Tar U He La —Ú Lu Keregh Kpa?
Tar U He La —Ú Lu Keregh Kpa?
“Ma kwagh u hemban doon ve ngu ga, saa u ember man u eren akaa a dedoo sha ayange a ve lu uma la cii. Man shi er hanma or nana̱ ya kwagh, nana̱ ma kwagh, i̱ doo nan iyol ken tom u nan ye ican sha mi la cii; kwagh ne ka iwua i Aôndo je.”—ORPASENKWAGH 3:12, 13.
1. Hii nan i gbe u se lu a ishimaveren ser a va lu guda ke’ hemene?
IOR kpishi ka ve hen ér Aôndo Uhembanagee vihi tu, shi kwagh na môm kpa ngu zángè ga. Nahan kpa, avur a i nger sha la ka kwagh u mimi u a dugh tseer tseer ke’ Mkaanem nam ma a ne i nger yô. Avur la gba zwa môm a mlu u̱ a lu “Aôndo u sar sar” la man mver u yange ver mbamaren asev mba hiihii mbara ke’ paradiso shin tar la kpaa. (1 Timoteu 1:11, NW; Genese 2:7-9) Zum u se ngur keren u zuan a mkav sha u fan mlu u ke’ hemen u Aôndo a tende zwa a ior nav la yô, mayange i de kpiligh se iyol u fan mbamlu mba vea va na se iember man taryan u tsan gbem sha won la ga.
2. Ka akaa a nyi ú lu veren ashe keghene?
2 Ken kwaghngeren u hiihii la, se nenge sha ajiir atar ke’ atô u ajiir anyiin a Bibilo i tsengaôron kwagh u “Usha u he man tar u he kpaa” la. (Yesaia 65:17) Ke’ atô u akaa a mimi a i tsengeôron la yô, i nger môm ke’ takerada u Mpase 21:1 la. Avur a a gem a dondo la ôr kwagh u shighe u Aôndo Uhembanagee una va gema mbamlu mba taregh mbara igem i môm ve hanma kwagh a doo ashe la. Una ese mliam ma mzungu mara kera cii. Mayange iyolbeen ia kera wuan ior ga shin angev shin uaikyôr kpaa ga. Ijungwen ia kera lu ga, shin mliam shin mnyoon kpaa je ga. Uwú, ishimaveren ne shi doo tsôô! Kpa se na jighjigh ser kwagh a tsa sha won a lu nahan mimi kpa, man ishimaveren ne ia bende a vese hegen nena?
Atôakyaa a I Gbe u Se Lu Vangertiôr Yô
3. Se fatyô u nan uityendezwa mba Bibilo i er sha kwagh u mlu u ke’ hemen la jighjigh sha ci u nyi?
3 Ver ase ishima sha kwagh u Mpase 21:5 a ze hemen u ôron la. Ivur ne kaa ér Aôndo u a tem sha ikônough nagh ki torough ki shaagh la yôô nahan ér: “Nenge M ngu geman akaa cii hingir a he.” Icighan ityendezwa ne i̱ hemba hanma inja i mlu u sha tseeneke u ityar í keren la cii shin tindi u ainge u a ne hanma or ian i eren kwagh u nan soo la shin nyityô kwagh i orumace nan we ishima u va eren ke’ hemen cii. Ityendezwa la ka ibumun i i dugh sha zwa u Un u Bibilo i̱ kaa ér “eren aie ga” man i̱ a fatyô u suur sha mi hùndén ishima yô. (Titu 1:2) Sha nahan yô, alaghga a lu ú ke’ ishima inja e̱r ikyaa kure a kure je, ka u se shi yaren a yar kwan sha ishimaveren i saan iyol ne, zan a za hemen u suur he’ Aôndo, man ka cii je la yô. Kpa ka a̱ kuma pe se sôghul ve ga. Akaa nga kpishi a i gbe u se hen se fa sha kwagh u mlu wase u ke’ hemen yô.
4, 5. Ka akaaôron a profeti a Bibilo a nyi se hila tím sha á man i lu u̱ aa wa vangertiôr wase inya tine sha kwagh u a lu keghen se ke’ hemen laa?
