Kwagh u I Gbe u U Tsua Yô
Ka akaa a se tsough u eren la aa na ve a saan se iyol shin a saan se iyol ga ye. Man Yehova kpa fa kwagh ne. Ka nahan ve a soo ér se dondon atindiakaa a na ye.
Yehova soo ér i saan se iyol shi se lu ken bem kpaa.
“TER Orpaan wou, Icighan u Iserael, ngu kaan nahan er: Mo M ngu TER Aôndo wou, M tese u kwagh u una lu u a inja yô, M hemen we sha gbenda u ú zenden sha mi la. Ma u ver ato sha atindi Am, tsô bem wou ma a lu er ifi nahan, man shi perapera wou kpaa ma a lu er agôndo a zegemnger nahan.”—YESAIA 48:17, 18.
Er Aôndo a gbe se yô, a fa gbenda u u hembe doon u se er kwagh ve a saan se iyol yô. A soo ér se dondon akaawan a na sha er a kpe se iyol yô. Ka sea dondon atindi a Aôndo yô, se kera hen a hen aluer akaa se tsough u eren la ka a dedoo shin ka a bo ga. Aluer se er nahan yô, se lu tsuan akaa a injaa a aa va se a bem man msaanyol yô.
Yehova soo ér se er kwagh u a gande se agee ga.
“Gadia tindi u m we u nyian ne a hemba u agee ga, man ngu ca kpaa ga.”—DUTERONOMI 30:11.
Alaghga a gba u se gema gbenda u se henen shi se eren kwagh la ve se dondo atindi a Aôndo a sha kwagh u aeren a dedoo la tsembelee ye. Nahan kpa, Yehova ver ishima ér se er kwagh u ganden se agee ga. Er i lu un a gbe se yô, a fa kwagh u se fatyô u eren kua u se fatyô ga la kpaa. Ka sea fa Yehova yô, se mase kaven ser “atindi a na yuhwa ga.”—1 Yohane 5:3.
Yehova tôndo zwa u wasen mba ve tsua u kuran atindi a na yô.
“Gadia Mo, TER, Aôndo wou, M kôr uwegh ough ku yanegh; M kaa a we Mer: De cie ga, M wasen we.”—YESAIA 41:13.
Se fatyô u eren akaa ken uma wase sha gbenda u Aôndo a soo la sha ci u una wase se u eren nahan. Una wase se sha ikyev i Bibilo i i lu Mkaanem nam la, sha ci u ka ma taver se ishima shi ma na se ishimaverenkeghen kpaa.
Ior umiliôn sha tar nenge ér ve dondo atindiakaa a Bibilo nahan hemba kpen ve iyol ken uma. Nahan seer henen sha akaa a injaa a Bibilo i we se la. U fatyô u hiin eren kwagh ne sha u henen antakeda u pasen Bibilo u U Fatyô u Lun Uma Gbem sha Won shi a Saan We Iyol! la, u zua a u gbilin sha jw.org/tiv. Ngu a mtom man ker:
-
Bibilo ia Wase U Nena?
-
Bibilo Ôr Akaa a Nan Se Ishimaverenkeghen
-
U Fatyô u Nan Jighjigh a Kwagh u Bibilo I̱ Ôr Kpa?
Nahan aluer u tôv kwagh u Bibilo i i lu Mkaanem ma Aôndo la tsembelee yô, u mase kaven er Bibilo i ye tsegh ga yô; shi i̱ “kuma u suur sha mi hanma shighe cii, hegen zan zan gbem sha won.” (Pasalmi 111:8, NWT) U dondon atindi a Bibilo a sha kwagh u aeren a dedoo la, ka kwagh u hemban doon u i gbe u se er a uma wase yô. Nahan kpa, Aôndo una kighir se ér se er nahan ga. (Duteronomi 30:19, 20; Yosua 24:15) Ka kwagh u i gbe u se cii se tsua a ishima yase u eren yô.
