Ka Hanma Shighe Tartor u Aôndo Ua Hemen Tara?
Mbadondon mba Yesu mba jighjigh mbagenev yange ve soo u fan shighe u Tartor u Aôndo ua hii u hemen la. Yesu na mlumun sha mpin ve la kaa ér, vea fatyô u fan shighe jighilii u Tartor la ua hemen tar ga. (Aerenakaa 1:6, 7) Kpa yange vande kaan a mbadondon un ér vea va nengen akaa agen a a kohol a eren hen shighe môm yô, ve fa je ér “Tartor u Aôndo ngu ikyua ikyua” shi kuma u ua hii u hemen tar.—Luka 21:31.
KA AKAA A NYI YESU KAA ÉR A A ERE?
Yesu yange kaa ér: “Ikyurior igen ia mough ityav a ikyurior igen, shi tartor ugen ua mough ityav a tartor ugen. Tar ua tenger tsung sha ajiir kpishi, shi ijen ia gba sha ajiir kposo kposo, shi ubombauangev vea lu sha ajiir wue wue.” (Luka 21:10, 11) Akaa a a lu eren hen shighe môm ne a a tese ér “Tartor u Aôndo ngu ikyua ikyua.” Akaa ne kohol nga eren hen shighe môm shi ior mba nengen a a sha tar wueele? Nenge ase mimi u kwagh ne.
1. ITYAV
Ken inyom 1914 la, ityav pev sha tar sha gbenda u i lu a vande nôngon ityav ga yô! Mbatimen sha kwagh u yiase ka ve kaa ér 1914 lu inyom i akaa kôr gema ken yiase cii, sha ci u lu inyom i i nôngo ityav mbi tar cii mbi hiihii je la. Lu ityav mbin va a kwagh u umato mbautyaav man ubom mba agirgi a uitya a keren la, man uindyer mba gbuuka man ugaas mbabov kua ikyav mbi utyaav mbibov mbigenev cii, sha gbenda u vesen ye. U dondon yô, lu ityav mbi tar cii mbi sha uhar, mbi mbi va a kwagh u ubom mba i yer ér atomic weapons la. Hii ken inyom i 1914 la je uumace mba nôngon ityav sha ajiir kposo kposo man ityav mbin wua ior umiliôn imôngo.
2. ITYARTENGER
Takerada u i yer ér, Britannica Academic la kaa ér, hanma inyom tar ka u tenger sha ajiir i kuma 100, i kehe je i kuma u “vihin akaa kehelee.” Shi gbaatom u i yer ér, United States Geological Survey la kaa ér, “mfe u se vande lun a mi sha kwagh u ityartenger hii er ken inyom i 1900 zan zan nyian la na yô, ka se ver ishima ser hanma inyom yô, ityartenger i vesen ia tenger a kuma er 16 nahan.” Shin er mbagenev vea kaa ér ka er i lu zange u fan kwagh u ityartenger hegen ve, i lu inja er i hemba ngeen nahan kpa, kwagh u a lu yô, ityartenger i vesen i i tenger sha tar la va a ican shi wua ior hemba ave a tse.
3. MYINA U KWAGHYAN
Ka ityav man anyighe man mvihi u tomsule kua m-ban u inyar, ka ve na ve kwaghyan a yina sha tar ye. Ripoti i World Food Programme i inyom i 2018 la kaa ér: “Iorov miliôn 821 sha tar cii mba ye kwagh ka yen ve, gema iorov miliôn 124 nahan di mba tse ijen.” Myina u kwaghyan kpa na yô mbayev ka ve kpe i kuma miliôn 3 man dubu deri 1 nahan hanma inyom. Aluer i pav iyenge i mbayev mba yange ve kpe sha tar ken inyom i 2011 la ker avegher ahar yô, mba ve kpe sha ci u myina u kwaghyan la nôngo u kuman vegher môm.