4 Gbidye kwar sha uityendezwa mba Bibilo i̱ er u van a usha mba hev man tar u he, e̱r kwaghngeren u hiihii la a we imaagh nahan la. Yesaia tsengaôron kwagh u tar u he ne, man kwaghôron u profeti na la yange iv zum u Mbayuda hide he’ tar ve va tím imaagh ki hegh ki mcivir u mimi la. (Esera 1:1-3; 2:1, 2; 3:12, 13) Nahan kpa, ka cii kwagh u kwaghôron u profeti u Yesaia shon yange hôn uwegh sha mi tseegh laa? Mayange je ga! Akaa a yange tsengaôron la nga va ivin sha gbenda u vesen ke’ hemen ica. Hii nan ve se kur ikyaa nahana? Ka sha ci u kwagh u i nger ke’ 2 Peteru 3:13 man Mpase 21:1-5 la. Ajiir ne cii hôn uwegh sha usha mba hev man tar u he u Mbakristu vea zua a mtsera mgbeghaa a tser tar cii yô.
5 Di vough e̱r se vande kaan nahan, Bibilo yar tom a ishemberkwaghôron i “Usha u he man tar u he” ne kwa nyiin. Se hila nenge sha ajiir atar se kure man á na se ishimataver kpaa. Jighilii yô, Bibilo tsengaôron ér Aôndo una va kar a iferkwagh kera kua akaa agen a van a ican i yan kpaa, shi i̱ kaa ér una za hemen u veren orumace doo doo ke’ tar u he u a tende zwa u van a mi la.
6. Kwaghôron u profeti u sha unyiin u a er kwagh u “Sha u he man tar u he” la tsengaôron ér nyi?
6 Yô de se time nen sha ijiir igen ape ishemberkwaghôron i̱ “Sha u he man tar u he” ne i̱ mase duen ke’ Yesaia 66:22-24 la. I kaa ér: “Er Sha u he man tar u he, mba Me er ve la, vea lu sha ishigh Yagh gbem nahan, kape vor wen man iti yen vea lu gbem je la, kape TER A kaa la. Tsô, hii sha uwer u he ne zan zan ar sha uwer u he ugen, man hii sha iyange i memen ne zan zan ar sha iyange i memen igen, uuma cii vea va gure sha ishigh Yagh, kape TER A kaa la. Vea due vea za kenger akom a ior mba ve hendan a Mo la, gadia ijôô ve ia kpe ga, man usu ve kpaa á pir u ga; vea hingir kwagh u ndôhôr uumace cii ishima.”
7. Hii nan ve i gbe u se kure ikyaa ser m-iv u Yesaia 66:22-24 la ngu van a va ke’ hemene?
7 Yange kwaghôron u profeti ne iv sha Mbayuda mba ngise ve hide ve va wa ikile he’ tar ve la, nahan kpa lu sha inja i a va nenge a m-iv ugen kpaa. Yange lu u a va lu ke’ hemen, hii he’ shighe u i nger washika u Peteru u sha uhar la man takerada u Mpase la kpaa, gadia ve hôn uwegh sha “Sha u he man tar u he” ú ke’ hemen. Se fatyô u veren ashe keghen shighe u kwaghôron u profeti ne una va iv vindi vindi ke’ mlu u tar u̱ he, sha gbenda u vesen la. Gbidye kwar sha mbamlu mbagen mba se ver ishima u va ember la.
8, 9. (a) Ior mba Aôndo vea “lu gbem” sha nyi gbenda? (b) Kwaghôron u profeti u a kaa ér mbacivir Yehova vea civir un “hii sha uwer u he ne zan zan ar sha uwer u he ugen, man hii sha iyange i memen ne zan zan ar sha iyange i memen igen” la yô, ikyav na kanyi?
8 Mpase 21:4 tese ér ku ua kera lu ga. Kwagh u i er ke’ Yesaia ityough 66 la kpa lumun a kwagh la. Se fatyô u nengen ke’ ivur i sha 22 la e̱r Yehova a fe dedoo e̱r usha u he man tar u he la i lu kwagh u hila ga, shin kwagh u anyangem kpuaa tseegh kpaa ga yô. U seer yô, ior nav vea tsôr; vea “lu gbem” sha ishigh nagh. Kwagh u Aôndo a vande eren kera sha ci u ior nav mba a tsough la gema na se ityôkyaa i lun vangertiôr. I tôv Mbakristu mbamimi a ican kpishi je, shi i nôngo tsung ér a tim a tim ve kera ke’ iti i kwaghaôndo kpaa. (Yohane 16:2; Aerenakaa 8:1) Nahan cii kpa, mbaihyomov mba ageev mba hendan a ior i Aôndo, amba e̱r Nero Tor u Mbaroma man Adolf Hitler nahan, kan shio u timin ior mba Aôndo mba ve te ikyaa a na shi i yer ve i suur sha iti na la. Yehova kùrà nongoior na, man se fa keng je ser una sue ú ua tile zan zan gbem sha won.
