Nenge er Bibilo i ne mlumun sha mbampin mban yô:

Aerenakaa 24:15 kaa a vese ér mba va “nderen mbaperapera man mbaperapera ga kpaa shin ku.” Mbaperapera ka mba yange ve ungwan imo i Yehova shighe u ve lu uma la. Sha nahan yô, i nger ati a ve ken takeda u uma la. (Mal. 3:16) Mbaperapera ga ka mba yange ian due kuma u vea hen kwagh u Yehova shin vea civir un ga tsô maa ku wua ve la. Sha nahan yô, i nger ati a ve ken takeda u uma la ga.

Ka mba i ôr kwagh ve ken Yohane 5:28, 29 la shi i ôr kwagh ve ken Aerenakaa 24:15 kpaa ye. Yesu kaa ér ‘mba yange ve lu eren akaa a dedoo’ yô, vea “zua a uma sha mnder u shin ku la,” kpa ‘mba yange ve lu eren akaabo’ yô, “a ôr ve ijir sha mnder u shin ku la.” Mbaperapera yange ve er akaa a dedoo ken uma ve cii ve mase kpen ye. Nahan a va nderen ve shin ku yô, vea zua a uma sha ci u ati a ve nga ken takeda u uma la her. Kpa mbaperapera ga yô, yange ve er akaabo ken uma ve cii. Nahan a va nderen ve shin ku yô, a ôr ve ijir, sha ci u mba a nger ati a ve ken takeda u uma la ga. A na ve shighe sha er a nenge, aluer ve kuma u a nger ve ati ken takeda u uma la yô. Hen shighe la, vea zua a ian i henen kwagh u Yehova fan un, sha er aluer ve lumun u ungwan imo na yô, a nger ve ati ken takeda u uma la yô.

Mpase 20:12, 13 kaa ér a gba u mba a nder ve shin ku la cii vea “er akaa a i nger ken uihyurenmbaruamabera” la, ka atindi a he a Aôndo una na se ken tar u he la je la. Nahan, mba vea venda u eren akaa a i nger la cii yô, Yehova Aôndo una tim ve sha won kera.—Yes. 65:20.

Daniel 12:2 tsenga ôron ér mbagenev ken mba ve lu yaven shin ku la vea nder “sha u zan ken uma u tsôron, man mbagenev di sha u zan ken kunya man ihyeen i been mayange ga.” Ivur ne ngi ôron kwagh u una mase eren ve shighe u a nder ve shin kera la; vea zua a “uma u tsôron” gayô “ihyeen i been mayange ga.” Nahan anyom 1,000 la aa been yô, mbagenev vea zua a uma u tsôron; mbagenev di a tim ve sha won kera gbindigh gbindigh.—Mpa. 20:15; 21:3, 4.

De se tese ikyav: A fatyô u tôôn mlu u ikweior i ihiar i mba a nder ve shin ku la karen sha mlu u ior mba ve soo u moughon hen tar ve za lun ken ma tar ugen yô. Mbaperapera mba er ior mba gomoti u tar u ve yem ker la a ne ve takeda (visa) ér ve lu a tom shin ya ken tar la, sha er a lumun u eren kwagh a ve shi vea lu a ian gbanger gbanger i eren kwagh ken tar shon la nahan. Kpa mbaperapera ga yô, mba er ior mba i ne ve visa ér ve lu ken tar u ve yem ker la hen anshighe kpuaa tseegh, shin ve lu mbavannya ker di tsô nahan. A gba u mbavan a va mban vea tese anzaaior a ve lu la cii ve, a mase nan ve ian ér ve za hemen u lun ken tar u ve mough ve yem ker la ye. Kape mbaperapera ga mba a nder ve shin ku la kpa, a gba u vea lumun u dondon atindi a Yehova shi vea tese ér mba mbaperapera, ve vea za hemen u lun ken Paradiso je la. Bee kera yô, nyityô takeda i gomoti a ne mbavan a va mbara cii kpa, shighe ka una karen yô, i na mbagenev takera u lun marnya u tar la, kpa mbagenev yô, i wa ve i hide a ve ken tar u yange ve mough her la. Ka er ieren i or i lu la ka i tsua kwagh u a er a nan ye. Nahan kape mba a nder ve shin ku ken tar u he la kpa a nenge er jighjigh ve una lu, man er ieren ve kpa ia lu la cii man a tsua kwagh u a er ve je la.

Yehova ka Aôndo u lun a dooshima tseegh ga, kpa ka Aôndo u a eren kwagh sha mimi kpaa yô. (Dut. 32:4; Ps. 33:5) Una va tese dooshima na sha u nderen mbaperapera kua mbaperapera ga kpaa shin ku. Kpa una ver ishima ér mba ken ikweior i ihiar ne cii ve kuran atindi a na a tesen kwagh u a lu u vough man u vough ga la. Ka mba una doo ve ishima shi vea lu kuran atindi a na la tseegh, una lumun ér ve za hemen u lun uma ken tar u he la ye.