Yôô Loho U Dedoo Sha Gbashima
Yôô Loho U Dedoo Sha Gbashima
“Luun nen mbatseen asema, shiren nen Ter tom.”—MBAROMANU 12:11.
1, 2. Er Mbakristu ve lu mbapasen loho u dedoo yô, ka ieren i nyi ve nôngon u lun a mini?
TOM u he ngu sagher gumor ugen ke’ iyol. Iyange i a hii yaren tom la, a kegh akaawan a orvesen na una va wa un la a ishimanyian. Ngu a ishimaveren sha tom na u hiihii u a va na un la, man maa un iyol kpen kpen. Ka un ke’ shima ape eren tom la sha afatyô na cii.
2 Se Mbakristu kpa se fatyô u tôôn ayol a ase vough e̱r se mba mbatomov mba hev nahan. Er ishimaverenkeghen yase i lu u lun uma gbem sha won yô, a fatyô u kaan ér se kpa se hii a hii u eren Yehova tom. Ka keng Orgban se ngu a ityom kpishi ke’ ishima na sha ci wase sha er tom a ban se ga zan zan gbem sha won yô. Kpa tom u hiihii u i hii nan se yô ka u yôôn loho u dedoo u Tartor la. (1 Mbatesalonika 2:4) Se nenge tom u Aôndo a we se ne nena? Di vough er gumor la nahan, se soo u eren tom ne sha afatyô wase cii a ishima i tseen man iember kpaa—een, sha gbashima je!
3. Kanyi i gbe u ortom u loho u dedoo nana er ve nana za ikyula?
3 Kpa sha mimi yô, ka kwagh u ican kpishi u lun a amba aeren a injaa la. U shi seer sha tom wase ne yô, se mba a ityom igen kpishi, amba a ityom a alaghga aa na a tume se iyol shi a za ishima yase iyol kpaa yô. Hanma shighe cii ka se nôngo sha u eren akaa ne shi veren ishima sha tom wase u kwaghpasen la kpa tsembelee. Nahan kpa, ka u a zer nôngon a mbamzeyol mban gbem. (Marku 8:34) Yesu yange kaa var var je ér saa se nôngo kpoghuloo ve se kuma u lun Mbakristu mba zan ikyula ye.—Luka 13:24.
4. Ishimanyian i sha use use la ia fatyô u eren a mlu wase u ke’ jijingi la nana?
4 Ashighe agen ityom i ka se ngee a mi i eren yum ne ka i na se iyolkpen fefa kua ishima i vôron kpaa. “Akaa a nyian ishima a uma ne” aa fatyô u kighir ishima i tseen yase kua iwuese i se lu a mi sha tom u hemen u Aôndo ne. (Luka 21:34, 35; Marku 4:18, 19) Sha ci u myen u orumace nan yen yum ne yô, alaghga se ‘undu dooshima wase u hiihii’ la. (Mpase 2:1-4) Avegher agen a tom wase u se eren Yehova ne aa fatyô u hingir kwagh u gban eren di tsô. Bibilo taver se asema sha ikyav vough ér se̱ kura ishima i tseen i tom wase nana?
Er “Usu u Hian” ke’ Asema a Ase Nahan
5, 6. Paulu yange nenge ian na i civirigh i pasen kwagh la nena?
5 Tom u Yehova a we se sha ikyev ne ka kwagh u injaa je ka u se de ser u̱ hingir beerkwagh ga. Apostoli Paulu yange tôô kwagh u loho u dedoo u pasen ne ér ka zege ian i civirigh je yô a nenge ér un yina u mà i we un ú sha ikyev kpaa. A kaa wener: “Mo u m hembe gban ijime ken uicighanmbaiorov cii yô, i nam mrumun u sha mhôôn ne u ôron atôatyev Loho u Dedoo u mngee u Kristu A ngee a akaa i gande u tôvon la, man shi u pasen wanger wanger er tom u sha kwaghmyer la u lu yô; kwaghmyer ne lu myer ken Aôndo u A gbe akaa cii, hii je er shighe lu a lu ga la.”—Mbaefese 3:8, 9.
