U Tan Ivor I Mimi U Tartor
U Tan Ivor I Mimi U Tartor
“Lôô ivor you pepe, man aikighe kpaa de hiden a uwegh ou ga.”—ORPASENKWAGH 11:6
1. Ka sha nyi gbenda nahan Mbakristu ve lu tan ivor ainge?
TOM sule yange lu tamen kwagh he’ ityô i Mbaheberu mba ngise mbara kpishi. Ka ityôkyaa ne yange i na ve Yesu u ke’ mlu u uma na cii lu ke’ Tar u Ityendezwa la yange teren tom sule ke’ anzaakaa a na ye. Sha ikyav i tesen yô, yange kar kwaghpasen u loho u dedoo u Tartor u Aôndo la sha ivor i tan. (Mateu 13:1-9, 18-23; Luka 8:5-15) Aluer sha ayange ase ne sea lu ke’ tar u í eren tom sule shin sea lu ga kpaa, u tan ivor i ke’ jijingi sha imba gbenda ngin ne ka tom u hemban lun hange hange u Mbakristu ve lu eren yô.
2. Tom wase u pasenkwagh ne ngu a inja nena, shi kanyi akaa nahan i lu eren nyian sha u zan hemen a ú?
2 Ka zege ian u civirigh u wan uwegh ke’ tom u tan ivor i mimi u ke’ Bibilo sha shighe u mkur ne. Mbaromanu 10:14, 15 ôr se mluainja u tom ne wang ér: “Á er nan man ior vea yila sha iti i Un u ve ne Un jighjigh ga laa? Man shi á er nan man vea na Un jighjigh, Un u ve lu a ungwa kwagh Na ga laa? Man shi á er nan man vea ungwa aluer or u ôron kwaghaôndo nana lu ga yôô? Man shi á er nan man vea ôr kwaghaôndo aluer a tindi ve ga yôô? Kape i nger la er: Angahar a mbayôôn loho u akaadoon la a doo tsô!” Er i gbe je ka hegen i hembe lun shighe u sha inja u zan hemen a ieren i dedoo sha u been tom u Aôndo a ne se ne ye. Sha ityôkyaa la yô, Mbashiada mba Yehova ùvè ityough ke’ Bibilo mba gberen man u gberen ityakerada i i har sha Bibilo la ke’ ijô 340, shi mba samber a í kpaa. Sha u á er kwagh ne yô, iorov 18,000 na ayol a ve sha u wasen tom ne ke’ ijiirtamen ve la kua sha ubranci mba afishi a sha ityar wuee la kpaa. Shi iyenge ior i zurum miliôn ateratar nahan mba karen ior ityakerada i i har sha Bibilo ne sha tar.
3. Mba zuan a nyi ke’ mlee u lôôn mimi u Tartor nee?
3 Tom u ican ne u wàsè nyi? Er yange lu sha ayange a Kwagh u Kristu hii ica lu a̱ gba ga la nahan, nyian kpa ior kpishi mba ngohol mimi ne. (Aerenakaa 2:41, 46, 47) Nahan kpa, kwagh u a hembe lun a inja a ikpelaior i mbapasen kwagh u Tartor mbahev mba i lu eren ve batisema ne yô, ka sha er shiada i vesen ne i̱ lu wasen sha u tseghan iti i Yehova shi i lu kenden a na sha ér un ka Aôndo u mimi tswen yô. (Mateu 6:9) U seer yô, mfe u Mkaanem ma Aôndo wase uuma mbaiorov kpishi shi una fatyô u zan a ve ke’ myom kpaa.—Aerenakaa 13:47.
4. Kwagh yange gba mbaapostoli sha ior mba ve pasen ve kwagh la za kighir nena?
4 Mbaapostoli yange ve fa mluainja u loho u dedoo u nán uma ne tsembelee, nahan ve lu a mhôônom ma zungwen tsung sha mba yange ve pasen ve ú la. Kwagh ne tese ikyav wang sha mkaanem ma apostoli Paulu ma yange nger nahan la, ér: “Er ne sar se yum yô, kera doo se u nan ne Loho u Dedoo u Aôndo tseegh ga, kpa zan zan kua uma wase je kpaa, gadia ne hingir mbadoon se ishima kpishi.” (1 Mbatesalonika 2:8) U tesen ér ior doo ve ishima kpishi yô, Paulu man mbaapostoli mbagen lu dondon Yesu man mbatyomov mba shaav mba ve we uwegh ke’ tom u waren uma ne cou cou la. De se sav nen ityom i mbashaav mba shiren Aôndo tom mban ve lu eren sha u lôôn mimi u Tartor la, shi se nenge er ikyav ve la i̱ taver se asema u kuren tom wase yô.
