Yehova Aôndo kaa a vese ér se pase un hanma kwagh u a lu zan se iyol ken ishima cii. (Pasalmi 55:22) Zayol môm kehe gande shin ndahar gande u se er msen sha mi ga. Aluer kwagh la gba se kwagh yô, Yehova kpa a gba un kwagh. Aluer se mba eren msen hen a na yô, kwagh la una wase se u lun a bemshima.—Mbafilipi 4:6, 7.

Shighe u se lu yan ican a ma angev mbu ken ityou yô, a lu se inja er se mba tswen nahan. Ka hanma shighe ior mbagen vea kav kwagh u a lu zan se iyol la jighilii ga. (Anzaakaa 14:10) Kpa aluer se er msen hen Aôndo se pase un er i lu se ken ishima la sha mimi yô, una kegh ato a vese shi una kav kwagh u a lu zayol wase la jighilii. Yehova nengen a vese shi a fa zayol wase kua akaa a se lu nôngon a mi la, nahan a soo ér se er msen hen a na se pase un hanma kwagh u a lu zan se iyol cii.—2 Kroniku 6:29, 30.

Ka sea lamen a Yehova ken msen yô, se lu a vangertiôr ser kwagh wase gba un ishima. Se fatyô u lun a vangertiôr hen Yehova er Orpasalmi kpa lu a mi ve er msen nahan ér: “U nenge ican yam, U fa er i lu zan uma wam iyol yum yô.” (Pasalmi 31:7) Ka sea fa ser, Yehova fa akaa a se lu yan ican a mi la tseegh kpa, kwagh la a wase se u wan ishima shighe u se lu yan ican yô. Kpa ka a er kwagh i hemba di u fan ican i se lu yan la. Yehova fa se hemba hanma orgen cii, nahan ka a fa kwagh u a lu zayol wase yô, shi a sur se ishima shi a taver se ishima ken Bibilo.