Ior kpishi lumun ér akaa agen a ior ve eren la ka akaa a dedoo, kpa agen yô ka a bo je ka u henen a hen ga. Ikyav i tesen yô, ior nenge ér u wuan or, shin u kighir or yaven a nan, gayô u yaven a mbayev ka kwaghbo u vesen, kpa u zungwen ior mhôônom shi eren kwagh a ior sha inja man kundu kundu la ka aeren a dedoo. Kpa gema aeren agen er u lun a or u keren man u eren kwagh a ior sha mimi kua u yesen mbayev nahan di ye? Sha kwagh u aeren ne yô, ior kpishi nenge ér kwagh u or nan tsough u eren cii kwaghbo ngu sha mi ga. Ka ve hen ér, hanma kwagh u or nan tsough u eren cii ka u vough. Ashighe kpishi ior ka ve tsua akaa sha gbenda u ve nenge i doo ve la, man sha gbenda u ior mba hen ijiir ve ve nenge kwagh shon la. Kpa u eren nahan la ka shami?

Ashighe kpishi ka se tsua kwagh sha gbenda u se nenge ser kwagh la ka u shami shin ka u shami ga la. Man ka imoshima yase ka i na ve se er kwagh nahan ye. (Mbaroma 2:14, 15) Shighe u wanye nan lu cuku la je kpa, ka nan fa mkposo u ieren i dedoo a i bo, nahan ka nana er kwaghbo yô, ishima i na nan ibo kpishi. Shighe ka una karen yô, gbenda u i eren kwagh hen haregh wase la ka u bende a imoshima yase. Ikyav i tesen yô, gbenda u tsombor wase man atica a ase man azende a ase man ityô yase kua mba ken kwaghaôndo wase ve eren kwagh la, ka u bende a gbenda u se eren kwagh la. Ka sea tsua kwagh u se er yô, imoshima yase i wase se u fan aluer kwagh u se tsough la ka u dedoo shin ka u bo yô.

Ka sea fa kwagh u a lu u bo man u dedoo la yô, kwagh la a mgbegha se u zungwen mbagen mhôônom, shi wuese kwagh, shi eren kwagh a mbagen sha inja, shi den ve kwaghbo kpaa. Shi ka sea fa kwagh u a lu u bo man u dedoo la yô, se kera er kwagh u una vihi ior asev ga, shin kwagh u se hee shin se ya kunya shin ibo kpaa ga.

Ka hanma shighe kwagh u se henen la a lun shami yee? Orgen iti na ér Garrick, yange er uma kpishi shighe u lu gumor la, shi kaa ér, “Una er hanma kwagh u a doo un u eren cii.” Nahan kpa, yange va mase kaven er kwagh u injaa môm a dugh ken akaa a sha mnenge na yô a lu a vough la ga yô. A kaa ér yange saan un iyol ga sha ci u un lu “man mcimbim ma bom shi eren idya shi hunden msôrom shi eren ipila kpoghuloo.”

Se mba eren kwagh er se nenge i doo se la tseegh ga, ashighe kpishi ka se henen sha gbenda u mbagenev vea nenge akaa a se tsough u eren la kpaa. Ka sea eren kwagh er mbagenev kpa ve nengen ér doo u a er kwagh shon la yô, se hen kwagh ken a ve shi kwaghfan ve la kpa a lu se a iwasen. Shi ka sea eren kwagh u mba hen tsombor wase man azende ase, kua mba hen ijiir yase ve nenge ér ka u shami la yô, ve na se icivir kpishi.

Gbenda u mbagenev ve nengen kwagh la ngu lun vough hanma shighe? Gumkwase ugen, iti na ér Priscila, yange eren kwagh u mbakov na kpishi eren yô, nahan hii u yaven a ior je lu a vôso nom ga. Kpa va kav er kwagh u mbagenev ve nenge ér ka u shami la a ne un msaanyol ga yô. A kaa ér: “Er m lu eren kwagh u hanma or nan nenge ér ka u shami la nahan kpa, m zua a msaanyol ga. Kwagh la yange na m hingir u eren abumeakaa shi m ver uma wam sha zongo je kpaa.”

Ka gbenda u i lu se shin mbagenev ken ishima la ka u na ve se tsua kwagh u se nenge ser ka u vough la ye. Kpa ka sea tsua kwagh sha imba gbenda ne yô, ka hanma shighe kwagh u injaa ka a due ker ga. Ashighe agen kwagh u se tsough u eren la a fatyô u lun kwagh u una bula se a bula shin mbagenev je kpaa. (Anzaakaa 14:12) Man aluer se shin mbagenev nenge ma kwagh ér ka u shami je kpa, mhen la una fatyô u lun u shami ga, shi kwagh la una fatyô u bulan se, shin mnenge wase la una gema. Bee kera yô, akaa a yange ior nengen ér ka a bo la je kpa, ve hingir u nengen a hegen ér ka a dedoo. Man a yange i nengen a ér ka a dedoo la yô, hegen mba nengen a ér ka a bo.

Kwagh u hemban doon ngu u una wase se u fan kwagh u a lu u shami man u shami ga yôô? Man se fatyô u zuan a akaawan a sha kwagh u aeren a wang, a se dondo a nyian ve se va ahenge ken hemen ga yôô?

Kwagh er doo yô, se mba a akaawan a aa wase hanma or, hen hanma ijiir i nan lu cii, u fan kwagh u a lu u wang hanma shighe cii yô. Ken ngeren u a dondo ne, se lu nengen ape se zua a akaawan a injaa a aa wase se u fan kwagh u a lu u shami man u shami ga la.