4. IANGEV MAN IANGEV MBI TSAREN
Takerada u Mzough u Nengen sha Mkpeyol u Tar Cii la a gber yô, kaa ér: “Ka ken derianyom u sha 21 ne ubombauangev mba tsaren ve dumbur ye. Iangev mbi tsev, er nyia-wambe man black death man ayaikyure nahan cin hide, shi iangev mbi hev mbigenev due, er SARS man angev mbu haan ahenga man MERS man Ebola kua Zika” nahan. Bouange u a sember duen yô, ka Korona. Er mbasainsi man mbatwerev ve seer fan u sôron iangev nahan kpa, mba a zua a icigh ki sôron hanma angev ga.
5. TOM U PASEN KWAGH SHA TAR CII
Yesu yange ôr kwagh ugen u a lu vegher u ikyav ne yô kaa ér: “A pase loho u dedoo u Tartor ne a tser tar sha u u lu shiada hen akuraior cii, ka zum la mkur una va ye.” (Mateu 24:14) Er mbamzeyol mba vesen ve lu shin tar nahan kpa, ior mba hemban miliôn anigheni, mba ve dugh ken akuraior kposo kposo yô, mba pasen loho u dedoo u Tartor u Aôndo, ken ityar 240, ken ijô i hemban er 1,000 nahan. Ken yiase i uumace cii, imbakwagh ne ngi a vande eren ga.
IKYAV LA TESE ÉR NYI?
Akaa a yange Yesu kaa ér a a kohol a lu ikyav la cii, nga eren nyian. Doo u se ver ishima sha akaa ne sha ci u nyi? Sha ci u Yesu kaa ér: “Zum u ne nenge akaa ne aa nguren eren yô, fa nen je ner Tartor u Aôndo ngu ikyua ikyua.”—Luka 21:31.
Ica a kera gba ga tsô, Tartor la ua gema tar ua lu er yange Aôndo wa ishima ér u lu la
Aluer se gbidye kwar sha ikyav la shi se tôv sha akaa a Bibilo i ôr sha a dondo a dondo la cii yô, se kav er Aôndo yange ver Tartor na sha, ken inyom i 1914 yô. a Shi lu ken inyom shon ver wan na Yesu Kristu Tor ye. (Pasalmi 2:2, 4, 6-9) Ica a kera gba ga tsô, Tartor u Aôndo ua hemen tar, maa ua tim ugomoti mba ve lu hendan a u la, shi ua gema tar a hingir paradiso sha er uumace vea lu sha u gbem shawon yô.
Ica a kera gba ga tsô, msen u ter wase u yange Yesu tese la una kure sha mi, ér: “Tartor wou u̱ va. I̱ er ishima you shin tar kpaa, vough er i eren sha nahan.” (Mateu 6:10) Nahan ka nyi Tartor la u lu eren, hii shighe u i ver u ken inyom i 1914 laa? Man ka nyi se fatyô u veren ashe a mi, shighe u Tartor la ua hemen uumace laa?
a Wea soo u seer zuan a iwanger sha kwagh u inyom i 1914 yô, nenge takeda u U Fatyô u Lun Uma Gbem sha Won shi a Saan We Iyol! la, ityough 32, ka Mbashiada mba Yehova ve gber u ye.
Kwagh Ugen u Alaghga Shi Una Doo U Yô
IYOUKURA
Ka Hanma Shighe Mkurtar Una Va? Kwagh u Yesu Ôr Yô
U ngu nengen er akaa a Yesu ôr ken kwaghôron u profeti ér aa er la a lu eren hegen kpa?
MBAMPIN MBA BIBILO I NE MLUMUN SHA MI LA
Ka Nyi i Tese Ér Se Mba ken “Ayange a Masejime,” Shin “Ashighe a Mkur”?
Bibilo pase akaa a aa er shin mbamlu mba ior vea nyôr ker cii man “mkurtar” yô
