1. Apostoli Paulu yange ta Mbakristu mba i shighe ve mkurem la icin ér nyi?

APOSTOLI PAULU yange ta icin ér: “De.” Ér i de nyi? Wener: “De hingir nen inja i môm a tar ne ga.” (Rom. 12:2) Paulu yange nger mkaanem man hen Mbakristu mba hiihii mbara. Er nan ve yange ta nomso man kasev mba ve tsegha ayol a ve sha ci u Aôndo shi icighan jijingi tsegha ve la icin taveraa nahana?—Rom. 1:7.

2-3. Satan ngu a nôngo ér una mee se se gema ijime a Yehova nena, kpa se fatyô u dughun akaa a “taver tsung,” shin aeren a bo la ken a vese kera nena?

² Yange ishima za Paulu iyol sha ci u a shi nan kpa, Mbakristu mbagen de mhen u bo kua kwaghfan u taregh u tar ne u samber a mi la lu nyôron ve ken ityou. (Ef. 4:17-19) Imbakwagh la ia fatyô u eren hanma wase cii. Satan u a lu aôndo u tar ne la ngu nôngon sha igbenda kposo kposo sha afatyô na cii ér una mee se, se gema ijime a Yehova. Gbenda môm u a lu eren kwagh ne yô, ka una nenge ér se mba a isharen ken a vese cuku tsô ser ma i ongo a vese shin ma se due iti yô, maa a kôr ave sha mi je. Shighe gen je yô, alaghga una kôr ave sha akaa a i tese se hen tsombor shin hen ityô yase gayô ken makeranta kua hen ior mba se lun a ve la sha er una mgbegha se, se gema henen kwagh er un nahan yô.

³ Nahan se fatyô u dughun akaa a “taver tsung” shin a a we amishe ken a vese la kera kpa? (2 Kor. 10:4) Nenge ase  mlumun u Paulu yange na yô, ér: “Se mba vihin mbamhen kua hanma kwagh u taven u a hendan a mfe u Aôndo cii, shi se mba kangen hanma mhen, nôngon ser a ungwan Kristu.” (2 Kor. 10:5, NW) Nahan sha iwasen i Yehova yô, se fatyô u dughun aeren shin anza a bo ne ken a vese. Mkaanem ma Aôndo ma a fatyô u been a megh shin ieren i tar u Satan ne ken a vese vough er icigh ka ki bee a megh nahan.

4. Ka akaa a nyi nahan yange gba u se kpishi se de u eren shighe u se ngohol mimi ikyagh laa?

⁴ Hide hen sha akaa a yange gba u u gema ken uma wou shighe u u hii henen mimi u Mkaanem ma Aôndo, nahan u tsua u civir Yehova la. Se mbagenev kpishi yange gba u se de akaa a bo a se eren la. (1 Kor. 6:9-11) Doo se kpishi er Yehova a wase se u hemban aeren a bo ne nahan!

5. Ka akaa ahar a nyi i ter ken Mbaromanu 12:2 a i gbe u se er keng keng-ne?

⁵ Nahan cii kpa, gba u mayange se haa iyol inya ga. Er se de u eren asorabo a vesen a ngise se eren cii ve se va er batisema nahan kpa, gba u se er teghelee sha nyityôkwagh i ia na se hide se yem eren akaa a yange se eren la cii. Kpa se er kwagh ne nena? Paulu na mlumun ér: “De hingir nen inja i môm a tar ne ga, kpa i̱ gema ne sha mgem u he u mhen wen.” (Rom. 12:2) Gba hange hange u u er akaa ahar. Hiihii yô, a gba u se ‘de u hingir inja i môm a tar,’ shin dondon aeren a tar ne. Sha uhar yô, a gba u se “gema,” se gema gbenda u se henen kwagh la kua aeren a ase.

