Ken 1 Mbakorinte 15:8 la, Paulu kaa ér: “U masen yô, mo kpa a ande hen a mo. Sha nahan yô, m ngu inja er ka wan u i mar nan kôugh nahan.” Tsuaa la, se kaa ser ikyav tese ér ka kwagh u yange er Paulu shighe u i tese un iengem i Yesu sha, ken mpase u sha mnenge la lu ôron ye. Lu inja er yange i na un ian i icivirigh i hiden maren un, shin nderen un shin ku ken iyol i jijingi sha shighe la nahan. Man shighe la, lu a kuma u a nder ior shin ku ken mlu la ga; kpa lu u anyom aa kar deri imôngo cii je ve mnder u shin ngura una hii ye. Nahan kpa, se mba seer timen sha ivur Bibilo ne yô, se nenge ser gba hange hange u se nyôôso gbenda u yange se pase ivur Bibilo shon la.

Ka mimi, hen ijiir ne, Paulu lu ôron kwagh u yange er un shighe u i gema un hingir orhenen u Yesu la. Kpa kwagh u yange kaa ér i ‘mar un kôugh’ la inja na ér nyi? Una fatyô u kaan ér i mar un kôugh sha igbenda imôngo.

Yange i gema un kpoo man sha utaha kpishi. Ka i mar wan kôugh abur abur. Shighe u Saulu (u i va gema yilan un ér Paulu la) lu yemen ken Damaseku u za tôvon Mbakristu a ican la, mayange hen ér Yesu u i nder un shin ku la una ande hen a na ken mpase u sha mnenge la ga. Mgem u Paulu la yange va un abur abur, shi Mbakristu mba lu zan una za tôv ve a ican la kpa kwagh shon kpiligh ve iyol. Heela tseegh ga, kwagh ne yange er Paulu sha utaha kpishi, je yô kera fatyô u nengen a ma kwagh ga ayange imôngo.—Aer. 9:1-9, 17-19.

Yange i gema un “sha shighe ga.” Ishember i ken zwa Grika i i gem ér “wan u i mar nan kôugh” la, shi a fatyô u geman i sha gbenda ugen ér “wan u i mar nan sha shighe ga yô.” Bibilo i i yer ér The Jerusalem Bible la gema vegher u masetyô u ivur ne ér: “Lu inja er i marem shighe u or môm nan ver ishima ga nahan.” Yesu yange hide kôndo yem sha shighe kar cii ve, i va gema Paulu ye. Mbagenev mba Paulu ôr kwagh ve been maa a ôr mkaanem ma ivur ne la cii, yange ve nenge a Yesu shighe u i nder un shin ku kpa lu a kôndo a yem sha ga la. Kpa Paulu yô, yange nenge a Yesu hen shighe la ga. (1 Kor. 15:4-8) Zum u Yesu ande hen Paulu sha shighe u or môm ver ishima ga la, Paulu zua a ian i nengen a na shighe u i nder un shin ku kera la, shin er lu “sha shighe ga” nahan kpaa.

Lu ôron kwagh na iyol na a iyolhiden ijime. Mbatimen sha akaa a ken Bibilo mbagenev kaa ér, sha kwagh u Paulu ôr ne yô, ka inja er yange lu puun iyol na nahan. Kpa luun er Paulu lu puun a puu iyol na mimi yô, kwagh la ma a tese ér yange nenge ér mimi je un kuma u lun apostoli ga. Jighilii yô, Paulu shi kaa ér: “M hemba gban ijime ken mbaapostoli cii, m kuma u a yilam ér apostoli ga, sha ci u yange m tôv tiônnongo u Aôndo a ican. Kpa Aôndo tesem erdoo u sha mhôôn ve m lu kwagh u m lu ne ye.”—1 Kor. 15:9, 10.

Sha nahan yô, ikyav tese ér Paulu lu ôron lu kwagh u Yesu yange ande hen na abur abur shin kpoo, shin i gema un sha shighe u or môm ver ishima ga la, shin mlu na u yange via ken jijingi kuma u a tese un mpase u sha mnenge u kpilighyol shon ga la. A lu nyityô kwagh Paulu lu ôron kpa, ikyav tese wang ér mpase u Paulu nenge a mi la lu un kwagh u vesen. Kwagh ne yange tese un wang er Yesu a nder shin ku mimi yô. Ka nahan ve yange una tesen mbagenev kwagh u mnder u Yesu shin ku je a or kwagh u yange er un sha shighe u or môm ver ishima ga la keng ye.—Aer. 22:6-11; 26:13-18.