron la tsembelee. Shi ka ve nôngo ve fa hanma or ken tiônnongo, shi ve zaan hen anmgbianev ve za sôron ve sha u taver ve asema. Mbatamen mbagenev shi ka ve wasen tom u maan Ayou a Tartor, man u sôron a. Mbagenev ka ve lu mba nengen sha mkohol sha er akaa a za vough yô. Mbagenev mba ken Kômatii u Wasen sha Kwagh u Iyouci kua ken Iniongo i Nengen Anmgbianev Angev sha Iyouci. Mbatamen ka ve er tom kpoghuloo sha ci wase!
10. Ka atôakyaa a nyi se lu a mi a wuese tom u mbatamen ve eren kpoghuloo laa?
10 Yehova yange tsenga ôron ér mbakuran vea nenge sha a vese doo doo, shi se “kera cia kwagh ga shin kwagh á cier [se] iyol kpaa ga.” (Yer. 23:4) Anmgbian u kwase ugen ken tar u Finland, iti na ér Johanna, yange nenge a mimi u mkaanem man zum u ngô na gba angev mbu vihin tsung yô. A kaa ér: “Shin er taver mo u pasen mbagenev er lum ken ishima la nahan kpa, m pase ortamen ugen zayol ne. Yange m fa un tsembelee ga, kpa a wa ishima a kegh ato a mo, shi a er msen vea mo, shi a pasem er m doo Yehova ishima yô. Me fatyô u umbur hanma kwagh u yange ôr a mo ga, kpa m umbur er yange ishima gbam shimi yô. M na jighjigh mer ka Yehova je yange tindi un ér a va wasem hen shighe ne nahan ye.” Ka sha nyi gbenda nahan mbatamen mba hen tiônnongo wou ve wase u-we?
11. Se tese ser se wuese mbatamen nena? (Shi nenge foto kpaa.)
11 Yehova soo ér se tese sha mimi ser se wuese mbatamen “sha ci u tom u ve eren la.” (1 Tes. 5:12, 13) Anmgbian u kwase ugen u un kpa a lu ken tar u Finland yô, iti na ér Henrietta, a kaa ér: “Mbatamen ka ve kegh iyol u wasen mbagenev, kpa u ngu wer hemba mban a agee kua shighe a vese shin mba a mbamzeyol ken uuma vev ga ze. Ashighe agen ka m gba kaan a ve tsô mer: ‘De m ôr u kwagh, u ngu ortamen u injaa nahan u fa kpa? M soo u wuese we sha tom u dedoo u u eren la.’” Anmgbian u kwase ugen ken tar u Türkiye, c iti na ér Sera, a kaa ér: “Gba u se taver mbatamen asema sha er vea za hemen u eren tom ve tsembelee yô. Nahan se fatyô u ngeren ve loho sha kaade, gayô lôhôn ve iwer, shin duen kwaghpasen vea ve imôngo.” Ortamen ugen ngu hen tiônnongo wou u u soo u wuese nan sha tom u nan eren kpoghuloo la yôô? Wea lu a or ken ishima yô, tese nan wer tom u nan eren la ngu u a inja kpishi.—1 Kor. 16:18.
U fatyô u taver anmgbianev mba i ne ve ityom ken tiônnongo la asema sha er vea za hemen u wasen tiônnongo yô (Nenge ikyumhiange i sha 7, 11, 15)
MBATAMEN MBA SÔRON ATÔÔNANONGO MBA VE TAVER SE ASEMA LA
12. Ka nomsombaiorov mba han kpaa Yesu yange na ér ve taver atôônango asema? (1 Mbatesalonika 2:7, 8)
12 Kristu Yesu na tiônnongo “uiyua, ka nomsombaiorov” mba ve eren un tom sha gbenda ugen yô. Yange mgbegha mbatamen mba ken Yerusalem ve tindi Paulu vea Banaba kua mbatamen mbagenev ér ve lu mbatamen mba zenden sôron atôônanongo. (Aer. 11:22) Sha ci u nyi? Lu sha ityôkyaa shon i môm i i ver mbashiren tiônnongo kua mbatamen la, sha u zenden sha atôônanongo taver anmgbianev mba nomso man mba kasev asema. (Aer. 15:40, 41) Nomsombaiorov mban yange ve de akaa kar ve, sha er vea er tom ne yô, ashighe agen yange ve tagher a mbamzeyol je i lu inja er vea fatyô u waren ga nahan.—Ôr 1 Mbatesalonika 2:7, 8.
