Mbampin Mba Mbaôron Takerada Ne Ve Pin La

Yesaia ityough 53 ngu a kwaghôron u profeti u i fe un wuee yô. I kaa ke’ ivur i sha 10 la ér: “Lu ishima i TER je u vihin un iyol; A haa un angev iyol kpaa.” Inja i kwaghôron ne yô ér nyi?

Taver u nengen a ityôkyaa i í ne ve alaghga mpin una due sha kwagh u í ôr ke’ Yesaia 53:10 ne ga. Mbakristu mba mimi mba henen ér Aôndo wase u dooshima man u mhôôn una fatyô u nan or ican, shin haan or ma angev ga. Bibilo na se ityôkyaa i nan jighjigh ér doo a doo Aôndo ishima u nan mbaishôôv ican ga. (Duteronomi 32:4; Yeremia 7:30, 31) Kpa ke’ atô u uderimbaanyomov mba ve kar la, Yehova yange á de ér ican i̱ er ior ashighe agen sha atôakaa a á zough sha kwaghfan man dooshima na yô. Kpa sha mimi yô mayange yange na sha u Yesu Wan na u ishima ishima la a̱ ya ican ga. Tsô ngeren ne ngu ôron ér nyi jimi?

Aluer se time sha ivur ne jimin cii, se ver ikyav sha acin a ahar a i tér ishemberti i “ishima” la yô, se fatyô u kaven inja i mkaanem ma shon. I nger ke’ Yesaia 53:10 ér: “Nahan kpaa lu ishima i TER je u vihin Un iyol; A haa Un angev iyol kpaa; shighe u Una gema iyol Na Una na nagh sha mi sha ci u isholibo yô, Una nenge a tsombor Na; Una tsa sha won, man á kpe kwagh u TER A ver ishima sha mi la iyol sha uwegh Nagh.”

Loho u ú lu ke’ Bibilo jimin cii ú tese ér “kwagh u TER A ver ishima sha mi” u í tér ke’ mbee u ivur shon la har sha m-er u eren ishima na sha ikyev i Tartor la. Yehova una eren kwagh ne yô, una paa hementor na, shi una bugh gbenda sha u i̱ kar a dyako u isholibo he’ uumace mba ungwan tindi ve ye ne kera yô—ka asorabo ase je la. (1 Kroniku 29:11; Pasalmi 83:18; Aerenakaa 4:24; Mbaheberu 2:14, 15; 1 Yohane 3:8) Awashima u eren kwagh ne jimin cii yô, gba u Wan u Aôndo una gema iyol na una hingir orumace cii ve, una mase nan naagh ku iwom kura ye. Er se fe nahan, ke’ mne u nan naagh ku shon ne, Yesu yange ya ican. Bibilo ôr se ér: “A hen iko i wan sha atsan a A ya la.” Nahan Yesu yange zua a mtsera sha atsan a á ya la.—Mbaheberu 5:7-9.

Yesu yange vande fan je ér kwagh u yange gba u una er la una kua kwagh u nyoon tsung kpa ker. Kwagh ne due wang ke’ mkaanem nam ma i nger ke’ Yohane 12:23, 24 he’ ijiir i í ôr nahan ne, ér: “Shighe kuma u á na Wan u or icivir ve. Mimi mimi je, M kaan ne ne, aluer ishangewua ia gba hen inya ia kpe ga yô, ia lu di her môm tsô; kpa aluer ia kpe yô, ia mar kpishi.” Een, Yesu yange fa ér a gba u una lu a jighjigh na u nan her dông, shin a̱ kua ican i yan ke’ ku je kpaa. Kwaghôron ne shi za hemen kaa nahan ér: “Hegen ishima ngi tan Mo kwe, tsô shi Me kaa nana? Tere, yimam due a Mo hen shighe ne kera! Kpa ka sha ci u kwagh ne je man M ve hen shighe ne ye. Tere, na iti You icivir. Tsô imo due Sha kaa er: M vande civir i, Me shi Me civir i kpaa.”— Yohane 12:27, 28; Mateu 26:38, 39.

Ka ke’ kwaghôron ne man se fatyô u zuan a mkav sha kwagh u í nger ke’ Yesaia 53:10 la ye. Yehova yange vande fan tsuaa ér Wan na una va tagher ishigh a kwagh u a fatyô u kaan ér a cagh un a cagh yô. Nahan kpa, er Yehova vande lun a iengem man zege injar i dedoo i ia due ker la ke’ ishima yô, a wa ishima sha hanma kwagh u yange gba u Yesu una va tagher ishigh a mi cii. Ka sha imba gbenda ne yange “lu ishima i” Yehova “u vihin” Mesiya iyol ye. Man Yesu kpa kwagh u yange fatyô u eren shi kwagh u yange er la cii lu ishima na. Sha mimi yô, er Yesaia 53:10 a mase kuren nahan, “á kpe kwagh u TER A ver ishima sha mi la iyol sha uwegh Nagh.”