Aluer u soo u fan or tsembelee yô, hemba doon u u hen u fa kwagh u nan er la man mbamtaver mba nan hemba ken uma u nan la. Kape Aôndo kpa, aluer u soo u fan un tsembelee ve a gba u u hen u fa kwagh u a er je la. Aluer u er nahan yô, alaghga u fa akaa kpishi a Aôndo yange er sha ci u iwasen yase hegen man ken hemen yô.

Yehova Aôndo ka Orgbanakaa u Hembancii man “hii sha igbetar je, mba nengen a aeren a na a i nengen a mi bong ga la wang, sha ci u mba nengen a a ken akaa a a gbe la.” (Mbaromanu 1:20, NW ) “U A gbe tar sha tahav Nav, man A ver tar sha won sha kwaghfan Na, man A samber Usha sha mkav Na” la. (Yeremia 10:12) Akaa a kpilighyol a Aôndo a gbe la kpa tese ér kwagh wase gba un ishima.

Nenge ase er Yehova a ne uma wase a doo tsung, sha u gban uumace sha “inja i mlu” na ne. (Genese 1:27) Kwagh ne tese ér a er se sha gbenda u se fatyô u tesen aeren a na a hemban cii la sha igbenda i kiriki. A gba se a tahav mbu fan mnenge na man atindi a na. Er se lu nôngon u eren sha atindi a na la, se zua a msaanyol u vesen shi uma wase kpa una lu a inja. Kwagh u hemban cii je yô, a gba se sha gbenda u se fatyô u yan ikyar a na yô.

Ka sea nenge a akaa a Aôndo a gbe shin tar la yô, se kav er i lu un ken ishima a vese la. Sha kwagh u apostoli Paulu a ôr la yô, Aôndo “de u pasen iyol Na ga, eren akaa a dedoo, [ka] A nôôn [se] ura u senen sha, A ivin asema a [ese] a kwaghyan man msaanyol kpaa.” (Aerenakaa 14:17) Aôndo ka a na se akaa kpishi i hemba akaa a i gbe u se lu a mi ve se lu uma la. Ka a na se akaa mgbeghaa man atô kposo kposo, sha er a saan se iyol ken uma yô. Kpa akaa ne cii ka di mafo u kwagh u a we ishima u eren a vese tsô.

Yehova yange gba tar ne ér uumace ve lu uma sha u gbem. Bibilo kaa ér: “Tar yô, A na ônov mba  iorov,” shi “A gba u er u̱ lu gbilin dang ga, A maa u sha er ior ve̱ tema sha u” yô. (Pasalmi 115:16; Yesaia 45:18) Ka unô ioro, man vea lu sha u akuma shighe nena? “Mbaperapera vea ya dyako u tar, vea lu ken u gbem.”—Pasalmi 37:29.

Sha kpôô yô, Yehova yange gba Adam man Ifa, ior mba hiihii mbara ver ve ken paradiso u shin tar la ér, ve ‘sôron un shi ve kuran un kpaa.’ (Genese 2:8, 15) Aôndo yange na ve ityom ihiar i doon tsung, ér: “Mar nen kpishi, seer nen ngeen, iv nen tar, gema nen u, u̱ lu sha ikev yen.” (Genese 1:28) Sha nahan yô, Adam man Ifa lu a ishimaverenkeghen i ember uma u kpen mayange ga la shin tar. Kpa kwagh er vihi yô, ve tsua u hemban Aôndo ato, sha ityôkyaa ne yô, ishimaverenkeghen i lun ken “mbaperapera” mba “vea ya dyako u tar” la kar ve. Kpa, er se nenge nahan, ieren ve la gema awashima u Yehova sha ci wase man tar la ga. Nahan kpa, kwagh u hiihii yô, de se nenge nen kwagh ugen u Aôndo a er yô.

Shi i fa Bibilo ér ka Mkaanem ma Aôndo. Yehova na se Bibilo sha ci u nyi? Ityôkyaa i vesen yô ér se hen kwagh na. (Anzaakaa 2:1-5) Sha mimi yô, Bibilo na mbalumun sha mbampin mba alaghga se lu a mi sha kwagh u Aôndo la cii ga, takerada môm kpa mayange u a fatyô u eren nahan ga. (Orpasenkwagh 3:11) Nahan kpa, hanma kwagh u i nger ken Bibilo yô, ka a wase se u fan Aôndo. Se nenge er a eren kwagh a ior yô, nahan se fa injaor i a lu la. Se hen se fa ior mba a soo man mba a soo ga yô. (Pasalmi 15:1-5) Se hen se fa mnenge na sha kwagh u mciviraôndo man aeren a wang kua akaa a yolough. Shi Bibilo pase se aeren man mkaanem ma wan u Aôndo, Yesu Kristu, nahan kwagh ne wase se u fan aeren man mkaanem ma Aôndo wang.—Yohane 14:9.

Ityôkyaa igen i Yehova a ne se Mkaanem nam, Bibilo yô, ka sha u ma wase se u fan er se er ve a saan se iyol shi uma wase una lu a inja yô. Yehova pase se ken Bibilo er se er ve a saan tsombor wase iyol man er kwagh a kuman se kua er se nôngo a ishimanyian yô. Man er se va pase ken magazin ne nahan, Bibilo na mbamlumun sha mbampin mba vesen, er: Ican i yan dumbur sha ci u nyi? Ka nyi i lu keghen se ken hemene? Shi i pase kwagh u Aôndo a er sha u nengen ér awashima na u sha hiihii la kure vough yô.

