Mpin U Mbaôron Takerada Ne . . .
Kirimishi Ka Iniongo i Mbakristuu?
Ior umiliôn imôngo sha tar na jighjigh ér Kirimishi ka iniongo i ember iyange i mar i Yesu Kristu. Nahan kpa, ka u hen wer ior mba yange ve hemba lun a Yesu kôôsôô la, er mbaapostoli man mbahenen nav nahan, yange ve eren iniongo i Kirimishii? Man u fa kwagh u Bibilo i ôr sha kwagh u iyange i mar kpa? Aluer se zua a mbamlumun sha mbampin mban yô, kwagh la una wase se u fan aluer Kirimishi ka iniongo i Mbakristu yô.
Hiihii yô, Bibilo ter kwagh u ember iyangemar i Yesu shin ma orjighjigh ugen u civir Aôndo ga. Ka iorov uhar tseegh Bibilo i ôr kwagh ve ér yange ve er iniongo i ember iyangemar ve ye. Ve cii yange ve civir Yehova, Aôndo u a ne i nger Bibilo la ga, shi zum u hanma ve nan er iniongo i ember iyangemar i nan la, kwagh u dang er. (Genese 40:20; Marku 6:21) Takerada ugen (Encyclopædia Britannica) kaa ér, Mbakristu mba tsuaa mbara yange ve “venda ieren i mbafanaôndoga i ember iyangemar” la.
U fa werayange u yange i mar Yesu yôô?
Bibilo pase shighe u i mar Yesu jighilii ga. Takerada ugen (McClintock and Strong’s Cyclopedia) kaa ér: “A fatyô u fan iyange i i mar Kristu la jighilii ken Ikyuryan i He ga, shin ma ijiir igen kpaa ga.” Sha kpôô yô, Yesu yange una soo ér mbadondon un ve eren iniongo i ember iyange i mar na yô, yange ma pase wang ér ve fa iyange i i mar un la jighilii.
Kwagh u sha uhar yô, Bibilo ôr kwagh môm u tesen ér Yesu shin orhenen na môm yange nan ember Kirimishi tsô kpaa ga. Takerada ugen (New Catholic Encyclopedia) kaa ér yange i hii teren ishember i Kirimishi la “ken Chronograph of Philocalus, takerada u Mbaromanu gberen hanma inyom sha kwagh u iniongo mba vesen mba i eren ken inyom la, ú yange i zua a mi ken inyom i 336 la yô.” Kwagh ne tese wang je ér ishember ne hii u duen ken kwaghngeren shighe u i nger Bibilo i bee la, kua shighe Yesu hide yem sha anyom kar uderi imôngo yô. Sha nahan yô, McClintock man Strong nger kwagh pase ér “iniongo i Kirimishi due hen Aôndo ga, shi i ôr kwagh i ken Ikyuryan i He kpaa ga.”
Ka mkombo u nyi Yesu yange kaa a mbahenen nav ér ve eren sha u umbur unu?
Er Yesu a lu Ortesen u Hemban yô, yange tese mbadondon un kwagh u soo ér ve er la, shi i nger akaa ne ken Bibilo kpaa. Kpa iniongo i Kirimishi yô, tese ve kwagh sha mi ga. Er tica u ken makeranta ka nan soo ér mbayevmakeranta mba nan ve de eren kwagh i karen akaa a nan tese ve la ken inya ga nahan, kape Yesu kpa yange soo ér mbadondon un ve “de karen akaa a i nger [ken Icighanruamabera] la ken inya ga” je la.—1 Mbakorinte 4:6.
Kpa mkombo u hange hange ugen gema ngu u yange Mbakristu mba tsuaa mbara hoghol a mi kpishi yô—ka mkombo u umbur ku u Yesu, shin mkombo u kwaghyan u umbur Ter. Yesu iyol na yange pase mbahenen nav shighe u vea eren mkombo ne yô, man er vea eren un la kpaa. Kwagh u Yesu yange tese ve jighilii sha kwagh u mkombo ne la, kua werayange u eren un cii, i nger ken Bibilo.—Luka 22:7, 19; 1 Mbakorinte 11:25.
Er se fe wang nahan, Kirimishi ka iniongo i ember iyangemar, shi Mbakristu mba tsuaa mbara yange ve dondo ieren i mbafanaôndoga la ga. Bee kera yô, Bibilo ter kwagh u Yesu ember iyangemar na, shi ma orgen er iniongo i Kirimishi ga. Mbakristu umiliôn imôngo sha tar zua a iwanger sha kwagh ne, nahan ve kure ikyaa ér iniongo i Kirimishi ngi sha ci ve ga.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Er Nan Mbashiada mba Yehova Ve Eren Iniongo i Umbur Iyange i Mar Ga?
Nenge akaa anyiin a sha kwagh u iyange i mar a a tese ér iniongo i umbur iyange i mar la doo Aôndo ga yô.
M-UMBUR
Umbur Ku u Yesu
Se mba lôhôn we ser va kohol a vese imôngo hen mkombo u injaa ne. Kwaghôron u a na hen mkombo ne la una wase u u fan er u fatyô u zuan a mtsera ken uma man ku u Yesu yô.
