“Akaainjaa” Nga Ivin Ke’ Iyou I Yehova
“Akaainjaa” Nga Ivin Ke’ Iyou I Yehova
“ [Mo Yehova] Me tenger akuraior cii, nahan akaainjaa a akuraior cii aa va, nahan Me iv iyou ne a iengem.”—HAGAI 2:7.
1. Hii nan i lu ior asev mba ve doo se ishima mbara ka se vande henen kwagh ve zum u kwagh a bur se a buru?
KA AKAAINJAA a nyi u ombo ke’ iyou youwe? U ngu a mkônom ma injaam shin u ngu a kômputa u sha iwavaren i ainge shin ú sember yamen mato u he? Wea kohol akaa ne cii wea lu a a je kpa, ú lumun wer ka ior mba ve lu he’ ya wou la—mba he’ tsombor wou mbara ve hembe lun we akaa a injaa ga zee? Tôô ase wer u yav tugh mbugenev yô, mnyim yughur we gande u za nure mnya u nder. Ya wou gba usu, nahan u mase shin di a uminiti kpuaa tseegh u yevese waren! Kanyi i lu kwagh u hiihii u ishima ia hii nyian we a mini? Ka mkônom ou shinii? Ka kômputa wouwe? Shin ka mato wouwe? Ka ior ou mba ve doo ú ishima la ú yem henen kwagh ve ga zee? Ka keng ú hen sha kwagh ve, gadia ior hemba mban a inja a ikyáv.
2. Yehova gba akaa kighir nena, man kanyi yange i̱ hemba gban Yesu ishima ken akaa la ciili?
2 Yô hen ase sha kwagh u Yehova Aôndo vea Wan na Yesu Kristu. Ka Yehova iyol na A “er Sha man tar man zegemnger kua akaa a a lu ken ve cii kpaa ye.” (Aerenakaa 4:24) Ka sha ikyev i Wan na, u a lu “or u fan tom” la Yehova yange gba akaa agen cii ye. (Anzaakaa 8:30, 31; Yohane 1:3; Mbakolose 1:15-17) Hanma kwagh u yange i gba cii lu Yehova man Yesu a inja. (Tôô kar sha Genese 1:31.) Kpa ken atô u akaa a i gbe cii, ka hanmô u hen wer a hemba teran ve sha ishima—ka akaa shinii ka ioro? E̱r Yesu lu eren tom u kwaghfan u̱ i ôr kwagh na inja e̱r ka or nahan la yô, a kaa ér: “Doom a ônov mba iorov tsung,” shin mgem u Ruamabera u William F. Beck la ùnà kera ôr kwagh u Yesu ga yô, yange “i doo un a uumace.”
3. Ka kwaghôron u profeti u nyi Yehova a er sha zwa u Hagai?
3 Yehova hembe veren ishima sha ior je ka u tunan ga. Mkaanem nam ma profeti ma yange ôr sha zwa u profeti na Hagai ke’ inyom i 520 C.S.W. la ma tese ikyav i kwagh ne. Yehova kaa ér: “Me tenger akuraior cii, nahan akaainjaa a akuraior cii aa va, nahan Me iv iyou ne a iengem. . . . Icivir i iyou ne i masetyô ia hemba i tsuaa la.”— Hagai 2:7, 9.
4, 5. (a) U̱ kaan ér ishember i í yer ér “akaainjaa” la ka akaa a iyolough a eren shagba a mi la gba iliam ga sha ci u nyi? (b) Ú pase inja i “akaainjaa” wer nyi, man ka sha ci u nyi?
4 Ka “akaainjaa” a nyi i lu u̱ aa iv iyou i Yehova shi aa va i̱ a iengem i hemban ciili? A lu ikyáv mbi taver ishe mbi eren hwe a minii? Shin a lu zenaria man azurfa man awen a injaa? Mayange a fatyô u lun akaa ne ga. Umbur wer, tempel u tsuaa, u yange i tsegha un uderimbaanyomov kar kuma utaan la, lu imaagh ki ki kom inyaregh udola biliôn imôngo yô! * Sha kpôô yô, Yehova ver ishima er asande a Mbayuda mba ve za hide shir he’ tar ve, ngeen kpa ve ngee ga ne ve̱ maa tempel a̱ hemba lun a ulum a tempel u Solomon yange maa la ga!
