Mbamaren mba a tom u vesen; ka tom u tesen mbayev vev kwagh u Yehova. (Ef. 6:4) Nongo u Yehova gber ityakeda shi er uvidio shi dugh atsam kpaa, sha u wasen mbamaren. U tese mbayev ou kwagh a akaa ne nena?

• Za sha jw.org. U fatyô u zuan a hanma kwagh u i er sha ci u mbayev cii sha jw.org, er uvidio kua ngeren nahan. a Wea soo u zuan a akaa ne yô, nger wer, “Mbayev” gayô “Agumaior,” hen an-ijiir u keren kwagh sha jw.org/tiv, ape i nger ér Search la, maa kighir.

• Tsua kwagh u a hembe doon sha ci u wan wou yô. Nenge akaa a a lu henpe i nger ér “Mbayev” la. U fatyô u tsuan uvidio man atsam kua ngeren mba u nenge wer vea hemba wasen wan wou la. Wea soo u zuan a imbakwagh la yô, ker henpe i nger ér “Family Worship Projects” shin “Akaa a Timen sha Mi ken Mcivir u Hen Tsombor” la.

• Tôô shighe wase mbayev ou u timen sha akaa a vea fatyô u henen ken uvidio man atsam la kua ngeren mbara yô. Shighe u wan wou a lu gbilin kpa, de gbe kaan a na tsô wer a nenge uvidio mban shin a nger akaa sha ajiir a i gbe u una nger la ga. Kpa time sha akaa shon vea na imôngo, nahan wase un a hen u lun vea Yehova kôôsôô.