IOR mba a mbamnenge kposo kposo sha kwagh u uma man ku. Mbagenev na jighjigh ér shighe u ve kpe kpa, jijingi ve una due a za lu ijiir igen, shin una za hingir kwagh ugen mape. Mbagenev di na jighjigh ér vea kpe kpa a za hide a mar ve vea za lu ken tar u ujijingi vea uter vev mbatsev. Nahan kpa mbagenev na jighjigh ér or ka nana kpe yô, kwagh u nan bee.

Alaghga we kpa u na jighjigh a kwagh ne sha gbenda u yange i yese u, shin aeren a ityôô ou a tese la. Er ior ve lu a mbamnenge kposo kposo sha kwagh u ngu a er or zum u nan kpe kera la yô, ma or ngu u se pine nan, shin ijiir ngi i se za ve se zua a iwanger sha kwagh u a tsum ior kpishi ne yôô?

Mbatesen kwaghaôndo samber a ityesen i i kaa ér uma kpen ga la anyom uderi imôngo hegen. Ior mba ve lu ken ukwaghaôndo mbavesen, er kwaghaôndo u Mbakristu nahan, kua Mbahindu, Mbayuda, Mbamusulumi man ukwaghaôndo mbagenev na jighjigh ér uma kpen ga, kpa ka a due shighe u iyol i hingir kpenegh yô, a za lu ken tar u ujijingi. Mbabuda di gema na jighjigh ér, or ka nana kpeen a hiden a maren nan kwa kimbir kimbir yô, tahav mbu nan, shin mhen u nan a va ar sha iaven i msaanyol u hemban cii, i í yer ér Nirvana la.

Shi atesen ne na yô, ior kpishi sha tar nyian na jighjigh ér ku ka u bugh or gbenda u nyôron ken tar ugen. Sha nahan yô, mbagenev kpishi na jighjigh ér ku ka kwagh u hange hange, u ka a er or ve nan zua a uma ugen yô, nahan ve nenge ér Aôndo wa ishima ér ior ve kpeen. Kpa Bibilo ôr nyi sha ikyaa nee? Ôr ngeren u a dondo ne nenge. Mlumun u Bibilo i ne la una kpiligh we iyol.