Ver Ishima Sha Mkaanem Ma Aôndo Ma Profeti la
Ver Ishima Sha Mkaanem Ma Aôndo Ma Profeti la
“Se mba a kwaghôron u profeti u a til dông je. Doo u né wa iko sha mi.”—2 PETERU 1:19.
1, 2. Kanyi ikyav i mesiya u aiegh nahan ú fatyô u ôronô?
UMESIYA mbaaiev ndera nôngon ér vea tsengakaan kwagh u̱ ke’ hemen udubumbaanyomov imôngo hegen. Orgen yange lu ke’ derianyom u sha utaan S.W. la, yilan iyol na ér ka un Mose. Or ne kaa a Mbayuda mba ve lu ke’ icile i Kreta la sha zwanyohon ér un ngu mesiya, nahan una yima ve una due a ve ke’ mkighir kera. Tsô iyange i myom la i kom yô, ve dondo un, a unde a ve sha igyungu i taven geng, Zegemnger u Mediterenia gema lu ve shin. Maa a kaa a ve ér ve̱ tsue ve̱ gba shin zegemnger la, nahan una pav sha ishiv vev kera. Ior kpishi mba yange ve guusu shin zegemnger la saa mnger kpa mesiya u aiegh la gema yevese ijiir la haa toho.
2 Ka kom ke’ derianyom u sha 12 la yô “Mesiya” ugen shi due ke’ tar u Yemen. Orhemen kwaghaôndo u mba gberen icul inya he’ tar la kaa a na ér a̱ er ikyav i ia tese ér un ngu mesiya yô. “Mesiya” ne kaa a orhemen kwaghaôndo u mba gberen icul inya la ér a̱ gber un ityough. A tsengaôron nahan ér mnder na u una nder shin ku fese la una hingir ikyav i tesen. Tsô orhemen kwaghaôndo u mba gberen icul inya la lumun a mhen na la—maa lù mkur u “mesiya” u Yemen je la.
3. Ka an nan lu Mesiya u mimi, man yange tom na la pase se nyi kwagh jimi?
3 Umesiya mbaaiev kua shi akaaôron a ve a profeti la ka agbilinakaa tseegh kpa u veren ishima sha mkaanem ma Aôndo ma profeti yô mayange ze a or ke’ aheen ga cii. Yesu Kristu u lù Mesiya u mimi la yange lu m-iv u akaaôron a profeti kpishi a̱ ke’ Bibilo. Sha ikyav i tesen yô, orngeren Ivangeli Mateu ngur ôron kwaghôron u profeti u Yesaia yô a nger ér: “Tar u Sebulon man tar u Nafetali, sha gbenda u zegemnger u peren Yordan la, Galilia u akuraior. Nongoior u u tem ken ime yô, ve nenge a iwanger i vesen, man mba ve tem ken tar kua mure u kuugh yô, iwanger due ta sha a ve. Hen shighe la je Yesu hii u ôron kwaghaôndo, gba kaan er: Gema nen asema, gadia tartor u Sha mgbôghom ve.” (Mateu 4:15-17; Yesaia 9:1, 2) Ka Yesu yange lu “iwanger i vesen” la ye, man tom na la yange u tèsè ér ka un a lù Profeti u Mose tsengaôron kwagh na la ye. Lù u ior mba ve vende ù keghen ato a Yesu jimin cii á tìm ve kera.—Duteronomi 18:18, 19; Aerenakaa 3: 22, 23.
4. Yange Yesu iv mkaanem ma i nger ke’ Yesaia 53:12 la nena?
4 Yesu shi yange iv mkaanem ma profeti ma má lu ke’ Yesaia 53:12 la. Í nger her ér: “A gbihi uma Na ken ku je, shi i wa Un ken mbaaferev kpaa; nahan kpaa, ka Un je A tee isholibo i ior kpishi sha iyol Na, man A shi A sôn sha ci u mbaaferev kpaa ye.” Er Yesu fa ér un sôôn nan uma na u̱ sha inja i or la ér a̱ lu ipaa yô, a nyôôso jighjigh u nan u mbahenen nav. (Marku 10:45) Gbenda u vesen u yange e̱r kwagh ne yô lu mgem u sha iengem la.
Mgem u Sha Iengem la Màà Jighjigh U Nan
5. Ú pase kwagh u mgem u sha iengem la ke’ mkaanem ou nena?
