SHIGHE u Mbaiserael mba sha ayange a tsuaa la lu wan agoyol u peren Ifi u Yordan nyôron ken tar u Aôndo tôndozwa u nan ve la, ve zua a mbavannya mbagen. Mbavannya mban lu kasev mba ve lu Mbaiserael ga yô. Ve va lôhô nomsombaiorov iniongo. Alaghga kwagh ne lu er ka ian i dedoo je ve zough a mi i vea fatyô u zuan a azende a he shi vinen amar shi yan kwaghyan u injaa nahan, lu kwagh u doon ve. Er aeren a ityô i kasev mbara kua anza ve zua sha kwagh u Tindi u Aôndo tese Mbaiserael ga nahan kpa, alaghga Mbaiserael mbagen hen ér; ‘Kwagh a zayol ga. Se wa ikyo.’

 Ka nyi yange i ere? Bibilo kaa a vese ér: “Ior hii u eren idya a ônkasev mba Moabi.” Jighilii yô, kasev mban yange ve soo ér Mbaiserael mbara ve civir mbaaôndo mbaaiev. Shi Mbaiserael er nahan kpaa! Ka nahan ve “ishima nyoon TER a Iserael tsung” ye.—Num. 25:1-3.

Mbaiserael yange ve per Tindi u Aôndo sha igbenda ihiar: Yange ve gure ve civir ieev, shi ve er idya kpaa. Nahan ior udubu imôngo kpe sha isholibo i ve er la. (Eks. 20:4, 5, 14; Dut. 13:6-9) Lu nyi igen kpa i na ve kwaghbo u er ne seer nyoon yumu? Lu shighe u kwagh ne er la. Luun er ior mbara per Tindi u Aôndo ga yô, yange lu u ica ma gba ga tsô Mbaiserael udubu imôngo mba ve kpe la ma ve per Yordan ma ve nyôr ken Tar u Ityendezwa la.—Num. 25:5, 9.

Paulu yange nger kwagh sha kwagh u akaa aa er ne ér: “Akaa ne er ve, lu akav a tesen man i nger a sha u a̱ lu se ityesen, se mba mkur u ashighe a ve sha a vese ne yô.” (1 Kor. 10:7-11) Akperan nga ga, yange a saan Satan iyol tsung er Mbaiserael mbara hingir u eren isholibo i vesen, nahan ve kera kuma u nyôron ken Tar u Ityendezwa ga yô. Doo u se er kwagh sha kwaghfan sha u wan icintan la ikyo, sha ci u se fa ser a doo Satan tsung aluer se yem eren akaa a a na se kera kuma u nyôron ken tar u he u Aôndo la ga yô!

Satan ngu a hôn Mbakristu sha igbenda i a fe tsembelee shi yange hôn ior mbagen a mi kôr yô. Er se vande ôron nahan, Mbaiserael kpa Satan yange kôr ve sha ijimba i eren. Sha shighe wase ne kpa, ijimba i eren ka hôn u bo ugen. Gbenda môm u se fatyô hingir u za eren ijimba yô, ka u nengen ufoto mba ijimbagh.

Nyian ne, or a fatyô u nengen ufoto mba ijimbagh man orgen môm nana fa kwagh sha mi ga. Ngise la or a soo u nengen akaa a ijimbagh yô, i gba u nana za hen ijiir i i tesen ufiim mbara yô, gayô nana za hen shôôpu i teen ityakerada i i er kwagh u ijimbagh shin i lu a ufoto mba ijimbagh ker yô. Ior kpishi yange ve cia u zan hen ajiir ne sha ci u or a za nenge a ve her yô vea hee. Kpa hegen ne, or u nan fetyô u zan sha Intanet yô nana fatyô u nengen ufoto mba ijimbagh sha ijiirtom gayô shin mato kpaa. Shi ken ityar kpishi, nomsoor shin kwase nana fatyô u nengen ufoto mba ijimbagh a u duen hen ya u nan shio.

