Jighjigh U Nan Una Fatyô u Geman Uma Wou

“A AÔNDO shio je kpa or naná fatyô u lun a inja.” Kape kwase ugen u yange na jighjigh ér Aôndo una lù kpa i fa ga yange kaa la. Yange kaa ér un yèsè ônov nav un tèsè ve aeren a dedoo, shi ve di kpaa ve yèsè ônov vev sha zwa la—a u nan Aôndo jighjigh shio.

Inja na yô ka u kaan ér kèrà ka a inja u nan Aôndo jighjigh ga shinii? Ikyav tèsè ér kwase ne yô yange hen nahan. Shi ka mimi, ka hanma or u nan ne Aôndo jighjigh ga nan lu or u bo ga. Apostoli Paulu yange ôr kwagh u “atôatyev” a á fe Aôndo ga kpa á ‘eren akaa a sha tindi sha gbaaôndo u a la.’ (Mbaromanu 2:14) I màr ior cii a imoshima—kua mba ve ton ér Aôndo ngu ga la kpaa. Ior kpishi ka ve nôngo ér vea dondo ityesen i imoshima ve, shin vea na Aôndo shon u á ne ve imo i ken atô i fan kwagh u dedoo man u bo la jighjigh ga je kpaa.

Nahan cii kpa, jighjigh u nan Aôndo tsung—u a har sha Bibilo yô—hemba ngun aa tahav mbu dedoo á imoshima i lun a mkôôm shio la. Jighjigh u nan u a har sha Bibilo, Mkaanem ma Aôndo yô, tesen imoshima, ne ngi hembe fan u paven kwagh u dedoo a u bo la. (Mbaheberu 5:14) Heela tseegh ga, jighjigh u nan ka a na ior ve za hemen u eren aeren a dedoo la her dông sha shighe u mbamkighir mba taver ve ve je kpaa. U tesen ikyav yô, sha derianyom u sha 20 la, yange ikpentar kpishi hingir sha ikyev i hemen u mbapativ mba vihin tu tsung, man kwagh la na yô ior mba ngise ve lu̱ inja je e̱r ka mba ikyoov mbara kpa hingir u eren afer a kpilighyol. Nahan kpa mba yange ve na Aôndo jighjigh sha mimi yô ve venda u peren atindi a mlu ve la, shin yange a̱ àngèr ve aa ku je kpaa. Kwagh u seer yô, jighjigh u nan u a har sha Bibilo yô una fatyô u geman ior. Una fatyô u wárén uuma mbà i lu inja e̱r ve saa la shi wasen ior u palegh mbamtsum mba vesen kpaa. Nenge ase akav a tesen angan ne.

 Jighjigh u Nan Una Fatyô u Geman Uma u he’ Tsombor

“Ú e̱r kwagh u i lu inja e̱r mayange je á fatyô u eren ga la sha jighjigh u nan wou.” Kape orjir ugen u ke’ tar u Ingila yange kaa zum u á lù kuren ijir, pasen or u nana yèsè ônov mba John man Tania je la. Zum u mbautaha va hingir u fan John man Tania la, ve lu̱ a̱ vôso ayol a ve ga shi uma ve u he’ tsombor vihi kpen kpen. John yange maan icimbiv mbi bough shi haan ishor, nahan ke’ masejime yô va hii u iin sha u una zua a inyaregh ki zan hemen a aeren ne yô. Á gbihi ônov nav kua ngô ve cii. Tsô, ka “ivande” i nyi yange i ere?