5 Nahan, “akaainjaa” a aa iv Iyou i Yehova la a lu nyi? Wanger er i lu ior yô. Kera je kpa, ka azurfa man zenaria ve ne i saan Yehova ke’ ishima ga kpa gema ka mba ve civir un sha ci u un doo ve ishima la. (Anzaakaa 27:11; 1 Mbakorinte 10:26) Een, nomsombaiorov man kasev man mbayev mba ve civir Yehova sha ishima na la cii ve gba un kwagh. (Yohane 4:23, 24) Ka mba ve lu “akaainjaa” je ne, man hemba mban a inja sha ishigh ki Yehova a akaa a doon ashe a ngise i wuha tempel u Solomon iyol a mi la.
6. Tempel u Aôndo u tsuaa la yange kure awashima u nyi?
6 Shin er yange ahendan pever ma shighe môm ga nahan kpa, i va mase maan tempel la kuren ke’ inyom i 515 C.S.W. la. Tempel u ke’ Yerusalem la ndera lun ijiirtamen i mcivir u wang i “akaainjaa” kpishi a a kou mar u Mbayuda man Atôatyev a yange nyôr ve a nyôr la kpaa. Kwagh ne lu nahan zan zan va ar sha shighe u naagh ku Yesu la. Kpa tempel la tile sha ityough ki kwagh u hemban lun shagba kwagh cii, e̱r se va kàv ke’ hemen nahan.
M-iv u sha Derianyom u Hiihii La
7. (a) Tempel u Aôndo u ngise lu ke’ Yerusalem la yange tese ikyav i nyi? (b) Pase ase akaa a pristi u tamen yange a er sha Iyange i Nan Iwom la.
7 Tempel u ke’ Yerusalem la yange lu ikyav i mserakaa u vesen u sha kwagh u mcivir. Ka tempel u Aôndo u ke’ jijingi, u Yehova a tím imaagh nagh ke’ inyom i 29 S.W. shi a ver Yesu sha u a lu Pristi u Tamen la je la. (Mbaheberu 5:4-10; 9:11, 12) Hide nenge ase e̱r aeren a Yesu a zough sha ityom i pristi u tamen u Iserael yô. Hanma inyom yô, sha Iyange i Nan Iwom la pristi u tamen yange a za sha atse a nanden naagh a ke’ tembe tempel la a za na naagh sha nombua sha u nan iwom sha ci u asorabo a upristi. Shighe a̱ karen deghôô yô, shi a nyôr ke’ tempel a awambe a nombua la, á ta á nyôr he’ ihinda i i pav tembe a Icighankpar la shi a kar a nyôr he’ ikyondo i yisan i i pav Icighankpar a Icighankpar u Hemban cii la. Pristi u tamen la yange una za nyôron ke’ Icighankpar u Hemban cii la yô, a mishi awambe sha ishigh ki areki u ikyuryan la. Nahan, una nguren nan iwom sha u nan naagh sha ivo sha ci u ikwe 12 i Iserael i yange eren tom pristi ga la kpa shi a er sha zwa la. (Levitiku 16:5-15) Amba aerenegh ne zua sha kwagh u tempel u Aôndo u ke’ jijingi la nena?
8. (a) Ka sha nyi gbenda yange i na naagh sha Yesu sha mhii u inyom i 29 S.W. laa? (b) Yesu yange lu ken mlu u civirigh u nyi vea Yehova sha ayange a a e̱r tom shin tar la ciili?
