Er U Er Ve U Fatyô u Va Lun ken Tar u He Yô

KUHWA

Ngeren mba ken ijime mbara tese er i lu u ica ia kera gba ga tsô Aôndo una tim mbaaferev sha tar, shi una kar a mbamzeyol mba ve lu sha tar ne cii kera yô. Se fatyô u nan jighjigh ser kwagh ne una er. Sha ci u nyi? Sha ci u Mkaanem ma Aôndo kaa ér:

“Tar ne ngu karen kera.”—1 YOHANE 2:17.

Se fatyô u lun a jighjigh u nan ser ior mbagenev vea war sha ci u ivur Bibilo i se ôr sha heen ne shi kaa ér:

“Or u nan eren ishima i Aôndo yô, nana lu her gbem sha won.”

Nahan, gba u se eren ishima i Aôndo ve se va war ye. Kpa gba u se hii keren u fan Aôndo, ve se fa kwagh u a lu ishima i Aôndo la ye.

‘KER U FAN’ AÔNDO SHA ER U WAR MKURTAR YÔ

Yesu kaa ér: “U̱ ve̱ zua a uma u tsôron yô, saa vea lu keren u fan we, we Aôndo u mimi tswen.” (Yohane 17:3) Aluer se soo u va waren mkurtar lun uma gbem sha won yô, a gba u se ‘ker u fan’ Aôndo. Kpa u ngu wer ka u fan tsô ser Aôndo ngu shin fan akaa a mimi sha kwagh na tseegh tsô ga. Gba u se ya ijende a na. Er ka i gba u se luun vea azende a ase ve ijende yase ia taver nahan, kape Aôndo kpa i lu je la. Hen ase sha akaa a mimi a vesen agen a se hen ken Bibilo, a aa wase se se ya ijende a Aôndo shi se za hemen u lun azende a na yô.

Akaa a Mimi a Se Hen ken Bibilo Yô

Bibilo pase se ér, sha hiihii la je Aôndo lu a awashima ér se lu ken Paradiso.

Aôndo yange gba Adam man Ifa, uumace mba hiihii mbara, maa ver ve hen ijiir igen i doonashe kpishi, i yilan i ér sule u Eden. Yange ve lu a mshi ga, shi Aôndo na ve hanma kwagh u gba u vea lu a mi ve a saan ve iyol yô. Yange ma ve fatyô u lun uma gbem sha shon. Yange vea ze hemen u lun azende a Aôndo yô, ma ve kpe mayange ga. Kpa ve tsua u hemban Aôndo ato sha tindi u taver ga u Aôndo wa ve yô.

Bibilo pase se er i hii ve se lu yan ican nyian yô.

Er Adam, orumace u hiihii la hemba Aôndo ato yô, kera lu u un iyol na una lu uma gbem sha won ga, kua uumace mba vea due ken a na la cii. Bibilo kaa ér: “Er isholibo nyôr shin tar sha or môm, man ku gema va sha ci u isholibo la yô, ku va sha ior cii.” (Mbaroma 5:12) Er ormaren ka nana lu a angev ve, nana maren ônov yô, ve due a mbu nahan, kape ônov mba Adam cii ve due a mshi u Adam la je la. Kwagh la na yô, ka se bee iyol shi ve kpe.

Bibilo pase kwagh u Aôndo a er sha u wasen se yô.

Bibilo kaa ér: “Tar ne doo Aôndo ishima kpishi je yô, a na Wan na u môm môm la, sha u hanma or u nan ne un jighjigh cii nana̱ de timin ga, kpa nana̱ zua a uma u tsôron.” (Yohane 3:16) Aôndo yange tindi Yesu shin tar ér a va paa se sha uma na. Orgen u lun anyom 86 ken tar u India, iti na ér Prabhakar, a ôr kwagh u dooshima u Aôndo tese ne, a kaa ér: “Kwagh ne tese ér m doo Yehova a ishima sha mimi. Dooshima na ne na m ngu a ishimaverenkeghen i zuan a uma u tsôron.”

Bibilo pase se er se tese ser kwagh u Aôndo a er sha ci wase ne ngu se a inja yô.

Bibilo kaa ér se fatyô u wuese Aôndo sha kwagh u a er sha ci wase ne sha u “kuran atindi a na.” (1 Yohane 2:3) Er se doo Yehova Aôndo ishima yô, a tese se kwagh u se er ve a saan se iyol yô. (Yesaia 48:17, 18) Aôndo soo ér se ya ican ga. A tôndo zwa ér aluer se mba dondon kwaghwan na yô, a saan se iyol hegen tseegh ga, kpa se fatyô u va lu uma gbem sha won.

ÔRON BIBILO I I LU MKAANEM MA AÔNDO LA HANMA IYANGE

U fatyô u waren mkurtar sha u eren msen wer Aôndo a wase u man sha u eren ishima na

Se mba ye kwaghyan hanma iyange sha er se lu uma yô. Kpa Yesu kaa ér: “Ka sha beredi tseegh or a lu uma ga, kpa ka sha hanma kwaghôron u a dugh hen Yehova yô.”—Mateu 4:4.

Nyian ne, Yehova ôron kwagh a vese ken Bibilo. Aluer u ngu henen icighan takeda la yô, u fa akaa a mimi a vesen a Yehova yange er sha ci u uumace, man a a lu eren hegen, kua a una va er ken hemen sha ci ve la kpaa.

EREN MSEN HEN AÔNDO WER A WASE U

Aluer u soo u ungwan imo i Aôndo kpa ka taver we u den aeren a a kaa ér ka a bo la yô, u er nena? Aluer kwagh ngu nahan yô, a gba u se ker u fan Aôndo, nahan kwagh la una wase u sha gbenda u vesen.

Nenge ase kwagh u kwase ugen u yange eren idya kpoghuloo yô, iti na ér Sakura. Yange hiin u henen Bibilo yô, a hen kwagh u tindi u Aôndo a we ér “yevese nen idya” la. (1 Mbakorinte 6:18) Sakura yange er msen hen Aôndo ér a na un agee, nahan fatyô u den ieren i bo la. Kpa yange gba u una nôngo a ameen. A kaa ér, “Kwagh u idyaa ka una vam ken ishima yô, m er msen hen Yehova sha mimi, sha ci u m fa je mer m kuma u nôngon a zayol ne iyol yam ga. Msen wasem kpishi u seer lun a Yehova kôôsôô.” Ior umiliôn imôngo mba keren u fan Yehova, er Sakura nahan. Nahan Yehova Aôndo gu nan ve agee a i gbe u vea lu a mi ve vea fatyô u den akaa agen ken uma ve, eren ishima na yô.—Mbafilipi 4:13.

Aluer u ngu keren u fan Aôndo tsembelee yô, we di kpa ‘Aôndo una fa u’ tsembelee sha ci u u lu ijende na i doon un ishima. (Mbagalatia 4:9; Pasalmi 25:14) Nahan u va fatyô u waren nyôron ken tar u he u Aôndo a tôndo zwa la. Kpa tar u he la ua lu nena jimi? Ngeren u dondo ne una pase se.

a Bibilo pase ér Yehova ka iti i Aôndo.

Kwagh Ugen u Alaghga Shi Una Doo U Yô

IYOUKURA

Ior Kpishi Vea War Mkur—We kpa U Fatyô u Waren

Kpa u er nan ve u wara? U ombo akaa shin u wa iyol sha akaa a iyolough sha ci u iyange i mtim ve u va war ye shinii?

IYOUKURA