9 Kape kwagh u mbara mba ve ne Aôndo jighjigh, mba̱ vea lu imaagh ki tar u he la kpa a lu la. Vea lu ikyumior i civir a ishima i môm ke’ tar u he, shi hanmô ve naná lu gbem, vea lu civir Orgbantar u a gbe akaa cii la wang. Ú ngu wer vea civir ashighe ashighe, shin tsere-tse-tsere ga. Tindi u Aôndo, u ngise i na Iserael sha ikyev i Mose la yange wa ve kwagh ér ve̱ eren akaa agenegh a civir un hanma uwer sha mdugh u uweregh man hanma sati sha iyange i memen. (Levitiku 24:5-9; Numeri 10:10; 28:9, 10; 2 Kroniku 2:4) Nahan Yesaia 66:23 ôr kwagh u mcivir u civir Aôndo ndúúrúú hanma sati man hanma uwer a u̱ hôron ma shighe môm ga la. Mvende u vendan ér Aôndo ngu ga la man atseregh a ke’ kwaghaôndo la kpa aa lu shighe la ga. “Uuma cii vea va gure sha ishigh” ki Yehova.
10. Hii nan ú lu a vangertiôr wer mbaaferev vea saa tar u he la ishe vindi vindi ga?
10 Yesaia 66:24 kaa a vese gbang gbang ér kwagh môm kpa una anger bem man perapera u tar u he la mayange ga. Mbaaferev vea saa ú ishe ga. Umbur wer 2 Peteru 3:7 kaa ér: “iyange i ijirigh man mtim u mba ve vende Aôndo la” ngi mnger. Ka mba ve nyímán Aôndo shi ve cie un ga la tseegh vea kuusu shin ku ye. Gwarce kpa una tenger mbaishôôv sha ityou, e̱r ka i kaa kwagh a ve ken ityav mbi uumace ve nôngon, i hembe wuan mbaaderapupuu a ushoja la nahan ga. Orjir u Vesen tôndo zwa a vese ér iyange na ia lu i timin mba ve cie Aôndo ga mbara tseegh.
11. Antior u nan hendan a Aôndo kua mcivir na cii yô, Yesaia tese ér a va lu nan ke’ hemen nena?
11 Mbaperapera mba vea war la vea nenge e̱r kwaghôron u Aôndo u profeti a lu u mimi yô. Ivur i sha 24 la tsengaôron ér “akom a ior mba ve hendan a” Yehova la aa lu ikyav i ijirôron na. Alaghga kwaghôron u Yesaia a er sha u pasen kwagh ne wang la una kunda iyol ungwan. Nahan kpa, a zua sha akaa a mimi a yange vande eren kera tsuaa yô. Yange i ver ajiir a haan ihyôghonough ke’ ijime i girgar u Yerusalem u tsuaa la, nahan ashighe agen yô, i gbihi akom a mbaaferev mba i er ve ijiir i woo ve, kpa i nenge ér ve kuma u a ii ve sha icivir ga la. * Ka he’ ijiir la yange mbaanyingôr man usu u yeghen kpenger kpenger la u mase been a ihyôghonough mbira man akom la fere je i ngôôr ga ye. Ikyav tese wang ér, akaa a yange Yesaia lu henen ke’ ishima la cii tese ér ijir i i lu u Yehova una va ôr mbaasorabo la ia bunde ga.
Kwagh u A Tende Zwa La
12. Yesaia seer tan se ikyughur sha kwagh u mlu u uma u ke’ tar u he la nena?
12 Mpase 21:4 ôr se akaa agen a aa va kera lu ke’ tar u he u ú lu van la ga yô. Nahan kpa, kanyi ia lu he’ shighe la? Uma una lu nena? Kape se fatyô se zua a ankyurce u suur sha mi je kpa? Een. Yesaia ityough 65 pase mbamlu mba se ember la sha kwaghôron u profeti, kpa saa aluer Yehova lumun ér se̱ lu uma zum u una mase gban usha mbahev man tar u he la ve. Mba̱ a ver ve doo doo, a ne ve ijiir i ia tsa gbem sha won ke’ tar u he mbara cii vea kera bee iyol vea kpe kera ga. Yesaia 65:20 taver se ishima nahan ér: “Hii sha shighe la je, wanikundan u lun ayange kpuaa nana kera lu ga, gadia wanye nana kpe er anyom a nan aa kuma deri nahan, man orsholibo kpaa ka u nan kom anyom deri la, ifan ia kôr nan ye.”
