NENGE KWAGH U DOON TSUNG NE SHA WONO! Un u a gbe se la tôndo zwa ér una na se uma u tsôron shin tar ne. Nahan kpa, ior kpishi kwagh ne taver ve u nan jighjigh a mi. Ka ve kaa ér, ‘Hanma or yô, gba u nana kpe iyange igen. Kape sha gbaaôndo je kwagh u uma man ku a lu je la.’ Mbagenev yô, nenge ér or a fatyô u lun uma gbem sha won, kpa ka shin tar ne ga. Ka ve kaa ér, saa or nana kpe, nana yem sha tartor ve nana zua a uma u tsôron ye. We u nenge nena?

Kpa cii man u na mlumun sha mpin ne yô, hii nan ve u time sha mlumun u Bibilo i ne sha mbampin mba utar mban ne ga: Gbenda u yange i gbe or la tese ér yange soo ér nana lu uma gbem nena? Sha hiihii la lu nyi yange i lu awashima u Aôndo sha ci u tar man uumacee? Ku va hingir u van sha tsombor u uumace cii nena?

Orumace due kposo a akaa a uma agen a Aôndo a gbe shin tar ne la cii. Nena yô? Bibilo kaa ér ka uumace tseegh i gbe ve sha inja i “mlu” u Aôndo man sha “ibeen” na ye. (Genese 1:26, 27) Inja i kwagh ne ér nyi? Inja na yô, yange i gba uumace a anza man aeren a Aôndo la, er dooshima man ieren i mimi nahan.

Kwagh ugen yô, i gba orumace a tahav mbu fan kwagh u dedoo man u bo, kua isharen i fan Aôndo shi yan ikyar kôôsôô a na la. Ka nahan ve se fetyô u lun a iwuese sha, sha man tar u doonashe tsung ne man igbetar kua tomavee man ityogholough kua atsam ye. Kwagh u hemban cii je yô, i gba orumace a tahav mbu nana fatyô u civir Un u a gbe akaa la yô. Aeren a orumace nan lu a mi ne na yô, nan due kposo kpishi a akaa a uma agen a i gbe shin tar ne la.

Sha nahan yô, time ase sha kwagh ne: Luun er Aôndo yange soo ér uumace ve lu uma sha annyomov kpuaa tseegh yô, ma na ve aeren a doon tsung ne kua ian i lun a ikighir ga u lun a a shi sôron a sha er a hemba doon yôô? Mimi u kwagh ne yô, Aôndo yange na uumace a eren a doon tsung ne man tahav sha er se fatyô u ember uma shin tar ne gbem sha won yô.

Nahan kpa, mbagenev kaa ér mayange Aôndo washima ér uumace ve lu uma shin tar gbem sha won ga. Ka ve kaa ér yange i gba tar ne ér u lu ya u uumace sha anshighe kpuaa, sha er a kar a fa uumace mba ve kom u yemen sha za lun vea Aôndo gbem sha won la yô. Kpa aluer kwagh ne ka mimi yô, a tese ér ka Aôndo a ne ve tar u iv a ifer shi u vihi cica cii nahan ga zee? Aluer kwagh ngu nahan yô, una lu vendan mlu  u Aôndo la jighilii. Bibilo ôr kwagh na, kaa ér: “Igbenda Na cii, ngi jighilii. Ka Aôndo u jighjigh, ngu a ifer ga, Un ka u perapera man u mimi.”—Duteronomi 32:4.

Bibilo pase awashima u Aôndo u hiihii sha ci u tar ne la wang, sha mkaanem man, ér: “Usha ka Usha mba TER, kpa tar yô, A na ônov mba iorov.” (Pasalmi 115:16) Sha mimi yô, Aôndo gba tar u doonashe ne ér u lu ya u uumace gbem sha won shi u iv a akaa a se lu a mi ve se ember uma gbem sha won la.—Genese 2:8, 9.

