Mbampin mba Mbaôron Takerada Ne Ve Pin La

Ke’ Mbaromanu 12:19 la, apostoli Paulu yange lu kaan ér Mbakristu ve̱ de vihin ishima ga zum u a kaa ér: “Ne mbadoon mo ishima, de oron nen iyev sha kwagh wen ga, kpa na nen iyugh i Aôndo ian” la shinii?

U ôron kwagh sha mimi yô, mlumun ka ei. Kwagh u apostoli Paulu yange lu ôron heen yô lu kwagh u iyugh i Aôndo. Nahan kpa, ú ngu wer ka u kaan ér Mbakristu véà vihi ishima shin véà vihi ga kpa kwagh gba sha mi ga ze. Bibilo wa se kwagh ke’ igbar ér se̱ de lun mba vihin ishima ga. Nenge ase akaa a lun ikyav a icighan kwaghwan i ôr la.

“De ishima i nyoon, de iyugh; ishima i̱ de vihin we ga, ka u nan or, ifer i eren tsô.” (Pasalmi 37:8) “Hanma or u nana yuwe a anngô u nan yô, nan kuma u á ôr nan ijir ve.” (Mateu 5:22) “Aeren a iyolough nga ken igbar je, ka idya man hôngor man ijimba i eren, man u civir akombo man ahir a eren man ihom i kôron man iyongo i keren man iwuhe man ishima i nyoon.” (Mbagalatia 5:19, 20) “Dugh nen hanma ishima i yuan man ishima i nyoon man iyugh man u zôhôn genger genger man ityuhwanev ken a ven kera.” (Mbaefese 4:31) “Hanma or nana̱ lu tsev tsev sha u ungwan kwagh kpa nana̱ gema a̱ ngôôr a kwaghôron, nana̱ ngôôr a iyugh kpaa.” (Yakobu 1:19) Heela tseegh ga, takerada u Anzaakaa wa se kwagh kwa kimbir kimbir ér se̱ de ne iyugh ian ke’ asema ase shin se̱ yuwen fefa sha akaa a cuku cuku man a á lu mbamtsum mba uumace la ga.—Anzaakaa 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.

Kwagh u i er ke’ Mbaromanu 12:19 la kpa ngu kwagh môm a imba kwaghwan ne. Paulu wa se kwagh ér dooshima wase a̱ de luun sha imanger ga, shi se̱ veren mba ve tev se a ican la dedoo, shi se̱ de henen kwagh u bo sha or ga, shi se̱ de oron iyev kpaa ga, shi se̱ nôngo u lun ke’ bem a ior cii. Nahan a taver se ishima ér: “Ne mbadoon mo ishima, de oron nen iyev sha kwagh wen ga, kpa na nen iyugh i Aôndo ian, gadia i nger er: Ka Mo Me or iyev ye, ka Mo Me kimbi ye, kape Ter A kaa la.”—Mbaromanu 12:9, 14, 16-19.

Een, se na ishimavihin ian ser i mgbegha se sha u kimbin injô i iyevoron ga. Mfe wase u se lu a mi sha akaa kua mbamhen asev cii yina. Aluer se na ishimavihin ian ser i̱ mgbegha se sha u ôron iyev yô, ashighe kpishi se lu eren kwagh u shami ga. Kwagh la á gema a lu u̱ eren awashima u Orihom u Aôndo u i yer ér Diabolo la. Paulu nger mape gen la ér: “Nyoon nen ishima, kpa de eren nen isholibo ga, iyange i̱ de been ne a ishima i vihin her ga. De ne nen diabolo ian ga.”—Mbaefese 4:26, 27.

Gbenda u ú hembe doon shi ú lu u kwaghfan kpaa yô, ka u den ér Aôndo a̱ tese shighe man or u a va a iyevoron sha a nan la. Una lu oron iyev la fan dedoo je ér kwagh u un eren ne zua sha ijirôron na i mimi la vough. Se fatyô u nengen er i lu kwagh ne yange Paulu lu ôron ke’ Mbaromanu 12:19 nahan, zum u se nenge e̱r a civ ke’ ngeren u Duteronomi 32:35, 41, u a kaa nahan ér “Iyevoron ka i Yam man mkimbi kpaa” la. (Tôô kar sha Mbaheberu 10:30.) Shin er i zough a ishemberti i i nger ér “i Aôndo” la ke’ ngeren u Grika la ga nahan kpaa, ior mba̱ geman Bibilo mba ainge mbagen wa i̱ ke’ Mbaromanu 12:19 la. Kwagh ne na yô hingir u ngeren nahan ér “de Aôndo a̱ or iyev” (The Contemporary English Version); “na nen iyugh i Aôndo ian” (American Standard Version); “de Aôndo a̱ na tsaha aluer ka sha ishima na yô” (The New Testament in Modern English); “na ian sha ci u icighan iyevoron”—The New English Bible.

Shin zum u mbaihyomov mba mimi ve nzughul a vese shin ve lu tôvon se a ican kpaa, se fatyô u tesen ser se suur sha mpase u i pase kwagh u Yehova Aôndo, u̱ Mose ungwa i lu yôôn nahan la, ér: “TERE, TERE, Aôndo u mgboughon a mhôônom ma zungwen kua mrumun u sha mhôôn, u wan ishima man u lun a erdoo man mimi wuee je, u eren a ior udubu imôngo dedoo, u deen ifer man tindi u peren man isholibo; kpa u tsahan yô, deen ga, tsahan ônov sha ci u ifer i uter kua ônov mba ônov kpaa, zan zan kov u sha utar man shi u sha unyiin kpaa.”—Ekesodu 34:6, 7.