8 Jighilii yô, yange i na naagh sha Yesu sha atse a nanden naagh a ishima i Aôndo zum u i er un batisema shi i tsegha un sha icighan jijingi u Aôndo ke’ inyom i 29 S.W. la. (Luka 3:21, 22) Sha mimi yô, kwagh u yange er ne gema lu mhii u uma u yange Yesu de akaa cii hingir un msaa kuma anyom atar man tiôn la. (Mbaheberu 10:5-10) Zum la, Yesu lu ke’ mlu u ken jijingi u ter-a-wan vea Aôndo. Uumace mbagenev vea fatyô u kaven mlu u Yesu vea Ter na u sha la tsembelee ga. Lu inja e̱r i kange ve ashe a mkav sha ikyondo, di vough e̱r yange ikyondo yisa Icighankpar sha u mba ke’ tembe u tabernakel ve̱ de te ashe ve̱ nengen kwagh u a lu keregh la ga nahan.— Ekesodu 40:28.
9. Hii nan ve yange Yesu yem sha ken mlu u orumace ga, man yange i mase sôron ikyaa ne kuren nena?
9 Shin er or u yange i yilan ér Yesu la lu Wan u Aôndo u i tsegh un sha jijingi nahan kpa, yange kan shio u aren sha uma u sha la. Sha ci u nyi? Sha ci u inyam man awambe vea fatyô u yan dyako u Tartor u Aôndo ú sha ga. (1 Mbakorinte 15:44, 50) E̱r iyol i Yesu i sha inja i orumace la yange tagher kwagh yô, mtil u ikyondo i yisan i̱ paven Icighankpar a Icighankpar u Hemban cii ke’ tempel u Aôndo u tsuaa la lù ikyav i iyol na la, man ikyav ne ka i kuman vough kpaa. (Mbaheberu 10:20) Kpa Yesu kpe ka tse ayange atar yô maa Aôndo nder un shin ku ken mlu u or u ke’ jijingi. (1 Peteru 3:18) He’ shighe ne yô, fatyô u nyôron ken Icighankpar u Hemban cii u tempel u Aôndo u ken jijingi la—ka sha jim je la. Man ka kwagh u yange e̱r kpaa je la. Paulu nger kwagh nahan ér: “Kristu kera nyôr ken icighanjiir [alagh ga ka Icighankpar u Hemban cii la je lù ôron ye] u i er sha ave a ior ga, u a lu eev mbu u mimi la kpaa ga, kpa lu Sha jim jim, sha u Una ande sha ishigh ki Aôndo sha ci wase.”— Mbaheberu 9:24.
10. Yesu hidi za nyer sha yô, er nyi?
10 Yesu za nyer sha yô, a ‘mishi awambe’ a naagh nagh kura sha u kenden injar i iwom i awambe a uma na la nan Yehova. Nahan cii kpa, Yesu er kwagh hemba heela. E̱r shi kpuaa u una kpe yô, a kaa a mbahenen nav ér: “Me yem sha u Me za sôr ne ijiir. Me yem Me za sôr ne ijiir yô, Me shi Me hide, Me va kua a ven sha er ne kpaa né lu hen ape M lu yô.” (Yohane 14:2, 3) Nahan Yesu nyer ken Icighankpar u Hemban cii la, shin sha yô, a bugh gbenda sha u mbagenev kpa vea dondo un ijime yô. (Mbaheberu 6:19, 20) Ior mban, mba̱ vea lu iyenge 144,000 ne vea lu upristi mba kiriki sha mserakaa u Aôndo a ser a ver ken tempel na u ke’ jijingi la. (Mpase 7:4; 14:1; 20:6) Di vough e̱r pristi u tamen u Iserael yange a vande nyôron a awambe a nombua ken Icighankpar u Hemban cii sha u nan iwom sha ci u asorabo a upristi nahan, kape injar i awambe a Yesu a i hee inya la kpa i hii kuren gbayol a mi sha mba 144,000 mban vough je la. *