5 Mgem u sha iengem la lu̱ ikyav kwagh i profeti. Yesu kaa ér: “Gadia Wan u or Una va ken icivir i Ter Na a mbatyomov Nav mba Shaav . . . Mimi je M kaan ne ne, mba ve til heen ne, mbagenev ker ka mba vea bende a ku je ga, saa vea vande nengen a Wan u or Una lu van ken tartor Na ve.” (Mateu 16:27, 28) Mase zan mbagenev ke’ mbaapostoli mbara yange ve nenge Yesu lu van ken Tartor na mimi kpa? Mateu 17:1-7 kaa ér: “Tsô ayange nga kar ataratar yô, Yesu kua a Peteru man Yakobu man anngô na Yohane, za unde sha gôgôwo, ve tseegh; tsô i gema iyol Na sha ishiv vev.” Kwagh u lù er ne lu u cieryol je zua ga! “Ishigh Nagh engem er iyange nahan, akondo Na kpa kungu segh segh er iwanger nahan. Tsô Mose man Eliya va ande her a ve gba ôron kwagh a Na.” Shi “Ibeenegh ki iwangeregh va gba mure sha a ve” man ve ungwa imo i Aôndo iyol na lu kaan ér: “Ngun ka Wan Wam u ishima ishima, u ishima i doom a Na yum yô; ungwan nen Un. Mbahenen mba ongo nahan yô, ve gba inya ve cir ishigh inya, cier ve iyol tsung je. Tsô Yesu va, va kpoghor ve, A kaa er: Mough nen sha, de cie nen ga.”
6. (a) Er nan ve Yesu yange yila mgem u sha iengem la ér ka mpase u sha mnenge? (b) Mgem u sha iengem la lù tesen nyi ikyav kwagh jimi?
6 A̱ shi nan kpa kwagh u kpilighyol ne yange e̱r sha inuunugh i môm ki sha Uwo u Hermon, hen ape Yesu man mbaapostoli nav mba utar mbara yange ve tsa he’ tugh mbula la. Ikyav tese je ér kwagh la yange e̱r lu tugh, nahan hemba duen kpéhèl kpéhèl. Ityôkyaa i môm i yange na ve Yesu kaa ér ka mpase u sha mnenge yô lu sha ci u Mose man Eliya vande kpen kera ica i gba, nahan ve lu her sha mlu u iyolough ga. Ka Kristu tseegh yange lu her kpôô kpôô ye. (Mateu 17:8, 9) Imba mgem u Yesu gema sha iengem mondo sérétété la lu zege ikyav i tesen hen Peteru man Yakobu man Yohane ér kape una va va sha iengem kua agee a Tartor na je la. Mose man Eliya tile sha ityough ki anmgbianev mba Yesu mba i shigh ve mkurem mba ve lu mbayandyako imôngo a na la, man mpase u sha mnenge shon nyôôso shiada na i yange e̱r sha kwagh u Tartor man mtem u̱ una va tema tor ke’ hemen la kpaa.
7. Hii nan se fe ser yange Peteru umbur mgem u sha iengem la vindi vindi?
7 Mgem u sha iengem la yange wase u taver jighjigh u nan u mbaapostoli mba utar mbà lù u̱ vea va lu a tom u hemen ke’ tiônnongo u Mbakristu la. M-engem u ishigh ki Yesu engem wang la man mkungu u akondo a na kungu sérétété kua imo i Aôndo iyol na i i pase ér Yesu ka Wan Na u ishima ishima u̱ ve̱ ungwan imo na la—akaa ne cii yange kure awashima u á doo doo. Kpa lù u mbaapostoli vea ôr ma or mpase u ve nenge la ga zan zan Yesu una va kar nderen shin ku. E̱r anyom kar 32 nahan je kpa, mgem u sha iengem ne lu Peteru ke’ ishima her ndor shough shough. Zum u a lu ôron kwagh u mgem shon man injakwagh i á til shami la yô, a nger ér: “Gadia zum u se va pase ne agee man m-ande u Ter wase Yesu Kristu la yô, kera lu sha gbenda u ukwaghhir mba i dugh a dugh sha kwaghfan la se lu zan ga, kpa se lu mba se nenge a nenge iengem Na sha ashe je. Gadia A ngohol icivir man iengem hen Aôndo Ter zum u imo due ken iengem i hemban la, ôr kwagh a Na er: Ngun ka Wan Wam u ishima ishima u ishima i doom a Na yum yô. Man imo la se ayol ase kpaa se ungwa, lu Sha i due ye, zum u se lu a Na imôngo sha icighanwo la.”—2 Peteru 1:16-18.
