Akaawan ka a ngee sha ikyaa ne je i zua ga. Nahan kpa, ka hanma kwaghwan cii a lun a iwasen ga. U tesen ikyav yô, zum u or wou nan kpe yô, orgen nana kaa ér we u de vaan ga, shi u de tesen wer kwagh za u iyol cuku kpaa ga. Mbagenev di vea gema a na ishima a vihi u ker kpishi. Kpa Bibilo ngi a kwaghwan u a hembe lun vough, shi a zough sha kwagh u mbatwerev ve zough a mi ken kwaghtôvon ve nyian yô.

Sha ajiir agen ior mba nengen ér nomsoor vaan ga. Kpa mimi yô ma ityôkyaa ngi i kunya a kôr se u vaan ken igbara? Mbatwerev kaa ér gba u or a vaa shighe u kwagh u vihin a er nan yô. Ka wea vaa yô, a lu nyityô kwagh i vihin i kpa, shighe una karen yô, i pever we shin ishima. Kpa aluer u ngu kighir mliam yô, u ngu wuan iyol you. Kwagh u i kaan ér nomsoor vaan ku ga la Bibilo lumun a mi ga. Nenge ikyav sha kwagh u Yesu. Yange za ku u Lasaru za vaa, shin er lu a tahav mbu nderen un shin ku nahan je kpaa.—Yohane 11:33-35.

Or ka nana vaan ku yô, ashighe agen nan nyoon ishima mgbagh mgbagh, hemban je yô ku u u er nan aburabur yô. Atôakyaa nga kpishi a ka a na or u vaan ku nan nyoon ishima yô. Shighe gen orcivirigh ka nana ôr kwagh a nan gagh shin sha ibume yô, ishima i vihi nan ker. Orgen shin South Africa mba yer un ér Mike, a kaa wener: “Shighe u m lu anyom 14 la, terem saa ku. Sha iyange i i lu iin un la, pastô ugen ken côôci i Anglican kaa ér kwagh gba Aôndo a ior mba dedoo, nahan ngu a tôô ve tsuaa a yem a ve. * Kwagh ne yange nam ishimavihin kpishi, sha ci u terem yange kpe kende se icôghor. Zan zan hegen u m lu anyom 63 ne je kpa, kwagh la ngu vihin mo her.”

Ibo i ken ishima di ye? Ashighe agen or ka nana kpe or yô, nan naan iyol i nan ibo, hemban cii je yô zum u ku shon u ve kpoo yô. Adooga nana zer henen ken ishima ér, ‘Yange mea er i ngin shin i ngin yô, alaghga via ma a kpe ga.’ Shin alaghga kwa u masetyô u yange u zua ishigh a nan la ne zôhô zwa. Kwagh ne kpa una na ishima ia seer nan we ibo.

Aluer ishima ngi vihin we shin ngi nan we ibo nahan yô, doo u u gba teman a mi ving tsô ga. Lam a ma ijende you, u nana kegh ato a we shi nana pase u er ior kpishi ishima ka i na ve ibo sha ikyu i ior vev nahan yô. Bibilo kaa a vese ér: “Huror yô, lu a dooshima gbem, man shi i mar anmgbian sha ci u ayange a ican.”—Anzaakaa 17:17.

Ijende i hemban cii i i gbe u or u ku u er nan la nana lu a mi yô, ka Yehova Aôndo, Un u a gbe se la. Pase un ishima you vindi vindi ken msen, “gadia ka Un A lu koson [we] ye.” (1 Peteru 5:7) Heela tseegh ga, a tôndo zwa ér mba ve er nahan cii una sur ve asema sha “bem u Aôndo u a gande hanma mfe wase cii” la. (Mbafilipi 4:6, 7) Shi zua a msurshima hen Aôndo sha u ôron Bibilo i i lu Mkaanem nam la. Nger avur a ruamabera a nan we ishimasurun sha kwatakerada. (Nenge ngeren u kiriki u a baa sha ngun ne la box.) U fatyô u nôngon kôron agen ken ityou je kpaa. Aluer u ngu henen sha kwagh u avur shon a er la yô, aa wase u, hemban je yô tugh, shighe u u lu tswen u lu fantyô u yaven ga la.—Pasalmi 34:18.

Orgen u lun anyom 40, u se yer un ser Jack yô,  kwase na sember kpen angev mbu kyansa. Nahan Jack kaa wener ashighe agen ka i huan un kpishi. Kpa msen u eren wase un u wan ishima. A pase wener: “Ka mea er msen yô, i kera huan mo ga cii. Ashighe kpishi ka m nder tugh, maa mnyam ma kera va ga gbem sev mbu av. Kpa ka mea ôr avur a ken Ruamabera a surun mo ishima, shi mea gbidye kwar sha mi, shi mea pase Aôndo ishima yam ken msen yô, i kundum iyol shi m zua a bemshima, nahan ishima yam i mem, maa m gba mnyam.”

Gumkwase ugen u i yer un ér Vanessa yô, yange ngô na gba angev maa kpe. Un kpa yange kav iwasen i msen. A kaa ér: “Ken ashighe a hemban taver a m tagher a mi ne cii, yange m yila iti i Aôndo maa m haa mliam ashe. Yehova lu ungwan mbamsen av shi nan mo agee a wan ishima hanma shighe cii.”

Ior mbagenev ka ve wa mba ve lu zungwen ikyu i ior vev la kwagh ér ve eren akaa a wasen mbagenev, shin ve nyôr iyol ken tom u nan ior iwasen hen ityô ve. Aluer or ngu eren nahan yô a saan nan iyol shi ishima ia pever nan. (Aerenakaa 20:35) Mbakristu kpishi mba ve lu zungwen ikyu i ior vev la nenge ér u eren tom u wasen mbagenev la va ve a ishimasurun kpishi.—2 Mbakorinte 1:3, 4.