Yange i maren hen anijiir ugen ken agar, ken kpentar u Saxony, ken tar u ngise i yilan ér German Democratic Republic (GDR) la. Yange tsombor wam eren kwagh a mo kundu kundu kua sha dooshima, shi mbamaren av tesem u lun a aeren a dedoo. GDR yange lu tar u i eren pati u kômunizim (Communism) u nengen ér ior cii mba kwaghmôm yô, nahan kwagh gba ior mba hen Saxony cii a kwaghaôndo ga. Yange m na jighjigh mer Aôndo ngu ga. Hii shighe u m lu iyev je zan zan m va nyôr anyom 18 la, m na jighjigh a akaa a ahar ne: mer Aôndo ngu ga shi ior cii mba kwaghmôm.

Mhen u ior cii mba kwaghmôm ne yange doom. Sha ci u nyi? Sha ci u yange m nenge mer gba u kwagh a lu nahan. Shi yange m na jighjigh mer gba u hanmaor ma nan lu a akaa a mbagenev kpa ve lu a mi la. Sha nahan yô, m nyôr mzough u agumaior u nengen ér ior cii mba kwaghmôm la. Shighe u m lu anyom 14 la, m vihi shighe kpishi u eren tom u nengen mer ijiir ngi tsembelee sha u kuran ihyôghonough za haan kera. Yange doo ior mba hen gar u Aue a mo kpishi sha tom u m lu eren ne, je yô, mbahemenev mba her nam iyua. Shin er m lu wanye her nahan kpa, m fa mbapatii mba tagher tagher mba ken tar u GDR. Yange m nenge mer akaa a m lu eren ne ka a dedoo shi a va duem a doo kpaa.

Kpa ica i gbe ga yô, akaa va kôr gema kpoo. Ken inyom i 1989 la, avegher a tar u Jamani a ahar la hide zua hingir tar môm, nahan i hembe kpekpe u gar u Berlin la, maa mzough u mbapatii mba sha ityoughkitaregh ki Yuropa la cii kera za hemen ga. Nahan akaa gba eren mo ciligh ciligh a kundan mo iyol. Ica i gbe ga yô, m va kav er ifer de ishar ken tar u GDR yô. U tesen ikyav yô, ior mba yange ve ta ikyaa a mhen u ior cii mba kwaghmôm la ga cii yô, i nenge ve ér mba aseeraior. Tsô m pine mer, er nan ve kwagh lu nahana? Kera ka pati ne yange nengen ér ior cii mba kwaghmôm ga zee? Pati ne yange lu kwagh u mimi ga nahan zee? Yange ishima zam iyol kpishi.

Nahan m hide m penda ishima sha ityogholough mbi kuhwan man kwaghkperan. Er m lu henen ityogholough ken makeranta shi lu zan inja er me va mough me yem yunivasiti yô, m lu henen je mer me va lu or u kuhwan ityogholov man orkperankwagh. Heela tseegh ga, aeren a dedoo a m lu a mi yev la kpa m gema m ta kera. Kwagh u hemba lun mo kwagh u vesen hen shighe ne yô, lu u yan tar shi sôôr mbayev kasev imôngo hen shighe môm. Kpa ityogholough mbi kuhwan man kwaghkperan man uma u m lu eren la cii fatyô u van mo a msaanyol ga. Ufoto mba m kperan la je kpa tese ér yange mciem lu ken mo. M shi pinen mer, mlu wam u ken  hemen una va lu nena? Man ityôkyaa i m lu uma jim yô ka nyi?

Mbamlumun mba yange m va mase zuan a mi sha mbampin mban la kpiligh mo iyol. Iyange igen aikighe, m tema sha makeranta vea mbayevmakeranta mbagen se lu lamen sha kwagh u mlu u ken hemen. Nahan wankwase ugen ken mbayevmakeranta mban, iti na ér Mandy, * u lu môm ken Mbashiada mba Yehova yô, tesem kwagh u me er ve a wasem yô, hen aikighe la. A kaa a mo ér: “Andreas, aluer u soo u fan kwagh u uma man mlu u ken hemen yô, tôô shighe time ken Bibilo zulee.”

