AHIR A TÔVON SHA ASAN: Ior mbagenev na jighjigh ér ka er asan a due sha kwavaôndo hen shighe u i mar or la ka i nenge i fa er nana va lu la ye. Nahan ka ve ôron ityakeda i sha akaa la ér vea fa kwagh u una va er ve ken hemen la, sha er vea tsua kwagh u una wase ve u palegh kwaghbo shin va lun ken mkpeyol yô.

AHIR A FENG SHUI: Mbagenev na jighjigh ér aluer ve er akaa hen ijiir ve sha ishima i ma tahav mbu ve nengen a mi ga, er ahumbe nahan yô, ikyôr ia lagh ve sha hanma kwagh. Orgen ken Hong Kong mba yer un ér Lo Wing, * a kaa ér, “Or u tesen ahir a Feng Shui ugen yange kaa a mo ér, aluer m tsegha ijiir ken shôôpu yam, m ver kôôpu u gelase u injaa her yô, kpenga wam ua hemba van mo a inyaregh.”

U CIVIR UTER MBA TSEV: Mbagenev na jighjigh ér gba u vea civir uter vev mba tsev shin mbaaôndo mbagenev sha er vea kura ve shi vea na ve iveren yô. Orgen ken tar u Vietnam iti na ér Van, a kaa ér, “M na jighjigh mer aluer m ngu nan uter av mba tsev icivir yô, a hemba saan mo iyol hegen, shi mo kua ônov av cii se va lu ken mkpeyol.”

OR KA NANA KPE YÔ, I HIDE SHI I MAR NAN: Mbagenev nenge ér er u lu uma je, ka u u kpeen shi a hiden a maren we gbem. Ve na jighjigh ér akaa a dedoo shin a vihin a a eren ve hegen la cii, ka injar i sha akaa a yange ve er cii ve va kpe la.

 Mbagenev kpishi nenge ér akaa la cii ka tsav mbu civir, kpa shi ka ve gema ve tôvon ihiange i ken ave shi ve ôron ityakeda i tôvon sha asan man ikpande kua ukaade mba tsengan pasen akaa a mi, gayô ve nengen mngerem shi ve kpehen asor. Ve hen ér akaa ne aa wase ve u fan er a va lu ve ken hemen yô.

Mba ve ne jighjigh a akaa ne shi ve eren a la ka ve nena hegene? Man ken hemen a lu ve nena?

Nenge ase kwagh u yange er orgen ken tar u Vietnam, u suur sha akaa ne yô, iti na ér Hào. A kaa ér, “Yange kpenga wam gba, shi m nyôr ken injô i vesen man ishimanyian, shi bem kera lu hen ya wam ga.”

Orgen ken Taiwan kpa yange na jighjigh a akaa la, iti na ér Qiuming. A kaa ér: “M nenge yô, ken atesen man aeren a ityôô a ior ve ne jighjigh a mi ne cii, i môm kpa ôr kwagh jighilii ga shi gba zwa môm a igen ga. Akaa a mba nengen asan tsenga pasen la kpa lu eren sha mi ga. Ityesen i i kaa ér or ka nana kpe yô i hide shi i mar nan la kpa m hen sha mi yô, aluer u kpe shi i hide i mar u, man u umbur er yange u lu cii u va kpe la ga nahan, a er nan ve u fa wer u gema shi u hemba ngun ken mkpeyolo?”

Er Hào man Qiuming kua mbagenev kpishi ve nenge nahan, ka kwagh u se hen ser i vande veren ér a er se, shin kwagh u una er se zum u se kpe a hide a mar se la una wase se u fan er a va lu se ken hemen ga, shi ka asan shin uter mba tsev kpaa ga. Kwagh ne tese ér se fatyô u eren kwagh u kper ken hemen a due se a doo gaa?

Ior kpishi hen ér kwagh u una wase ve vea va lu ken mkpeyol yô, ka u zan yunivasiti shi lun a inyaregh kpishi. Mbagenev mba ve er nahan la ka ve nena?