6. Mkaanem ma Yesu ma i nger ken Mateu 12:43-45 la tese se nyi?

⁶ Mgem u Paulu lu ôron kwagh na heen ne hemba di mgem u sha iyol. Mgem ne bende a mlu wase jimin cii. (Nenge ngeren u kiriki u a lu a itinekwagh ér “ Ka Mgem u Mimi shin U  Yer a Yer Iyolo?” la.) Gba u se gema mlu wase vindi vindi, aeren a ase kua mbamnenge asev man asaren a ase. Gba u se cii se pine ayol a ase ser ‘Akaa a m lu geman ken uma wam sha u me hingir Orkristu ne, ka sha iyol tseegh shin mimi je m ngu hingir Orkristu ken atô u ishima yam je?’ Mkposo la ka kwagh u vesen. Yesu yange tese kwagh u i gbe u a er la ken mkaanem nam ma i nger ken Mateu 12:43-45 la. (Ôr.) Mkaanem mara tese se kwagh u injaa kpen kpen, ér: U been a mbamhen mba bov ken a vese tseegh la kuma ga, gba u se dugh ve, se gema se iv ishima yase a mhen u Aôndo.

7. Se er nan ve se gema or u se lu ken atô jim jim laa?

⁷ Nahan se fatyô u geman mbamhen asev shin injaor i se lu ken atô jim jim kpa? Mkaanem ma Aôndo na mlumun nahan ér: “Hingir nen hegh ken jijingi u mhen wen, man haa nen orhe iyol u i gbe un sha inja i Aôndo ken perapera u mimi man mtsegh u mimi” la. (Ef. 4:23, 24) Kwagh la tese ér se fatyô u geman or u se lu ken atô jim jim la, kpa ka kwagh u zange ga. Gba u se er kwagh a hemba di u kighir asaren a ase kua aeren a ase a bo la. Gba u se gema ‘mhen wase.’ Kwagh la wa u geman asaren a ase kua ieren yase kua akaa a a mgbeghan se u eren kwagh la. Kwagh ne ka kwagh u i gbe u se za hemen u eren zan zan yô.

8-9. Kwagh u yange er anmgbian ugen la tese er i gbe hange hange u se gema or u se lu ken atô la nena?

⁸ De se nenge ikyav sha kwagh u anmgbian ugen u yange eren ipila yô. Yange de msôrom ma man kua num nôngon nahan i er un batisema. Kwagh ne hingir shiada i dedoo hen anijiir u lu her la. Kpa anmgbian ne eren batisema shighe kar kpuaa yô, iyange igen aikighe daalaa nahan va tagher a kwagh ugen u karen jighjigh na u ver ishima ga yô. Or ugen za ma ikyôhô lu hunden maa va due hen ya na ér vea nôngo num. Sha hiihii la yô, anmgbian ne kôr iyol na tsaha. Kpa or la va lamen dang sha iti i Yehova yô, anmgbian ne wa ishima wa shio. A due a za kôr or la a tôô un iyol tsembelee. Yange er nahan sha ci u nyi? Er Bibilo na i henen la i wase un u kighir isharen i eren ipila la nahan kpa, yange lu a gema tahav mbu kôôm mhen na la ga. Inja na yô, lu a gema or u lu ken atô jim la ga.

⁹ Nahan kpa anmgbian ne yange yina ishima ga. (Anz. 24:16) Mbatamen yange ve wase un, nahan za hemen u geman. Shighe kar yô, va hingir ortamen. Maa iyange igen aikighe yô, shi a tagher a imbakwagh i yange vande tagher a mi anyom kpishi ken ijime la, hen Iyou i Tartor. Orgen za ma ikyôhô lu hunden, maa wener una gbidye ortamen ugen. Anmgbian wase ne yange er nena? Yange gba ishima shimi shi hide a iyol ijime, a lam a or u lu hunden ikyôhô la kundu kundu nahan or la gba ishima shimi, shi anmgbian wase ne tôô un yem a na hen ya na. Er nan ve anmgbian wase ne er kwagh kposo kwa nee? A gema or u lu ken atô la. Yange hingir or u lun a bem shi hiden a iyol ijime, man kwagh ne va Yehova a iwuese!

