Orgen mba yer iti na ér Seth, * a kaa ér, “Mo man kwase wam cii yange i de se tom hen shighe môm”. “Anyom ahar cii se lu masen nôngon a uma sha iwasen i ior lu nan tsombor wase kua an-ityomov mba kiriki mba se lu eren yô. Kwagh ne na yô, kwase wam Priscilla ure kpishi, shi mo kpa lum er kwagh hembam nahan.

“Yange se nôngo a uma nena? Hanma shighe yô, Priscilla yange a umbur mkaanem ma Yesu ma i nger ken Mateu 6:34 la. Yesu yange kaa ér, ishima i de nyian se sha kwagh u kper ga, gadia hanma iyange ngi a zayol u i. Shi mbamsen nav mba yange eren a ishima i môm la kpa na un agee a wan ishima. Mo di Pasalmi 55:22 surum ishima. Yange m haa akaa a zan mo iyol cii sha Yehova, er Orpasalmi nahan, maa Yehova taver mo ishima. Er m zough a tom hegen nahan cii kpa, se dondo kwaghwan u Yesu u a lu ken Mateu 6:20-22 la, nahan se mba eren akaa akuma akuma ken uma wase. U hemban cii je yô, se hemba kporom ikyua a Aôndo shi se mba kôôsôô a ayol a ase.”

Orgen mba yer iti na ér Jonathan, a kaa ér: “Shighe u kpenga u tsombor wase gba la, ishima zam iyol sha kwagh u mlu wase u ken hemen tsung. Er ican kôr kpishi yô, se er tom kpoghuloo anyom 20 kpa se lu a kwagh ga. Mo vea kwase wam se hii u gban ayôôso sha ikyaa i inyar.” Yange ve lu cian u yamen kwagh sha injô, sha ci u i lu ve er vea za kpa mbakasuav vea venda u nan ve nahan.

Jonathan shi kaa ér: “Kpa Mkaanem ma Aôndo man icighan jijingi na wase se u tsuan akaa a injaa a se er yô. Yange m hen u eren hanma inja tom cii, shi se pande u vihin inyaregh sha akaa a a lu hange hange ga la. Er se lu Mbashiada mba Yehova yô, anmgbianev kpa lu wasen  se. Yange ve seer taver se ishima, shi a̱ va nyôr se a taver yô, ve ta se uwegh.”

Rakel kaa ér: “Shighe u nomom undum yem kwagh na la, yange nyoon mo shi ishima vihim sha hiihii la kpishi. Nahan m ure tsung. Kpa m kporom hen Aôndo, nahan m zua a ishimasurun. Hanma sev mea er msen hen Aôndo yô, m zua a ishimasurun. Yange lum er a sôr ishima yam nahan.”

Shi Rakel kaa ér, “Bibilo i i lu mkaanem ma Aôndo la na yô, m de u nyoon ishima shi m de u henen sha akaa a zan mo iyol. Yange m umbur mkaanem ma Paulu ma ken Mbaromanu 12:21 man, ma kaa ér: “Kwaghbo a̱ de hembe u ga, kpa we gema hemba kwaghbo sha kwagh u dedoo.”

“Yange ijende yam igen wam kwagh nahan m kav er i doo u me za hemen u wan ishima yô. Yange tesem kwagh u i nger ken Orpasenkwagh 3:6 la, maa kende kaa a mo teghlee ér, shighe gen ka i gba u se de ‘kwagh á gba saan tsô.’ Kwaghwan ne yange taver mo kpishi, kpa lu kwagh u doo u me er je la. Hegen m ngu a akaa a a m we ishima u eren ken uma wam yô.”

Kwase ugen di mba yer un ér Elizabeth, a kaa ér: “Shighe u ivese you i kera kor ga yô, ka i gba u a sur u ishima. Ijende yam igen lu surun mo ishima ayange ayange. Yange a vaa a mo imôngo shi a surum ishima, shi na yô, m nenge mer m gba kwagh. M na jighjigh mer ka Yehova je yange tindi un ér a surum ishima ye.”

Luis u se vande teren kwagh na ken ngeren u hiihii la yange lu a angev mbu ishimav, mbu mbu nôngo u wuan un kuma kwa har yô. Hanma iyange yô, i wa un kwagh u wasen un u ôôn, a lu a mi i kuma ahwa 16. A kaa ér: “Hanma shighe yô m eren msen hen Yehova. Ka mea er msen mea bee kera yô, m kav agee a jijingi u Aôndo ken a mo. Msen ka a nam agee a wan ishima sha ci u m na Aôndo jighjigh shi m fa mer a wam ikyo.”