8. (a) Mkaanem ma Aôndo ôr sha kwagh u Wan na la ma ver ishima sha nyi kwagh jimi? (b) Ibeenegh ki yange ki due ke’ mgem u sha iengem la tile sha ityough ki nyi?
8 Kwagh u yange hemba lun u injaa je yô ka myee u Aôndo yôô ér: “Ngun ka Wan Wam u ishima ishima, u ishima i doom a Na yum yô; ungwan nen Un” la. Kwaghyôôn ne ver ishima sha Yesu ér ka un u̱ Aôndo a ker un Tor, u̱ akaa a i gbe a sha won cii aa ungwa imo na yô. Ibeenegh ki gban mure sha la tese ér a fatyô u nengen a m-iv u mpase u sha mnenge ne sha ashe kpôghôô ga. Saa ka ior mba ve kav “ikyav” i mlu-her u lù u Yesu una lu ken tahav mbu Tartor la tseegh vea kav m-iv shon sha ashe a mkav ye. (Mateu 24:3) Sha kpôô yô, icin i yange Yesu ta ve ér ve̱ de er ma orgen mpase u sha mnenge la ga zan zan una kar nderen shin ku la tèsè ér mkende u á kende a na sha, shi á na un icivir la una va zum u una nder shin ku kera la.
9. Hii nan ve i gbe u mgem u sha iengem la una taver jighjigh u nan wase?
9 Er Peteru ôron kwagh u mgem u sha iengem la been kera yô, a kaa ér: “Se mba a kwaghôron u profeti u a til dông je. Doo u né wa iko sha mi er ka imenger i i wanger ken ijiir i wan ime nahan, zan zan sev mbu kar aven man ishan i sha use kpaa ia due ia kôndo sha ken asema a en yô. Kwagh u hiihii yô, fa nen kwagh ne, ma kwaghôron u profeti u ken icighanruamabera ka kwagh u or nana gba pasen iyol i nan tsô ga. Gadia mayange ma kwaghôron u profeti due sha awashima u or ga, kpa Icighan Jijingi mgbegha ior man ve ôr kwagh u Aôndo ye.” (2 Peteru 1:19-21) Mgem u sha iengem la ka ikyav i tesen ér mkaanem ma Aôndo ma profeti kuma u haren sha mi. Se ver ishima sha mkaanem mara kpa se kera dondo gbenda u “ukwaghhir mba i dugh a dugh sha kwaghfan,” i lu Aôndo a ne ve ga shi a rumun a ve kpaa ga la ga. Doo u mgem u sha iengem la una taver jighjigh u se ne mkaanem ma profeti la sha ci u mpase u sha mnenge u a tsenga tesen iengem i Yesu man agee a Tartor la iv hegen. Een, avindigh nga nyian a a tese ikyav ér Kristu ngu Tor u ageegh sha je i gande tunan yô.
Er Ishan i Sha Use la I Dugh Yô
10. Ka an shin kanyi i lu “ishan i sha use” i Peteru a tér i̱ laa, man er nan ve ú ne ikyar nahana?
10 Peteru nger nahan ér: “Doo u né wa iko sha [mkaanem ma profeti] er ka imenger i i wanger ken ijiir i wan ime nahan, zan zan sev mbu kar aven man ishan i sha use kpaa ia due ia kôndo sha ken asema a en yô.” Ka an shin kanyi i lu “ishan i sha use” la? Ishemberti i í yer ér “ishan i sha use” la i̱ due ke’ Bibilo kwa tar tseegh man ikyav na ngi kwagh môm a ‘ishan i pepe.’ Mpase 22:16 yila Yesu Kristu ér ka “Ishan i sha use i engem.” Ashighe agen ke’ inyom yô, ka amba a asan ne je ka a mase za duen sha kwavaôndo vegher u sha ityoughkitaregh la ye. Ka a due ica i̱ gba ga maa i nenge a iyange, sha nahan yô, ngá yôôn angwe u m-av u sev mbù hev. Peteru yar tom a ishemberti i “ishan i sha use” la u ôron kwagh u Yesu shighe u á ngohol agee a Tartor kera yô. Sha shighe la, Yesu due kôndo sha won cii, kua sha tar wase ne kpaa! E̱r a lu Mesiya u a lu Ishan i sha Use la yô, a yôô sev mbu hev, shin iaven i he, i̱ i̱ av sha ci u uumace mba ve kor tindi la.