Kpa ka cii la ga. Ior mba a uhanseeti man tablet nahan ka kera lun ve ican u nengen ufoto mba ijimbagh ga. Aluer or ngu zenden sha gbenda shin nan nyôr mato gayô igirgirdogo kpa nana fatyô u nengen ufoto mba ijimbagh sha anar u nan.

Er i kera lu ican u nengen ufoto mba ijimbagh shi yeren ieren ne ga yô, ufoto mba ijimbagh va a mbamzeyol nyian hemba ave a tse. Ior kpishi mba nengen ufoto mba ijimbagh ka ve vihi ivese ve shi ve kera lu a icivir ga shi kwagh la a vihi imoshima ve kpaa. U hemban vihin cii yô, kwagh la una fatyô u vihin ikyaryan ve a Yehova. Sha mimi yô, ufoto mba ijimbagh ka ve bula or u nan nengen ve la. Ashighe kpishi ieren ne ka i va or a uzayol mba ken ishima kpaa. Ashighe agen di or ka nana va de ieren ne kpa uzayol mbara ve bee cii ga.

Kpa doo u se fa ser Yehova una fatyô u kuran se sha er se gba ken hôn u Satan ne ga yô. Kpa aluer se soo ser Yehova a kura se yô, saa se er kwagh u Mbaiserael mbara yange ve er ga la, se “veren ato” sha kwaghôron na. (Eks. 19:5) Doo u se fa ser Yehova soo kwagh u ufoto mba ijimbagh ga sam sam. Er nan ve se ôr nahana?

Hen ase sha kwagh ne: Atindi a Aôndo na ikyurior i Iserael la lu kposo a atindi a akuraior agen a sha ayange ve la. Atindi la lu er ka kpekpe  nahan sha ci u a pav Mbaiserael a ver kposo a mbawanndor a ve kua aeren a bo a ior mba shon eren la. (Dut. 4:6-8) Atindi la yange pase wang ér Yehova kôr ijimba ihyom.

Yehova yange ter anza a dang a akuraior agen eren la, maa a kaa a Mbaiserael ér: “Shi aeren a ken tar u Kanaan, ape Mo M lu van a ven ne kpaa, de eren nen a ga. . . . Tar la hôngor, ka nahan man M tsaha u sha ci u kwaghbo u u ye.” Icighan Aôndo u Mbaiserael yô, yange nenge wener uma u Mbakanaan la ndôhôrshima je yô, inya i ve tema ker la kpa hôngor.—Lev. 18:3, 25.

Er yange tsaha Mbakanaan nahan kpa, ior mbagen za hemen u eren ijimba her. Yange anyom nga kar er 1,500 nahan yô, apostoli Paulu ôr kwagh u akuraior a Mbakristu lu ker la ér “Asema a ve wa akpema” shin mba kera we ikyo sha atindi a sha kwagh u aeren a wang la ga. Jim yô, “ve na ayol a ve sha ijimba i eren sha u keren hanma kwagh u hôngorough sha hua.” (Ef. 4:17-19) Nyian ne kpa ior kpishi mba eren ijimba man kunya ngu kôron ve a iyol ve kpaa ga. Mba civir Aôndo sha mimi ka ve nôngo sha afatyô ve cii ér vea palegh u nengen akaa a ijimbagh a ior i tar ne i eren la.

Ieren i nengen ufoto mba ijimbagh ka kwagh u lahan Yehova kpishi je. Yange gba uumace sha ibeen na man sha gbenda u se fatyô u fan kwagh u a doo man u a doo ga yô. Aôndo yange er kwagh sha kwaghfan sha u wan atindi sha kwagh u yav a or. Yange wa ishima ér i lu ior mba ve vese ayol a ve tseegh ve yaven a or u ve vese la sha er a saan ve iyol ye. (Gen. 1:26-28; Anz. 5:18, 19) Nahan ka nyi mba ve eren ufoto mba ijimbagh shin mba ve samber a ve la ve lu erene? Mba vendan atindi a Yehova a sha kwagh u aeren a wang la shia shia. Ior mba ve lu samber a ufoto mba ijimbagh la mba lahan Yehova tsung je. Aôndo una va ôr mbara mba ve vende atindiakaa a na, ve gem ve lu eren akaa a ijimbagh shin samber a mi la ijir.—Rom. 1:24-27.