Kwase ugen iti na ér Petra. Ngu anyom 80 kar. A kaa ér: “Ka i sarem u eren akaa kpishi kpa m fatyô ga. Ka mea nenge er agee a lu been mo ken iyol nahan, i vihim je i zua ga. Ka m vôr kpishi, nahan i gba u me mena icigh ve me zua a agee ye. Ashighe kpishi ka m hen sha kwagh u Yesu yange zamber a Ter na ér a fatyô yô, ma i kar un a ican igen sha la. Kpa Yehova taver Yesu ishima, mo kpa  ngu taver mo ishima. Msen ka icigh ki m me hanma iyange yô. Ka mea lam a Aôndo yô, m hemba zuan a guda.”—Mateu 26:39.

Orgen ngu yan ican a angev mbu kpen alegh mbu i yer ér sclerosis la je zurum anyom 30 hegen. Iti na ér Julian. Un kpa ngu a mnenge u Petra la. A kaa ér: “M de u teman shin ikyônough ki kundun iyol, m gema teman shin ikyekye i mbaawanev. Kpa uma wam ngum a inja sha ci u m ngu eren mbagenev tom. Ka wea wasen ior yô, u kera henen sha ican you kpishi ga, shi Yehova ka a kure ityendezwa na i a kaa ér una taver se ishima sha shighe u ican la. Er apostoli Paulu kpa yange kaa nahan, mo kpa me fatyô u kaan jighilii mer: ‘M ngu a agee a eren akaa cii je ken Un u A taver mo ne.’”—Mbafilipi 4:13.

Orgen mba yer iti na ér Antonio, a kaa ér: “Yange mato wua terem sha gbenda, nahan i va ôrom. Kpa sha hiihii la lum er ka mimi ga nahan. Yange m nenge mer deraba la nan er shami ga—sha ci u terem lu karen angahar sha kpe gbenda je. Kpa m lu a kwagh u eren sha mi ga. Yange hume kuma ayange a ataan cii mase kpen ye. Kpa m kighir iyol yam mer me vaa sha ashe a ngôm ga, nahan m za vaa hen ape m lu tswen yô. M zer pinen ken ishima mer, ‘Ka nyi sha won nee? Ka nyi sha won nee?’”

Antonio shi kaa ér: “Ken ayange a m lu ken zayol ne la cii, m zer zamber a Yehova mer a wasem me kighir ishimavihin yam la shi a surum ishima kpaa. Tegh tegh tsô ishima pever mo. Yange m umbur kwagh u Bibilo i kaa ér hanma wase cii nana fatyô u tagher a ‘aikyôr’ la. Er Aôndo a eren aie ga yô, m na jighjigh mer me va nenge a terem shighe u a va nder ior shin ku la.”—Orpasenkwagh 9:11; Yohane 11:25; Titu 1:2.

Robert u se ter kwagh na ken ngeren u hiihii la kpa nenge nahan. A kaa ér: “Mo man kwase wam se zua a bem, er i pase ken Mbafilipi 4:6, 7 nahan. Yange se zua a Bem ne sha mbamsen mba se lu eren hen Yehova yô. Bem ne yange wase se u lamen a mbatôôn abaver, pasen ve ishimaverenkeghen i se lu a mi sha kwagh u mnder u shin ku la. Shin er wan wase la yange kpe ku u aikyôr sha igirgi nahan kpa, ashighe kpishi ka sea umbur akaa agen a yange se eren vea na imôngo la yô, i saan se iyol. Ka se nôngon ser se hemba veren ishima sha akaa shon.”

Robert shi kaa ér: “Zum u mbagenev mba se civir Yehova a ve imôngo va kaa a vese ér ve nenge er se lu lamen a mbatôôn abaver sha televishen kundu kundu, pasen ve jighjigh wase u nan yô, se kaa a ve ser, jighilii yô, ka mbamsen mba anmgbianev kpishi ve eren sha ci wase la ve wase se ye. M na jighjigh mer mimi je ka Yehova yange lu wasen se sha ilyoho kpishi i surun se ishima i ve lu tindin se a mi la ye.”

Kwagh u ior mba se ter ne tese ér Aôndo una fatyô u nan mba ve tagher a mbamzeyol kua mbamtaver kposo kposo la ishimasurun. We di ye? Wea lu ken nyityô zayol kpa, fa wer u fatyô u zuan a ishimasurun i ia wase u ken ashighe a taver la cii yô. * Nahan, er nan u ker iwasen hen Yehova ga? Un ka “Aôndo u A lu a ishimasurun cii” yô.—2 Mbakorinte 1:3