11. (a) Er nan ve 2 Peteru 1:19 a tese ér “ishan i sha use” i̱ dugh ke’ asema a ior kpôô kpôô ga? (b) Ú pase 2 Peteru 1:19 nena?
11 Mbageman Bibilo kpishi samber a mhen ne ér mkaanem ma apostoli Peteru ma i nger ke’ 2 Peteru 1:19 mara ôr ka kwagh u ke’ ishima i or i ke’ vanger. Ishima i or u nan gande yô, i̱ yuhwa di uikyaren mba myohom ma ounce hii er 9 zan zan kighir 11 nahan tseegh. Nahan a hii nan ve Yesu Kristu—u̱ hegen a lu jijingi u iengemegh u kpen ga u a lu sha la—una va due ken ilyeghegh ki orough ki kiriki kin nahana? (1 Timoteu 6:16) Nahan cii kpa asema a ase a sha injakwagh la kpa gba zua sha kwagh ne, gadia ka a á ne ve se veren ishima sha mkaanem ma Aôndo ma profeti ye. Kpa shi sule iyol nenge ke’ 2 Peteru 1:19 la tsembelee nahan ú nenge e̱r New World Translation á we aniwever ngeren u a lu ikyav i memen la hen ape i za kur asemberakwaghôron a a kaa ér “zan zan sev mbu kar aven man ishan i sha use kpaa ia due ia kôndo sha” la, nahan aniwever ngeren ne pav mkaanem man ver kposo a mà i vande ngeren la kua mà má kaa ér “ken asema a en” la kpaa. A fatyô u ngeren ivur ne nahan ér: ‘Se mba a kwaghôron u profeti u a til dông yô; doo u né wa iko sha mi er ka imenger i i wanger ken ijiir i wan ime nahan, inja na yô, ka ke’ asema a en je la, zan zan sev mbua kar aven man ishan i sha use kpaa ia due.’
12. Kera cii yô, mlu u asema a uumace jimin cii ngu nena, kpa Mbakristu mba mimi yô, kwagh ve ngu di nena?
12 Kera cii yô, mlu u asema a sha injakwagh a uumace mba isholibo ne nga nan jimi? Ateti, asema ve nga ke’ ime i ke’ jijingi! Kpa aluer se mbá Mbakristu mba mimi yô, ka i lu se inja er se mba a imenger ngi tan iwanger ke’ asema ase nahan, asema shon a aluer i wanger á ga ve mà á lu ke’ ime la. Er mkaanem ma Peteru ma tese nahan, ka sha u̱ veren ishima sha mkaanem ma Aôndo ma profeti ma tan iwanger la ve Mbakristu mba mimi vea fatyô u lun geng ge geng shi lun tsevaa zan zan sev mbu hev mbura mbua kar aven ye. Vea kav e̱r Ishan i sha Use ne i dugh, i lu ke’ asema a uumace mba inyam man awambe ne ga, kpa i lu sha ishigh ki hanma kwagh u i gbe un a gba cii yô.
13. (a) Hii nan ve se fe wanger wanger ser Ishan i sha Use la i due kar kera? (b) Er nan ve Mbakristu vea fatyô u wan ishima a mbamlu mba taver mba yange Yesu tsengaôron ér vea va sha shighe wase nee?