“Akaainjaa” a Ainge
11. Pristi u tamen u Iserael yange a na naagh sha ivo sha ci u unô, man kwagh ne tsenga tesen ikyav i nyi?
11 Ka inja e̱r mkohol u i lù kohol mba i shigh ve mkurem la bee ke’ inyom i 1935 la nahan. * Nahan kpa Yehova lu a iv iyou na a iengem á bee ve ga. Ei he, lu u “akaainjaa” la aa seer van ker. Umbur wer pristi u tamen u ken Iserael la yange a na naagh sha ilev ihiar—lu nombua u yange a na sha ci u asorabo a upristi la man ivo i yange a na sha ci u asorabo a ikwe igen i yange eren tom pristi ga la. E̱r upristi mbara ve til sha ityough ki ior mba i shigh ve mkurem mba i lu u̱ vea lu vea Yesu imôngo sha Tartor u sha la nahan, ikwe igen i i lu upristi ga la di yô tile sha ityough ki unô? I na mlumun ke’ mkaanem ma Yesu ma i nger ke’ Yohane 10:16 la nahan ér: “M ngu a iyôngo igen i i lu hen ityôr ne ga yô, i kpaa Me va a i keng, ia ungwa imo Yam; ia hingir ikum i môm man orkuran môm kpaa.” Sha nahan yô, awambe a Yesu a i hee inya la wase ikweior ihiar u zuan a mtsera—ú hiihii yô, ka Mbakristu mba ve lu a ishimaverenkeghen i va hemen vea Yesu sha la, man í sha uhar yô, ka mbara mba ve lu a ishimaveren i va zuan a uma u tsôron ken paradiso shin tar la. A̱ shi nan kpa ka kwe u sha uhar ne “akaainjaa” a ken kwaghôron u profeti u Hagai la a til sha ityough ki ú ye.— Mika 4:1, 2; 1 Yohane 2:1, 2.
12. Mba urugh “akaainjaa” van a a ken iyou i Aôndo nyian nena?
12 “Akaainjaa” ne nga ivin a iv ke’ iyou i Yehova heregh tsô. Ken anyom a a sember karen ne, i bugh aan a pasen kwagh a yange i cir sha Ityoughkitaregh ki Yuropa man avegher agen ken Afrika kua ityar igen kpaa la, nahan ian na loho u dedoo u Tartor u Aôndo a ver la samber nyôr sha ajiir shon a í lu a ta nguhar heregh ga la. Ior mbainjaav ka vea nyôron ke’ tempel u sha mserakaa u Aôndo ne yô, ve di kpa ve nôngo tsung u geman mbagenev kpa ve̱ hingir mbahenen, sha u kuran tindi u Yesu wa la. (Mateu 28:19, 20) E̱r ka vea ngure eren nahan yô, ka ve ya gaduga a ior kpishi, mbayev man mba been iyol cii, mba ve lu a ishima i hingir “akaainjaa” a aa iv iyou i Yehova a iengem la. Yô nenge ase akav kpuaa a a tese e̱r kwagh ne a lu eren yô.
13. Wanyekwase ugen u ke’ tar u Bolivia tese ishimatseen sha u samber a loho u Tartor nena?
13 Wanyekwase ugen u anyom ataan u ke’ tar u Bolivia u a vese sha ikyev i mbamaren nav mba ve lu Mbashiada yô pine tica na ér a na un ian i hôron makeranta ke’ sati u lu u ortamen u sôron ningir una va inya la. Sha ci u nyi? Ka sha ci u yange soo er un kpa una pase kwagh ke’ sati u hange hange u yange lu a akaa a eren kpishi la. Kwagh ne yange kpiligh mbamaren nav iyol, kpa gema saan ve iyol a inja na i dedoo la. Hegen ne wanyekwase ne ngu henen Bibilo a iorov kposo kposo ityough itian, man mbagenev ke’ mba a lu henen Bibilo a ve la hii u van mbamkombo mba Mbakristu kpaa. Je yô shi yange kua a or u tesen un la va a na hen Iyou i Tartor. Alaghga ke’ hemen yô, mbagenev mba a henen Bibilo a ve la kpa vea mase tesen e̱r ve lu “akaainjaa” a aa iv iyou i Yehova a iengem yô.
14. Mtaver u yange anmgbian wase u kwase u ke’ Korea taver ishima lam a or u̱ lu̱ inja e̱r una ver ato ga la gema ume atam nena?
