U FATYÔ U TSUAN MA MLU JIGHILII U U SOO WER U VA LU SHA MI KEN HEMEN YÔÔ? Ior mbagenev na jighjigh ér, er ve tsough kwagh u una va er ve ken hemen la ga nahan kpa, i vande tsuan kwagh u una va er ve ken uma yô sha ci ve. Shighe u ve kera fetyô u eren akaa a ve tsough u eren la ga yô, ka ve kure ikyaa ér gba u kwagh a lu nahan. Ve kaa ér, “I vande tsuan ér m de eren akaa a m tsough u eren la ga!”

Mbagenev yô, nenge er tar u se lu shin mi ne u iv a mkighir man ijirôron i mimi ga yô, nahan ve vôr a uma, sha ci u ve fa kwagh u vea er ga. Alaghga ve nôngo ér vea na uma ve a lu guda, kpa ve nenge er hanma shighe yô, ityav man ifer man uaahe man angev ka ve vihi mbaawashima vev mbara yô. Sha nahan yô, ka ve pine ayol a ve ér, ‘Ishima ngi zan mo iyol sha ci u nyi?’

Ka mimi mbamlu mba u tagher a mi ken uma la vea fatyô u benden a akaa a u we ishima u eren ken uma la kehelee je. (Orpasenkwagh 9:11) Nahan kpa, hide sha kwagh u mlu wou u ken hemen u tsôron la yô, u ngu a kwagh jighilii u u tsua yô. Sha kpôô yô, Bibilo tese ér mlu wou u ken hemen la har sha kwagh u u tsough la. Nenge ase kwagh u i er ne.

Mose, orhemen u ikyuior i Iserael u sha ayange a tsuaa la, yange kaa a ve shighe u shi kpuaa u vea nyôr ken Tar u Ityendezwa la ér: “M ver uma man ku sha ishigh yough, man shi iveren man ifan; yô, tsuwa uma sha er ú lu uma, we a tsombor wou; er TER, Aôndo wou, A̱ doo u ishima, u̱ ungwan imo Na, u̱ var a Na” yô.—Duteronomi 30:15, 19, 20.

“M ver uma man ku sha ishigh yough, man shi iveren man ifan; yô, tsuwa uma.”—Duteronomi 30:19

Ka mimi! Aôndo yange due a Mbaiserael ken kpan ken Igipiti kera shi na ve ian i zan ikyura shi zuan a msaanyol ken Tar u Ityendezwa la. Kpa lu u vea gba zuan a averen la tsô ga. U ve zua a averen shon yô, gba u vea “tsuwa uma.” Nena? ‘Sha u soon Aôndo shi ungwan imo na shi varen a na.’

Nyian kpa, ka kwagh shon môm tsô i ver u ér we u tsua ye, nahan kwagh u u tsough la, una tese er mlu wou u ken hemen la una va lu yô. Aluer u tsua u soon Aôndo shi ungwan imo na shi varen a na yô, ka uma je u tsough ye, inja na yô, u va zua a uma u tsôron ken paradiso shin tar. Kpa hanma gbenda yô, wa nyi kere?

Dooshima ka ieren i Aôndo i vesen. Icighan jijingi yange mgbegha apostoli Yohane nger ér, “Aôndo ka dooshima je.” (1 Yohane 4:8) Sha ityôkyaa ne yô, yange ka pinen Yesu tindi u a lu u vesen ken atindi cii la yô, a kaa ér: “Ter Aôndo wou A̱ doo u ishima a ishima you cii man a uma wou cii man a mfe wou cii.” (Mateu 22:37) Sha nahan yô, ikyar i yan kôôsôô vea Yehova la, gba u ia har sha dooshima, a lu sha mcie shin u gban ungwan imo na tsô la ga. Kpa, gba u se tsua u soon un sha ci u nyi?

Dooshima u Yehova sha uumace la ngu er dooshima u mbamaren ka ve lu a mi sha mbayev vev la nahan. Er mbamaren ve yen nahan kpa, mbamaren mba ve lu a dooshima la, ka ve wa mbayev vev kwagh shi ve taver ve ishima shi ve sue ve shi ve tsaha ve sha ci u ve soo ér i saan mbayev vev iyol shi ve za ikyura. Ka nyi mbamaren ka ve soo ér vea zua a mi ken mbayev veve? Ka ve soo ér mbayev vev ve soo ve shi ve ungwa kwagh u ve mbamaren ve tese ve sha ci u iwasen ve la. Nahan aluer Ter wase u sha u a lu vough la soo ér se tese iwuese sha akaa cii a a er a vese la nahan a lu sha inja gaa?