“Usha ka Usha mba TER, kpa tar yô, A na ônov mba iorov.”—Pasalmi 115:16

Shi Bibilo pase awashima u Aôndo sha ci u uumace la wang. Aôndo yange kaa a Adam man Ifa, uumace mba hiihii mbara ér, “iv nen tar, gema nen u, u̱ lu sha ikyev yen . . . hanma kwagh u uma u a zenden sha tar cii.” (Genese 1:28) Kwagh u nengen sha Paradiso shi samber a mi sha tar cii la, lu ian i civirigh je Aôndo na ve ye! Jighilii yô, kwagh u lu keghen Adam man Ifa kua mbayev mba lu u shighe a kar ve vea mar la yô, lu uma u tsôron shin tar, lu iyua i yemen sha ga.

Tsô, se mba kpen sha ci u nyi? Bibilo kaa ér môm ken mbatyomov mba Aôndo, u shighe kar yô, i va gema yilan un ér orhembanato Satan Diabolo la, yange nôngo ér una vihi akaa a Aôndo sôr ver vough vough ken sule u Eden la. Nena?

Satan yange mee mbamaren asev mba hiihii mbara, Adam man Ifa, ve dondo un sha u hemban Aôndo ato. Satan yange kaa a ve ér Aôndo ngu nyumen ve kwagh u dedoo, inja na yô, a venda u nan ve ian i tsuan kwagh u dedoo man u bo ayol a ve, sha nahan yô, ve tsua u dondon Satan, geman hemban Aôndo di ato. Lu nyi due kere? Shighe kar yô, ve kpe di vough er Aôndo ta ve icin nahan. Yange ve kera lu a ian i lun uma ken Paradiso shin tar gbem sha won ga.—Genese 2:17; 3:1-6; 5:5.

Ihyembeato i Adam man Ifa la ngi benden a uumace zan zan nyian. Mkaanem ma Aôndo kaa ér: “Er isholibo nyôr shin tar sha or môm, man ku gema va sha ci u isholibo yô, nahan ku va sha ior cii.” (Mbaromanu 5:12) Se mba kpen sha ci u se ya dyako u isholibo man ku hen mbamaren asev mba hiihii mbara, ka sha ci u Aôndo vande ‘tsuan’ sha gbenda u se fatyô u kaven ga, ér se va kpeen ga.

Ihyembeato i ken Eden la i gema awashima u Aôndo u hiihii sha ci u uumace man tar la ga. Dooshima u vough u Aôndo man ieren na i mimi la mgbegha un due a gbenda u yiman se sha ikyev i isholibo man ku. Apostoli Paulu pase kwagh ne ér: “Injar i isholibo i kimbin yô, ka ku, kpa iyua i sha mlumun u sha mhôôn u Aôndo yô, ka uma u tsôron ken Kristu Yesu Ter wase.” (Mbaromanu 6:23) Dooshima yange mgbegha Aôndo “na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron” yô. (Yohane 3:16) Er Yesu na naagh ku ipaan a ishima na yô, a paa hanma kwagh u saa sha ikyev i Adam la cii. a

Ica i a gba ga je tsô, ityendezwa i Aôndo a er ér tar u a va hingir paradiso la ia hingir kwagh u mimi. We kpa u fatyô u va zuan a iveren i doon tsung ne, aluer u ungwa kwaghwan u Yesu ne yô, ér: “Nyôr nen hen hunda u hogholoo, gadia gbenda u zan ken mtim la gbangese, ngu bele bele kpaa, man ior mba ve nyer her yô, ve ngee tsô. Gadia hunda hoghor, gbenda kpaa imbishi u u ze sha uma la, mbazuan a mi mba kpeghee tsô.” (Mateu 7:13, 14) Sha kpôô yô, mlu wou u ken hemen la har sha akaa a u tsough u eren la. Sha nahan yô, ka nyi u ere?