14 Er kwase Kristu ugen ke’ tar u Korea lu keghen he’ tashan u girgidogo yô, a sôsom a wanyemakeranta u gema lu̱ ungwan ityougholov ke’ redio u ungwan sha ikyar i wan ke’ ato la. A pine un ér: “U ngu ke’ ma kwaghaôndo kpa?” Wanyemakeranta la gema kaa a na ér: “Kwagh gbam a kwaghaôndo môm tsô kpaa ga.” Kpa uwer gba anmgbian wase u kwase ne ga. A za hemen a kwaghôron a kaa wener: “Shighe ka una nguren karen yô, ka i sar or a pe tsuan kwaghaôndo môm. Kpa aluer nan ngu a mfe sha kwagh u kwaghaôndo ga yô, alaghga naná tsua u bo.” Tsô wanyemakeranta la kôr mlu na u sha ishi gema, maa gba veren ato a anmgbian wase u kwase la a ishima i môm je. A na un takerada u i yer ér Is There a Creator Who Cares About You? la shi kaa a na ér zum u i kom un u tsuan kwaghaôndo yô takerada la ua lu un a iwasen kpishi je. A ngohol takerada shon ave ahar. Ka hurugh sati ugen yô, a gba a mi henen Bibilo a Mbashiada mba Yehova je. Hegen yô, ngu zan mbamkombo mba tiônnongo seer seer.
15. Wanyekwase ugen ke’ tar u Japan hiin Bibilo i henen a ior nena, man iniôngon na i ume atam nena?
15 Megumi, wanyekwase u anyom 12 u ke’ tar u Japan yange nenge wener makeranta na ka haregh u dedoo u pasen kwagh shi tesen ior kwagh kpaa. Nahan a kôr cio u hiin Bibilo i henen a ior kpishi. Megumi kôr cio u eren kwagh ne nena? E̱r ka i lu sha shighe u i due ahumbe a atetan la un di a gema a ôron Bibilo shin a waan ago a mbamkombo yô, mba ve lu nongo môm a na ve shi pinen un kwagh u a lu eren jim yô. Mbagenev di shi ve pine Megumi ér a̱ ôr ve ityôkyaa i i ne ve a lu iyol ken akaaeren a makeranta agen ga yô. Megumi á gema á na mlumun sha mbampin vev mbara shi a seer ôron ve e̱r Aôndo a lu a iti yô. Ashighe kpishi kwagh ne a na i sar mba ve keghen ato a na la u ungwan. Nahan a lôhô ve ér ve hen Bibilo a na imôngo. Hegen ne Megumi ngu henen kwagh a iorov 20— mbá 18 ka mba ve lu nongo môm a na yô.
16. Anmgbian ugen ke’ tar u Kamaron kôr cio u hiin Bibilo i henen a mbagenev ke’ nongoior u nahan ior tar nena?
16 Nomsombaiorov ityough anigheni lu shiren tom mape ke’ tar u Kamaron. Tsô ve ta ikyenge ve yila anmgbian wase ugen u yange gema lu nan mbakaren gbenda ityakerada i pasen kwagh u Bibilo yô. E̱r lu tarnahan yange i lu ve ka nahan anmgbian ne yô, ve pine un ér a̱ ôr ve ityôkyaa i i hii ve a ne ityesen i Mbautar man í gyamusu man í uma kpen ga la jighjigh ga yô. Anmgbian wase ne maa bugh Bibilo gba nan ve mbamlumun sha mbampin vev mbara. Sha nahan yô, iorov utar ken atô u nomsombaiorov mbara lumun u henen Bibilo. Ugen u yange lu a ve imôngo i yilan un ér Daniel la hii u van mbamkombo, je yô shi kura ikyav nav mbi yange civir azôv a mi la cii vihi kera. (Mpase 21:8) Yange inyom hurugh zua ga tsô maa i er un batisema.
17. Anmgbianev mbagenev ke’ tar u El Salvador er ayom pase or ugen u yange venda u veren ato ungwan loho u Tartor la kwagh nena?