6 Ieren i Paulu i injaa i sha tom na la ka ikyav i dedoo he’ avese. A nger ke’ washika na u a tindi a mi he’ Mbaromanu la ér: “Ka nahan man i hangem pe ôron . . . Loho u Dedoo kpee ye.” Yange kunya kôron un sha ci u loho u dedoo ga. (Mbaromanu 1:15, 16) Yange lu a ieren i vough nahan sasen un iyol u eren tom na.
7. Ka icintan i nyi yange Paulu ta ke’ washika na u yange tindi he’ Mbaromanu laa?
7 Apostoli Paulu yange nenge a ityôkyaa i lun a ishimatseen, sha nahan yô a wa Mbakristu mba ke’ Roma kwagh ér: “Uwer u̱ de gbe ne sha gbashima ga, luun nen mbatseen asema, shiren nen Ter tom.” (Mbaromanu 12:11) Ishemberti i ke’ Zwa Grika i̱ í gem ér ‘gba uwer’ la ngi a mhen u “or lun gbedôô shin wan hwev kpishi” la. Er alaghga se lu gban uwer ke’ tom wase ga nahan kpa, se cii doo pe se lu tsevaa sha nyityô akav a tesen iyolkpen a se hii u nengen a mi ke’ mlu wase u ke’ jijingi la shi se nyôôso ieren yase vough vough he’ ape i doo u se nyôôso la, aluer se nenge amba a akav la nga tesen ke’ avese yô.—Anzaakaa 22:3.
8. (a) Kanyi yange i hingir er “usu u hian” nahan ke’ ishima i Yeremia, man lu sha ci u nyi? (b) Ka ityesen i nyi se fatyô u zuan a mi ke’ kwagh u yange er Yeremia laa?
8 Shi jijingi u Aôndo kpa una fatyô u wasen se zum u se vôr yô. Ikyav i tesen yô, shighe ugen la iyol kpe profeti Yeremia kpishi nahan a nenge ér una de u eren tom na u profeti la. Je yô a ôr kwagh u Yehova nahan ér: “Me kera ter Un ga, me kera ôr kwagh ken iti Na kpaa ga.” Kwagh ne lu ikyav i myen u ke’ jijingi u Yeremia yina yô shinii? Ei. Sha mimi yô, mtaver u Yeremia yange taver ke’ jijingi la, kua mdoo u Yehova doo un ishima la man ishimatseen na sha kwagh u mimi la yange na un agee a zan hemen a tom u profeti. A pase ér: “[Mkaanem ma Yehova] hingir mo ken ishima er usu u hian, u i cir u ken akuhe am yô, m wa ishima je, m vôr, hembam kera.” (Yeremia 20:9) Iyolkpen i mba civir Aôndo sha mimi ka ve zua a mi sha ashighe ashighe la ka di mlu u sha gbaaôndo tsô. Kpa zum u ve er msen he’ Yehova ér a̱ wase ve yô, ka a kav mlu u asema ve nahan a na ve icighan jijingi na aluer mba a mkaanem nam ke’ asema ve e̱r Yeremia nahan yô.—Luka 11:9-13; Aerenakaa 15:8.
“De Pirin Nen Jijingi Ga”
9. Ka nyi ia fatyô u yangen tom u icighan jijingi a eren sha ci wase laa?
9 Apostoli Paulu wa Mbatesalonika kwagh ér: “De pirin nen jijingi ga.” (1 Mbatesalonika 5:19) Een, aeren a a dugh kposo a akaawan a Aôndo cii aa fatyô u vihin tom u icighan jijingi a eren sha ci wase la. (Mbaefese 4:30) Mbakristu mba ainge mba a tom u pasen loho u dedoo. Ka se wa ikyo sha ian i civirigh ne kpishi. Mbafanaôndoga ka vea laha tom wase u pasen kwagh ne kpa i lu se kwagh u kpilighyol ga. Kpa zum u Orkristu ka nana gbihi tom u nan sha apera yô, kwagh la a fatyô u van a m-pir u jijingi u Aôndo u a lu númún se la.
