Kwaghwan u Una Wase U Yô
Bibilo wase ior umiliôn imôngo sha igbenda inyiin.
1. Ivese
Ior mba a mbamnenge kposo kposo sha kwagh u ivesegh man sha kwagh u or a er ve, nana zua a msaanyol ken ivese i nan yô.
BIBILO KAA ÉR: “Hanma wen yô, kwase u nan a doo nan ishima er i iyol i nan i doo nan ishima nahan; kwase di nana naan nom u nan icivir tsung.”—MBAEFESE 5:33.
INJA I KWAGH NE: Ka Aôndo yange hii ivese ye, nahan a fa kwagh u i gbe u mba ve vese ayol a ve la vea er ve a saan ve iyol yô. (Marku 10:6-9) Aluer nom hemba wan kwase u nan ikyo shi kwase kpa hemba wan nom na ikyo yô, a hemba saan ve iyol. Nom u kwase u nan a doo nan ishima yô, nan eren kwagh a nan sha inja shi nan wan nan ikyo kpaa. Shi kwase u nan ne nom u nan icivir yô, nan suen nom u nan shi nan lamen a nan sha icivir kpaa.
KWAGHWAN U BIBILO NGU A INJA: Orgen mba yer iti na ér Quang vea kwase na Thi, mba ken tar u Vietnam. Ve nenge ér a tsa kpa ivese ve ia doo ga. Quang yange eren kwagh a kwase na kundu kundu ga. A kaa ér: “Yange kwagh gbaan mo sha kwagh u Thi ga, shi ashighe kpishi m er kwagh a na dang.” Thi yange soo ér se pav ivaa. Thi kaa ér: “Yange m kera na nomom jighjigh ga shi icivir kpa m kera naan un ga.”
Ica i gbe ga yô, Quang vea Thi hii u henen kwagh u Bibilo i tese yô, nahan ve fa er vea fatyô u dondon kwagh u i nger ken Mbaefese 5:33 la ken ivese ve yô. Quang kaa ér, “Ivur ne wasem u nengen er i hii ve i doo u me eren kwagh kundu kundu yô. Shi m nenge mer doo u Thi una doom ishima shi me nengen sha mbamgbe nav kpaa. Yange m ngur eren kwagh a Thi nahan yô, maa hii u eren kwagh a mo sha dooshima shi naan mo icivir.” Thi kaa ér, “Er m lu dondon kwagh u i nger ken Mbaefese 5:33 la yô, m lu doon un ishima seer a seer shi lu nengen sha mo shi se lu ken bem kpaa.”
Wea soo u seer zuan a iwanger sha kwagh u ivesegh yô, ôr Awake! u 2018 Namba 2, u a lu a itinekwagh ér “12 Secrets of Successful Families” la, sha jw.org.
2. Er Se Eren Kwagh a Mbagenev Yô
Ior ka ve shi nzughul a mbagenev sha ci u kwavyolough u ior mbara ngu kposo a u ve yum, shin sha ci u ve due ken ityar igen shin mba ze kwaghaôndo ugen shin mlu iyol ve a kaha, gayô mba nomso mba yaven a nomso shin kasev mba yaven a kasev yum.
BIBILO KAA ÉR: “Naan nen hanma injaor cii icivir.”—1 PETERU 2:17.
INJA I KWAGH NE: Bibilo kaa ér se kôr ior mba kwavyolough ve u lu kposo a u wase la ihyom ga, shi i̱ kaa ér se kôr ior ihyom sha ci u tar ve ngu kposo a u wase shin sha ci u kwaghaôndo ve kaha a u wase shin mba nomso mba yaven a nomso gayô kasev mba yaven a kasev yum ga. Kpa Bibilo gema kaa ér se naan hanma or icivir, a lu ior-il shin abuter, a lu ornyar shin icanor, shin a lu or u ken tar ugen kpaa. (Aerenakaa 10:34) Aluer se lumun a akaa a mbagenev ve ne jighjigh a mi la ga, shin gbenda u ve eren akaa la ga je kpa, se fatyô u eren kwagh a ve kundu kundu man sha icivir kpaa.—Mateu 7:12.
KWAGHWAN U BIBILO NGU A INJA: Yange i tese orgen u i yer iti na ér Daniel yô, u nengen ior mba ken veghertar u Ashia cii ér ka ior mba van a anzughul hen tar na. Sha nahan yô, Daniel kôr ior mba ken veghertar u Ashia cii ihyom, je a tuhwan ve ken igbar kpaa. Daniel kaa ér: “Yange m nenge ieren yam ne mer ka u tan ikyaa a tar wam. Cuku kpa yange m fa mer gbenda u m henen shin m eren kwagh la lu shami ga ze.”
Ica i gbe ga yô, Daniel va hen kwagh u Bibilo i tese yô. Nahan a kaa ér, “Yange gba u me gema mhen wam vindi vindi. Shi gba u me nengen ior er Aôndo A nengen ve la, vea lu ior mba ken tar ugen je kpaa.” Daniel pase er ka i lu un hegen shighe u un zua a ior yô. A kaa ér: “M kera zeren henen ape ve dugh ga. Ior cii doom ishima shi m ngu a azende hegen sha ajiir kposo kposo sha tar.”
Wea soo u seer zuan a iwanger yô za sha jw.org, za ôr Awake! u 2020 Namba 3, u a lu a itinekwagh ér “Is There a Cure for Prejudice?” la.
