U tesen ikyav yô, Sally, * u a lu ken tar u Amerika, u yange uraahumbe va vihi un akaa kpishi la kaa ér: “Yange lum inja er me kera fatyô u wan ishima a ishimanyian ga nahan. Yange lum ken ishima inja er shi cuku me kpe kera nahan, ayange kpishi.”

Shin aluer or u doon se ishima nan kpe di ye? Janice, u a lu ken tar u Australia la kaa ér: “Wan wam u nomso yange kpe, anyom nga karen ahar yô, wan wam u nomso ugen la kpa kpe. Shawon yange duem ishima, nahan gba u me hide me sôr akaa ken uma, er m fetyô la cii. Yange m zamber Aôndo m kaa a na mer: ‘Me kera fatyô u wan ishima a mnyoon man ican kua iuren ga! De m kpe kera. M soo u lun uma ga.’”

Daniel di kwase na yange er idya, nahan va pase un ér un er idya, kwagh ne kpiligh Daniel iyol shi ishima vihi un ker tsung. Daniel kaa ér: “Shighe u kwase wam kaa a mo ér un er idya la, vihim pev. Hanma shighe u yange mea umbur kwagh ne yô, i vihim tsung. Yange lum ken ishima nahan iwer imôngo.”

Ken mgber u Iyoukura ne, se lu tôvon nengen er akaa a a dondo ne a er se je kpa, se fatyô u zuan a ityôkyaa i zan hemen u lun uma yô

• Shighe u aahe a er yô

• Shighe u or doon we ishima nan kpe yô

• Shighe u nom shin kwase wou nan er idya yô

• Shighe u u lu wan ishima a bouange yô

• Shighe u i lu inja er mbamzeyol ou mba ganden we agee yô

Hiihii yô, shighe u aahe a er yô, se fatyô u nôngon a mi nena?