I LU Nahan u ure tsung, maa u tôm wer guda ma u kpe kera vee? Aluer ka nahan yô, alaghga u kav er lu Adriana ken ishima yô. Yange ishima nyian un tsung shi ure, nahan kera lu a ishimaverenkeghen ga. Yange i zua Adriana a angev mbu ka mbu na or ure hanma shighe cii la.

Shi nenge ase kwagh u er or u ken tar u Japan u i yer un ér Kaoru, u yange lu nengen sha mbamaren nav mba ve beeyol shi ve lu uange la. A kaa ér: “Hen shighe ne, m lu tagher a hang tsung sha tom, nahan m vôr gbeda gbeda. Shighe kar yô, kwaghyan kera lu zan mo zwa ga, shi m kera faantyô u yaven ga. Maa m hii u henen mer, aluer m kpe yô, mbamzeyol av cii vea bee kera.”

Or u ken tar u Najeria u i yer un ér, Ojebode la, kaa ér: “Yange m ure hanma shighe cii je yô, m vaan a vaa, maa m gba keren gbenda u wuan iyol yam.” Kwagh er doo yô, Ojebode man Kaoru kua Adriana cii yange ve wua ayol ave ga. Kpa hanma inyom yô, ior udubu uderi imôngo ka ve wua ayol ave.

Mba ve hembe wuan ayol ave yô, ka nomso, sha ci u ve kpishi kunya ka u kôr ve tsung u pinen mbagenev iwasen. Yesu yange kaa ér, ka mbauangev kwagh a gbe ve a ortwer ye. (Luka 5:31) Sha nahan yô, aluer we kpa ka u ure tsung je, i lu u pe wuan iyol you yô, kunya u de ker u, u keren iwasen ga. Mbakpishiv mba ve lu nôngon a iuren la, nenge ér twer u ken iyouci ua fatyô u wasen ve u nôngon a zayol ve ne. Ojebode man Kaoru kua Adriana cii yange ve zua a iwasen ken iyouci, nahan hegen ve hemba fan gbenda u nôngon a zayol ve ne.

Alaghga mbatwerev vea fatyô u eren or u nan lu a angev mbu iuren la twer shin pasen nan kwagh u nana er ve a wase nan la gayô eren tom a igbenda ihiar ne cii sha u sôron nan. Ior mba ve lu a angev mbu iuren la, ka ve soo ér mba hen tsombor ve man azende a ve a kav er i lu ve ken ishima la, shi a sue ve shi a waan ve ikyo shi a waan ishima a ve kpaa. Or u i hembe doon u se ya ijende a nan yô, ka Yehova Aôndo, u a ne se iwasen i doon tsung ken Bibilo, i i lu Mkaanem nam la.

Mba ve lu a angev mbu iuren la, alaghga a gba u a er ve twer shighe gôgônan shi alaghga a gba u vea gema aeren a ve. Aluer u ngu nôngon a angev mbu iuren kpa, u fatyô u veren ashe a mlu u nan msaanyol u ken hemen la, er Ojebode nahan. A kaa ér: “M ngu veren ashe u va nengen a m-iv u Yesaia 33:24, u a tsengaôron shighe u ormôm shin tar nana va kera kaa ér ‘Kwagh nyoon mo, ga’ la.” Zua a ishimasurun ken ityendezwa i Aôndo i va nan se “tar u he,” ape “ican” i uange ia va kera lu ga la. (Mpase 21:1, 4) Ityendezwa ne tese ér or a va kera lu a angev mbu nan nan hang ken ityou man ken ishima ga. Angev mbu nan or iuren cii mbua va kera lu ga gbem shawon. Mayange u “kera umbur akaa a tsuaa la ga, man shi aa kera va [u] ken ishima kpaa ga.”—Yesaia 65:17.