Nahan hide di sha kwagh u ior mba ve ôron shin ve nengen akaa a jimbagh la di ye? Mbagen yô, vea nenge ér ka kwaghbo ga, ka di kwagh u nan msaanyol tsô. Nahan kpa, jighilii yô, mba suen mbara mba ve vende atindiakaa a Yehova la. Alaghga a lu awashima ve shighe u ve hii u nengen ufoto mbaijimbagh la ga. Nahan cii kpa, Bibilo tese wang ér, gba u mbacivir Aôndo u mimi yô, vea kôr ufoto mbaijimbagh ihyom tsung  je. Bibilo wa se kwagh ér: “Ne mba TER A doo ne ishima yô, kôr nen kwaghbo ihyom.”—Ps. 97:10.

Mba ve soo ér vea palegh u nengen ufoto mbaijimbagh la je kpa, alaghga a taver ve u eren nahan. Se cii se yina, nahan a gba u se nôngo ityav a asaren ase a hôngorough la. Heela tseegh ga, alaghga ishima yase ia nôngo ér ia na se hen ser ka kwaghbo u nengen ufoto mbaijimbagh ga. (Yer. 17:9) Kpa ior kpishi mba ve hingir Mbakristu yô, hemba ityav mbin. Sha nahan yô, we kpa u fatyô u lun a vangertiôr wer u kôrcio u hemban isharen i nengen ufoto mbaijimbagh la. Nenge ase er Mkaanem ma Aôndo ma a fatyô u wasen we u palegh hôn u Satan u ufoto mbaijimbagh ne yô.

Er se vande nengen nahan, yange Mbaiserael kpishi de asaren a bo hungwa a ve. Nyian ne kpa imbakwagh ne ia fatyô u eren. Yakobu u lu anmgbian u Yesu la yange pase kwaghbo ne nahan ér: “Hanma or ka . . . asaren a nan iyol i nan ka a urugh nan a hôn nan [ye]. Zum u isharen ka i jile iyol kera yô, i gema i mar isholibo.” (Yak. 1:14, 15) Isharen i ijimbagh ka ia vesen ken ishima i or yô, ka i va za ar sha iaven i a taver or shon u palegh kwaghbo yô. Sha nahan yô, gba u se kar a isharen i ijimbagh ken ishima yase sha fese, se de u henen sha mi.

Aluer ka u shi henen sha akaa a ijimbagh yô, er kwagh sha kwagh la fese. Yesu yange kaa ér: “Man aluer uwegh ough shin nguhar wou vea na u gbev mbu nôngon yô, tôndo ve, ta kera. . . . Man aluer ishe you ia na u gbev mbu nôngon yô, dugh i, ta kera.” (Mat. 18:8, 9) Yesu yange lu kaan ér se gber alegh a iyolough ase kpôô kpôô ga. Yange lu tesen ikyav er i gbe u se kar a kwagh u a lu nan se gbev mbu nôngon la kera yô; se er kwagh ne fese. Se fatyô u dondon kwaghwan la sha kwagh u nengen ufoto mba ijimbagh nena?

Aluer u asegh sha ufoto mba ijimbagh yô, mayange de henen wer, ‘Kwagh a za iyol ga’ ze. Tôô ashe kera fese. Aluer ka sha televishen yô, pir un kera fese. Aluer ka sha kômputa shin hanseeti gayô tablet kpa pir un kera fese je. Hide ver ishima sha kwagh u a lu u wang yô. Aluer u er nahan yô, kwagh la una wase u u kôron iyol tsaha, henen sha akaa a injaa, u kera yem henen sha asaren a bo ga.