13. Ka ityom i nyi mbatamen mba sôron atôônango ve erene?
13 Mbatamen mba sôron atôônango ka ve zende sha kpishi. Atôônanongo agen ka a lu ica, nahan i tôô ve ahwa imôngo u za nyôron her. Hanma kasua yô, ortamen u sôron atôônanongo ka nan na akaaôron imôngo, shi nan zende nan sôr anmgbianev mba nomso kua mba kasev sha u taver ve asema, shi nan er mkombo vea upania, shi nan er mkombo vea mbatamen, shi nan er mbamkombo mba duen kwaghpasen. Ka nan wa iyol sha akaaôron shi nan nenge sha mbamkohol mba ningir kua mbamkohol mba vesen. Shi ka nan tese ken makeranta u upania, shi nan yila upania mba hen ningir cii nan er mkombo vea ve. Dugh akaa ne cii sha kpa, ka nan er ityom i vesen igen i ashighe agen ka i va gba kpoo u a er, nahan branci a kaa ér nana er yô.
14. Ka atôakyaa a nyi se lu a mi a wuese mbatamen mba sôron atôônanongo mba ve eren tom kpoghuloo laa?
14 Tom u injaa u mbatamen mba sôron atôônanongo ve eren la ngu wasen atôônanongo nena? Anmgbian ugen ken tar u Türkiye ôr kwagh u vannya u mbatamen mba sôron atôônanongo kaa ér: “Hanma kwa u ortamen u sôron atôônanongo nan ve hen tiônnongo wase yô, kwagh la ka a taver mo ishima u seer shighe wam u wasen anmgbianev mba nomso man mba kasev. M za ikyua a mbatamen mba sôron atôônanongo imôngo, kpa mô ve môm kpa ikyav tese ér nan soon u biishi a ior ga ze, shin nan ngee a tom gande u nana lam a mo ga.” Johanna u se vande teren kwagh na la, yange due kwaghpasen vea ortamen u sôron atôônanongo ugen, kpa ve zua a or môm hen ya ga. A kaa ér: “Nahan cii kpa, kwagh u yange er sha iyange la una hungur mo ga. Anmgbianev av mba kasev cii sember moughon yemen hen ijiir igen. Nahan ka i sarem u nengen a ve kpen kpen. Ortamen u sôron atôônanongo la yange surum ishima shi wasem u nengen mer, er m lu civir Yehova ne, mea lu vea tsombor wam shin azende a am ikyua ga kpa, ken tar u he la yô, se lu a aan kpishi a hiden lun imôngo.” Se kpishi kwagh u mbatamen mba sôron atôônanongo doo se, er anmgbian u kwase la nahan.—Aer. 20:37–21:1.
15. (a) Sha kwagh u i ôr ken 3 Yohane 5-8 la yô, se tese ser mbatamen mba sôron atôônanongo mba se a inja nena? (Shi nenge foto kpaa.) (b) Gba u se tese ser kasev mba anmgbianev mba ve eren tom ken tiônnongo kpoghuloo la gba se kwagh sha ci u nyi, man se er kwagh ne nena? (Nenge ngeren u kiriki u a lu a itinekwagh ér, “ Umbur kwagh u Kasev Vev” la.)
