Er Se Tese Ior Dooshima Yô
Er se due ken Adam, orumace u hiihii la yô, se cii se mba tsombor môm. Er ka i ver ishima ér mba hen tsombor cii ve doo ayol a ve shi ve naan ayol a ve icivir nahan kpa, taver u kwagh a lu nahan ainge. Ka kwagh u Aôndo u se doo un ishima la a soo la ga.
KWAGH U ICIGHAN RUAMABERA I ÔR SHA KWAGH U DOOSHIMA YÔ
“Or u nan we ndor a we nana̱ doo u ishima er we iyol you nahan.”—LEVITIKU 19:18.
“Mbahyomov enev ve za hemen u doon ne ishima.”—MATEU 5:44.
U IOR DOON SE ISHIMA LA INJA NA ÉR NYI?
Nenge er Aôndo a pase kwagh u a lu dooshima la ken Mkaanem nam, ken 1 Mbakorinte 13:4-7 yô:
“Dooshima we ishima shi tesen erdoo.”
Hen sha kwagh ne: Ior ka vea waan ishima a we, shin vea tesen we erdoo, shin wea er kwagh u shami ga kpa vea vihi ishima a we ga nahan, i lu u nena?
“Dooshima gbe iyuhwe ga.”
Hen sha kwagh ne: Ior ka vea hunan kwagh wou kpishi shi vea gbaan we iyuhe nahan, i lu u nena?
Dooshima “keren mtsera na ga.”
Hen sha kwagh ne: Ior ka vea kegh iyol u lumun a mbamhen ou shi vea sendegh sha mbamnenge vev ga nahan, i lu u nena?
Dooshima “koson kwaghbo ken ishima ga.”
Hen sha kwagh ne: Aôndo kegh iyol u den mba ve er isholibo kpa ve gema ishima la. “Zehe gbem ga, ishima i nyoon Un gbem kpaa ga.” (Pasalmi 103:9) Ka sea er or kwaghbo kpa nana de se yô, i doo se. Nahan doo u se keghen iyol u den mbagenev kwaghbo zum u ve er kwagh u doon se ga yô.—Pasalmi 86:5.
“Dooshima ember sha kwagh u ifer ga.”
Hen sha kwagh ne: Kwagh u vihin ka una er se yô, se mba soon ser mbagenev ve ember sha ican i se nyer ker la ga. Nahan doo u se ember shighe u mbagenev ve lu yan ican ga, aluer ve er kwagh a vese sha inja ga je kpaa.
Kwagh u se er ve se zua a iveren i Aôndo yô, saa se tesen ior cii dooshima sha igbenda i i ter sha heen ne. Gbenda ugen u se fatyô u eren kwagh ne yô, ka u wasen mba ve lu ken ibanave la.
