Kwagh Wou Gba Aôndo Ishima
BIBILO ngi a kwaghwan u hemban doon cii sha ci u ka Mkaanem ma Aôndo. Bibilo ka takeda u tweregh ga, kpa ia fatyô u wasen se shighe u i lu se ken ishima er mbamzeyol asev gande se agee man shighe u se lu henen kwagh sha inja ga man shighe u i lu se ken ishima dang kua shighe u i vihi se iyol shin ishima i nyian se kpishi yô.
Kwagh u hemban cii yô, Bibilo kaa ér Yehova Aôndo a u a gbe se la fa mbamhen asev man er ka i lu se ken ishima la hemba hanma or cii. A kegh a kegh iyol u wasen se sha hanma zayol u se tagher a mi cii. Ikyav i tesen yô, nenge kwagh u i ôr ken avur a Bibilo ahar ne sha u surun se ishima yô:
“Yehova ngu ikyua a mba asema a vihin ve la; yem mba iyol i kpe ve yô.”—PASALMI 34:18; NWT.
“Mo, TER, Aôndo wou, M kôr uwegh ough ku yanegh; M kaa a we Mer: De cie ga, M wasen we.”—YESAIA 41:13.
Yehova ka a wase se u nôngon a mbamzeyol asev mba ken ishima nena? Er u lu ôron ngeren mba ve dondo ne yô, u nenge er Yehova a tese ér kwagh wase gba un ishima sha igbenda kpishi shi a soo u wasen se yô.
a Yehova ka iti i Aôndo kpôô kpôô.—Ekesodu 6:3.