Yesu—Ortan Ivor i Mimi u Tartor
5. Kanyi tom jim yange Yesu ùvè ityough ker zum u a lu shin tar laa?
5 Yesu lu or u vough, shi lu a tahav mbu nan ior mba sha ayange na la uyôughyôughmbaakaav mba dedoo kpaa. Ikyav i tesen yô, yange mà bee a uzayol mba tom tweregh mba sha ayange na la shin yange mà seer mkav u uumace sha agbar a kwaghfan u sangen yeke agen. Nahan kpa sha mhii u tom na je tsô a kaa ke’ igbar wener tom na ka u pasen loho u dedoo. (Luka 4:17-21) Er tom na ngu ze u za kuusu yô, a pase wener: “Ka sha ci u nahan i marem, shi ka sha ci u nahan kpaa M ve shin tar ne, sha er Me pase mimi ye.” (Yohane 18:37) Nahan yange ùvè ityough ke’ mte u tan ivor i mimi u Tartor la. U Yesu tesen mba he’ ityô na kwagh u Aôndo kua mbaawashima Nav la yange hemba lun a inja a ma nyityô kwaghhenen u yange ma na ve cii.—Mbaromanu 11:33-36.
6, 7. (a) Kanyi ityendezwa yange Yesu er cii man kôndo yem sha i mayange á hungur ga, man ngu ivin i̱ nena? (b) Ieren i Yesu i sha tom u kwaghpasen ne i bende a we iyol you nena?
6 Yesu yange kaa ér un ngu Ortan ivor i mimi u Tartor. (Yohane 4:35-38) Yange a samber a ivor i loho u dedoo sha hanma ian i i dugh cii. Shin er yange lu kpen sha kon nahan je kpaa, a pase loho u dedoo u paradiso u shin tar u̱ una va la. (Luka 23:43) Been heela kera yô, mhange u yange i hange un u̱ i̱ pase loho u dedoo la yange kure sha ku na u sha kon u mtsaha la ga. Cii man a kôndo a yem sha yô, a wa mbahenen nav tindi ér ve̱ za hemen u tan ivor i mimi u Tartor ne shi ve̱ gema ior ve̱ hingir mbahenen kpaa. Yesu maa er ityendezwa i á hungur a mi ga yô. A kaa ér: “Nenge, Me luun a ven ayange ayange zan zan mkurtar je.”—Mateu 28:19, 20.
7 Ka sha kwaghôron ne Yesu yange er ityendezwa ér una súén tom u pasen loho u dedoo ne shi una tesen gbenda shi una kuran ú “ayange ayange zan zan mkurtar je” ye. (Ka se se nger i yier ye.) Zan zan va ar sha ayange ase ne kpa Yesu ngu a isharen sha tom u ivangeli ne heregh. Ka Orhemen wase u a lu ityough sha mte u tan ivor i mimi u Tartor yô. (Mateu 23:10) Er a lu Ityough ki tiônnongo u Mbakristu yô, ka un Yehova a we tom u sha tar cii ne sha ikyev na ye.—Mbaefese 1:22, 23; Mbakolose 1:18.
Mbatyomov Mba Yôôn Loho u Dedoo
8, 9. (a) Mbatyomov tese isharen i mimi sha tom u uumace nena? (b) Ka sha nyi gbenda nahan a fatyô u kaan ér se hingir kwagh u mbatyomov vea kengere?
8 Shighe u yange Yehova gba tar la, “asan a sha use lu wan icam, . . . [shi geren] amo sha iember.” (Yobu 38:4-7) Hii he’ shighe la je tsô, ve mba i igbe ve ve lu sha mban mba tesen isharen i̱ ve lu a mi sha akaa a uumace la. Yehova yar tom a ve sha u nán uumace akaaôron a na a sha icighan la. (Pasalmi 103:20) Kwagh ne hemba ngun nahan sha msamber u samber a loho u dedoo sha ayange ase ne. Apostoli Yohane nenge ke’ mpase u i na un la yô, a nenge a “ortyom u Sha ugen lu purugh sha kwavaôndo lu a Icôronloho u Dedoo u yôôn hen mba ve tem shin tar cii, hen hanma ikurior man hanma nongo man hanma zwa man hanma nongoior. Lu kaan sha zegeimo er: Cia nen Aôndo, na nen Un icivir gadia shighe Na u ôron ijir kuma ve.”—Mpase 14:6, 7.