3. Inyaregh
Ior kpishi ka ve nôngon ér vea hingir mbainyarev sha er a saan ve iyol shi a va kpe ve iyol ken hemen yô.
BIBILO KAA ÉR: “Kwaghfan kor or sha kwagh u vihin di er inyaregh nahan kpaa; kpa mhembe u mfe yô, ka er kwaghfan a kor uma u or u nan lu a mi la.”—ORPASENKWAGH 7:12.
INJA I KWAGH NE: Gba u se lu a inyaregh ve se kure mbamgbe asev ye, kpa ka ki kia na ve se zua a msaanyol shin kia na se mkpeyol ken hemen ga. (Anzaakaa 18:11; 23:4, 5) A gba u se dondon kwaghfan u a dugh hen Aôndo la cii ve se zua a msaanyol shi uma wase una va lu a inja ken hemen ye.—1 Timoteu 6:17-19.
KWAGHWAN U BIBILO NGU A INJA: Orgen ken tar u Indonesia iti na ér Cardo, yange hemba veren ishima sha inyaregh ki keren. A kaa ér: “Yange m lu a akaa a ior kpishi keren yô. Yange m zende sha tar, shi m yam akaa a taver ishe kpishi, kua umato man uyaav kpishi.” Kpa inyaregh kin tsa kpishi ga. Cardo kaa ér: “Yange orgen bumem, ngohol mo inyaregh cica cii. Inyaregh ki m ya ican, m er tom anyom imôngo cii ve m zua a mi la bee kwa môm. Yange m vihi shighe wam cii u keren inyaregh, kpa ken masejime yô, m va hingir aveve shi m va ahenge sha ci u m kera shi a kwagh môm ga, shi m kera gba kwagh kpaa ga.”
Cardo yange hii u dondon kwaghwan u Bibilo sha kwagh u inyar. Yange kera ver ishima na cii sha u keren uzegembaakaav ga, kpa gema eren kwagh ken uma akuma akuma. A kaa ér: “M nenge mer ka hegen jighilii m lu ornyar ye, sha ci u m hemba yan ijende vea Aôndo hegen kangenaa. Ka m yav tugh mem mem, shi hemba saan mo iyol hegen.”
Wea soo u seer zuan a iwanger sha kwagh u Bibilo i ôr sha kwagh u inyar yô, ôr ngeren u sha jw.org/tiv u a lu a itinekwagh ér “Makeranta man Inyaregh Tseegh Kuma u Van Or a Mkpeyolo?” la, ken Iyoukura, Namba 3 2021.
4. U Yaven a Or
Ior mba a mbamnenge kposo kposo sha kwagh u yavaor; ve gba zwa môm sha kwagh u a lu u shami sha ikyaa ne ga.
BIBILO KAA ÉR: “Nyagh idya. Hanma wen nana̱ fa u kôron iyol i nan tsaha sha er ia lu wang shi ia lu a icivir yô, de eren nen hua sha u lun a isharen i yaven a or, i ior ve kôron iyol tsaha sha mi ga, er akuraior a a fe Aôndo ga la a eren nahan la ga.”—1 MBATESALONIKA 4:3-5.
INJA I KWAGH NE: Bibilo ver ikighir sha kwagh u kuren asaren a ase a yaven a or la. Ishember i “idya” la wa gbaga u eren man aeren a ijimbagh hen atô u ior mba ve vôso a ayol a ve ga man u nomso yaven a nomso shin kasev yaven a kasev kua u or yaven a zendenya la kpa ker. (1 Mbakorinte 6:9, 10) U yaven a or ka kwagh u injaa u Aôndo a ne uumace yô, kpa iyua ne ngi sha ci u mba ve vôso ayol a ve la tseegh.—Anzaakaa 5:18, 19.
KWAGHWAN U BIBILO NGU A INJA: Kwase ugen ken tar u Australia iti na ér Kylie, a kaa ér: “Er m lu kwav yô, yange m hen mer aluer m yav a or yô, me doo nan ishima shi me gba nan kwagh kpaa. Kpa kwagh gema er nahan ga. Yange lum er m gba kwagh ga nahan, shi ishima gema vihim a vihi.”
Shighe karen yô, Kylie hen kwagh u Bibilo i ôr sha kwagh u yavaor yô, shi dondo kwaghwan shon kpaa. A kaa ér: “M nenge mer atindi a Aôndo ka a wase se sha er kwagh a bula se shin se zua a ishimavihin ga yô, hegen m nenge mer m gba kwagh shi m doo mbagenev ishima sha ci u m ngu eren kwagh u Yehova a soo yô. Er m lu dondon kwagh u Bibilo i tese yô, kwagh la kuram sha mbamzeyol mba ma m nyer ker la!”
Wea soo u seer zuan a iwanger yô, za sha jw.org za ôr ngeren u ken zwa Buter, u a lu a itinekwagh ér, “What Does the Bible Say About Living Together Without Marriage?” la.
Aôndo u a gbe se la tese se kwagh u a lu u shami man u shami ga yô. Shin er ka i lu kwagh u zange u dondon atindiakaa a na a sha kwagh u anza a dedoo la ga nahan kpa, ka sea dondo a yô, kwagh la a wase se. Doo u se fa ser, se er nahan yô a saan se iyol gbem sha won.