Iyange igen sev mbu aven yô, John ungwa wan u anngô na u vesen lù ôron kwagh u Paradiso. Kwagh la doo un ungwan, nahan a za pine mbamaren mba wan ne sha u una seer ungwan kwagh shon yô. Mbamaren mba wan ne ka Mbashiada mba Yehova, nahan ve wase John sha u a̱ hen kwagh shon ke’ Bibilo yô. Tègh tègh tsô, John man Tania hii u lun a jighjigh u nan u a har sha Bibilo u̱ yange va gema uuma vev yô. Ve nger ivese ve shi ve de̱ u eren akaabo a ngise ve eren la kpaa. Mbatomov mba eniee yange ve va jìngè he’ ya ve yô ve nenge a kwagh u yange or mà hen ér una fatyô u lun ke’ anshighe u a kar kpuaa la ga yô—ve nenge tsombor ne lù saan saan, ya ve lu wang, shi ijiir la lù i injaa i yesen mbayev her kpaa. Kwaghôron u orjir la lu vough zum u a kaa ér jighjigh u nan u he u John man Tania ve zough a mi la e̱r “ivande” la.

Kwagh u kunya yange lu nôngon u eren gumkwase ugen u sèmbèr eren nom ke’ vegher u sha Ityoughkitaregh, u lu ica a tar u Ingila ukilomita dubu imôngo yô. Yange lù wan ke’ ishima ér un kpa una pav ivese, una hingir môm ke’ ior umiliôn imôngo mba avese ve a kuren ke’ ivaapaven hanma inyom la. Yange lù a wan, shi nom na gema lù tamen a na ica je. Sha ityôkyaa ne yô, ior nav lù teven un ke’ tyô ér a̱ pav ivese, man yange hii u nyôôso iyol i paven ivese shon kpaa. Nahan kpa, Kwase Shiada u Yehova ugenegh lù henen Bibilo a na. Kwase Shiada la va fe kwagh u lù zan hemen yô, a pase gumkwase ne kwagh u Bibilo i er sha kwagh u ivesegh yô—u tesen ikyav yô, i̱ pase ér ivese ka naagh ku hen Aôndo shi ka kwagh u á gba tan kera tsô ga. (Mateu 19:4-6, 9) Kwase la gba henen ke’ ishima na ér, ‘Tuna kpishi e̱r i hii ve i de i lu kwase u fan kpa á fem ga ne á lu nôngon ér tsombor wase u̱ de saren ga, kpa mba ve lu a mo ikyooso kyooso ne di ve gem ve soo ér u̱ sar yô.’ Jighjigh u nan na u he ne wase un u kuran ivese na.

Kwagh u vihin u a lu nzughul a uma u hen tsombor yô ka iyav mbu vihin. Ibaver igen i i ne sha ikyev i Mzough u Ityar Cii i̱ kaa ér hanma inyom yô ka a̱ bunde kera kera kpa í dugh iyav mbu anikyundanev e̱r umiliôn 45 nahan í ta kera sha apera. Hanma kwa u i er imba kwagh ne cii ka i lu kwagh u vihin u kpilighyol. Mfe u fan Bibilo yange wase kwase ugen ke’ kpentar u Philippines nahan kera seer sha iyenge i mba dughun iyav ne ga.

Yange môm ke’ Mbashiada mba Yehova za kwase ne inya, nahan a lumun ér una hen Bibilo ke’ antakerada u i yer ér Kanyi Aôndo a Soo her Avese?  * la, maa i gba a mi henen Bibilo a na je. Iwer ngi karen kpuaa yô, a pase ityôkyaa i yange i na ve un lumun u henen kwagh yô. Kwase la yange lu iyav zum u Mbashiada mbara hii zan un inya la, kpa un vea nom na ve soo u vihin iyav mbu shon. Nahan cii kpa, foto u wan u ke’ ùyà u á lu sha peeji u sha 24 ke’ antakerada shon la kôr kwase la ke’ ishima. Shi ipyasen i haren sha Bibilo i i ne ér uma ka icighan kwagh sha ci u ‘ka her Aôndo imbor i uma i lu’ la na kwase la kera dugh wan na ta kera ga. (Pasalmi 36:9) Hegen a hingir ngô u wanikyundan u doonashe, shi lun gbon gbon kpaa.