13. Yesaia 65:20 kaa a vese ér ior mba Aôndo vea tema ke’ mkpeyol nena?
13 Zum u kwaghôron ne hii ivin sha ior mba Yesaia la, ikyav tese ér ityough tsô kpa yange ki nándè anikyundanev mba ve lu ke’ tar shon la ga. Mbaihyomov kera nyôron, e̱r yange Mbababilon nyôr kôr anikyundanev shin ve wua agumaior a a lu sha ayange a ve a uye la nahan ga. (2 Kroniku 36:17, 20) Ken tar u he u ú lu van la kpa, ior vea tema ke’ mkpeyol vea lu bem bem shi vea ya tar kpaa. Antior u nan tsough a ishima i nan u̱ hemban Aôndo ato la, a de nan ér nana̱ lu uma zan zan ga. Aôndo una kaa a imbaor la kera. Nahan aluer orsholibo u hemban atô la ngu anyom deri ye? Naná kpe ‘er wanye’ nahan, aluer i kar sha mlu u mà nan lu gbem sha won la yô.—1 Timoteu 1:19, 20; 2 Timoteu 2:16-19.
14, 15. Sha kwagh u Yesaia 65:21, 22 a ôr yô, ú fatyô u veren ashe keghen sha u va eren ityom i njaa i nyi?
14 U̱ Yesaia yange ma ver ishima u hemban ôron e̱r a va dugh or u eren isholibo sha apera kera la yô, ka mbamlu mba umav mba vea mgbough ke’ tar u he la yange gema lu pasen kwagh ve ye. Tôô ase ke’ ishima you wer, we kpa yange ú lu heregh. Alaghga akaa a ú hii nengen a mi sha ashe a ishima you yô a lu a ke’ akôngo a ya. Yesaia time sha kwagh la ken ivur i sha 21 man 22 la nahan ér: “Vea maa uya man vea tema keregh, vea kaha ishule i ikon i wain, man vea ya atam a i. Mayange vea maa ya, orgen á kar á tema ker ga, vea lôô, man orgen á kar á ya, ga; gadia er ayange a ikon a lu nahan kape ayange a ior Av kpaa aa lu la; uicuwan Av kpaa vea ya tom u ave ve zan zan je.”
15 Aluer ú ngu a̱ fa eev mbu maan kwagh ga shin ú ngu a̱ fa sule kahan kpaa ga yô, kwaghôron u profeti u Yesaia ngu kaan a we ér a va tese ú akaa ne vie vie. Nahan kpa, ú lu̱ a ishima i henen kwagh sha ikyev i mbatesen mba vea fa tom tsema tsema, shin mbawanndor a we mba doon kwagh, mba vea ta ú uwegh saan saan a ishima ve i môm la kpa? Aluer ka u ya wou una lu a zege windou u lun a ajingi shio, u a ta a ta ikyondo sha mi sha e̱r ahumbe a ndôhôr a taan we iyol tùù, shin aluer ka u á wa ajingi sha e̱r ú nengen e̱r mlu u ahumbe a geman kpa, Yesaia ti kera pase kwagh ne nahan kpiligh kpiligh ga. Ú maa ya u lun a haav mbu senen a sen tóo sha u yangen senou man ura u tsendanaa? Shin mlu u ahumbe a he’ haregh wou una na ú u̱ mándén haav mbu lun shambe shambe—e̱r mbu i nengen a mi vegher tar u he’ Atô u Ityoughkitaregh—mbu̱ ú fatyô u kohol a tsombor wou imôngo sha tembe ú haav mbula, yan kwaghyan shi lamen saan saan laa?—Duteronomi 22:8; Nehemia 8:16.
16. Hii nan ú lu a ishimaveren wer tar u he ua va a mkom zan zana?
16 U̱ we fan wer ú va lu a ya wou la hemba ngun a inja a u̱ kérén wer ú sange yeke sha kwagh ne la. A lu̱ u wou ikyangegh—a kera lu e̱r nyian ka ú ya ican ú maa ya, orgen nan kar nan tema keregh la ga. Yesaia 65:21 shi kaa ér ú lôô shi ú ya atam a kwagh u ú lee la. Kwaghôron la kohol hanma kwagh kange ile i môm. Ú zua a mkom kpishi sha iniôngon you, ka atam a iusa you je la. Man ú za hemen u zuan a mi ke’ uma wou zan zan je—“er ayange a ikon a lu nahan.” Sha kpôô yô kwagh ne zua sha kwagh u i kaa ér “akaa cii hingir a he” la!—Pasalmi 92:12-14.