15 Apostoli Yohane yange taver Gayu ishima ér a ngohol anmgbianev mba ve ve hen a na la sar sar, shi a “na ve gbenda er Aôndo a soo la.” (Ôr 3 Yohane 5-8.) Gbenda môm u se er kwagh ne yô, ka u lôhôn ortamen u sôron atôônanongo iwer hen ya wase. Gbenda ugen yô, ka sha u van mbamkombo mba duen kwaghpasen mba ka nan er shighe u nan ve u va sôron tiônnongo la. Leslie u se vande ôron kwagh na la ka a tese iwuese na sha igbenda igen. A kaa ér: “Ka m er msen mer Yehova a nenge sha mbamgbe vev, shi mo vea nomom ka se nger ve washika se pase ve er vannya ve la a wase se kpishi yô.” Umbur wer mbatamen mba sôron atôônanongo kpa, mba a mbamtaver shi ka ve vôr er se nahan. Ashighe agen ka ve gba angev, shin ishima i nyian ve, gayô iyol i kpe ve. Alaghga mkaanem ma taver nan ishima shin iyua i akuma akuma i u ne ortamen u sôron atôônanongo wou la, a lu iwasen i nan lu keren hen shighe la je la!—Anz. 12:25.
GBA U SE LU A NOMSOMBAIOROV MBA VE LU “UIYUA” LA
16. Sha kwagh u i ôr ken Anzaakaa 3:27 la yô, ka mbampin mba nyi nahan anmgbianev mba nomso vea fatyô u pinen ayol a ve?
16 Hanma ijiir sha tar yô, gba u se lu a nomsombaiorov mba ve lu “uiyua” la kpishi. Wea lu anmgbian u u er batisema yô, u fatyô u wasen sha imba gbenda la kpa? (Ôr Anzaakaa 3:27.) U soo wer u vese u ar sha ian i orshiren tiônnongo? Man wea vande lun orshiren tiônnongo kera yô, u soo wer u vese u ar sha ian i ortamen laa? d U fatyô u nyôôso akaa ken uma wou sha er u wa uwegh shin foom u zan Makeranta u Mbapasen Ivangeli i Tartor la kpa? Makeranta la ua tsaase we, shi ua wase u sha gbenda u Yesu una hemba eren tom a we yô. Aluer u nenge wer u kuma u eren akaa ne ga yô, er msen hen Yehova. Sôn un a na u cighan jijingi na, sha er una wase u u fatyô u eren hanma tom u i ne u cii yô.—Luka 11:13; Aer. 20:28.
17. Kwagh u nomsombaiorov mba ve lu “uiyua” la tese se nyi sha kwagh u Tor wase Kristu Yesu?
17 Anmgbianev mba nomso mba eren tom kpoghuloo mba Yesu a tsough ér ve lu “uiyua” la, ka ikyav i tesen ér ngu hemen se ken ayange a masejime ne. (Mat. 28:20) Se wuese kpishi er se lu a Tor u tangen iyol ga u se doo un ishima shi a fe akaa a a gbe se la, nahan a ne se anmgbianev mba wasen se yô. Sha nahan yô, ker aan a tesen wer nomsombaiorov mba ve eren tom kpoghuloo mban mba u a inja. Shi mayange de hungur u sughun Yehova ga, sha ci u ka un a ne “hanma iyua i dedoo man i vough cii” ye.—Yak. 1:17.
ICAM 99 Anmgbianev mba Hanma Tar Cii
a Mbatamen mba ve lu Mbahemenev mba Shin Itine la, kua mbawasen Mbahemenev mba Shin Itine tom man mba ken Kômatii u Nengen sha Branci kua mba ve eren ityom igen la kpa ka “uiyua.”
b I yila mbagenev ken ngeren ne sha ati a ve kpôô kpôô ga.
c Yange i yilan ér Turkey.
d Wea soo u fan kwagh u u er ve u vese u ar sha ian i orshiren tiônnongo shin ortamen la yô, nenge ngeren u a lu a itinekwagh ér, “Anmgbianev mba Nomso, Ne mba Nôngon Ner Ne Lu Mbashiren Tiônnongo Kpa?” la, man u a lu a itinekwagh ér, “Anmgbianev mba Nomso, Ne mba Nôngon Ner Ne Lu Mbatamen Kpa?” la, ken Iyoukura i Novemba, 2024.