10. (a) Mnenge u mbawanndor a vese una bende a vese nena? (b) Ka mnenge u tom wase u taven tseng u nyi i nger ke’ 2 Mbakorinte 2:17 laa?
10 Alaghga mbagenev mba ve lu ke’ tiônnongo u Mbakristu ga mbara vea hen ér tom wase ka di u samber a ityakerada tseegh. Mbagen di yô alaghga vea kure ikyaa sha mlan nahan ér se mba zenden sha uya-uya sha u ngohol uiyua. Aluer se de̱ ser amba a mhen a ke’ kpe ne a̱ za se iyol yô, alaghga kwagh la una na se kera er tom tsaase tsaase ga. U ma se de ser amba a mhen la a̱ za se iyol yô, guda se lu nen a mnenge u Yehova man Yesu ve nengen tom wase la. Apostoli Paulu yange pase mnenge u taven tseng la nahan ér: “Se mba zenden kpenga a kwaghôron u Aôndo er mbagenev kpishi ve eren nahan la ga, kpa se mba ôron kwagh ken Kristu sha mimi, ka er mba Aôndo A tindi ve nahan man ka sha ishigh ki Aôndo kpaa.”—2 Mbakorinte 2:17.
11. Kanyi yange i̱ wase Mbakristu mba hiihii mbara u lun a ishima i tseen ke’ mtev u i lu tôvon ve a ican laa, man ikyav ve i tesen la ia wase se nena?
11 Er Yesu kpe kera ica i gbe ga nahan, mbadondon un mba ve lu ke’ Yerusalem mbara tagher ishigh a tovacan. Yange i àngèr ve shi i na zwa ér ve̱ de kwaghpasen kpaa. Nahan cii kpa, Bibilo kaa ér yange “i iv ve a Icighan Jijingi, ve gba ôron kwaghôron u Aôndo vangertiôr.” (Aerenakaa 4:17, 21, 31) Mkaanem ma Paulu nger he’ Timoteu ke’ masejime la tese mlu u dedoo u i gbe u Mbakristu vea lu a mi yô. Paulu lu kaa wener: “Gadia ka jijingi u cian kwagh, Aôndo A ne se ga, kpa ka u ageegh man u dooshima man u kôron iyol tsaha. Nahan yô, kunya u̱ de ker u u eren shiada sha u pasen Ter wase ga, u̱ de ker u sha kwagh wam, mo orkwar Na kpaa ga, kpa nyôr nongo sha ican i yan sha ci u Loho u Dedoo sha agee a Aôndo.”—2 Timoteu 1:7, 8.
Kanyi Se Lu Orwanndor A Vese a Mini?
12. Ka ityôkyaa i nyi i ne ve se pasen loho u dedoo jimi?
12 Saa se lu a awashima u dedoo ve se fatyô u lun a mhen u injaa sha tom wase ne ye. Ka sha ci u nyi se pasen kwagha? Ityôkyaa jim ngi ke’ mkaanem ma orpasalmi ma a kaa nahan la, ér: “Ityom You cii ia wuese We, TERE; mba i doo U a ve la, vea wuese We; vea ôr kwagh u iengem i tartor Wou, vea ter agee a Ou kpaa; sha er á pase ônov mba iorov aeren a Na a ageegh, kua iengem i icivir i tartor Na la kpaa.” (Pasalmi 145:10-12) Een, se mba pasen kwagh ka sha u wuese Yehova ke’ igbar shi tseghan iti na he’ uumace cii. Shin zum u i lu ior kpuaa tseegh ve kegh ato a vese je kpaa, u se yôôn loho u myom ne gban uwer ga la ve Yehova a iwuese.