17. Ka ityendezwa i nyi ia hemba taver mbamaren asema ciili?
17 Aluer ú ngu ormaren yô, mkaanem man maa kôr ú ke’ ishima tsung je. Ma kaa ér: “Vea kera er tom gbilin ga, vea kera mar ônov sha ci u ve̱ tim kera kpaa ga; gadia ve ka vor u mba TER A ver ve doo doo la, kua tsombor ve a ve imôngo kpaa. Tsô er ve lu a yila ga kpaa, Me rumun, man er ve lu a kure kwaghôron ga je, tsô Me ungwa.” (Yesaia 65:23, 24) E̱r i lu nahan ú fa mnyoon u ‘maren ônov sha ci u ve tim kera’ la vee? Se kera za shi dughun akaa a zan mbayev iyol, a ka a na mbamaren man mbagenev ve yem zungwen la sha ati ga. Heela tseegh ga, se cii se nenge e̱r mbamaren ka ve uve ityough ken ityom ve man ázúghúl shin asaren a ve, ve kera lu a ian i teman imôngo a mbayev vev kpishi ga yô. Kpa Yehova ti taver se ishima ér una ver ato a ugbayol asev, una kure ve, je yô shi una zer umbur ve ke’ ishima kpaa.
18. Hii nan ú kegh iyol wer ú va ember a ishôso ke’ tar u he?
18 E̱r ú lu hilan henen sha kwagh u ú va ember ke’ tar u he jim la yô, hide kenger ase ke’ ishima nenge akaa a kwaghôron u Aôndo u profeti a pase ne, ér: “Gbaseela man waniyôngo vea ya toho imôngo, begha una ya toho er bua nahan, vuulevu ua lu kwaghyan u iyô. Vea kera er kwagh u vihin ga, shin vea tim kwagh sha icighanwo Wam cii mayange kpaa ga, kape TER A kaa la.” (Yesaia 65:25) Uumace mba kpelan kwagh nôngo tsung u kpelan mlu u taregh u i pase heen ne, kpa kwagh ne gban kan di mbamhen mba ke’ ishima mba i kpel ke’ foto tsô ga. Kwagh ne una er kpôô kpôô. Uumace vea lu bem bem ayol a ve, di vough e̱r vea lu bem bem a ishôso nahan. Mbatôvon mlu u akaauma mbagenev kua mbasoon kwagh u ishôso gema uma ve cii na sha u zeren henen kwagh u atô a uzendenya a ve tsough kpuaa tseegh u tôvon fan kwagh ve la. Kpa hide gbidye ase kwar sha kwagh u ú fatyô u henen fan zum u uzendenya vea kera cian uumace ga la. Zum la, ú fatyô u zan ikyua a inyon je kpaa, kua akaauma a vér vér a a lu ke’ ikyô shin ke’ icôr ikyô yô—een, ú kenger á shi u hen kwagh u á shi a saan we iyol a á kpaa. (Yobu 12:7-9) Ú kôr cio u eren nahan ke’ bem, man or môm kpa naná anger we ga, shin ma inyam kpaa ga. Yehova kaa ér: “Vea kera er kwagh u vihin ga, shin vea tim kwagh sha icighanwo Wam cii mayange kpaa ga.” (Yesaia 65:25) Nenge ase e̱r imba mgem la ia kaha kposo a kwagh u se nengen a mi shi se benden a mi nyian ne sha wono!
19, 20. Hii nan ve ior mba Aôndo ve kaha kposo a ior mbagenev kpishi nyiana?
19 Di vough er se vande ôron kera nahan, uumace kan shio u tsengan ôron kwagh u ke’ hemen shami vough, shin e̱r ior ve kumbur sha kwagh u dubuanyom u he hanma ijiir nahan kpaa. Kwagh la na yô, iyol kpe ior kpishi, shi ve hingir zema-ze-zema, shi ve ùrè kpaa. Peter Emberley, orhemen u yunivasiti igen ke’ tar u Canada nger kwagh kaa wener: “Mbaganden kpishi mba tagher a mbampin mbavesen mba sha kwagh u lun uma la. Ḿ ngu ana? Kanyi m lu yan ican kerene? Ka dyako u nyi m ver kov u ú lu van a va la? Mba di nôngon térégh térégh ke’ ganden ga yô ke’ iyolbeen sha u bem a̱ lu shi ma ve shi we kirigh ke’ uma ve yô.”