13 Ishan i sha Use la i vande duen! Se fatyô u fan kwagh la wanger wanger sha u veren ishima sha kwaghôron u profeti u vesen u Yesu ôr sha kwagh u mlu-her na la. Ainge ne, se mba ke’ m-iv u kwaghôron ne sha er akaa a lu eren er i gbe je a lu a̱ vande eren ga yô, ambaakaa er ityav mbi nôngon man ijen i gban man ityartenger man loho u dedoo u pasen tar sha won cii la nahan. (Mateu 24:3-14) Shin er se Mbakristu kpa ashighe a taver a yange Yesu tsengaôron kwagh u á la a lu benden a vese nahan kpa, se fatyô u wan ishima a bem man a ishima i sar sar kpaa. Sha ci u nyi? Sha ci u se mbá veren ishima sha mkaanem ma Aôndo ma profeti shi se na jighjigh a uityendezwa nav mba ke’ hemen mbara. Se fa ser se háà angahar sha kpandehunda u nyôron ken ashighe a hemban doon cii sha ci u se nyôr ken “shighe u mkur” za kweng hegen! (Daniel 12:4) Kwagh hùrà kondo tar iyol kpulo di e̱r yange i tsengaôron ken Yesaia 60:2 la nahan, ér: “Gadia, nenge, ime ia cir tar, man angôghime kpaa una cir akuraior.” Á er nan ve or a fa gbenda ken ime i cieryol nee? Saa or a hide a iyol i nan ijime naná ver ishima sha mkaanem ma Aôndo ma profeti la hegen cii man tso a kua a kar ihyongo ye. Gba u ior mbaasemaamimi vea gema he’ Yehova Aôndo, Imbor i uma man iwanger. (Pasalmi 36: 9; Aerenakaa 17:28) Ka sha u eren kwagh ne tseegh ve or nana fatyô u zuan a iwanger i mkav u mimi kua ishimaverenkeghen i zuan a msaanyol u kpilighyol u una va ken hemen u Aôndo a we shima u nan hanma orumace u eren sha ishima na la ye.—Mpase 21:1-5.
“Iwanger Va Nyôr Shin Tar”
14. Aluer se soo u lun ke’ m-iv u akaaôron a uprofeti a kpilighyol a Bibilo ne yô, kanyi kwagh i gbe u se er keng-e?
14 Ruamabera pase wang ér Yesu Kristu tema Tor hegen. Sha er yange ngohol tahav ke’ inyom i 1914 la yô, akaaôron a profeti agenegh a kpilighyol la kpa aa iv. U̱ se kpa se̱ va nenge m-iv ne yô, saa se tese ser se mbá mbaasemaleghlegh mbà ve ne Yesu Kristu jighjigh, man ve gem asema ve undu ityom ve i bo kua akaabo a yange ve e̱r ken mlan la yô. Kpa ior mba ime i doo ve ishima yô, vea zua a uma u tsôron ga. Yesu lu kaa nahan ér: “Man ngin ka ijirôron ne: iwanger va nyôr shin tar man ime gema hemba doon ior a iwanger, gadia aeren a ve lu a bo je. Gadia hanma or u nan eren kwaghbo yô, ka iwanger je nan vende ye, man shi nan ve hen iwanger kpaa ga, sha u i̱ de vende aeren a nan ga yô. Kpa u nan eren mimi yô, nan ve hen iwanger sha er á pase aeren a nan er i lu ken Aôndo je man i er a ye.”—Yohane 3:19-21.
15. Aluer se kenger myom u Aôndo a ne se ken Wan na ne kpènénéné yô, kanyi kwagh ia ere?
15 Iwanger i ken jijingi ne va shin tar sha ikyev i Yesu, man ka a inja u veren atô he’ a na kpaa. Paulu nger ér: “Ngise yô, Aôndo ôr kwagh a uter sha uprofeti acin imôngo man sha igbenda kposo kposo kpaa, kpa ken ayange a masetyô ne yô, A ôr kwagh a vese sha Wan Na u A ver Un dyako sha akaa cii” la. (Mbaheberu 1:1, 2) Aluer se kenger myom u Aôndo a ne sha ikyev i Wan na u ishima shima la kpènénéné yô kanyi ia ere? Paulu za hemen u ôron ér: “Aluer kwaghôron u i ôr sha zwa u mbatyomov mba Shaav la lu dông man hanma mper u tindi kua hanma ihembeato kpaa i or iyev sha mi vough yô, nahan se sé war nana aluer sé kera wa myom u vesen ne iko ga yôô? Ka Ter A hii u pasen un ye, mba ve ungwa un la kpaa, ve va taver un hen vese. Aôndo kpaa lu eren shiada a ve imôngo sha uivande man sha akaa a kpilighyol man akaa a ageegh atô kposo kposo man shi sha ikwar i karen i Icighan Jijingi sha ishima Na kpaa.” (Mbaheberu 2:2-4) Een, ka Yesu je a lu itine i myee u yôôn kwaghôron u profeti ye.—Mpase 19:10.