Ken zwa u yange i nger Bibilo ker la yô, ishember i “ungwa” la ashighe kpishi yô, inja na ka i wa u “eren kwagh sha imo i or” la kpa ker. Ka kwagh u ka sea kaa a wanye ér “Ungwan mbamaren ou” ve se ver ishima ser ve er la ga zee? Sha nahan yô, kwagh u ungwan imo i Aôndo la, inja na yô, ka u henen shi eren sha kwagh u a kaa ér se er la. Kpa er se fatyô u ungwan imo i Aôndo kpôô kpôô ga yô, ka se ungwa un sha u ôron Bibilo shi dondon kwagh u a lu ken Mkaanem nam, Bibilo la.—1 Yohane 5:3.

Er Yesu soo u tesen mluainja u ungwan imo i Aôndo la yô, sha shighe ugen la a kaa ér: “Ka sha bredi tseegh or á lu uma ga, kpa ka sha hanma kwaghôron u a dugh sha zwa u Aôndo yô.” (Mateu 4:4) Er kwaghyan u iyolough a lu se a inja nahan, kape kwagh u zuan a mfe u Aôndo la kpa a lu vough je la, kpa jim je yô, kwagh u zuan a mfe u Aôndo la hemba ngun a inja. Sha ci u nyi? Tor u lun a kwaghfan Solomon pase ér: “Kwaghfan kor or sha kwagh u vihin di er inyaregh nahan kpaa; kpa mhembe u mfe yô, ka er kwaghfan a kor uma u or u nan lu a mi la” yô. (Orpasenkwagh 7:12) Mfe man kwaghfan u a dugh hen Aôndo la una fatyô u kuran se nyian shi una wase se u tsuan akaa sha kwaghfan a a va za a vese ken uma u tsôron ken hemen yô.

Umbur injakwagh i Yesu i se vande timen sha mi ken ngeren u ken ijime la, Yesu kaa ér: “Gadia hunda hoghor, gbenda kpaa imbishi u u ze sha uma la, mbazuan a mi mba kpeghee tsô.” (Mateu 7:13, 14) Shighe u se lu zan zende sha imba gbenda la yô, ka u henen a hen ga, aluer se soo u zan nyôron ape se lu zan la yô, saa se lu a or u nan fe u tsembelee shi se var a nan ve, se za se nyôr her ye, ka ken uma u tsôron je la. Sha nahan yô, se mba a ityôkyaa i dedoo i varen a Aôndo. (Pasalmi 16:8) Kpa se er kwagh ne nena?

Hanma iyange yô, akaa ka a lu kpishi a i gba u se er yô, shi akaa agen kpa ka a lu kpishi a se soo u eren yô. Amba akaa la a a fatyô u danen se shin a fatyô u nan se kera lu a shighe u henen sha kwagh u Aôndo a soo ér se er la ga. Ka nahan ve Bibilo i umbur se ér: “Nenge nen vighe vighe er ne zenden yô, i̱ de lu er mbalanenkwagh nahan ga, kpa i̱ lu er mbafankwagh nahan. Man waan nen ian yen ikyo, gadia ayange ne ka a bo je” ye. (Mbaefese 5:15, 16) Aluer se nenge ikyar i se ye vea Yehova la ér ka kwagh u hemban lun a inja cii ken uma wase yô, se lu kôôsôô a na.—Mateu 6:33.

Er u fatyô u geman akaa a a er u a kar ken ijime la ga nahan kpa, u fatyô u eren akaa a a na we kua mba ve doo u ishima la cii ne va lu ken mlu u dedoo ken hemen yô. Bibilo pase ér Ter wase u sha, Yehova Aôndo soo se kpishi shi a tese se, se fa kwagh u se eren ve una nenge a doo un yô. Nenge ase mkaanem ma profeti Mika ne, ér:

“A tese u, kwagh u dedoo, we or; tsô ka nyi TER A keren her a we, saa u eren kwagh u mimi man u soon u zungwen mhôônom, man u hiden a iyol ijime er u zenden vea Aôndo wou la gaa?”—Mika 6:8.

U lumun mlehe u Yehova a lôhô u ér we u va zende vea na, nahan we u zua a averen a tsôron a un ver sha ci u ior mba ve zenden vea na la kpa? Ka we u tsua kwagh u u soo wer u er la ye!