Aluer u de u nengen ufoto mba ijimbagh kpa ufoto mbara mba van we ken ishima her di ye? Ufoto mba ijimbagh shin mbamhen mba ijimbagh vea fatyô u lun or ken ishima gbem. Kwagh ne una fatyô u eren hanma shighe cii. Aluer kwagh er nahan yô, alaghga a lu u pe eren kwagh u hôngorough, er u ngirigh ilyeegh you ki yaven a or nahan. Nahan fa wer akaa la a fatyô u van we ken ishima, shi kegh iyol u nôngon ityav a a.

Seer kangen ishima wer u henen shi u eren kwagh er Aôndo a soo la. Lu er apostoli Paulu nahan, un yange kegh iyol u ‘gbidyen iyol na veren i ken kpan je.’ (1 Kor. 9:27) De deen wer asaren a bo a ya tor ken a we ga. ‘Lu a mhen u he, sha er u gema u hingir u fan kwagh u a doo Aôndo man u a lumun a mi shi a lu u vough sha ishigh nagh la yô.’ (Rom. 12:2) Umbur wer, u henen shi eren kwagh er Aôndo a soo la hembe van a averen a u dondon asaren a ijimbagh.

Nôngo kôr avur a Bibilo agen ken ityou. Nahan shighe u mbamhen mba bov ve ve u ken ishima yô, kighir iyol you hen sha kwagh u avur shon. Avur er Pasalmi 119:37 man Yesaia 52:11 man Mateu 5:28 man Mbaefese 5:3 man Mbakolose 3:5 kua 1 Mbatesalonika 4:4-8 nahan aa fatyô u wasen we u zuan mhen wou hwange môm a gbenda u Yehova a nengen ufoto mba ijimbagh kua kwagh u a soo ér u er la.

Nahan kpa aluer ashighe agen isharen i nengen shin henen sha akaa a ijimbagh la ka i va taver je u nenge wer u fatyô u kôron iyol tsaha ga di ye? Dondo ikyav i Yesu a ver se la. (1 Pet. 2:21) Yange mba eren Yesu batisema kera yô, Satan lu meen un. Yesu yange er nena? Yange za hemen u vendan. Yange a ter avur a Bibilo kposo kposo sha u vendan ameen a Satan la. A kaa ér: “Yem kera, Satan”! maa Satan undu un. Er Yesu yange gba uwer u nôngon kwagh a Diabolo ga nahan, we kpa de gbe uwer ga. (Mat. 4:1-11) Satan vea tar na vea za hemen u nôngon ér vea iv ishima you a mbamhen mba ijimbagh, kpa de gbe uwer u nôngon kwagh a ve ga. U fatyô u hemban ityav mbi u lu nôngon a ieren i nengen ufoto mba ijimbagh la. Sha iwasen i Yehova yô, u fatyô u hemban orihyom wou la.

EREN MSEN HEN YEHOVA SHI UNGWAN IMO NA

Za hemen u eren msen hen Yehova shi sônon un wer a wase u. Paulu yange kaa ér: “Akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun, man bem u Aôndo u a gande hanma mfe wase cii una kura asema a en man mbamhen enev ken Kristu Yesu ye.” (Fil. 4:6, 7) Bem u Aôndo ka a na se mpeveryol ken ityav mbi se lu nôngon a isholibo ne. Aluer u kporom ikyua a Yehova yô, “Un kpaa, Una kporom her a [we].”—Yak. 4:8.

Aluer ikyar i se ye vea Uhembanagee sha won cii la taver yô, hôn u Satan môm kpa se gba ker ga. Yesu ngise kaa ér: “Tor u tar ne [Satan] ngu van, ngu a ma ityôkwagh sha a Mo ga.” (Yoh. 14:30) Er nan ve Yesu yange lu a vangertiôr nahana? A pase kwagen la wener: “Un u A tindim la ngu a Mo; A undum tswen ga, gadia M eren akaa a doon Un gbem.” (Yoh. 8:29) Aluer we kpa u za hemen u eren akaa sha ishima i Yehova yô, una kende u ga cii. Palegh hôn u nengen ufoto mba ijimbagh la, nahan mayange Satan una wever we ave iyol ga.