17 Nomsoor ugen ke’ tar u El Salvador lu a iwa i vihin tu, nahan zum u a nenge Mbashiada mba Yehova ve lu pasen kwagh ikyua cii, a zer i̱ he’ hunda. Nomsoor ne a kegh zan zan Mbashiada vea karen a yemen yô maa a sàgh iwa na a nyôr a i̱ ke’ iyou. Mayange anmgbianev fatyô u lamen a or ne ma shighe môm ga. Tsô iyange igen ne yô, ve e̱r mhen ér vea kar gbenda ugen kpa vea nenge. Mbá fe ér ka keng or la una gber ato a ungwa kwaghôron ve yô, ve mase kuren ikyaa ér vea pase iwa la kwagh. Mba va sôôn he’ ya la yô, ve sugh iwa shon shi ve ôr e̱r i saan ve iyol u zuan a ian i lamen a i̱ nahan. Ve gba pasen i̱ kwagh ôron e̱r shighe a lu van u paradiso una va lu shin tar, shi ma or kpa naná kera nyoon ishima ga nahan—een, a lu shighe u ishôso je kpa ia lu bem bem je la. Mba been yô, ve lôhô iwa la ayem sar sar maa ve kôr gbenda ave yemen. Kpa kwagh gema e̱r u kpiligh ve iyol yô, or ne due ke’ iyou na maa gba zamber a ve ér ve ya un anyi e̱r un ne Mbashiada ian i lamen a na ma shighe môm ga yô. A ngohol umagazin mba yange i na un la nahan maa i hii Bibilo i henen a na. Or ne hingir anmgbian wase hegen—ngu môm ke’ “akaainjaa” la!
“De Cie Nen Ga”
18. Mbakristu mbagenev kpishi mba tagher ishigh a mbamtaver mba nyiiv, kpa Yehova gem nengen mbacivir un nena?
18 We di yô u ngu iyol ke’ tom u hange hange u pasen kwagh u Tartor shi geman ior hingir mbahenen ne kpa? Aluer ka nahan yô, u ngu a ian i civirigh mimi. Gadia sha mimi yô, ka sha ikyev i tom ne Yehova a lu urugh “akaainjaa” nyôron a á ke’ iyou na ye. (Yohane 6:44) U ôron kwagh haan mbabov kera yô, alaghga ashighe agen a vôr ú iyol shin uwer ua gba ú je kpaa. Mbagenev mba ve civir Yehova sha mimi la kpa ashighe agen ka i lu ve ke’ ishima inja e̱r ve kuma sha kwarkyaa ga nahan. Kpa gba ishima ikyôr! Hanma or u nan civir Yehova yô nan ngu un kwagh u injaa, shi gba un ishima tsung sha kwagh u myom wou kpaa.—2 Peteru 3:9.
19. Ka ishimataver i nyi Yehova a ne sha ikyev i Hagai, man mkaanem mara maa na se agee nena?
19 Zum u uwer u gbe se cii, aluer ka sha ci u ahendan shin uzayol mbagenev mba vihin ke’ ishima kpaa, kwaghôron u Yehova a Mbayuda mba yange ve za hide shir he’ tar ve la una fatyô u nan se agee. I nger ke’ Hagai 2:4-6 nahan ér: “Kpa hegen yô, taver ishima, we Serubabel, kape TER A kaa ne; man taver ishima we zegepristi Yosua, wan u Yehosadaki, man shi taver nen ishima, ne ior mba hen tar ne cii, er nen tom, kape TER A kaa ne, gadia M ngu a ven, kape TER u akum a Sha A kaa ne, sha kwagh u ikur i M ya a ven, zum u ne due ken Igipiti la, man nenge Jijingi Wam ngu a ven; de cie nen ga. Gadia TER u akum a Sha ngu kaan nahan er: Mase shin kwagh môm, kera shi ca ga tsô, Me tenger Sha man tar man zegemnger man iombortar.” Kav wer, Yehova we a wa se kwagh ér se taver ishima tseegh ga kpa shi gem keren se a gbenda u zuan a agee kpaa. Sha nena yô? Ver ase ikyav sha mkaanem ma taver or ishima mà má kaa ér: “M ngu a ven” la. U̱ se fan ser Yehova ngu a vese ken nyityô mbamtagher mba se tagher ishigh a mi cii la ka kwagh u wan jighjigh u nan wase inya tine!—Mbaromanu 8:31.