10. Ka nyi i gbe u se er keng ve se gema or u se lu ken atô jim jim laa?

¹⁰ Mbamgem mban ka kwagh u iyange i môm ga, shi ka kwagh u eren kwa môm kpoo ga. Alaghga a gba u se ‘nôngo ngeelee’ anyom imôngo je. (2 Pet. 1:5) Nahan kpa doo u se fa ser “u lun ken mimi” shighe gôgônan la tseegh una fatyô u geman or ga. Saa se nôngo sha afatyô wase cii se gema injaor i se lu ken atô jim jim la. Akaa nga a se er ve se kôrcio u eren kwagh ne yô. De se pande se time sha akaa shon kpuaa.

11. Msen ka a wase se u geman tahav mbu mgbeghan mhen wase nena?

¹¹ Msen ka kwagh u vesen u hiihii u i gbe u se er yô. Gba u se er msen er yange orpasalmi er nahan, yange er msen ér: “Gba ishima i wang ken a mo, Aôndo, shi ver jijingi u he u taver ken a mo.” (Ps. 51:10) Saa se fa ser gba hange hange u se gema tahav mbu mbu mgbeghan mhen wase la, shi se sônon Yehova ser a wase se. Kpa, se er nan ve se fa ser Yehova una wase se u gemana? Kwagh u Yehova tôndozwa ér una er a Mbaiserael mba taver ityough sha ayange a Esekiel la una wase se u fan je ser, se kpa Yehova una wase se. Yange kaa ér: “Me na ve u lun ishima i môm, Me ver jijingi u he ker a ve; . . . Me na ve ishima i inyam; [ka ishima i i kegh iyol u ungwan kwaghwan u Aôndo je la].” (Esek. 11:19) Yehova yange kegh iyol u wasen Mbaiserael mbara u geman inja, shi se kpa a kegh iyol u wasen se.

12-13. (a) Pasalmi 119:59 tese ér ka nyi i gbe u se gbidye kwar sha mi? (b) Ka mbampin mba nyi i doo u u pine iyol youwe?

¹² Kwagh u vesen ugen u i gbe u se er yô, ka u gbidyen kwar. Hanma iyange yô, doo u se tôôn shighe se gbidye kwar shighe u se lu timen ken Mkaanem ma Aôndo yô. Gba u se time sha kwagh u se lu henen la a za shimi sha er se fa ajiir a i gbe u se gema mhen wase yô. (Ôr Pasalmi 119:59; Heb. 4:12; Yak. 1:25) Doo u se fa hanma mhen shin ieren i se lu a mi i alaghga i zough sha mhen u taregh la cii. Gba u se lumun ér mimi je se yina, nahan se nôngo kpoghuloo se hemba mbamyen mbara.

¹³ U tesen ikyav yô, u fatyô u pinen iyol you wer: ‘Ma ikyav ngi kpuaa i i tese ér m ngu a iyuhe ken ishima yôô?’ (1 Pet. 2:1) ‘Ka i lum pe timin akende sha ci u ijiir i m dugh her shin makeranta u m ze, gayô inyaregh ki m lu a mi yôô?’ (Anz. 16:5) ‘M nengen mer m hemba ior mba ve lu a akaa er mo nahan ga shin ve dugh ken ityô igen laa?’ (Yak. 2:2-4) ‘Akaa a tar u Satan u ne la ka a sareme?’ (1 Yoh. 2:15-17) ‘Iemberyolough i dang shin i pilagh ngi doon mo?’ (Ps. 97:10; 101:3; Amo. 5:15) Mbamlumun sha mbampin mba tôvon iyol you mban vea wase u u fan ajiir a i gbe u u nyôôso uma wou yô. Aluer se hemba akaa a lun er “ayou a taver tsung nahan” la yô, a doo Ter wase u sha a vese.—Ps. 19:14.

