KWAGH U UNA WASE IHYOM IA BEE YÔ
2 | De Keren u Oron Iyev Ga
Bibilo Kaa Ér:
“Or a̱ er u ifer kpa, we de eren nan ifer ga. . . . Aluer gba sha mi yô, er kwagh u u fetyô la sha u lun ken bem a ior cii. . . . , de oron nen iyev ayol a en ga, . . . gadia i nger ér: ‘Iyev i ôron ka i yam; mo me kimbi,’ kape Yehova a kaa la.”—MBAROMA 12:17-19.
Inja i Kwagh u Bibilo i Ôr La:
Er se cii ishima ka i vihi se shighe u or er se kwagh u ifer nahan kpa, Aôndo lumun ér se oron iyev ga. Kpa a tôndo zwa ér una va kar a aferakaa cii kera, nahan a gema ôron ijir sha mimi.—Pasalmi 37:7, 10.
Er Kwagh u Bibilo i Ôr la Una Wase U Yô:
Uumace mba ve yen ne ka vea or iyev yô, kwagh la a seer van a ihyom i kôron. Sha nahan yô, aluer or er u ifer shin ma kwagh u doon we ga kpa, de oron iyev ga. Kôr iyol you tsaha, nahan er kwagh a nan ken bem. Ashighe agen yô, a hemba doon aluer u de kwagh shon yô. (Anzaakaa 19:11) Kpa ashighe agen di yô, a hemba doon aluer u za na ripoti sha kwagh shon yô. Ikyav i tesen yô, aluer mbaaferev va ta num sha a we yô, u fatyô u za nan ripoti sha kwagh u ifer la hen dasenda shin hen mbautahav.
Or a fatyô u den iyev i oron
Aluer ka inja er u fatyô u sôron zayol la ken bem ga di ye? Shin aluer u nôngo sha afatyô wou cii wer u sôr zayol la ken bem kpa gba sha mi ga di ye? De oron iyev ga. U or iyev yô, kwagh a hemba vihin gban a gba kera. Kpa aluer u palegh u oron iyev yô, kwagh la una wase ior vea kera zua a atôakyaa a kôron mbagenev ihyom ga. Tsua wer u hen u suur sha gbenda u Aôndo a sôron zayol la. “Suur sha a Na, Una er sha mi vough.”—Pasalmi 37:3-5.
Kwagh Ugen u Alaghga Shi Una Doo U Yô
BIBILO GEM IOR
Yange m lu Nôngon Mer Me Bee a Kwagh u Ieren i Mimi Ga La
Rafika yange nyôr nongo u mba hendan a gomoti ér vea nôngo gomoti a gema eren kwagh a ior sha mimi yô. Kpa va ôr kwagh u ityendezwa i Bibilo i er ér Tartor u Aôndo ua va a bem shi ua na a gema eren kwagh sha mimi la.