Jighjigh u Nan Wasen Mba Í Nengen Ér Mba Aseeraior La

Nomsombaiorov uhar mba ke’ tar u Etiopia wùhà iyol caveraa za mkombo u Mbashiada mba Yehova. Mba hemben mkombo kera yô, Orshiada ugen kporom ikyua va sugh ve, pine ve tar kúndù kúndù. Ior mbara sôn ér i̱ ker ve a ankwagh. Orshiada la na ve kwagh, kpa lù inyaregh ga, lù kwagh u hemban inyaregh. A taver ve ishima ér ve̱ na Aôndo jighjigh, sha ci u kwagh la ka “u a hemba zenaria inja ica” je yô. (1 Peteru 1:7) U môm ken ave vengese nahan hii u henen Bibilo. Kwagh ne gema mlu u uma na. E̱r jighjigh u nan na ngur seer yô, a de̱ taav u mán man msôrom mà mán ganden ikyaa inya la kua idya i eren kpaa, shi a de̱ tamen ikya i i yer ér khat (kwagh u kôron e̱r msôrom nahan) la kpaa. A hen u wan ikyo sha iyol na shi a de̱ zamber zenden, man hegen ngu eren tom, uma na ngu tsembelee kpaa.

Ke’ tar u Italy di yô, i ôr orgen u lun anyom 47 ijir i wuhe un anyom pue kpa i gema i wa un ke’ gaadi  u sôron mbaihyunduv. Orshiada u Yehova ugen u yange i na un ian i nyôron ke’ ugaadi atô kposo kposo sha u za nan ior iwasen i ke’ jijingi yô hen Bibilo a na. Or la za hemen gyávér gyávér je. Jighjigh u nan gema uma u or ne je yô hegen mbakwarev mbagenev ka ve za her a na ér a̱ tese ve gbenda u vea kar man vea sôr mbamzeyol vev yô. Jighjigh u nan na u a har sha Bibilo la na un iciviryolough kua ulum kpaa, shi mbakuran gaadi kpa na un jighjigh.

Ken anyom a á sember karen la pipambaabaver kpishi na ábávér sha kwagh u ityav mbi ke’ kpentar u Afrika la. U hemban cieryol je yô ka mbayevnomso mba kiriki mba i tese ve ve hingir shoja mba nôngon ityáv la. Ka i na mbayev mban icimbiv mbi taver ve ma shi i nzughul a ve shi i kighir ve ér ve̱ er ior vev akaa a kpilighyol sha u tesen ér, ka ikyumutya i̱ ve til sha vegher u i̱ ve lu nôngon ityáv la tseegh ve ongo i̱ ye. Jighjigh u nan u a har sha Bibilo la taver kuma u geman uuma mba amba a agumaior la kpa? Kwagh yange e̱r nahan acin ahar je.

Alex yange eren fada tom sha atse ke’ Côôci i Katoliko ke’ tar u Liberia. Kpa va kom anyom 13 yô, maa nyôr kweshojaa u atemtyo, hingir shoja i kiriki i vihin tu tsung. Ica i gbe ga yô maa a nyôr akombo a eren sha u una cia kwagh ke’ utya ga yô. Yange i wua azende a Alex kpishi sha ashe na, kpa un yô war. Ke’ inyom i 1997 la a zua a Mbashiada mba Yehova, nahan a kav ér ve nenge un kpènénéné ga. Kpa, ve gema ve wase un u henen fan kwagh u Bibilo i̱ kaa sha kwagh u ipila i eren yô. Alex maa de̱ shoja. E̱r jighjigh u nan na ngur seer yô, a dondo kwaghwan u Bibilo i̱ we ne, ér: “Nana̱ nyagh ifer nana̱ gema nana̱ er kwagh u dedoo, nana̱ ker bem nana̱ zenda un ityô kpaa.”—1 Peteru 3:11.