20 Ú fatyô u kaven ityôkyaa i i ne ve kwagh a lu nahan he’ mbagenev kpishi yô. Alaghga vea ker u ember uma sha u eren anumbe atô kposo kposo shin keren msaanyol sha abeerakaa a nan iemberyolough. Nahan cii kpa, ve kera za̱ fa kwagh u kper sev mbu a va a mi ga, ka nahan ve uma ka a kera lu ve a homon shin ityôkyaa shin ma iwasen kpaa ga ye. E̱r ú va hingir u fan akaa ne nahan yô, gbidye kwar sha itinekwagh i se hila nenge sha mi ne, nahan tôô kar sha mnenge wou sha kwagh u uma. We kpa ú fa je wer, ken usha mbahev man tar u he u Yehova a tende zwa la yô, se fatyô u geman ashe kenger kera maa kaan ke’ ishima yase ser, ‘Sha kpôô yô, Aôndo er akaa cii hingir a he!’ Sé ya tar sha wono!
21. Yesaia 65:25 man Yesaia 11:9 ôr kwagh gba zwa môm sha ishember i nyi?
21 U̱ keren wer ú fa e̱r uma una lu ke’ tar u he u Aôndo la ka igyengem ga. Ngu lôhôn se, shi tévén se kpaa, ér se̱ civir un hegen sha mimi sha e̱r se kuma u lun uma zum u ‘vea kera er kwagh u vihin ga, shin vea tim kwagh sha icighanwo na kpaa ga la.’ (Yesaia 65:25) Nahan kpa, ú fa e̱r yange Yesaia ôr kwagh za inja nahan, shi ter ityôkwagh i i lu hange hange aluer ka u se ember tar u he la kpa? Yesaia 11:9 kaa ér: “Vea vihi kwagh ga, vea tim kwagh sha icighanwo Wam cii kpaa ga, gadia tar ua mgbough a mfe u TER er mngerem ma ngee shin zegemnger nahan.”
22. Mtím u se time sha akaaôron a profeti a anyiin la a taver se ishima sha u se nyima tsombo u eren nyi?
22 “Mfe u TER.” Zum u Aôndo una gema akaa cii a hingir a he yô, mba vea tema sha tar la vea lu a mfe na man u awashima na vough. A kera lu u henen di a hen kwagh u ishôsough tseegh ga. Mkaanem nam ma a ne i nger la gba inya ga. U tesen ikyav yô, gbidye kwar sha akaa a se hila tim sha mi sha u timen ke’ akaaôron a profeti a anyiin a a er kwagh a ter “Sha u he man tar u he” la, tsô ú nenge e̱r i lu anivurkwagh ga yô. (Yesaia 65:17; 66:22; 2 Peteru 3:13; Mpase 21:1) Ú ngu a ityôkyaa i dedoo i ôron Bibilo hanma sev. Ú eren kwagh ne kèkè kpa? Aluer ka nahan ga yô, ka sha nyi igbenda nahan i gbe u ú yoghul iyol sha e̱r hanma iyange yô, ú pande ú ôr imo i Aôndo a lu a mi u kaan laa? Ú hingir u kaven wer, a kera lu u we veren a ver ashe u̱ va ember tar u he la tseegh ga, kpa ú zua a iember i hemban a hemba cii la hegen je, di vough e̱r orpasalmi kpa lu zua a mi nahan.—Pasalmi 1:1, 2.
[Footnotes]
^ Nenge ke’ takerada u i yer ér Insight on the Scriptures la, Tihi u sha 1, peeji u sha 906, ú i lu Watchtower Bible and Tract Society of New York, Inc. a nger la.
Ú Na Mlumun Wer Nena?
• Hii nan ve i gbe u se kure ikyaa ser Yesaia 66:22-24 tsengaôron akaa a a lu van a va ke’ hemen laa?
• Kanyi ú hembe veren ashe keghen ke’ atô u akaaôron a profeti a a lu ke’ Yesaia 66:22–24 man Yesaia 65:20-25 laa?
• Ka atôakyaa a nyi a ne ve ú lu a vangertiôr sha kwagh u mlu wou u ke’ hemen la?
[Study Questions]
[Pictures on page 15]
Yesaia man Peteru man Yohane cii tsengaôron avegher a “Sha u he man tar u he” la