13. Kanyi ka i na se u ôron mbagen ishimaverenkeghen i myom nee?
13 Shi se mba pasen kwagh ka sha ci u ior ve doo se ishima yô, shi ka sha ci u palegh ibo i awambe kpaa. (Esekiel 33:8; Marku 6:34) Mkaanem ma Paulu ôr sha kwagh u ior mba ve lu ke’ tiônnongo u Mbakristu ga la zua sha kwagh ne, yange kaa ér: “M ngu a injô iyol hen Mbagrika kua atôatyev kpaa, man shi hen mbafankwagh kua mbalanenkwagh cii.” (Mbaromanu 1:14) Paulu yange fa je ér un ngu ior a injô i pasen ve loho u dedoo ne, sha er i lu awashima u Aôndo “u ior cii ve̱ war ve̱ ar sha mfe u fan mimi la” yô. (1 Timoteu 2:4) Ainge ne kpaa se mba a imba dooshima la kua injô he’ orwanndor a vese. Mdoo u uumace ve doo Yehova ishima la yange na un u tindin Wan na shin tar ér a̱ va kpe sha ci ve. (Yohane 3:16) Kwagh la yange lu naagh ku vesen je zua ga. Se lu dondon dooshima u Yehova la zum u se ker ian sha u nôngon ôron mbagenev kwagh u loho u dedoo u myom u ú har sha naagh ku Yesu la yô.
14. Bibilo pase kwagh u tar u u lu ke’ won u tiônnongo u Mbakristu la nena?
14 Mbashiada mba Yehova ka ve nenge uumace ér ka mba ashe a ver ikyôr sha inja i vea va lu ke’ mlu u anmgbianev u̱ Mbakristu la yô. Saa se pase nen kwagh vangertiôr, nahan cii kpa vangertiôr wase a de lu u̱ ayongo ga. Sha kpôô yô, zum u Bibilo i lu ôron kwagh u tar jimin cii yô, ka i yar tom a asemberatii a tsoghul kpishi. Zum u Paulu ter ishemberti i “tar” la he’ shighe u a akaa nahan ér “kwaghfan u tar” kua “asaren a taregh” la yange ter ishember la sha inja i ka kwagh u dedoo ga. (1 Mbakorinte 3:19; Titu 2:12) Paulu shi umbur Mbakristu mba ke’ Efese ér zum u ve lu zenden “sha inja i mlu u tar u ainge ne” yô, ve hingir “kpenegh” ke’ jijingi. (Mbaefese 2:1-3) Akaaôron ne man agenegh a lun er á nahan zua sha mkaanem ma apostoli Yohane yange kaa nahan, ér: “Se fa se due ken Aôndo, kpa tar cii ngu sha ikev i Orbo” la.—1 Yohane 5:19.
15. Sha kwagh u ior mba ve lu ke’ tiônnongo u Mbakristu ga la yô, ka nyi se palegh u eren a ve, man ka sha ci u nyi?
15 Umbur wer amba a kwaghôron ne nga ôron kwagh u ior asange asange ga kpa ka tar jimin cii u ú lu paleghaa a Aôndo la. Mbakristu mba gbe karen a ishima tsô mba fe ér or nana ngohol loho u pasen ne shin nana ngohol ú ga ze. Mba a ma ityôkyaa i môm i kaan ér ma or nan ngu ivo ga. Ka se se ôr kwagh u una va er zum u Yesu una va sha u paven “iyôngo” a “ivo” kposo la ga. (Mateu 25:31-46) Ka Yesu i tsough un orjir ye; ka se ga. Bee heela kera yô, akaa a a vande eren kera la tese ikyav ér ior mba yange ve hemban eren akaa a vihin tsung mbara je kpa ve ngohol loho u Bibilo nahan ve gema shi ve hingir Mbakristu mba lun wang kpaa. Nahan yô, shin er alaghga se ker u yan ijende vea ambaaior agen ga nahan kpa, se timbir nen u pasen amba la ishimaverenkeghen i Tartor ne shighe u ian i dugh la ga. Ruamabera ôr kwagh u asande a ior agen a yange lu̱ a̱ lu̱ mbananjighjigh ga kpa “i ver ve sha u ve̱ zua a uma u tsôron” yô. Ke’ masejime yô, ve hingir u va nan jighjigh. (Aerenakaa 13:48) Sha nahan yô, se fatyô u fan or u i ver nan ér nana zua a mi la ga zan zan saa se pase nan kwagh ve—alaghga a lu kwa imôngo je kpaa. Nahan er se lu a kwagh ne ke’ asema ase yô, se eren a mba ve lu a̱ ngohol loho u myom ga ne sha “ishima i legh legh” man “sha mcie” kpaa, se lu veren shima keghen ser alaghga mbagen ke’ ave vea va ngohol loho u uma ne.—2 Timoteu 2:25; 1 Peteru 3:15.