Yange taver mo kpa gema sarem u fan, tsô m gba a mi keren ken Bibilo. Mandy yange kaa ér mo m ôr Daniel ityough 2, m ôron yô, kpiligh mo iyol a kwagh u i nger ker la. Akaaôron a profeti la pase ityartor i hemban tahav sha tar, shin ugomoti, mba vea hemen uumace sha adondo adondo, zan zan sha shighe wase ne yô. Mandy shi tesem akaaôron a profeti a ken Bibilo agen a a er kwagh u mlu wase u ken hemen yô. Ken masejime yô, m va hii u zuan a iwanger sha akaa a yange tsumem la! Kpa m pine ken ishima yam mer, ka an nan nger akaaôron a profeti nee, man ka an nana fatyô u tsengapasen kwagh u ken hemen vough nahana? Kwagh ne tese ér Aôndo ngu shinii?

Yange Mandy tesem Mbashiada mbagenev uhar, Horst vea kwase na Angelika, mba ve wasem u seer kaven Mkaanem ma Aôndo tsembelee yô. Fese je m kav er i lu nongo u kwaghaôndo u Mbashiada mba Yehova la tseegh u yer sha iti Aôndo i Yehova la, shi u tesen ior i yô. (Pasalmi 83:18; Mateu 6:9) M hen m fa er Yehova Aôndo a tende zwa u nan uumace uma u tsôron shin tar, gbem sha won yô. Pasalmi 37:9 kaa ér: “Mba ve veren ashe hen [Yehova] yô, ka ve vea ya dyako u tar ye.” Yange doom kpishi u fan mer, ian ne ngi sha ci u hanma or u nan ze hemen u civir Aôndo sha mimi er Bibilo i tese nahan cii yô.

Nahan cii kpa, yange taver mo u geman gbenda u m eren kwagh la, hiden eren kwagh u Bibilo i tese la. Er m za ikyura ken ityogholough mbi kuhwan kua kwaghkperan yô, m hingir u moron iyol, nahan yange gba u me hii henen u hiden a iyol ijime. Yange lun zange u den uma u ijimbagh u m eren a kwagh u yangem mo shio la ga. Doom kpishi er m fe mer Yehova we ishima a mba ve nôngon sha afatyô ve cii ve dondon kwagh u Bibilo i tese la, shi a zungwen ve mhôônom shi a kaven kwagh ken ishima kpaa yô!

Hii shighe u m lu iyev je zan zan m va nyôr anyom 18 la, m na jighjigh mer Aôndo ngu ga, shi ior cii mba kwaghmôm; kpa Bibilo za hemen u geman uma wam zan zan hegen. Mfe u m zough a mi la na yô, ishima de u nyian mo sha kwagh u ken hemen, shi m kav ityôkyaa i m lu uma yô. Ken inyom i 1993 la, i erem batisema, m hingir Orshiada u Yehova. Ken inyom i 2000 la, m vôso kwase u civir Yehova sha gbashima er mo nahan, iti na ér Tabitha. Ka se vihi shighe kpishi u wasen mbagenev er se fetyô la, sha u ve fa Bibilo. Ior kpishi mba se wasen ve la ka mba ve kpa yange ve vande nan jighjigh ér Aôndo ngu ga, shi ve na jighjigh a pati u Communism, u nengen ér ior cii mba kwaghmôm la yô. Ka mea tese ve er vea kar ve vea fa Yehova nahan, i saan mo iyol kpishi.

Shighe u m hii u kohol a Mbashiada mba Yehova la, ishima vihi mbamaren av je pev. Kpa ve va nenge er mkohol u m lu kohol imôngo a Mbashiada la a gema akaa kpishi ken uma wam yô. Kwagh u hemban doon mo cii yô, hegen ne mbamaren av mba timen ken Bibilo shi zan mbamkombo mba Mbashiada mba Yehova.

Saan mo man Tabitha iyol ken ivese yase, sha ci u se mba nôngon tsung dondon akaa a Bibilo i we kasev man noov la hanma shighe cii. Ikyav i tesen yô, ka se nôngon ser se dondo kwagh u Bibilo u i we noov man kasev ér ve eren kwagh a ayol a ve sha mimi la, nahan kwagh la na ivese yase seer doon.—Mbaheberu 13:4.

Ishima kera nyian mo sha kwagh u uma man mlu wam u ken hemen ga. M nenge mer m ngu ken tsombor u u lu anmgbianev mba sha tar cii, mba ve lu ken bem man mzough u mimi yô. Ken mzough ne, se mba nengen ser or môm hemba orgen ga. Ka kwagh u yange m na jighjigh a mi shi m soo u zuan a mi ken uma wam je la.