MBAISERAEL yange ve soo ityogholov kpen kpen. Bibilo ter ashighe kpishi a yange ior ve wa atsam shi ve kuhwa ityogholov yô. Jighilii yô, vegher u Bibilo ugen jimin cii ka atsam. Ikyav i tesen yô, takeda u Pasalmi man Icam i Hemban kua Ukwelegh cii ka atsam a yange i dugh sha u a waan yô. Takeda ugen (Music in Biblical Life), u u er kwagh u ior mba sha ayange a i ngeren Bibilo la yô kaa ér Bibilo “tese wang er Mbaiserael yange ve kuhwan ityogholov sha akaa kpishi a ve eren ken uma ve yô.”

Ityogholov mbi sha akaa a i eren ayange ayange la. Mbaiserael yange ve wa atsam shi ve kuhwa ityogholov sha u tesen er i lu ve ken ishima yô. (Yes. 30:29) Ikyav i tesen yô, yange a bumun tor shin a eren iniongo, shin ushoja vea za hemba ityav yô, kasev ve kuhwan angingav, shi ve waan atsam a ember shi ve vinen amar. (Mbaj. 11:34; 1 Sam. 18:6, 7; 1 Utor 1:39, 40) Shi yange or a kpe yô, Mbaiserael ve waan atsam a kuugh a pasen er ku la u nyoon ve tsung yô. Kwagh ne tese wang ér Mbaiserael yange ve soo ityogholov kpishi.

Ityogholov mbi kuhwan hen ya u tor. Ator a Iserael yange soo ityogholov kpen kpen. Tor Saulu yange za kua a Davidi ér a va lu hen ya na, a kuhwan un ityogholough. (1 Sam. 16:18, 23) Davidi iyol na va hingir tor yô, a var ikyav mbi kuhwan kwagh, shi a dugh atsam a kôron ken ishima, shi a ver ior mba kuhwan ityogholov atô kposo kposo, ér ve waan atsam shi ve kuhwan ityogholov ken tempel u Yehova. (2 Kron. 7:6; Amo. 6:5) Tor Solomon kpa yange lu a nomso man kasev mbawan atsam hen ya na.—Orpa. 2:8.

Ityogholov mbi kuhwan shighe u civir Yehova. U hemban cii yô, Mbaiserael yange ve kuhwan ityogholov shi ve waan atsam sha u civir Yehova. Jighilii yô, yange iorov 4,000 lu mbakuhwan ityogholov man mbawanatsam ken tempel u ken Yerusalem. (1 Kron. 23:5) Yange ve kuhwan myôm, man ityogholov mbi lun er jita nahan, man ityogholov mbigen mbi lun a ikyar, kua ibyusa. (2 Kron. 5:12) Kpa lu mbaatsamev mba fan ityogholov mban tseegh civir Yehova a ityogholov ga. Ikyav tese ér Mbaiserael yange vea kôndon sha Yerusalem u za eren uiniongo mba i eren hanma inyom la yô, ve waan atsam ve yemen. (Ps. 120-134) I yilan atsam shon ér Atsam a Mbakôndon (shin, Atsam a Zan Iniongo). Ityakeda i Mbayuda igen kaa ér Mbaiserael yange ve waan Upasalmi a mbagen sha shighe u yan Paseka.

Nyian kpa, ior mba Aôndo mba nengen ityogholov man atsam ér ka kwagh u hange hange. (Yak. 5:13) Ka se wa Yehova atsam a wuese un. (Ef. 5:19) Ka sea waan atsam vea anmgbianev asev mba nomso man mba kasev imôngo yô, se lu vea ve kangenaa. (Kol. 3:16) Shi ka sea waan atsam, shin sea kuhwan ityogholov shin sea ungwan atsam a wuese Yehova yô, kwagh la a taver se ishima, shi se seer zuan a agee a wan ishima a mbamzeyol asev. (Aer. 16:25) Ityogholov man atsam a wan ka gbenda u dedoo u tesen ser se na Yehova jighjigh shi a doo se ishima.