14. Er nan i gbe hange hange u se tsua azende a injaa?

¹⁴ Kwagh ugen yô, gba hange hange u se tsua azende a injaa. Sea fa shin sea fa ga kpa, ieren i ior mba se lun a ve la ka i tsar se. (Anz. 13:20) Doo u se fa ser alaghga sha ijiirtom yase shin ken makeranta kpa, ior mba soon ér se gema henen kwagh er tar ne la vea ban ga. Kpa se fatyô u zuan a azende a hemban doon cii ken mbamkombo asev mba Mbakristu. Ka ken mbamkombo mbara ka i taver se ishima u “lun a dooshima man aeren a dedoo” ye.—Heb. 10:24, 25.

15-16. Satan ngu a nôngo ér una gema mhen wase nena?

¹⁵ Kpa umbur wer Satan kange ishima ér una gema mhen wase. Ngu a nôngo sha igbenda kposo kposo ér una vihi mhen u dedoo u Mkaanem ma Aôndo ma ne se lu a mi la.

¹⁶ Nyian kpa Satan ngu pinen mpin u yange pine Ifa ken sule u Eden la her, wener: ‘Ka mimi je, Aôndo kaa er . . . ?’ (Gen. 3:1) Ken tar u u lu Satan sha ikyev ne, ashighe kpishi ka se ungwa mbampin amba er mban nahan, ér: ‘Ka mimi je Aôndo venda ér nomso ve de vôson nomso shin kasev ve de vôson kasev gaa? Ka mimi je Aôndo soo ér we u  de ember Kirimishi kua iyange i mar gaa? Mimi je Aôndo soo ér u venda awambe a tana? Mimi je Aôndo soo ér u palegh ior mba doon we ishima mba i dugh ve ken tiônnongo laa?’

17. Ka nyi i doo u se er shighe u or pin se mbampin mba vea na se lu a akperan sha kwagh u jighjigh wase, man Mbakolose 2:6, 7 tese ér ka nyi ia fatyô u duen ken kwagh laa?

¹⁷ Gba u se fa akaa a se ne jighjigh a mi la a kuma se. Aluer akaa agen wanger se ga kpa se gba ungwan ato tsô yô, alaghga se va hii u lun a akperan ken ishima. Akperan ne aa fatyô u nzughul a mhen wase shi aa vihi jighjigh wase u nan. Nahan ka nyi i gbe u se ere? Mkaanem ma Aôndo kaa a vese ér se gema mhen wase, sha er se hingir u fan “kwagh u a doo Aôndo man u a lumun a mi shi a lu u vough sha ishigh nagh la yô.” (Rom. 12:2, NW) Aluer se mba henen Bibilo hanma shighe yô, se hingir u nan mimi u Bibilo i tese se la jighjigh. Se hingir u lun a vangertiôr nahan ser atindiakaa a Yehova nga vough. Kwagh la una na yô, se wa amishe, se ‘taver jighjigh wase u nan’ vough er kon u u we amishe shin inya i taver nahan.—Ôr Mbakolose 2:6, 7.

18. Ka nyi ia wase se u vihin megh ku tar u Satan laa?

¹⁸ Ka we iyol you u fatyô u taver jighjigh wou ye, orgen nana fatyô u eren kwagh ne sha ci wou ga. Nahan za hemen u geman mhen wou. Eren msen hanma shighe, sônon Yehova wer a na u jijingi na. Gbidyen kwar zulee shi timen sha mbamhen ou kua akaa a mgbeghan we u eren kwagh la. Ker azende a injaa, luun vea ior mba vea wase u u geman mhen wou yô. Aluer u er nahan yô, u wua megh ku tar u Satan kura shi u vihi “mbamhen kera man shi hanma kwagh u taven u i kende a mi sha, sha u yisan kwaghfan u Aôndo” la cii.—2 Kor. 10:5.