Ibaver I Mba Yôôn Tartor

“Ú Fa Kwagh u Bibilo Je Zua Ga”

ZUM u Yesu lu anyom 12 la, a ôr kwagh a mbahemenev mba kwaghaôndo ke’ Yerusalem sha ishimataver, nahan “mba ve lu ungwan Un cii, kpiligh ve iyol sha mkav Na man sha mbamrumun Nav kpaa.” (Luka 2:47) Kape nyian kpa kwagh u mbayev mba kiriki mba civir Yehova mba ka ve taver ishima ve ôr atica a ve man mbakov ve mba ke’ makeranta kwagh u Aôndo man Bibilo la á lu vough je la, man ve kpa ashighe kpishi ka ve zua a mtsera u doon.

Tiffany lu anyekwase u lun anyom 14, lu ke’ klase u yange í tèmà imôngo sha kwaghôron u profeti u ke’ Bibilo u ulahadi 70 mba anyomov mba i nger ke’ takerada u Daniel 9:24-27 la. Tica ne ta iwanger sha avur ne kpuaa nahan maa ôô itinekwagh ne sha zaar zaar za kure.

Sha hiihii la yô, taver Tiffany u kéndén uwegh sha. A kaa ér: “Kpa kwagh u yange zam iyol kpishi yum yô, lu er i pase avur ne wang i za bee ga la. Cii man me fa heen nahan uwegh agh kende sha kera kpaa.” Kondo tica la iyol sha er or nan lu u wan zwa sha kwagh ne yô, ga yô mbayev kpishi kwagh la lu taver ve u kaven.

Mba ne Tiffany ian ér a̱ pase ase kwaghôron u profeti la yô, a mough sha a ôr kwagh wanger ke’ ato wang er a vande wan ago a kegh a kegh nahan. Er za been yô, klase cii huan ayôôso ving. Mciem pande gba Tiffany iyol kpuaa. Nahan klase maa num a ve a kuren yar yar, ve de fefa ga.

Tica la zer kimbir tsô zer kimbir ér: “Ú lam doo kpishi, Tiffany, doo je zua ga.” A lumun ér yange un fa je e̱r kwagh a lu sha avur ne i hembe nahan yô, kpa Tiffany lu or u hiihii u pasen un á wang. Mba dugh ke’ klase yô, a pine Tiffany e̱r i hii ve a fe kwagh u Bibilo tsembelee nahan yô.

A kaa a na ér: “Ka sha er m lu Orshiada u Yehova yô. Mo kpa yange mbamaren av pasem kwaghôron u profeti ne kwa imôngo cii man m mase kaven un ye.”

Mbakov na mba ve nyôron klase môm a na la kpa kpiligh ve iyol a Bibilo na i fan la. Wanye kwase ugen kaa a Tiffany ér: “Hegen yô m fa er i hii ve ne Mbashiada mba Yehova ka ne zenden ior sha uya uya yô; ka sha ci u ne fa Bibilo kuma ne.” Mbagen tôndo zwa ér hii he’ shighe la je vea kera hôm kwagh sha a na sha kwagh u atesen a a ne a jighjigh la ga.

Zum u Tiffany za ôr mbamaren nav kwagh ne yô, ve wa un kwagh ér a̱ za na tica na takerada u i yer ér Mfe u Una Va a Uma u Tsôron La. Zum u yange ungwa kwaghwan la man za tese tica na vegher u i pase kwaghôron u profeti u Daniel la yô, tica na ngohol takerada la fese je shi sugh un kpaa.

Sha mimi yô, shighe u mbayev Mbakristu ka vea taver ishima vea ôr kwagh u mbamaren vev ve tese ve sha kwagh u Aôndo man Bibilo la yô, ka ve va a iwuese man civir he’ Yehova man averen sha iyol ve kpaa. —Mateu 21:15, 16.