Akaa a Ior Ve Ôr sha Kwagh u Msen u Eren hen Aôndo Yô
“Ka mea eren msen shighe u i lum ken ishima dang yô, i lum er Aôndo ngu vea mo, a kôrom uwegh ngu tesen mo kwagh u me er nahan.”—Mkaanem ma kwase ugen, iti na ér MARÍA.
“Kwase wam yange ya ican a angev mbu kyansa zan zan anyom 13 cii mase kpen ye. Yange m er msen hanma iyange, m henen je mer Aôndo ngu ungwan mo ken ican yam, nahan ishima i pever mo.”—Mkaanem ma orgen, iti na ér RAÚL.
“Msen ka iyua i doon tsung i Aôndo a ne uumace yô.”—Mkaanem ma orgen, iti na ér ARNE.
María man Raúl man Arne kua mbagenev kpishi nenge ér msen ka iyua i doon tsung. Ve nenge ér vea fatyô u lamen a Aôndo ken msen, sughun un shi pinen un iwasen. Ve cii ve na jighjigh a kwagh u Bibilo i er sha kwagh u eren msen hen Aôndo ne a ishima i môm, ér: “Ka vangertiôr u se lu a mi je ne; nyityôkwagh i se sôn Aôndo man i lu i sha ishima na cii yô, ngu a ungwa se.”—1 Yohane 5:14.
Nahan kpa, ior mbagenev kpishi ka i taver ve u lumun a kwagh u Bibilo i er sha kwagh u msen u eren la. Orgen iti na ér Steve, a pase mnenge u yange a lu a mi sha kwagh u msen yô, a kaa ér, “Shighe u m nyôr anyom 17 la azende a am atar kpe ku u aikyôr. U môm lu mato wua un ye, mba uhar di kpe shin zegemnger.” Nahan Steve er nena? A kaa ér, “Yange m er msen hen Aôndo mer a pasem er i hii ve kwagh a lu nahan yô, kpa m fa er hii ve kwagh lu nahan ga. Nahan m hide m pine mer, ‘Ityôkyaa i m eren msen jim yô ka nyi?’” Er ior kpishi ka i lu ve er Aôndo ongo mbamsen vev ga yô, ve kera nenge a ityôkyaa i vea za hemen u eren msen ga.
Shi atôakaa agen kpa nga a a ne ve i taver ior u nan jighjigh ér msen ngu a iwasen yô. Mbagenev kaa ér, er Aôndo a fe akaa cii yô, a vande fan akaa a kwagh a gbe ve a mi la kua mbamzeyol vev, nahan ityôkyaa ngi i vea ôron un kwagh sha mi ga.
Mbagenev na jighjigh ér Aôndo ka a venda u ungwan mbamsen vev sha ci u akaa agen a yange ve er shami ga yô. Kwase ugen iti na ér Jenny, a kaa ér, “Zayol wam u vesen yô, ka m nenge mer m gba kwagh ga, sha ci u m er akaa a ka mea hide a hen sha mi ve m vaa afanyô yô, nahan ka m nenge mer m kuma u Aôndo una ungwa mbamsen av ga.”
We u nenge kwagh u eren msen la nena? We kpa, wea lu a zayol shin akperan a tan sha kwagh u msen er ior mba se ter kwagh ve sha heen ne nahan yô, u fatyô u zuan a ishimasurun, sha ci u Bibilo ia fatyô u tan we iwanger sha akaa a a tsume u sha kwagh u msen la cii. Se fatyô u nan kwagh u Bibilo i er sha kwagh u msen la jighjigh; * shi Bibilo ia wase u u zua a mlumun sha mbampin er mban nahan:
-
Aôndo ongo mbamsen asev mimi je kpa?
-
Er nan ve Aôndo a ongo mbamsen mbagenev ga?
-
U er msen nena ve Aôndo una ungwa?
-
Msen una wase u nena?
^ Ikyum. 9 Mbamsen mba ken Bibilo kpishi, mba mbacivir Aôndo yange ve er yô, kua mbamsen mba Yesu Kristu kpaa. Ruamabera u ken zwa Heberu u ior kpishi ve yer ér Ikuryan i Tse la, ngu a mbamsen ker hemba 150.
Kwagh Ugen u Alaghga Shi Una Doo U Yô
MBAMPIN MBA BIBILO I NE MLUMUN SHA MI LA
Gba u Se Eren Msen sha Ci u Nyi? Aôndo Una Ungwam Je He?
Aluer ka u Aôndo una ungwa msen wou kpa, ka gbenda u u er la ua na una ungwa ye.
MBAMPIN MBA AGUMAIOR A PIN LA
Gba u Me Er msen sha Ci u Nyi?
Msen ka kwagh u ka a na i lu or ken ishima guda tseegh tsô shinii, kwagh wa hemba nahana?