16. Ka sha ci u nyi se fatyô u nan akaaôron a profeti a Yehova Aôndo la cii jighjigh a u shin uwegh shio?
16 Er se vande nengen nahan, Peteru kaa ér: “Ma kwaghôron u profeti u ken icighanruamabera ka kwagh u or nana gba pasen iyol i nan tsô ga.” Uumace tseegh yô, vea fatyô u ôron mkaanem ma profeti ma mimi ga, kpa se fatyô u nan mkaanem ma Aôndo ma profeti cii jighjigh. Ka hen Yehova Aôndo iyol na je ma dugh ye. A wase mbacivir un sha icighan jijingi sha u ve̱ kav e̱r akaaôron a profeti a ke’ Bibilo la a lu ivin yô. Sha mimi yô, se mba a ishughun i nan Yehova sha e̱r hii ke’ inyom i 1914 la je se lu nengen a m-iv u akaaôron a profeti kpishi nahan. Shi se fa wanger wanger ser akaaôron a profeti a sha kwagh u mkur u botar ne a á shi her la kpaa aa iv cica cii. Ka hange hange u zeren veren ishima sha akaa a Aôndo a tsengankaan la, shi se na iwanger yase i̱ mondon i̱ wanger heregh kpaa. (Mateu 5:16) Se mba a iwuese er Yehova a lu nan sha u ‘iwanger i̱ mondo i̱ wanger se ken ime’ i i tser tar cii ainge ne nahan!— Yesaia 58:10.
17. Er nan ve kwagh a gbe se a iwanger i ke’ jijingi i he’ Aôndo la?
17 Iwanger i kpôô kpôô ne ngi wasen se u nengen kera. Shi ka i na yiav mbi vese sha er se zua a kwaghyan kpishi atô kposo kposo yô. Se fatyô u lun a iwanger i ka i mondo bong la shio ga. Iwanger i ke’ jijingi di ye? Ngi kùrán se shi ngi tèsén se mlu u ke’ hemen er i tsengaôron ke’ Bibilo, Mkaanem ma Aôndo nahan. (Pasalmi 119:105) Yehova Aôndo ‘tindi se a iwanger na kua mimi’ sha dooshima. (Pasalmi 43:3) Nahan gba u se tese iwuese yase sha mbamne mban kpee. Nahan yô de se nôngo nen sha afatyô wase cii sha u ngohol iwanger i “mkav u iengem i Aôndo” la sha u i̱ wanger ke’ asema ase a ke’ mlu yô.—2 Mbakorinte 4:6; Mbaefese 1:18.
18. Kanyi Ishan i sha Use i Yehova la i̱ we iyol u eren hegene?
18 Iyol doo se kpishi sha er se fe ser hii ke’ inyom i 1914 la je Yesu Kristu, Ishan i sha Use la, kôndo sha won cii shi hii u ivin mgem u sha iengem la nahan! Ishan i sha Use i Yehova ngi sha tembe hegen, i̱ wa iyol u eren sha awashima u Aôndo sha u zan hemen ivin mgem u sha iengem la—“ityav mbi iyange i vesen i Aôndo, Uhembanagee la.” (Mpase 16:14, 16) A karen a tsetar ne kera yô, Yehova una mase kuren ityendezwa na i yange er sha kwagh u ‘Usha mba hev man tar u he’ la, kwagh shon u se fatyô u nan un iwuese gbem sha won sha e̱r a lu Ter Uhemban sha won cii shi a lu Aôndo u akaaôron a profeti a mimi kpaa la. (2 Peteru 3:13) E̱r iyange shon i̱ lu a̱ va ga ne, de se za nen hemen u zenden ken icighan iwanger sha u veren ishima sha mkaanem ma Aôndo ma profeti la.
Ú Na Mlumun Wer Nena?
• Ú pase mgem u sha iengem u Yesu la nena?
• Mgem u sha iengem la wase u maan jighjigh u nan nena?
• Ka an shin kanyi i̱ lu Ishan i sha Use i Yehova la, man ka hanma shighe jim i̱ dughu?
• Er nena ve i gbe u se ver ishima sha mkaanem ma Aôndo ma profeti?
[Study Questions]
[Picture on page 20]
Ú fatyô u pasen ikyav i mgem u sha iengem la kpa?
[Picture on page 22]
Ishan i sha use ne due kera kpaa. Ú fa gbenda u i̱ dugh la man shighe u i̱ dugh la kpa?