Yange igen yô Samson, wanye u nôngon ityáv ugen, due zende va kar gbenda he’ gar u Alex lu la. Yange vande lun ke’ mbaatsamev mba ke’ iyouadua i zaan la, kpa ke’ inyom i 1993 la a nyôr shoja, nahan a hingir u man icimbiv dang dang shi nyôron iyol ke’ mcivir u ujijingi, kua ijimba i eren kpaa. Ke’ inyom i 1997 la maa i de̱ un tom shoja. Samson lu yemen ke’ gar u Monrovia sha u una za nyôr nongo ugenegh u mba kangen iyav. Ka he’ zum la ijende na igen taver un ishima ér a̱ hen Bibilo vea Mbashiada mba Yehova ye. Sha nahan yô a hingir u lun a jighjigh u nan u a har sha Bibilo la. Kwagh ne taver un ishima u undun igbenda na i num la. Hegen Alex man Samson cii mba ke’ bem, ieren i uma ve kpa ngi wang. Dugh jighjigh u nan u a har sha Bibilo kera yô, ma kwagh ugen ngu u una fatyô u geman uuma mba ior mba i nzughur a ve tsung mbaraa?

Jighjigh u Nan u Á Lu u Vough La

Angan ka di akav a kpuaa ke’ akav a tesen kpishi a á fatyô u nan u tesen tahav mbu jighjigh u nan u mimi u a har sha Bibilo la a lu a mi je ne. Sha mimi yô, ka hanma or u nan senge ér nan ná Aôndo jighjigh cii nan dondon atindi a Bibilo a tseng la ga. Sha jighilii yô, alaghga ior kpishi mba ve nyiman ér Aôndo ngu ga la vea hemba lun a aeren a injaa a mbagenev mba ve senge ér ve mba Mbakristu la. Kwagh a fatyô u lun nahan sha ci u jighjigh u nan u a har sha Bibilo la hemba u or sengen di tsô ér nan ná Aôndo jighjigh la.

Apostoli Paulu yange kaa ér jighjigh u nan “ka u fan kwagh u ishimaverenkeghen yase i lu sha mi la dedoo a akpelan a tan ga, ka ikav i akaa a i nengen a mi ga la.” (Mbaheberu 11:1) Sha nahan yô, jighjigh u nan jim yô ka u nan akaa—a a fatyô u tunan avindir a á ga la jighjigh—akaa á i gem i lu u̱ a fatyô u nengen a a ga yô. Hemban je yô ka u nan jighjigh a akperan shio ér Aôndo ngu shi kwagh gba un a vese kpaa, shi una ver mba ve eren ishima na mbara cii doo doo. Shi apostoli la kaa ér: “Or u nan kporom hen Aôndo yô, ka u nana na jighjigh keng er ngu, man shi Un ne mba ve lu keren Un la injar.”—Mbaheberu 11:6.

Ka imba jighjigh u nan ne yange gema uma u John man Tania kua u̱ mbagenev mba i er kwagh ve ke’ kwaghngeren ne mbara kpaa ye. Yange wase ve u nengen ke’ Bibilo, Mkaanem ma Aôndo a u tan akperan shio, sha u mà kôôm ve ke’ akaa a ve tsough u eren la. Yange wase ve u yan ican sha anshighe kpuaa sha e̱r vea e̱r kwagh u a hembe kpen iyol kpa a gem a lu u bo la ga yô. Shin e̱r u̱vàndè-èrèn mban yange ve lu kposo kposo nahan kpa, ve cii mhii ve yange lu inja i môm tsô. Yange môm ke’ Mbashiada mba Yehova hen Bibilo a ior mban, nahan ve mase nengen a mimi u kwagh u Bibilo i kaa la ye, ér: “Mkaanem ma Aôndo ma uma je, ma tem gbilin ga.” (Mbaheberu 4:12) Tahav mbu Mkaanem ma Aôndo ma lu a mi la yange má wase ior mban cii u maan jighjigh u nan taveraa, nahan gema uuma vev hemba lun a inja.

Mbashiada mba Yehova mba eren tom sha ityar man acile a zegemnger wuee je hemba e̱r 230 nahan. Mba lôhôn we ér u̱ hen Bibilo a ve. Sha ci u nyi? Sha ci u ve fa dedoo ér jighjigh u nan u a har sha Bibilo yô una va a mbamgem mba vesen ke’ uma wou kpaa.

[Ngeren mba shin kpe]

[Ufoto mba sha peeji 3 la]

Jighjigh u nan u a har sha Bibilo la ka a gema uma a hemba lun a inja