Een, Ityôkyaa i Injaa Ngi I Lun Uma
Kwase u Faizal yange kpe, ka gbe nôngon u a iv inyom yô, un kpa gba u pav un ishima. A kaa ér: “Er m ôr takerada u Bibilo u Yobu la yô, m kav mer Yehova na i nger u ken Bibilo sha ityôkyaa. Ka sea tagher a zege zayol, man sea ôr kwagh u or u yange nan kpa nan tagher a zayol ve lu nan ken ishima er se nahan yô, se zua a ishimasurun.” Shi a kaa ér: “Nahan kpa ityôkyaa i injaa ngi i lun uma.”
Tarsha yange lu gumkwase shighe u ngô na kpe la. A kaa ér: “U fan Un u a gbe se la, ka a na uma a lu a inja, man ishimaverenkeghen kua msaanyol, shin er alaghga se lu tagher a mbamzeyol nahan kpaa. Se fatyô u lun a vangertiôr ser, Yehova una fatyô u suen se shi wasen se hanma iyange.”
UNGEREN mba ken ijime la, tese er uaahe kposo kposo, vea fatyô u nan a lu inja er uma taver se je gande u wan ishima a mi yô. Er u lu wan ishima a mbamzeyol ou ne, alaghga u lu henen wer uma yô ngu a inja je-o, shin a lu u inja er ormôm tsô kpa nan wa u ikyo ga yô. Lu a vangertiôr wer Aôndo wa ikyo sha ican i u lu yan la. U doo un ishima.
Or u a nger Pasalmi 86 la, yange kaa ér un suur sha Aôndo: “Sha iyange i ican i tserem yô, me yila U, gadia Ú ungwam.” (Pasalmi 86:7) Kpa, alaghga u pine wer, ‘Aôndo una yimam “sha iyange i ican i tserem” la nena?’
Er alaghga Aôndo una kar a mbamzeyol ou kera fese ga nahan kpa, Bibilo i i lu Mkaanem nam la, na u vangertiôr ér, una fatyô u nan we bemshima u una wase u u nôngon a mbamzeyol ou yô, ér: “Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun, man bem u Aôndo u a gande hanma mfe wase cii una kura asema a en man mbamhen enev ken Kristu Yesu ye.” (Mbafilipi 4:6, 7) Wea lumun yô, de se nenge er avur a Bibilo ne a ne se vangertiôr ér Aôndo wa se ikyo sha mimi yô.
Aôndo Wa U Ikyo
“Aôndo hungur mô ve [atsator] môm ga, [NW ]. . . Mbaatsator kpishi je kpaa ne hemba ve inja.”—Luka 12:6, 7.
NENGE: Annyonov mba kpuaa, er mbaatsator nahan mba ve gbe kwagh hen ishigh ki ior mbagenev ga la je kpa gba Aôndo kwagh, we ve ikyo. Atsator u a ndahar kpishi la je kpa, Aôndo nengen a mi; hanma ve yô, gba Aôndo kwagh. Uumace hemba gban Aôndo kwagh a mbaatsator ica je. Ka uumace ve hembe lun kwagh u vesen ken akaa a Aôndo a gbe la cii ye. I gba ve sha “ibeen” i Aôndo shi vea fatyô u lun shi tesen aeren a Aôndo a doon tsung la.—Genese 1:26, 27.
“TERE, U tôvom, U fam. . . . U fa mhen wam . . . Karem, fa mbamhen av.”—Pasalmi 139:1, 2, 23.
NENGE: Aôndo fa u tsembelee. A fa akaa a ka u henen ken atô u ishima you la man mbamzeyol ou. Er alaghga mbagenev vea fa mbamzeyol ou man ishimanyian you ga nahan kpa, Aôndo yô, wa u ikyo shi a soo u wasen we. Kwagh ne na yô, ityôkyaa i injaa ngi i lun uma.
Uma Wou Ngu a Inja
‘TERE, ungwa msen wam, mliam am ma nyôr her a We. . . . Ver ato her a mo, sha iyange i me yila yô, rumun mo fese; . . . A ungwa msen u mba ve lu a orjime ga yô.’—Pasalmi 102:1, 2, 17.
NENGE: Ka inja er sha mhii u uumace hii ican i yan la je, Yehova fa mliam ma uumace ve lu vaan sha ci u ican i yan la nahan. (Pasalmi 56:8) Mliam man kua ma ou mara kpaa. Aôndo umbur mbamtaver ou man mliam ou cii, sha ci u u doo un ishima.
“De enger kenger sha mcie ga, gadia Mo M ngu Aôndo wou, M taver we, shi M wasen we . . . Mo, TER, Aôndo wou, . . . M kaa a we Mer: De cie ga, M wasen we.”—Yesaia 41:10, 13.
NENGE: Aôndo kegh a kegh iyol u wasen we. Aluer u gba yô, una kôr u a mough a mi sha.
Ishimaverenkeghen Ngi Ér Akaa a Va Doo ken Hemen
“Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.”—Yohane 3:16.
NENGE: U doo Aôndo ishima je yô, yange na Wan na, Yesu hingir nagh ku ipaan sha ci wou. Nagh kun na u ishimaverenkeghen i va lun saan saan shi zuan a uma u injaa gbem shawon. *
Er alaghga u tagher a mbamzeyol shi alaghga a lu inja er uma taver we je gande nahan kpa, hen mkaanem ma Aôndo shi taver jighjigh u u ne uityendezwa mba Aôndo la. Kwagh ne una na a saan we iyol shi u lu a vangertiôr wer ityôkyaa i injaa ngi i u lu uma yô.
^ par. 19 Wea soo u seer fan er u fatyô u zuan a iwasen ken nagh ku Yesu kura yô, nenge vidio i i lu a itinekwagh ér Umbur Ku u Yesu la sha www.pr418.com. Za ape i nger ér ITYAKERADA > ICER I VIDIO> MBAMKOMBO ASEV MAN TOM WASE la.
Kwagh Ugen u Alaghga Shi Una Doo U Yô
KYAMPEN I VESEN
Doo u Ú Hen Bibilo sha ci u Nyi?
Bibilo ngi tan ior umiliôn umiliôn sha tar cii iwanger sha akaa a hange hange a a tsum ve la. We kpa u soo u zuan a iwanger shonoo?
IYOUKURA
Msen Una Wase U sha Akaa Kpishi
Aluer u ngu eren msen hanma shighe yô, ka mtsera u nyi u zua a mini?
IYOUKURA
Er U Fatyô u Zuan a Iwasen ken Ikyo i Wan I Aôndo la Yô
Ruamabera wase se u nan uityendezwa mba Aôndo mba doon tsung mba ken hemen la jighjigh.
IYOUKURA
Iyua i Aôndo I Hemban Cii La
What factors make one gift more valuable than another? Giving thought to such factors can help us deepen our appreciation for the ransom.