Igbenda igen kpa ngi kpishi i i tese ér Bibilo ka takerada u doon tsung, u Aôndo a nger yô. I nger Bibilo ken atô u anyom a hemban er 1,600 nahan, sha ikyev i iorov er 40 nahan, nahan kpa loho u i u vesen la gema ga, sha ci u ka Aôndo a lu orngeren Bibilo kpôô kpôô ye. (2 Timoteu 3:16) Bibilo ngi kposo a ityakerada igen i sha ayange a tsua la, sha ci u anyom kar kpishi kpa kwaghmôm saa ker ga, er uihyurenmbaruamabera mba Bibilo mba sha ayange a tsuaa la ve tese nahan. Kwagh ugen yô, er ior yange ve nôngo ér i de gem Bibilo ga shi i de samber a i ga shi ior ve de ôron i ga nahan kpa, Bibilo ngi her zan zan nyian. Ka Bibilo i lu takerada u i hembe samber a mi shi i hembe geman u nyian ye. Er Bibilo i lu her zan zan nyian yô, kwagh ne tese ér “kwaghôron u TER wase yô, una lu her gbem sha won.”—Yesaia 40:8.

Kwagh ugen u Aôndo a er u doon tsung yô ka ibumun i a er, ér awashima na una kure keng a bunde ga la. Er se vande ôron nahan, Aôndo yange wa ishima ér uumace ve lu shin tar gbem sha won. Kpa Adam yange va hemba ato man er isholibo, nahan ian i zuan a uma u tsôron la kar un vea mbayev nav mba una va mar la cii. “Er isholibo nyôr shin tar sha or môm, man ku gema va sha ci u isholibo yô, nahan ku va sha ior cii sha ci u ve cii ve er isholibo yô.” (Mbaromanu 5:12) Er Adam yange hemba Aôndo ato, maa er isholibo yô, lu inja er awashima u Aôndo la una kure ga nahan. Yehova yange er nena?

Akaa a Yehova yange er la zua sha aeren a na la. Yehova tsaha Adam man Ifa sha ieren ve la, kpa dooshima mgbegha un gema ôr akaa a una er sha ci u mbayev mba vea va mar la. Kwaghfan u Yehova la wase un u fan kwagh u una er sha ikyaa la yô,  man fese je pase kwagh u una er la. (Genese 3:15) Lu u Yehova una va a gbenda u duen ken isholibo man ku kera, sha ikyev i wan na, Yesu Kristu. Kwagh ne yange wa nyi kere?

Er Yehova soo u paan uumace sha ikyev i kwaghtseren u ihyembeato i Adam i va a mi la yô, a tindi Yesu shin tar ér a tese ior gbenda u zan ken uma shi a “na uma Na a̱ hingir ipaan sha ci u ior kpishi.” a (Mateu 20:28; Yohane 14:6) Lu u Yesu una fatyô u paan uumace sha ci u lu or u vough er Adam nahan. Kpa Yesu er kwagh er Adam nahan ga, sha ci u yange za hemen u ungwan imo i Aôndo sha gbenda u vough zan zan kar nyôron ken ku. Er yange gba u Yesu una kpe ga yô, Yehova nder un hide yem za lu uma sha. Hegen Yesu una er kwagh u Adam fatyô u eren ga la; una na uumace mba ve ongo imo i Aôndo ian i zuan a uma u tsôron. “Gadia er ior kpishi ve hingir mbaasorabo sha ihyembeato i or môm yô, kape ior kpishi di ve hingir mbaperapera sha ikyo i wan i Or môm kpaa la.” (Mbaromanu 5:19) Nagh ku ipaan ku Yesu kura na yô, Aôndo una kure ityendezwa na i uumace lun uma shin tar gbem sha won la.

Se hen akaa kpishi sha gbenda u Yehova nenge sha mbamzeyol mba ihyembeato i Adam va a mi la. Se nenge er kwaghmôm kpa una fatyô u yangen Yehova u kuren kwagh u yange ôr la ga yô; “ikyôr ia lagh” kwaghôron na. (Yesaia 55:11) Shi se hen se fa er se doo Yehova ishima kpishi yô. “Ka sha kwagh ne man i pasen dooshima u se doo Aôndo ishima la ye, ér Aôndo tindi Wan Na u môm môm shin tar, sha u se̱ lu uma sha a Na. Ka hen ape dooshima a lu ne: ka Aôndo man A doo se ishima ga, kpa ka se, se doo Aôndo ishima ye, man A tindi Wan Na hingir iwom sha asorabo ase.”—1 Yohane 4:9, 10.

Aôndo “u Wan Na iyol Na je kpaa A tange ga kpa A gema Un A na sha ci wase cii” la, se mba a vangertiôr ser una “na se akaa cii” a a tende zwa u nan se la. (Mbaromanu 8:32) Ka nyi Aôndo a tende zwa u va eren se? Za hemen u ôron.