ITINEKWAGH I TAMEN | SHIGHE U OR WOU NAN KPE YÔ
Ka Kwaghbo u Se Zungwen Kuu?
I lu nahan kwagh nyoon we hen an-shighe kpuaa vee? Alaghga yange u zua a sooki fele je yô, hungur we er yange lu u la jighilii. Nahan kpa, ijungwen ngi nahan ga. Ortwer ugen mba yer un ér Alan Wolfelt, a nger ken takerada na u i yer ér Healing a Spouse’s Grieving Heart la ér: “Or a fatyô u been a ijungwen ken ishima ga.” Kpa shi a kaa ér: “Shighe ka una karen, shi ior vea suen we yô, ijungwen you la i pande.”
Ikyav i tesen yô, nenge ase kwagh u tertamen Aberaham yange er shighe u kwase na saa ku la. Bibilo kaa er yange “Aberaham nyôr gba zungwen ku u Sara vaan un.” Ishember i “gba zungwen” la tese ér yange Aberaham zungwe ku u kwase na Sara shighe kar cii ve va pever un shin ishima ye. * Orgen yô ka Yakob, u yange i bume un na jighjigh ér inyamkyume wua wan na Yosev la. Yange zungwe ku u wan na “ayange kpishi,” or môm hen tsombor na fatyô u surun un ishima ga. Anyom kar kpishi kpa ku u Yosev lu a de u vihin un ken ishima ga.—Genese 23:2; 37:34, 35; 42:36; 45:28.
Aberaham yange vaa ku u kwase na Sara, u doo un ishima kpishi la
Nyian kpa kape ior kpishi ishima i lu vihin ve sha ikyu i ior vev mba yange ve lu a ve kôôsôô la je la. Nenge ase ikyav sha kwagh u iorov mba uhar mban.
-
“Orya wam, Robert, yange kpe ken uwer u Julai ayange 9, ken inyom i 2008 la. Hen sev mbu shon mbu yange kpe la kpa se nder pepe se ya kwaghyan, se mba been yô, se suse zwa, se kuve ayol shi hanmô wase nan kaa ér ‘u doom ishima,’ er se vanden eren keke nahan. Anyom kar hegen ateratar, kpa ku na ngu vihin mo her. Kam er a tsa sha won kpa me zua a ishimasurun sha ku u Rob ga nahan.”—Mkaanem ma Gail, kwase u lun anyom 60.
-
“Ku pavem a kwase wam ka anyom 18 je ne, kpa ka saren mo u nengen a na, shi ku na ngu vihin mo her. Hanma shighe u m nenge a kwagh u doon mo ashe cii yô, ka m yem u henen sha kwagh na, m henen er una lu uma ve un kpa ma i doo un u nengen kwagh shon la yô.”—Mkaanem ma Etienne, or u lun anyom 84.
Kwagh ne tese wang ér se cii kwagh u vihin ka una er se yô, i nyoon se shi se ure tsung. Hanma or yô nan zungwen kwagh sha mzungu u nan, nahan doo u se puu gbenda u or nan lu zungwen kwagh u vihin tsung u a er nan la ga. Shi se kpa alaghga a gba u se palegh u puun ayol a ase, aluer se nenge ser se zungwe ku shin se ure kar ikyaa inya yô. Se er nan ve se kera zungwe ku u ma or wase kpishi ga?
^ par. 4 Isaka, wan u Aberaham kpa yange zungwe ku shighe gôgônan. Er i pase ken ngeren u Iyoukura ne u a lu a itinekwagh ér “Kav Jighjigh Ve u Nan” la nahan, Sara, ngô u Isaka yange kpe anyom kar atar, kpa ku na lu a de u vihin Isaka ga.—Genese 24:67.
[Ngeren u pasen foto u sha peeji 4]