9 Bibilo yila mbatyomov ér “ka ujijingi mba eren tom mba ka i tindin ve u za wasen mba vea ya dyako u myom” yô. (Mbaheberu 1:14) Er mbatyomov ve lu zan ityom ve asase asase nahan, mba a ian i nengen a vese kua tom wase kpaa. Se mba eren tom wase sha ashe a ikpelaior i̱ sha i i lu nengen yô, inja er se mba sha tembe u inumbe u u lu ke’ igbar nahan. (1 Mbakorinte 4:9) Ka kwagh u iember man u saan iyol u fan er i lu se tseegh se lu tan ivor i mimi u Tartor ne ga nahan!
Se Mba Eren Tom Wase sha Gbashima
10. A fatyô u karen kwaghwan u wasen u̱ a lu ke’ Orpasenkwagh 11:6 la sha tom wase u ivangeli ne nena?
10 Hii nan kwagh a gbe Yesu kua mbatyomov sha tom wase yum nahana? Yesu yange na ityôkyaa i môm nahan ér: “Me kaa ne, kape m-ember una lu sha ishigh ki mbatyomov mba Aôndo sha ci u orsholibo môm u nan gem ishima yô.” (Luka 15:10) Se kpa kape se lu a isharen i mimi sha ior je la. Sha nahan yô, ka se nôngo sha afatyô wase cii sha u samber a ivor i mimi u Tartor ne sha hanma ijiir cii. A fatyô u karen mkaanem ma Orpasenkwagh 11:6 mara sha tom wase. Bibilo wa se kwagh he’ ijiir la nahan ér: “Lôô ivor you pepe, man aikighe kpaa de hiden a uwegh ou ga; gadia u fa i ia doo la ga, shin ka ngin shin ka ngira, shin ihiar cii ia doo u.” Kpa sha mimi yô, sha ityough ki or môm u nan lumun loho wase ne yô alaghga ior mbá uderi uderi shin udubu udubu mba ve vende ú yô. Kpa di er mbatyomov nahan, se kpa ka se ember zum u “orsholibo môm” tseegh kpa ka nana lumun a loho u myom ne yô.
11. Ityakerada i i har sha Bibilo ne ia fatyô u eren tom tsaase tsaase nena?
11 Akaa nga kpishi ke’ mpase u pasen loho u dedoo ne. Kwagh môm u a lu a inja ke’ tom ne yô ka ityakerada i i gber i i har sha Bibilo, í Mbashiada mba Yehova ve yaren tom a mi la. Sha ashighe agen yô, ityakerada ne kpa ka i lu inja er ka ivor i i te hanma ijiir nahan. Se fa hen ape ia mende ga. Ashighe agen takerada ua kar sha ave a ior imôngo cii ve orgen nana mase za ôron ye. Alaghga je yô Yesu kua mbatyomov vea wa a ve sha aaven agen sha u kwagh ne a̱ za lu a iwasen he’ mba lun a ishima i mimi la. Nenge ase akaa agen a yange er a á tese ér Yehova una fatyô u eren ityom i kpilighyol a ityakerada i i ne ior la.