16. Ka ityôkyaa i môm i nyi i ne ve se soo u fan “ityesen” ne?
16 U se lun mbatesen mba fan ityesen la una wase se u sasen a sase pàsèn loho u dedoo ne. Ikyav i tesen yô: Or u nan fe ma ishor shin inumbe i eren ga yô kwagh u i̱ una fatyô u doon nan ga. Kpa he’ or u nan fe u eren i̱ tsembelee yô, a lu nan kwagh u iember je. Kape i lu vough je la, Mbakristu mba ve hen ve fe “ityesen” yô ka ve seer zuan a iember ke’ tom ve. (2 Timoteu 4:2; Titu 1:9) Paulu yange wa Timoteu kwagh ér: “Nôngo sha gbashima u veren iyol you sha ishigh ki Aôndo er or u i kar nan nan kom yô, ortom u i gba u nana ya kunya ga yô, or u nan pasen kwaghôron u mimi la jighilii.” (2 Timoteu 2:15) A er nan ve se fa ityesene?
17. Mfe u ke’ Bibilo la una “sar” se nena, man imba mfe la ia wase tom wase nena?
17 Gbenda môm yô ka u seer zuan a mfe u vough la. Apostoli Peteru taver se asema ér: “Atumba a man a mimi a sha kwaghôron u Aôndo la a̱ sar ne tsung er anikundanev mba forototo nahan, sha er né vese sha mi u zan ken myom yô.” (1 Peteru 2:2) Atumba nga zeren saren wanikyundan u a lu gbang gbang yô. Nahan, Mbakristu kpa alaghga a doo u mfe u ke’ Bibilo la una “sar” ve. A fatyô u eren kwagh ne sha u henen kwagh doo doo kua takerada u ôron kpaa. (Anzaakaa 2:1-6) Aluer ka u se hingir mbatesen Mkaanem ma Aôndo mba fan ityesen yô, gba u se nôngo tsung shi se kôr iyol yase tsaha kpaa, kpa imba iniôngon la i ve a mbamtsera. Msaanyol u ka se zua a mi sha u timen ke’ Mkaanem ma Aôndo la ka a iv se a jijingi u Aôndo nahan i torough se iyol u ôron mbagen akaa a se hen la.
18. Mbamkombo mba Mbakristu vea fatyô u wan se ago iyol sha u pasen kwaghôron u mimi la jighilii nena?
18 Shi mbamkombo mba Mbakristu kpa ka ve wase se u fan u yaren tom a Mkaanem ma Aôndo sha inja. Shighe u í lu ôron avur a ke’ Bibilo zum u i lu nan kwaghôron u ke’ igbar yô, doo u se dondo se ôron ke’ Bibilo asev. A lu a inja sha u se veren ishima sha avegher a mkombo, kua a a lu ôron kwagh sha tom wase u pasenkwagh la kpaa. Ma shighe môm kpa se nenge nen akav a i eren sha u i̱ nenge la ser ka inumbe, je yô se hingir u danen ishimaveren yase ke’ mkombo kpaa ga. Shi sha gbaa ne kpa gba pe se lu a iyol kôron tsaha man ishimaveren kpaa. (1 Timoteu 4:16) Mbamkombo mba Mbakristu mbá maan jighjigh wase u nan shi mbá ne Mkaanem ma Aôndo ma saren se, shi mbá tesen se sha u ishima i̱ sasen se a sase u yôôn loho u dedoo yô.
