Alaghga u umbur kwagh u Gail, kwase u se vande ôron kwagh na ken ngeren u sha uhar la. Yange hen ér a tsa sha won kpa una fatyô u zuan a ishimasurun sha ku u nom na, Rob ga. Nahan kpa, ngu veren ashe u va nengen a na ken tar u he u Aôndo a tende zwa u van a mi la. A kaa ér: “Ivur Bibilo i i hembe doon mo cii yô, ka Mpase 21:3, 4.” I kaa ér: “Aôndo iyol Na Una lu a ve. Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”

Gail kaa wener: “Ityendezwa ne tesem mimi u kwagh u m lu veren ashe a mi la. Kunya kôrom tsung a ior mba ku u er ve kpa ve fe ér mba va nderen ior shin ku ga la.” Gail ngu eren kwagh u a zough sha jighjigh u nan na la yô. Ngu eren tom u pasen ior ivangeli la kpoghuloo. Ka a shi pasen mbawanndor a na kwagh u Aôndo a tende zwa ér ken hemen yô, “ku ua kera lu ga” la.

Alaghga u kaa wer ‘Kwagh a fatyô u lun nahan ga!’ Kpa nenge ase ikyav sha kwagh u yange er orgen u i yilan un ér Yobu ne. Yange gba angev mbu nyoon tsung. (Yobu 2:7) Shin er yange tôm ku nahan kpa, a za hemen u nan jighjigh ér Aôndo ngu a tahav mbu va nderen un shin ku, una hide a lu uma sha tar. Yange ôr kwagh sha jighjigh u nan ér: “Kpe ahii, ma U yerem shin Sheol . . . , Ú yila, mo me gema me vengese; tom u ave Ou ua sar U.” (Yobu 14:13, 15) Yobu yange na jighjigh ér una kpe yô, a sar Aôndo na u hiden nengen a na, nahan a lu un toon toon u va nderen un shin ku.

Ica a gba ga tsô Aôndo una er kwagh ne. Una nder Yobu kua ikpela i uumace mbagenev kpaa, zum u una gema tar ne ua hingir paradiso la. (Luka 23:42, 43) Bibilo pase kwagh ne wang ken Aerenakaa 24:15 ér ior “vea nder shin ku.” Yesu kpa pase wang je ér: “Kwagh ne a̱ de kpiligh ne iyol ga, gadia shighe ngu van u mba ve lu shin iwar cii vea ungwa imo Na, vea due kpaa.” (Yohane 5:28, 29) Yobu una va nenge er ityendezwa ne ia kure sha ashe a na yô. Una lu sha ian i hiden lun her gbong gbong er ‘sha ayange a a lu iyev la’ nahan. Shi iyol na ia lu her “hegh á hemba i wanye kpaa.” (Yobu 33:24, 25) Hanmaor u nan ne Aôndo jighjigh shi nan tese iwuese sha kwagh u a er sha u va zungwen ior mhôônom, nderen ve shin ku la yô, nan kpa a va nder nan shin ku, nana lu uma sha tar.

Aluer or wou nan saa ku yô, alaghga kwagh u se tim sha mi ne una fatyô u surun we ishima za been ga. Kpa aluer u ngu gbidyen kwar sha uityendezwa mba Aôndo mba i nger ken Bibilo la yô, u lu a ishimaverenkeghen i mimi shi u zua a agee a wan ishima.—1 Mbatesalonika 4:13.

U soo u seer fan kwagh u una wase u u kera zungwe kpishi ga yôô? Shin ka i taver we er i hii ve Aôndo a de ifer man ican i dumbur yôô? Yô, za hen ijiir yase i sha Intanet i jw.org/tiv la, za nenge er Bibilo i ne mbamlumun mba mimi, mba vea fatyô u surun we ishima yô. ▪