Tom ú Aôndo u Mimi
12. Icaver magazin yange wase tsombor ugen u̱ fan Yehova nena?
12 Ke’ inyom i 1953 la, Robert man Lila kua mbayev vev cii ve undu gar u vesen ve za nyôr antse iyou u gban caver ke’ sule ke’ angar u Pennsylvania, ke’ tar u U.S.A. Fese u ve za nyôr iyou la nahan, Robert soo u kásén kwa u ôôn iyol shin jime i gbenda u unden sha ukpombaayough mba sha aôndo la. Er kúr ikpande za been sha u sôron ijiir la yô, a nenge ihyevyough kúrà atsaver a pipaa kua apusu a ake a ule man ihyôghonov mbigen za wa iya a mi ke’ kpekpe iyou la. Ke’ atô u ùkùmba-kùmbà mban ne kôpi u magazin u i yer ér The Golden Age la lu ker. Kwagh u hemba saren Robert u fan je yô lu kwagh u i nger sha itinekwagh i u̱ nán mbayev ityesen la. Ityesen i haren sha Bibilo i yange i tese ke’ magazin ne wang la na un u kaan a Lila ér vea nyôr “kwaghaôndo u mba Golden Age ne.” Usati mba karen kpuaa nahan yô maa, Mbashiada mba Yehova va mande ve uwegh sha hunda, kpa Robert gema kaa a ve ér ka “kwaghaôndo u mba Golden Age” la tseegh i saa tsombor na u dondon ye. Mbashiada mbara pase ve ér hegen i gema iti i takerada u i yer ér The Golden Age la hingir Awake! Robert man Lila maa hii u henen Bibilo hanma shighe vea Mbashiada, nahan ke’ masejime yô i er ve batisema. Ve di ve gema ve lôô ivor i mimi ne ke’ mbayev vev nahan ve sunda ngee kpishi. Nyian iorov mba hemban 20 mba he’ tsombor la kua Robert man mbayev mba Lila mar utaankaruhar mbara cii ka mba civir Yehova Aôndo mba i er ve batisema yô.
13. Kanyi yange i̱ wase nom man kwase ugen ke’ tar u Puerto Rico u lun a isharen ke’ Bibilo?
13 Anyom 40 a karen ke’ jime la, sar William man Ada mba ve vese ayol a ve ve lu ke’ tar u Puerto Rico la u henen Bibilo ga. Hanma shighe u Mbashiada mba Yehova vea mande ve uwegh sha hunda cii, ve er ayom e̱r ve mba her ga nahan. Iyange igen yô, William za kasua sha u za yamen kwagh u sôron ikyagh ki ke’ ya a mi. Ngur hiden yô, a nenge a takerada u panden lun iyol gese gese ne lu shin ikyagh ki haan inyarev shimi. Lu takerada u Mbashiada mba Yehova ve gber ke’ inyom i 1940 u i yer ér Religion la. William tôô takerada la yem a mi ke’ ya man saan un iyol u ôron fan mkposo u kwaghaôndo u mimi a u aiegh. Mbashiada mba Yehova mba ve kwa gen yô, William man Ada kegh ato a loho ve sha iember je shi ve hii u henen Bibilo a ve kpaa. Iwer ngi karen yô, ve er batisema sha mkohol u ityar ityar u i yila ér Divine Will International Assembly ke’ inyom i 1958 la. Hii shighe la je, ve wase ior hemba 50 u van ke’ mzough wase u anmgbianev Mbakristu ne.
14. Er kwagh u yange vande eren la a tese nahan kanyi kwagh ityakerada yase i haren sha Bibilo ne ia fatyô u erene?
14 Karl yange lu anyom 11 vough kpa gema lu anye u wan ifer. Yange i luun un inja er hanma shighe cii yô un ngu nyôron ke’ azayol nahan. Ter na lu Orjaman u pasen kwagh ke’ adua u i yer ér Methodist la, nahan a tese un ér á nande mbaaferev ke’ igyamusu i hel shighe u vea kpe kera yô. Nahan hel cier Karl iyol kpishi. Sev mbu gen mbu aven ke’ inyom i 1917 yô, Karl nenge a ankwatakerada ugenegh sha godobi maa tôô. Gbe ôron ú yô, ashe na kar fese za mande sha mpin u i pine ér: “Hel Kanyi?” la. Ankwatakerada ne lu sha ci u lôhôn ior kwaghôron u ke’ igbar sha u ve̱ za ungwa kwagh u hel sha ikyev i Mbahenen Bibilo mba hegen i yer ve ér Mbashiada mba Yehova ne. Er inyom i môm karen man Karl kimbir henen Bibilo kwa imôngo imôngo yô, i er un batisema nahan a hingir Orhenen Bibilo. Ken inyom i 1925 la i yila un ér a̱ za er tom ke’ gartamen u Mbashiada mba Yehova sha tar cii—ape a lu eren tom zan zan hegen la. Tom u Orkristu ú a er i hembe anyom akunduanyiin hegen la yange u hii sha ankwatakerada u purugh sha godobi tseegh.
