Hii Nan Ve Ihyom i Samber Wuee Nahana?
Hii nan ve ior kpishi sha tar ve kôr mbagenev ihyom je ka ve wuan ve? De se kav inja i ishember i ihyom la, man kwagh u ka a na ior ve hii u kôron mbagenev ihyom, man er i hii ve ihyom i lu hanma ijiir sha tar la tsô, se fa ityôkyaa.
Ka Nyi i Lu Ihyomo?
Aluer or soo kwagh u orgen shin nongoior ugen ga, je yô nan soon ér cuku kpa kwagh a zua nan a or la shin nongoior la ga yô, tese ér nan kôr or la shin nongoior la ihyom. Ihyom been er ishimavihin shin ishimanyoon i shighe ka una karen ve i bee la nahan ga, kpa ka i za hemen gbem.
KWAGH U KA A NA IOR VE HINGIR U KÔRON MBAGENEV IHYOM YÔ
Ior ka ve hingir u kôron mbagenev ihyom sha atôakyaa kpishi. Ka i kôr mbagenev ihyom i lu sha ci u ve er ma kwagh ga, kpa ka i lu sha ci u nongoior ve shin ikyurior i ve lu la. Ashighe agen ka i nengen mba i kôr ve ihyom la ér ka ubombaiorov, shin ka mbawan afer, shin ka ior mba vea fatyô u geman inja ga yô. Shi a fatyô u nengen ve ér ve gba ijime kpishi, shin vea va er ma kwaghbo, shin ka ve ve lu van a mbamzeyol ye. Ashighe agen mba ve kôr ior ihyom la ka i lu mba i vande eren tswam a ve, shin i er kwagh a ve sha mimi ga, shin i er ma kwagh ugen u a ne i hingir u vea kera soo kwagh u mbagen ga yô.
KWAGH U KA A NA IHYOM I SAMBER YÔ
Ashighe agen ior ka ve kôr mbagenev ihyom, man i lu mba ve vande fan ve kpaa ga yô. Ikyav i tesen yô, ior ka ve nengen ma nongoior er tsombor ve shin azende a ve kpa a nengen nongoior shon la. Sha nahan yô, aluer mbagen hen tsombor kôr ma nongoior ihyom yô, ica ia kera gba ga je maa hanma or hen ijiir ve la nana hingir u nengen nongoior u i ker u ihyom la ér ka mbaihyomov.
Aluer se kav er ihyom i ngôôr samber ga yô, kwagh la una wase se u fan ityôkyaa i ior kpishi ve kôr mbagenev ihyom la. Nahan kpa, kwagh u se er ve ihyom ia de u samber sha tar yô, saa se fa er yange ihyom hii la. Se fatyô u fan er yange ihyom hii la ken Bibilo.
BIBILO PASE ER YANGE IHYOM HII LA
KA UUMACE YANGE VE HII IHYOM I KÔRON GA. Yange ihyom i kôron hii lu sha je, shighe u ortyom u Aôndo ugen, u i va hingir u yilan un ér Satan Diabolo la, hendan kwagh a Aôndo yô. Diabolo “lu orwuanor sha hiihii je,” zum u yange hii u hendan a Aôndo la. Er a lu ‘oraie man ter u mbaerenaie’ kpaa yô, ngu eren akaa a van a ihyom man ayôôso her zan zan nyian. (Yohane 8:44; 1 Yohane 3:11, 12) Bibilo pase kwagh na ér a wa angereke, shi nyoon ishima, shi a wa tswam.—Yobu 2:7; Mpase 12:9, 12, 17.
UUMACE MBA NGÔÔR KÔRON MBAGENEV IHYOM GA SHA CI U VE YINA. Orumace u hiihii la, ka Adam je la, yange dondo Satan, hingir u eren asorabo er un nahan. Kwagh la na yô, uumace mba ve due ken Adam ne cii hingir mbaasorabo shi ve yina. (Mbaroma 5:12) Wan u Adam u hiihii u i yilan un ér Kain la, yange kôr anmgbian na Abel ihyom je wua un. (1 Yohane 3:12) Nahan kpa, uumace mbagenev kpishi mba tesen ior dooshima shi mba zungwen mhôônom. Kpa er ve due a isholibo i Adam la yô, ior kpishi mba a ieren i soon iyol ve tseegh la, kua iyuhe man ihyagh. Aeren ne na yô, ka ve kôr mbagenev ihyom.—2 Timoteu 3:1-5.
OR KA NANA SOO KWAGH U MA NONGOIOR GA YÔ, NAN NGÔÔR KÔRON VE IHYOM GA. Ior i tar ne ngi samber a anza a bo man aferakaa a a ne ve ihyom i lu been ga yô. Anza a bo man aferakaa, er ieren i soon kwagh u ma nongoior ga, man i sangen a sange, kua ityuhwanev man ayongo a hiin man ayôôso a eren je vihin akaa a ior man akaa a gomoti sha apera, kua ambaakaa la nahan, samber sha tar hegen wuee, sha ci u “tar cii ngu sha ikyev i Iferor,” ka Satan Diabolo je la.—1 Yohane 5:19.
Nahan kpa, Bibilo pase akaa a a ve a ihyom la di tseegh tsô de ga, i pase kwagh u una va bee a ihyom la kpaa.
Kwagh Ugen u Alaghga Shi Una Doo U Yô
MBAMPIN MBA BIBILO I NE MLUMUN SHA MI LA
Aôndo Yange Gba Diabolo?
Ka han Satan a dughu? Nenge er i hii ve Yesu yange kaa ér Diabolo va kera “tile sha mimi ga” yô.
