Ihyom ia Va Kera Lu Ga Gbem sha Won!
Aluer se dugh ihyom i kôron ken ishima yase elegh elegh je kpa, se fatyô u yangen mbagenev u kôron ior ihyom ga. Ior vea za hemen u kôron mbagenev ihyom shi tswamen ve a ishô ve iyol. Sha nahan yô, ka an nana fatyô u karen a ihyom i kôron kera elegh eleghe?
Ka Yehova Aôndo tseegh una fatyô u va been a ihyom i i samber sha tar wuee ne sha elegh elegh ye. Man ka kwagh u Bibilo i kaa ér una er vough je la.—Anzaakaa 20:22.
AÔNDO UNA VA KAR A AKAA A A VE A IHYOM LA CII KERA
-
1. SATAN DIABOLO. Ka Satan, ortyom u yange hii u hendan kwagh a Aôndo la a ne ve ihyom i ngee sha tar nyian yum nahan ye. Aôndo una va tim Satan kua ior mba Satan a ne ve hingir u kôron mbagenev ihyom la kera cica cii.—Pasalmi 37:38; Mbaroma 16:20.
-
2. TAR U SATAN U U IV A IHYOM NE. Akaa a a ne ve ihyom i ngee sha tar yum la cii, Aôndo una va kar a mi kera, kua mbapatii mba ve lu a mimi iyol ga shi ve lu samber a ihyom i kôron la kpaa. Shi mbahemenev mba kwaghaôndo mba ve tsughun ior shi ve samber a ihyom la kpa una kar a ve kera. Aôndo shi una tim mbakasuav mba wan hua, mba ve eren afer shi ve nyighen ior la cii.—2 Peteru 3:13.
-
3. MLU WASE U YINAN LA. Bibilo kaa ér uumace cii i mar ve a mlu u yinan shin mlu u henen kwagh shin nengen kwagh shin eren kwagh sha gbenda u vough ga. (Mbaroma 5:12) Kwagh ugen u ve eren u tesen ér ve yina yô, ka ve kôr mbagenev ihyom shi ve er kwagh a ve dang. Aôndo una wase uumace vea dugh mhen u yinan cii ken a ve kera, nahan ihyom ia kera va or ken ishima ga gbem sha won.—Yesaia 54:13.
BIBILO KAA ÉR IHYOM IA VA KERA LU SHA TAR GA
-
1. A KERA EREN KWAGH A OR SHA IFER GA. Tartor u Aôndo ua hemen tar cii gbem. Gomoti u Tartor la una lu sha, kpa una na a gema eren kwagh a ior sha mimi hanma ijiir cii shin tar. (Daniel 2:44) Ieren i soon kwagh u mbagenev ga, shin kwagh u mbavia a mbavia una kera lu ga. Igbenda i i lu eren kwagh a ior sha mimi ga hegen ne cii, Aôndo una va kar a mi kera.—Luka 18:7.
-
2. HANMA OR NANA TEMA KEN BEM. A kera nôngon ityav ga, shi a kera eren tswam a ma or ga, nahan or môm kpa nana kera yaan ican sha ci u ambaakaa la ga. (Pasalmi 46:9) A lu ior mba keren bem tseegh vea lu sha tar ye, nahan bem una lu hanma ijiir cii.—Pasalmi 72:7.
-
3. HANMA OR NANA LU KEN MLU U YINAN GA LA GBEM SHA WON. Ior mba vea lu sha tar cii vea doo ayol a ve sha mimi. (Mateu 22:39) Ishima ia kera nyian or ga, shi or môm nana kera umbur akaa a tse a vihin nan kpaa ga. (Yesaia 65:17) Shighe la, ihyom i kôron cii ia kera lu ga, nahan uumace cii “a saan ve iyol sha mngee u bem.”—Pasalmi 37:11.
Sar u kpishi u va lun uma shighe laa? Hegen je kpa ior mba henen akaawan a Bibilo sha er vea fa kwagh u vea er ve vea de u kôron mbagenev ihyom yô. (Pasalmi 37:8) Ka kwagh u Mbashiada mba Yehova umiliôn imôngo sha tar cii ve lu eren je la. Shin er ve due ken akuraior kposo kposo shi mbamlu vev ve lu kwaghmôm ga nahan kpa, ve doo ayol a ve shi mba eren kwagh ken mzough, er anmgbianev mba hen tsombor nahan.—Yesaia 2:2-4.
A saan Mbashiada mba Yehova iyol kpishi u pasen we er ve hen u nôngon a zayol u ior ka ve eren kwagh a ve sha mimi ga shin sha gbenda u tesen ér ve soo ve ga la yô. Kwagh u vea pase u la una wase u, nahan kure kure tsô, u dugh ihyom ken ishima you kera, shi ior vea hingir u doon we ishima. U fa u eren kwagh a ior cii kundu kundu, kua mba ka wea er kwagh u dedoo a ve je kpa ve wuese ga, shin ve tesen ér ve kôr u ihyom la je kpaa. Kwagh ne una na yô, a hemba saan we iyol hegen, shi mlu wou vea mbagenev una lu doon seer a seer. U hemban cii yô, u fa kwagh u u er ve u fatyô u va lun ken Tartor u Aôndo, shighe u ihyom i kôron ia kera lu ga gbem sha won la yô.—Pasalmi 37:29.
Kwagh Ugen u Alaghga Shi Una Doo U Yô
IYOUKURA
Ka Nyi Tartor u Aôndo Ua Va Ere?
Yesu yange fa je ér ka Tartor u Aôndo tseegh u lu gomoti u una bee a mbamzeyol mba shin tar ne kera ye. Ka nyi Tartor la u vande eren sha u nan se vangertiôr?
