Rosie kaa ér, “Yange ishima i shi nyian mo sha akaa agen a vihin tsung, aa i lu je kpa a lu a erem ga yô.” Ka avur a Bibilo a nyi nahan yange wase unu? Môm ken a yô, lu Mateu 6:34: “Nahan yô, asema a̱ de nyian ne sha kwagh u kper ga, gadia kper una gba nôngon sha kwagh na iyol na tsô; hanma iyange zayol u i lu a mi la, kuma i.” Hegen Rosie kaa ér, mkaanem ma Yesu mara wase un, nahan ishima de u nyian un sha kwagh u alaghga kper una er la. Shi a kaa ér, “Yange mbamzeyol av kumam, nahan gba u ishima ia nyian mo sha kwagh u a lu a er ga shin alaghga una er kpaa ga la ze.”

Yasmine kpa nenge ér ishima lu nyian un za karen ikyaa inya. “Yange m shi vaan sha ayange agen ken kasua, shi ayange agen m yav tugh ga. Yange m nenge mer akaa a kpeegh a m henen sha mi la nga ganden mo vanger.” Ka hanma ivur Ruamabera yange i wase unu? A kaa ér lu 1 Peteru 5:7: “Gema nen ishima i nyian yen la cii, haa nen sha a Na, gadia ka Un A lu koson ne ye.” Yasmine kaa ér: “Er shighe lu karen yô, m za hemen u eren msen hen Yehova, shi Yehova kpa ungwa mbamsen av. Nahan lum inja er i shirim ikyav mbi yuhwan tsung nahan. Mbamhen av mba kpeegh mbara ka ve vaan mo ken ishima sha ashighe ashighe, kpa hegen m fa er me nôngo a ve yô.”

Gumkwase ugen, iti na ér Isabella, a kaa ér: “M hen mer ahô a wan ka kwagh u sha tsombor, sha ci u terem kpa yange waan ahô. Yange m de u eren akaa a injaa la, sha er me lu a ian i memen shin nengen televishen yô. Ieren ne ka ibo, sha ci u ka i na ishima i seer lun or ker hang shi i na or er tom sha inja ga.” Kwaghwan u wase un yô, lu ken 2 Timoteu 2:15 la. A kaa ér: “Nôngo sha gbashima u veren iyol you sha ishigh ki Aôndo er or u i kar nan nan kom yô, ortom u i gba u nana ya kunya ga yô.” Isabella kaa ér, “Yange m soo mer Yehova a ya kunya sha ci u m ngu wan ahô u eren tom wam ga.” Nahan a gema inja kpen kpen.

Kelsey kpa lumun a kwagh ne, a kaa ér: “Yange shighe u tom u m lu a mi u eren la a kuma kpa, m de zan zan shighe a va shi kpuaa ve m hii u eren u ye. Maa m gba vaan shi m kera yav tugh ga, shi ishima i nyian mo. Nahan kwagh ne a bende a mo sha gbenda u doon ga.” Kelsey yange zua a iwasen ken Anzaakaa 13:16: “Hanma orfankwagh ka nan er tom u nan sha mfe, kpa ibumeor yô, ka nan samber ibumegh.” A pase kwagh u un gbidye kwar sha ivur Ruamabera ne ve un zua a mi yô, ér: “Ka a inja u fan kwagh u i lu u una er kpôô kpôô la shi wan agoyol sha mi cii man shighe na ye. Hegen ne m ngu a antakerada u m ver sha tebul wam, u ka m nger ityom i ken hemen i i lu u me er la ker yô, shi kwagh ne ka a wasem u sôron akaa ken uma wam, nahan m kera veren tom her zan zan mer shighe a bee cii ve me er u ga.”

Kirsten kaa ér “nomom yange yevese undum a mbayev mbakiriki unyiin.” Ka hanma ivur Bibilo yange i wase unu? Anzaakaa 17:17 kaa ér: “Huror yô, lu a dooshima gbem, man shi i mar anmgbian sha ci u ayange a ican.” Kirsten yange ker iwasen hen mbagenev mba ve civir Yehova a na imôngo la. Ka nyi yange zua a mini? A kaa ér, “Azende a am yange wasem sha igbenda kpishi! Mbagenev yange ve yam akaayan man ufaluwa ve za verem sha hunda. Iorov kpuaa yange ve wasem vea mbayev av u duen ya yemen hen ugen kuma acin atar. Orgen wasem m zua a tom. Azende am yange wasem mo hanma shighe cii.”

Delphine u se vande teren kwagh na la kpa, yange nôngo a mtswenem. Akaa yange saa un cii nga been kera yô, a umbur wener: “Yange m nenge mer kwagh hembam ken uma, nahan m gbaa kenger hanma or tsô. M nenge mer m ngu tswen.” Ivur Ruamabera i yange i wase un yô, lu Pasalmi 68:6. Ivur ne kaa ér: “Aôndo ka A gema or u mtswen, nan hingir u lun a ior ken ya.” A pase ér: “Yange m fa je mer ivur ne ngi ôron kwagh u ya u kpôô kpôô u hegen ne ga. Kpa, m kav mer Aôndo ka a na se ya u ken jijingi, ijiir i mkor u mimi i ka i na or nan lu imôngo vea mbagenev mba ve civir Yehova la. Kpa m fa je mer, me fatyô u kporom ikyua a mbagenev ga, saa me vande kporom ikyua a Yehova. Sha nahan yô, Pasalmi 37:4 wasem sha gbar ne. Ivur ne kaa ér: ‘I̱ saan we iyol ken TER, man Una na u asaren a ken ishima you ye.’”

A mase kuren ikyaa nahan ér: “Yange m kav mer gba u me seer taver ikyar i m ye vea Yehova la. A hemba doon a akaa doon la cii. Maa m nger akaa a me fatyô u eren imôngo vea mbagenev la shin inya, sha er aa wasem u kôron azende vea mba ve civir Yehova la yô. Yange m hen u nengen a akaa a dedoo a mbagenev ve eren la shi m eren kwagh a ve inja er ka akaa a dedoo la tseegh ve eren nahan.”

Sha kpôô yô, azende a civir Aôndo la kpa mba ior mba yinan her. Mbashiada mba Yehova kpa mba nôngon a mbamzeyol er ior mbagenev nahan. Kpa mfe u ken Bibilo la ka a mgbegha ior ve wase mbagenev shighe u i gbe sha mi yô. Sha nahan yô, ka a inja u kôron azende vea ambaaior la. Nahan kpa, akaawan a Bibilo shi a a fatyô u wasen se u nôngon a mbamzeyol mba se fatyô u sôron ve nyian ga la, er uicôronmbauangev man ijungwen nahana?