15. Kanyi kwagh Yehova una fatyô u eren sha er a nenge i doo un la?
15 Sha mimi yô, tahav mbu orumace yina u fan shin aluer mbatyomov yange vea wa ave sha akaa a yange er ne shin vea wa ga, man yange vea wa yô, er yange ve wa ave ve za kighir la kpa or fa ga. Nahan kpa, mayange se huna nen iertom i Yesu man i mbatyomov ke’ tom u kwaghpasen ne ga, shi mkôôm u Yehova una fatyô u kôôm akaa sha er a nenge i doo un la kpa ka u tunan ga. Amba ne kua u̱vàndè-èrèn mbagen mba lun nahan vough mbara cii tese tom u dedoo u ityakerada yase ia fatyô u eren shighe u i gbe ke’ ikyev i mbagenev yô.
I Wa Se Kwagh u Injaa sha Ikyev
16. Kanyi se fatyô u henen ke’ mkaanem ma i nger ke’ 2 Mbakorinte 4:7 laa?
16 Apostoli Paulu yange ôr kwagh u “kwagh u injaa ne ken ikav mbi inyaav.” Kwagh u injaa la ka tindi u Aôndo a we se u pasen kwagh ne, man ikyáv mbi inyaav la di gema ka uumace mba Yehova a ne ve ikyáv mbi injaav mbila sha ikyev la. Er uumace mban ve yen shi ve lu a ikighir yô, Paulu za hemen kaa wener kwagh u i ne ve tom ne ve, ve fetyô u eren la ka sha ci u “agee a hemban la ka a Aôndo, ka ken vese a dugh ga.” (2 Mbakorinte 4:7) Een se fatyô u suur sha Yehova ser a̱ na se tahav mbu se fatyô u kuren tom u se lu a mi sha a ve ne yô.
17. Kanyi se tagher a mi er se lu tan ivor i mimi u Tartor nee, nahan cii kpa hii nan ve i lu u se lu a ieren i dedoo la hereghe?
17 Ashighe agen ka se na naagh sha ayol ase. Alaghga a lu se haghelaa shin a taver se u eren tom ke’ uharegh mbagenev. Ajiir agen nga a ior mbagenev kpishi ve tee asema ve sha kwaghaôndo kera je shi ve hoo tswam iyol kpaa yô. Alaghga a er tom ke’ amba a jiirigh angara nahan sha gbashima kpa a lu gbilin tseegh. Kpa shighe u kwagh á lu inya kpishi yô, ma iniôngon i or a nôngo ve ia gande ikyaa inya je kpa ngi ga. Umbur wer ivor i ú te la ia fatyô u nan ior msaanyol hegen kua uma u tsôron ke’ hemen kpaa. Mkaanem ma Pasalmi 126:6 kure vough kwa imôngo nahan ér: “U nan zenden a mliam ashe, nan lu a ivor i tan la yô, nana hide a iember a aile a nan ave kpee je.”
18. Se er nan ve se ver ishima sha tom wasa, man ka sha ci u nyi i gbe u se er nahana?
18 De se yar nen tom a hanma ian i i dugh cii sha u tan ivor i mimi u Tartor ne a u hiden a uwegh jime shio. Mayange se hungur nen ga, se umbur nen ser, shin er i lu se sé môôr shi se urun ve mngerem nahan kpa ka Yehova a ne ve mvese ye. (1 Mbakorinte 3:6, 7) Nahan, di vough er Yesu vea mbatyomov ve lu kuren vegher u tom ve doo doo nahan kape se kpa Yehova a ver ishima ér se̱ kure tom wase doo doo je la. (2 Timoteu 4:5) De se ver nen ishima sha ityesen yase kua ieren yase man gbashima wase u sha tom kpaa. Sha ci u nyi? Paulu na mlumun wener: “Aluer ú er nahan yô, ú yima iyol you kua shi mba ve lu ungwan we la kpaa.”—1 Timoteu 4:16.
Kanyi Se Hene?
• Ka ke’ nyi igbenda tom wase u tan ivor ne ú lu umen atam a dedoo?
• Yesu Kristu man mbatyomov mba eren tom u ivangeli ne nyian nena?
• Hii nan ve i lu u sé lu ior mba tan ivor i mimi u Tartor ne a uwer gban shio?
• Kanyi ia wase se u tavershima ke’ tom wase zum u se tagher a iyol kpen shin tswama?
[Study Questions]
[Picture on page 27]
Mbakristu mba samber a ivor i mimi u Tartor ne a uwer gban shio di er mbasulev mba ke’ Iserael u tsuaa la nahan
[Pictures on pages 28, 29]
Mbashiada mba Yehova ka ve gber shi ve samber a ityakerada i haren sha Bibilo atô kposo kposo ke’ ijô 340