Ka An Nan Lu Aôndo?
Ior kpishi ka ve kaa ér ve na Aôndo jighjigh. Kpa aluer u pine ve or u Aôndo a lu yô, vea gema a na u mbamlumun kposo kposo. Hen mbagenev yô, Aôndo ka orjir u wan tswam, u a soo u tsahan ior sha mbamshi vev yô. Mbagenev di, nenge ér tesen ve dooshima shi den ve akaa a bo ve hanma shighe cii, aluer ve er nyi ityôkwagh je kpaa. Shi mbagenev di yô, na jighjigh ér Aôndo ngu ica a vese shi kwagh gba un sha kwagh wase ga. Er ior ve lu a mbamnenge kposo kposo sha kwagh u Aôndo yô, alaghga ior kpishi vea nenge ér taver kpishi u fan or u Aôndo a lu yô.
Ka a inja u fan or u Aôndo a lu yôô? Een, ka a inja. Aluer u seer fan Aôndo yô, uma wou una fatyô u seer lun a inja. (Aerenakaa 17:26-28) Er u lu seer kporom hen Aôndo la, un kpa kwagh wou una seer doon un shi una lu hemban wasen we cii. (Yakobu 4:8) Jighilii yô, aluer u ngu a mfe u vough sha kwagh u Aôndo yô, kwagh ne una fatyô u nan we uma u tsôron.—Yohane 17:3.
U fatyô u fan Aôndo nena? Hen ase sha kwagh u or u u fe nan tsembelee yô, er ijende you i kôôsôô nahan. Yange hii nana ve ne va ya ijende? Alaghga tsô yange u fa iti i nan, man aeren a nan man akaa a nan soon man aa nan soon ga la man kwagh u nan er man kwagh u nan we ishima u eren la kua akaa agen kpaa. Yange u hen u fa kwagh u nan, nahan kwagh ne urugh we va a mi hen a nan.
Nahan Aôndo kpa, se fatyô u fan un sha u timen sha igbenda i i dondo ne:
I gber magazin ne ér a na mbamlumun mba ve dugh ken Bibilo yô sha mbampin mban. Ngeren mban vea wase u u henen fan or u Aôndo a lu la tseegh tsô ga, kpa shi u fa iwasen i u zua a mi, er u ya ijende a Aôndo la.
