Rose kaa ér: “M ngu a angev mbu sha tsombor mbu ka mbu nyoon mo tsung hanma shighe cii yô. Sha nahan yô, akaa kpishi hembam u eren ken uma.” Zayol na u hemban vihin cii yô, ashighe agen ka a fatyô u veren ishima ôron Bibilo shi eren akaa a civir Aôndo agen ga. Kpa mkaanem ma Yesu ma ken Mateu 19:26 la wase un kpishi. Mkaanem man kaa ér: “Aôndo yô, fa akaa cii ityô.” Rose yange hen fa ér igbenda ngi kpishi i henen kwagh. Er yange mnyoon na la a nôngo u yangen un u ôron takerada sha ashighe agen yô, hii u ungwan icer i kuran a kura i Bibilo man ityakerada yase i pasen Bibilo la. * A kaa ér, “Aa icer ne shio yô, m fa kwagh u ma m er ve ma m ze hemen u taver ken jijingi ga.”

Shighe u Rose yange una ure sha ci u a kera fetyô u eren akaa a yange eren la ga yô, a zua a msurshima ken mkaanem ma ken 2 Mbakorinte 8:12 la, ér: “Aluer gbashima una lu yô, á rumun un sha kwagh u or nan lu a mi la, ka sha kwagh u nan lu a mi ga la ga.” Mkaanem man umbur Rose ér saan Aôndo iyol a kwagh u a eren la, sha ci u ka a er kwagh u a fetyô u eren la cii, shin er a kera fetyô u eren akaa agen ga nahan kpaa.

Delphine u se vande teren kwagh na la, umbur wener: “Yange wan wam u kwase u lu anyom 18 la kpen kera yô, kwagh ne nyoon mo tsung je yô m hen mer, me kera fatyô u zan hemen u lun uma ga. Kwaghmôm kera  lu zan vough ken uma wam ga.” Nahan kpa, zua a ishimasurun kpishi ken mkaanem ma ken Pasalmi 94:19, ape orpasalmi a kaa a Aôndo ér: “Zum u mbamhen ve ngeem ken ishima yô, mbamsurshima Ou nam ishima i saan saan” la. A kaa ér, “Yange m er msen hen Yehova mer a wasem me eren akaa a a nam msurshima sha mnyoon wam la yô.”

Yange na iyol na u eren ityom i injaa i wasen ior la hanma shighe cii. Shighe kar yô, a tôô iyol na a kar sha ukala mba anmbayev ka ve kpelan akaa a mi la, sha ci u mba ve hembe la je kpa ka ve lu a inja u kpelan kwagh a mi her. Kape un kpa nenge ér un hembe je la, kpa shi fa je ér una fatyô u wasen mbagenev. A umbur wener: “Yange m kav fese mer shighe u m er tom a akaawan a Bibilo man igbenda i Ruamabera a tese la, sha u wasen mba m henen Bibilo a ve la yô, i hingir gbenda u Yehova a surum ishima yô.” Yange nger ati a ior mba ken Bibilo mba ve zungwe sha ashighe agen kpishi la. Maa kav ér: “Ve cii yange ve eren msen.” Shi a fa je ér “aluer u wuhe Bibilo iyou yô, u fatyô u zuan a mlumun môm ga.”

Bibilo i henen tese Delphine kwagh ugen kpaa, ér gba u una ver ishima sha akaa a ken hemen, a lu a ken ijime la ga. Ishimaverenkeghen i i ôr kwagh u i ken Aerenakaa 24:15 la sur un ishima, ér: ‘Ka va nderen mbaperapera kua mba ve lu perapera ga la shin ku.’ Er nan ve a lu a vangertiôr ér Yehova una va nder wan na u kwase laa? De Delphine a na mlumun: “M nenge a wan wam u kwase ken hemen. I vande sôron ‘iyange’ i se va zua la veren, inja er ngi ken kalenda u Terem la nahan. M nenge wang, se mba imôngo ken an-sule wase u doon ashe la, er sha iyange i m mar un ve m soo un kpishi nahan.”