20. Ka sha nyi gbenda iengem i lu hemban ivin a iv ke’ iyou i Yehova hegen ciilii?
20 Yehova tese paase paase wener un ngu a ior nav. Sha kpôô yô, ka di vough e̱r a er sha zwa u profeti Hagai nahan, ér: “Icivir i iyou ne i masetyô ia hemba i tsuaa la . . . hen ijiir ne Me na bem.” (Hagai 2:9) U ôron kwagh sha mimi yô, ka u lun ken tempel u Yehova u ke’ jijingi la a lu kwagh u iengemegh u hemban cii nyian ye. Hanma inyom yô, ior udubu deri imôngo ka ve tume nongo lugh lugh zan ape mcivir u mimi a lu la. Mba koson ambaaior ne sha kwaghyan u ke’ jijingi doo doo, man e̱r tar ne u iv a hang nahan kpa, saa di bem u una va lu ke’ tar u he u Aôndo la tseegh una hemba mlu u ke’ bem u ve lu keregh hegen ne ye.—Yesaia 9:6, 7; Luka 12:42.
21. Kanyi i doo u se kange ishima u erene?
21 Ica a gba ga tsô mtenger u Yehova una va tenger akuraior sha shighe u Armagedon la una va. (Mpase 16:14, 16) Nahan yô, de se yar nen tom a shighe u a mase shin ne sha u seer waren uuma mba iorov. Se taver nen a taver ishima shi se suur nen sha Yehova vangertiôr. De se kange nen ishima u zan a za hemen u civir ken tempel u ke’ jijingi ne shi se seer ivin un a “akaainjaa” zan zan Yehova una kar ôron ér se kure tom u se lu shiren ne.
[Ngeren mba shin kpe]
^ Inyaregh ki yange i er iyua sha u maan tempel u Solomon la cii kia lu ingyegh kwagh môm a inyaregh ki ainge ki ki kom dola biliôn 40 nahan yô. Kwagh u yange i vihi sha tom u maan kwagh ve neer la cii i koson ke’ iyou inyar i ke’ tempel.—1 Utor 7:51.
^ Yesu yange lu a asorabo iyol a yange gba u a na iwom sha mi e̱r pristi u tamen u Iserael nahan ga. Nahan cii kpa, mba ve lu upristi a na imôngo la cii mba a asorabo iyol sha ci u i yam ve ken uumace mba eren isholibo.— Mpase 5:9, 10.
^ Nenge ke’ Iyoukura [Zwa Buter] i Febewari 15, 1998, peeji 17-22 la.
Baver We Kpa?
• Kanyi i hembe gban Yehova kwagh a akaa a iyolougho?
• Ka ikweior ihiar i nyi i zough a mtsera sha awambe a Yesu a i hee inya laa?
• Ka unô ve lu “akaainjaa” a i gbe u aa iv iyou i Yehova a iengem laa?
• Ka ikyav i nyi se lu a mi u tesen ser kwaghôron u profeti u Hagai la ngu ivin nyiana?
[Mbampin Mba Ngeren u Henen]
[Foto u sha peeji 10 la]
U fa ikyav i tempel u Yehova u tsuaa la kpa?
Ikyondo i yisan
Icighankpar
Atse a nanden naagh
Icighankpar u Hemban cii
Puadwer
Tembe
[Foto u sha peeji 11 la]
Yange pristi u tamen la a na naagh sha nombua sha ci u asorabo a Mbalevi kua ivo sha ci u asorabo a ikwe igen i Iserael i yange eren tom pristi ga la kpaa
[Foto u sha peeji 12 la]
Tom u pasen kwagh u Tartor ú i lu eren tar sha won cii ne ngu urugh ikpelaior van a mi ken iyou i Yehova