Se Fatyô u Suur sha Iwasen i Yehova
19. Er nan ve kwagh u pasen hanma shighe la a lu kwagh u hange hange?
19 Mbakristu “mbatseen asema” man mba i lu ve torough torough u pasen loho u dedoo yô, mba nôngon u eren tom hanma shighe cii. (Mbaefese 5:15, 16) Sha mimi yô, mbamlu mba kposo kposo, nahan ka ior cii vea fatyô u lun a shighe u eren tom u waren uma ne kwagh môm ga. (Mbagalatia 6:4, 5) Nahan kpa kwagh u a hembe lun hange hange je yô ka shighe u se yar tom u pasenkwagh la keng ga, kpa ka acin a se pase mbagen ishimaverenkeghen yase nduuruu la. (2 Timoteu 4:1, 2) Aluer se mba pasen kwagh seer a seer yô, se lu hemban nengen a mlu u tom ne ú lu hange hange la kpa seer a seer. (Mbaromanu 10:14, 15) Mhôônom ma a kôr se hanma shighe u se zough a ior mba ve shirin asema sha mimi man ve lu vaan shi ve lu a ishimaverenkeghen ga la cii.—Esekiel 9:4; Mbaromanu 8:22
20, 21. (a) Kanyi tom i shi se ke’ hemene? (b) Yehova ngu suen iniôngon yase nena?
20 Yehova wa se loho u dedoo sha ikyev. Ka tom u hiihii u a hii nan se, se “mbashirentom a Aôndo imôngo” je la. (1 Mbakorinte 3:6-9) Sase se iyol u kuren tom u Aôndo a ne se ne a uma wase cii man sha er se fetyô la cii. (Marku 12:30; Mbaromanu 12:1) Ior mbá ke’ tar kpishi mba ijen i kwagh u mimi i ker ve yô. Tom ngu kpishi u eren, kpa se mba suur sha Yehova ser a̱ wase se e̱r se eren tom u ivangeli ne ser se kure ú doo doo yô.—2 Timoteu 4:5.
21 Yehova na se jijingi na shi a wa se ago iyol sha “sanker u Jijingi” kpaa, ka Mkaanem ma Aôndo je la. Sha iwasen na yô se bugh zwa se “pase kwagh u myer u Loho u Dedoo vangertiôr.” (Mbaefese 6:17-20) Kwagh u apostoli Paulu yange nger he’ Mbakristu mba ke’ Tesalonika la a kar sha a vese vough, ér: “Ivangeli yase va her a ven, lu sha kwaghôron tseegh ga kpa lu sha agee man sha Icighan Jijingi man gbar gbar kpishi je. Ne fa [anzaaior] a se lu her atô wen sha ci wen yô.” (1 Mbatesalonika 1:5) Een, de se pase nen ivangeli ne a ishima i tseen!
U Hiden Kimbir Kpásè Kpásè
• Sha ci u ishimanyian i uma ne yô, kanyi ia fatyô u eren ishimatseen yase i sha tom nee?
• Ka sha nyi gbenda nahan i gbe u isharen yase i pasen loho u dedoo la ia lu er “usu u hian” ke’ asema ase nahana?
• Ka mbamhen mba lun ke’ kpe mba sha tom wase ne mba nyi i gbe u se palegha?
• Kera cii cii yô, doo u se nenge ior mba ve ne jighjigh a vese imôngo ga la nena?
• Yehova ngu wasen se u lun a ishimatseen sha tom u pasenkwagh nena?
[Study Questions]
[Pictures on page 21]
Mbakristu mbá dondon ishimatseen i̱ Paulu man i̱ Yeremia la
[Pictures on page 22]
Ka mdoo u Aôndo kua orwanndor a vese ve doo se ishima la a ne ve se tsee ishima sha tom ye